LUK 1
1
1Ayanam Theopil, deddína amie ngoluke gooraso arokuna atíkídí isabem atpe emla ralkítung. 2Agom pobina kídí elang delokke kerape agí amiglok kaasuna kídílok bulu ingkuem pobitudí dem bulu attung. 3Delok legape, Mite Migoma, kapeila ngokke kera lokkekai si atí takam si aipakpe poriname, nokkepe kampope ripodem aipakpe atbi domílo aiyé emla ngo mííto. 4Ngokke sikepe inamsi nom luyiltonam atí takam aruem apíípe no kéndope emla idung.
Baptist Joanke Aapenamem Pokanname
5Judialokke roja Herodke yédudelo Jekariah emnam miriko kato. Bí Abijahke miri adong lokke; bíkke méng Elijabeth bí Aaronke otínge. 6Annyide Shédíkelo yéji nekíai, bulu Ruutumke ngiitom delokke ayon takamem lupenam kamape míngge igeto. 7Idakkom bulu ome-oo kamangai, kapeila Elijabeth negenpe yéto; delokke bínyi mijing eejo kaabong.
8Longe konem Jekariahke agér idíe pííla, Shédíke keralo bíkke miripe agér iduem, 9mirikídar lokke iyang iyape gíngkísula ikolok, Ruutumke kumkeng ekumlo bíkke pakyak nyotdíe pííto. 10Delokke pakyak romdíe píído delo, kumsupena takame luyulo kumla duuto. 11Delokrongem Ruutumke Teyong kotoki kone pakyak meru nyotpom lokke lakbík danlo dagala bím lengkansuto. 12Jekariah bí bím kaayédem, bí pesola dan-geto, 13Idola Teyong kotokide pokai, “Jekariah, no pesomapeka, nokke kumnamem tattobong. Nokke méng Elijabeth bí ooko oyé, delo no Joan emla amínem mínlangka. 14Bí nokke ashéng shéngkepe delokke mííyum sukepe iyé, delokke amikídíe bím ogalok bojérungko ashéyé. 15Kapeila Ruutumke kangkolo bí bottena amipe iyé. Bí onggur alang emlang siiyé líknam apongem tíímayé, delokke Deena Aide bím olen delokkekai duubomyé. #1:15: Demangkom “Bíkke ane akii lokkekai”. 16Bí Israel amiem bojéko buluke Ruutum Shédíkíng langaayéku. 17Delokrongem bí Kaaluna miri Elijahke ralnam delokke pauar kana aapíem gela, Ruutumke keralo gígeboyé. Bí abukídí emlang ome-oo kídíem goodum suyéku; bí tatmana amikídíem leemo sudope iyé.”
18Jekariah bí Teyong kotokidem íngkíto, “Ngo kape kísa dem berokpe kénsuyéne? Ngo mijingkai delokke ngokke méngete eejokai.”
19Teyong kotokide pobito, “Ngo Gabriel. Ngo Shédíke keralo dakdung, delokke nom luposudope delokke nom sim aina kobor sim lukan bidope emla ngom melíktung. 20Delokke supak ngokke ponam kídísi píímang tetengem no agom pokénmape gommala duupoyé kapeila moodí aropaklo píípena ngokke agomem no arope míímato.”
21Depe iduem, luyulo Jekariahme toyana amikídíde kapeilai bí kumkeng ekum delo deddí pekai adol líkkane emla mííto. 22Luyulo bí lendokuem, bí bulum agom pobo sukén yimang. Bulu bí kumkeng ekum delo kaarí kaanyonam atíko kaatonape emla míngkai, kapeila bí agom pobolai mape, ruuyil petomlok bulum ibosuto.
23Bíkke agérem iyinrodem bí ekumlo entoku. 24Delokrongem bíkke méng Elijabeth bí akiilo ooko gekai, delo poolo pilngoko rusisula yéto. 25“Ruutummin ngom sikepe ibitune”, bí emto, “So longe kídarso bí ngom ayato delokke ngokke amikídí gooralo annyingem laabín bitoku.”
Jisume Openamem Poruuname
26Poolo akkéko doorongem, Shédí bí teyong kotoki Gabrielme Galil lokke Najareth emnam taonkolo melíkto. 27Dabidke odolok lenna Josephkíng tatbinam Mari emnam mimekolo bí pobi penamko kato. 28Teyong kotokide mimedelo gíla poto, “Airuna ayangem paana mime no, míípo langka! Ruutum bí nokkíng dung.”
29Bíkke agom sim tatla Mari bí míngkén mííyén yimang ikai delokke si agom si ingkuedí emla míísuto. 30Idakkom Teyong kotokide bím poto, “Mari, no pesomapeka, Shédí kelok airuna ayangem no paato. 31No koo gela ooko oyé, delokke no bíkke amínem Jisu emlangka. 32Bí tumilonmona amipe iyé delokke bím kedon yalumna Shédíke Ue emyé. Ruutum Shédí bí bíkke abu Dabidke dungkengem bím biyé. 33Delo bí Jakobke opín teyolo ruutumpe iyarbomyé; bíkke amode edílote nyokyimayé.”
