LUK 12

Aromanem Ansulangka

(Mt 10:26-27)

1Éjar Éjar amie aadum sukolok buluke arasulo tujém saayém bosula iduem, Jisu bí kera yalumpe bíkkíng luyilsuna kídílo pokai, “Pharisi kídílokke siiyém depe emnamde buluke iru sarunamem ansulangka. 2Delo mesup supeko atí kamang, demangkom kénmadope leesup supenam kamang. 3Noluke kaamolo ponamdem longe píalo tayyé, delokke noluke arang ruumlo posi sunamdem míílong teyolo pokan gooyé.

Peso Penamde Séko

(Mt 10:28-31)

4“Ngo nolum podung, ngokke angong kídíe, amíl petomem peddo delokrongem atí ilamana kídíem peso mapeka. 5Idakkom sékome nolu pesope aidudí dem ngo nolum lengkanyé; Amílem petgeyélate doorum líísamlo yoplík lanadem nolu peso langka. Arope, ngolu podung, bím peso langka.

6“Ngiití perí pilnguem pirnyi kope komanía? Depe ilate bulum atelkote Shédí bí mitpan sumang. 7Aropakpe, noluke dumpo lokke dumíd kídar takamemte Shédí bí sanyin tung. Peso mapeka; nolu deddína ngiití períemte are kayane!

Jisume Togesunam Elang Topak Suname

(Mt 10:32-33; 12:32; 10:10-20)

8“Ngo nolum podung, séko ngom amikídí keralo kangkéndudí, Tanike Uekom bím Shédíke teyong kotoki kídí keralo kangkényé. 9Idakkom séko ngom ami keralo topak suyédí de kaaluna miri kídí keralo lupak kosuyé

10“Delokke Tanike Uem lukaana miyongem maab biyé, idakkom séko Deena Aidem lukaayédí dem maab bimayé.

11“Edílo nolum kumkeng ekumlo, yébona delokke ruutum kídí keralo yééla bomayédí, no agíem kape kísa popít sulapei demangkom kape pomíloi emla nolu mínga sumapeka, 12kapeila delo anyodelo Deena Aide nolum pope namem biyé.”

Mirem Yaokolo Luyii Suname

13Milung delok amiko bím pokai, “Saare, ngokke bíruem abu sérangem ngom orpan sudope pobika.”

14Jisu bí poyansuto, “Angonge, séko ngom bisardope demangkom nonyike aralo sérangem orpan sudope lulíktune?” 15Delo Jisu bí bulum poto, “Ansulangka! Angu angu kaabo tatbo lokke agíem nolu mínggap sulangka; tani yénamde agíke kanam remnam lokmang.”

16Delokrongem bí ami kídíem luyii sunam agom sim poboto: “Mirem amilokke amongkone aina alie lento. 17Bí agíe míísuto, ‘Ngo kape imíloi aiyén? Ngokke aliem mekum peko kaimang.’ 18Delo bí pokai, ‘Ngo sikepe ipe. Ngo ngokke kumsungem atge yélangkula, botte yanako mokupe, delokke delo ngokke ali takam emlang delokke sérang kídíem mesiipe. 19Delokrongem ngo agíe sikepe lusupe, nokke deddína aina atíe yénam daknamem mekum name alummang. Yénamem yémantola, dola tííla ashéng angampe yémantola.’ 20Idakkom Shédí bí poto, ‘No mide no! Siyoke yohso nokke aidem nokkelok laanyok yéku. Delokrongem séko nokke agíkepe leemo sunamdem bomyékun?’

21“Sikepemin agíkepe mesii sudola Shédíkelo mirem mana kídíem iyéne.”

Shédíkíng Míída Sulangka

(Mt 6:25-34)

22Delokrongem Jisu bí bíkkelo luyilsuna kídíem poto, “Delok legape ngo nolum podung, noluke yénamlo, ingkuem dolapei, demangkom noluke amíl legape ingkuem gekom sulapei emla ankípe míídír sumapeka. 23Turnamde donam empemílo pakyane, delokke amílde ege galugem pemílo botteyane 24Píak kídíem míngkítoka! Bulu ngiimang remmang, bulu kumsu perí kamang; idolate Shédí bí bulum donamem bidung. Delokke nolu edítko pettang kídarem are kayadun! 25Míídírsuna nolu séko gontakote agí yépe namem laatem sulanako kadun? 26Nolu sim ansoona atí simte ilamamílo, nolu kapeila abíd legangem míídír sudune? 27Lili appune kape kísa siisadon dem míngkítoka. Bulu ankípe ngiimang demangkom summang. Idolate ngo nolum podung, Solomonte deddína kampo tayyo ege galugem gedolate sikesok atel kísa petemang. 28Shédí bí dekepe silo duudo, delokke nyampo emepe rompak kupe namemte, gepenamem bidumílo, edítko bí nolum ege galugem pakyape biyéne, E, míngkeng anyona kídía!

