LUK 14

Jisuke Amikonem Ipíkuname

1Sabbath longelo, amín kana Pharisi lokke ekum kolo Jisuke dope tíípe gíduem bím kanggapto. 2Delo bíkke keradelo tíídgena amiko kato. 3Jisu bí Pharisi kídíem lang ayon kénna kídíem íngkíto, “Sabbath longelo ipínamde inyo dunaya?” 4Depe idokom bulu adud ayutmang ila dungkai. Depe iname bí amidem gakbomdola, bím ipí geyé langkula melíktoku.

5Delokrongem bí bulum íngkíto, “Noluke akonke ue#14:5: Ayokon agome, “Gado” emdung. demangkom goorue sabbath longelo deerulo olíkmílo nolu hosat kumayénía?” 6Delo bulu popenam kamang.

Remakname Lang Daadééname

7Edílo bí mibo kídíe aiyana dungkeng kídarem ulaldope kanggaptodí, delo bí bulum sim luyii sunam agom sim pobito. 8“Akone nolum nyamran kolo tomyémílo, aiyana dungko mata mapeka, kapeila nolum penem míngge penam amiko goktung. 9Depe iduem, nolum tomna angode aala nolum poyé, ‘Sim ami sim noluke dungkuem bitola.’ Delo annyinge idola nolu loorímana umkélo duuperung aiyé. 10Idakkom edílo nolum tomyédí, delo amé yalumna dungkuem laatoka, demílomin noluke ajone aayém, bí nolum ‘Angonge aiyana dungkolo duutola,’ emyéne. Delo noluke dobo ajon kídí keralo nolum míngge yéne. 11Legade kekímpe míísuna miyodem kemap moyéku, delokke amépe míísu nadem botte moyéku.”

12Delokrongem Jisu bí bíkke ajon kídíem poto, “Nolu longe doman demangkom yume dotké doyém, noluke angong kídarem, noluke bíro demangkom edung erang kídarem, demangkom miremna kumríem tomsu mapeka, nolu depe imílo, bulu nolum tomyan suyéku. 13Idakkom nolu doman aranko iyémílo, opan kídíem, lebéé laksona, mingmana kídíem tomlangka, 14delo nolu ayang igulem paayé. Bulu nolum tomyan sula madokom, deena kídíke gerep yékuem nolum biyan suyéku.”

Bottena Doman Aranlo Luyiisuname

(Mt 22:1-10)

15Tébullo duuna akonde dem tatla, Jisume poto, “Shédíke amolo aran dona amide gérne.”

16Jisu bí poyansukai, “Amikone bottena aranko ila mibuem bojérungko tomto. 17Aran dodíem amide bíkke béérangem bíkke tomnam amikídíem sikepe podope melíkto, ‘Aatola, supak takame aikabong.’ 18Idakkom bulu takame akampe maab kosuto. Kerang kede pokai, ‘Ngo supakpak aríkko retung, delo ngo gíla dem kaaperung aiyé. Ngom maabtoka.’ 19Akone pokai, ‘Ngo supakpak gooru jur pilngoko retung, delokke ngo bulum íkaipe emla gídak. Ngom maab toika.’ 20Akonde pokai, ‘Ngo supakpak mime laatung, depe iname ngo aalamang.’

21“Béérade aalat sulangkula dem bíkke ruutumdem pobitoku, delo ekum atode markai delokke bíkke bééradem hukum bito, ‘Bedalo delokke taon kéényulo gílangkula opanem, migírnem, mingmanem, lebyanem, tomtokaku.’ 22Béérade poto, ‘Saare, nokke hukum binamem itobong, idakkom duupekue kadung teteng.’ 23Delokrongem ruutumde bíkke bééradem poto, ‘Bedalo delokke doolunglo enkala bulum aadope tomto langka, delomin ngokke ekumem duuyin bomyéne. 24Ngo nolum podung, tomnam kídí delokke atelkote ngokke aranem dokína kamayé.’ ”

Luyiisunape Yébom Suname

(Mt 10:37-38)

25Enmín gena milung dem Jisu bí kangkut sudo langkula pokai; 26“Séko ngokkíng aadola agíke ane abuem, agíke méng ome-uem, agíke bírme bíruem aropakpe agíke yénamemte mepak sula yémayédí bí ngokkelo luyilsuna amipe ilapemane. 27Delokke séko agílo kross em gesula ngokkíng gímín gemadudí bí ngokkelo luyilsuna amipe ilapemane.

28“Míngkítoka noluke akone ekumko mope míídung. Bí kerape dungíí dola edítko are ame iyédí delokke ekumdem moyin nana murkonge pííyédí, dem kaapong dung. 29Bí dekepe ipomamílo, gaangem díílík pakom ekumdem mongoyé; delokke takamke ngilkang kangkepe iyé. 30‘Si amisi ekumem morep kítungai, idola agérem iyintomang’ emla amie manyé.

31“Roja akone sipaying jarnyiko gíbola sipaying jarying annyi bomna rojako imínsupe imílo, bí kerape dungíí dola sipaying bojéna rojadem imín sulayédí dem míngkí podung. 32Bí ila mamílo, abíd maklínge mootelo endung adape makro melíkla denge bedalok ibosukupe emla roguyé. 33Dekepe noluke akone takamem mepaksula mamílo, bí ngokkelo luyilsunape ilamane.

Loorímana Alue

(Mt 5:13; Mk 9:50)

34“Alode aine, idakkom alo tíínamde nyokmílo, kape kísa dem tíídokupe ilayékun? 35De moone kédeng pekom kabomang delokke haar pekom loorímang; dem elpakdo. Sékoke nyorung kadudí, tatsu langka.”

Currently Selected:

LUK 14: adiBSI

Highlight

Copy