29“Noluke aangem dope tíípe namlo getí mapeka; dem míídír sumapeka. 30Kapeila angu ami kídíemin sikena atí kídarlo míítídune, delokke noluke Abu bí noluke míípenam kídíem kénsudung. 31Idakkom bíkke yétem mata poolangka, delo dem atí kídar demte nolum biyé.

Teyong Amolo Miremname

(Mt 6:19-21)

32“Bosééna bénbama, pesomapeka, kapeila noluke Abue nolum amongem bilídung. 33Noluke ekurang kídíem kosupala opan kídíem bitola. Nolu agí sukepe ínmana murkongem pinnyok pemangko pyoona dona aala mangkolo delokke yokyé dope mangko teyong amolo sokke kumsungem mesutola. 34Legade ingkolo nokke kumsunge duududí, delo nokke aangekom duuyé.

Kénsuna Béérange

35“Agér legape míírusula duulangka delokke nokke meruem íryar molangka. 36Nyamran ikolo yéto langaala, aalangkula eyabem pigayém delo eyabem kiiya bidope agí agí ruutumlo daryana béérang kísa nolu ilangka. 37Ruutumke aadokuem daryadope kaasunam béérade aine. Ngo nolum aruem podung, bí agí agí agérem gérpe emla leemosula, bulum apim bila, delokke aala bulum igulne. 38Lennyi lengumko aala ruutume yuem leemosula darya dokupe kaanam béérang kídíde aine. 39Idakkom sim kénlangka; Ekum atode pyoone aayé emla kerape kénsu tuamílo, bí ekumdelo rula momayai. 40Nolukom míírung superung aido, kapeila Tanike Ue noluke bím angkupeya emla míído anyopaklo aayéku.”

Míngkesuna Delokke Míngkesumana Béérange

(Mt 24:45-51)

41Pitor bí íngkíto, “Ruutume, no sim luyii sunam agom sim ngolu mía ma, takam emía podune?”

42Ruutum bí pokai, “Míngkesuna delokke kénnampe yébonade séko? Bíkkímin Ruutum bí agíke béérang kídíem dodílo donam bidope buluke teyolo ruutumpe melíktune. 43Ruutumke aadíkulo dekepe idope kaanam béérade aine. 44Nolum ngo arope podung, Ruutum bí agíke ekurang teyolo bím yébomdope melíkyé. 45Idakkom de béérade sikepekom agísue poladung, ‘Ngokke ruutum bí adaplo angku pomayé,’ delokke delo bí milo béérang kídí emlang delokke mime béérang kídíem demla, tíngír doírsula ito. 46De béérade bíkke ruutume aadí kumang emla kénsumape ido moodílo, ruutumde aayéku. Bí bééradem pamík pamíkla iyé delokke míngke sumana kídíem inam kísape iyé.

47“Delo agíke ruutumke míínamem kénna, idola mííru sumana demangkom bí ruutumke míínampe ibimana béérade demla mongéé kosuyé 48Idakkom séko kénmadí delokke ingéé penampe idudí bí anyoyape demngéé kosuyé. Bojépe binam miyodem bojépe koyé; delokke bojéyape melíknam dem bojéyape kobomyé.

Jisubí Ipan Sunana Lerínge

(Mt 10:34-36)

49“Ngo tani amoso eme rílíkpe emla aato delokke rído bongama emla míídung. 50Idokom ngo baptis isupenamko kadung, delokke dem ipíímang tetengem edítko ngo adírdun! 51Ngo tani amoso yéponamem bomang bikape aato emla míídunía? Demang, ngo nolum pobidung, ipan sumope emlamin aatone. 52Supak kelokke ila ekum erang atello midum pilngoko kamílo mipile akmínsuyé; angume annyiem akyé delokke annyie angumem akyé. 53Bulu apan aran ila, abue uem akyé delokke ue abuem akyé, ane omem akyé delokke ome anem akyé, ayue nyamengem akyé delokke nyamenge ayuem akyé.”

Moodíem Kénsuname

(Mt 16:2-3)

54Bí milung dem pokai, “Nolu anggo danlok doomug saayémílo menang asak ‘Pedonge oyé’ emdo delokke arope depe ido. 55Delokke edílo sokko danlok asare aayédí, ‘Dooreyé’ emdo delokke de dekepe ido. 56Aromana kídía! Nolu among talengem kaala legangem polado idola kape kísa siyum siroke amongem lukénmang emyéne?”

Nom Géénem Luyin Bosulangka

(Mt 5:25-26)

57“Kapeila nolu agíkepe ainam atíem míngkén sumangkane? 58Noluke akmín sunamem gíbosula ukil migomlo gíbosupe iduem bedalo bím pakla yémílo aibosu tokuka, demamílo bí nom bisarnalo gíboyé, delo bisarnade nolum patek migomlo melíkyé, delo patek migomde nolum pateklo tumyé. 59Ngo nolum podung, noluke ajéngem doryinma tetengem nolu lenkumayé.”

Currently Selected:

LUK 12: adiBSI

Highlight

Copy