34“Ngo mílípe dungada, kapeila dekepe iyéne?” emla Mari bí poyan suto. 35Teyong kotokide poyansuto, “Deena Aide nokkíng aayé, delokke kedon yalumna Shédíke ralname nom duubomyé. Sok legape dem openam deena koodem Shédíke Ue emyé.#1:35: Demangkom “Sok legape dem openam koodem deene emyé.” 36Nokke erang Elijabeth bíteng eejodola kooko oyé. Bíkke ko geronge poolo akkéko ikabong. 37Depe ila Shédíke iramnam atí kamang.”
38Mari bí poyansuto, “Ngo Ruutumke béérange, ngokkíng nokke pokampe idaklangka.” Delokrongem Teyong kotokide gíkaku.
Elijabethme Marike Kangaaname
39Dekepe irongem Mari bí oolkote doomape leemosula menape Judialokke etpang teyolo duuna doolung kolo gíla, 40Jekariahke ekumlo aala Elijabethme ashépe kaaríksuto. 41Edílo Elijabeth bí Marike ashéng lupuem tattodí, delo akiidelo koo genamde belengkai, delokke delo Elijabethme Deena Aide duulup bomkai. 42Bí bottepe ngasala poto, “Mime aralokke no gérne, delokke nokke koo openam dete gérne! 43Idokom ngok Ruutumke ane ngom, kangaanam gérnamsi ingkolokyi ikane? 44Kapeila nokke ashéng lupo agom adude ngokke nyorulo pííyéname, ngok akii sokke kue ashéla belengkai. 45Ruutumke poname aroyé emla arope míína mime no gérne.”
Marike Shédíme Yidgenam Mirie
46Delo Mari bí poyansuto:
“Ruutumme ngokke aapíe yidgedung.
47Ngom mopítna Shédíkíng ngokke aide ashédung,
48kapeila bí bíkke arééna béérangem míípang subito.
Supak lokke ila tani siirum siirume ngom gérne emyé.
49Kapeila ralna Shédí bí ngom bottena atíko bito.
Bíkke amínde deene;
50bíkke ayangde bím pesona takamlo siirum siirumlope kadung.
51Bí bíkke lakbíklok tolnam agérem ito;
agí aapí aralo adum ale míína kídíem nyokpan sumoto.
52Bí mite migom kídíem buluke dungkelok laayitoku,
idokom amépe míísuna kídíem gerep moto.
53Bí keno tíílínge inem aina atíem bito,
idakkom miremnem kenodope megéétoku.
54Bí bíkke Israel béérangem igulla, míípa sulangkula
55ngoluke abukídílo bíkke pébisunam kísape
Abraham melang delokke buluke otíng oyin kídíem agínpe yaasamto.”
56Mari bí poolo angumko Elijabethkíng duubosula ipala ekumlo entoku.
Baptist Joanme Oname
57Delokrongem Elijabethke koo odíe pííla bí ooko oto. 58Bíkke repe sinying kídí elang erang kídíe Ruutumke bím botteruna ayangem lengkan binamem talla bím bulu ashébosuto.
59Koo delokke longe píínyi nanalo bím dínbíílo iyod líkdíe pííla, idola bulu bíkke amínem Jekariah emla abu amínpe mínpe emla buluke idungem, 60bíkke anede, “Ma, bíkke amínem Joan emla míndope potung” emla poto.
61Delo bulu bím, “Nokke opín aralo sikepe amín gena atelkote kamang,” emto.
62Delokrongem bulu ingkona amínkodí mínpene emla ruuyilla íngkíto. 63Delo Jekariah bí atkeng alopko kola, “Bíkke amíne Joan” emla atbito. 64Dekepe irong pakdem bíkke yokane beleng langkula, ayue polen langkula Shédíme yidge lentoku. 65Dekedem kaapala buluke repe sinying kídíe pesue ito, delokke Judialokke etpang doolung tabung ami kídíe poge lugekai. 66Dem tatna mipíde sai emdola, “Demílo ingkona koope ipenakoi de?” emla agí agísulo íngkísuto, kapeila Ruutumke ralname bíkkíng duumín geto.
Jekariahke Polupoornam Mirie
67Bíkke abu Jekariah bí Deena Aide duulup bomname kaalu kangor agomem pokai:
68“Israelke Shédí ruutumme yidge langka,
kapeila bí agíke ami kídílo aala repíttoku.
69Bí bíkke béérang Dabidke odolok,
ngoluke legape turmonako gerepmoto.
70Sim bí kerapekai bíkke deena
kaaluna miri kídarlok pokansuto.
71Bí mirulokke ngolum mopítpene,
ngolum kangkina ralna kídílokke iturpene.
72Bí ngoluke buku kídíem yaasamem lengkanla,
delokke bíkke deena daapongem míípang sumotoku.
73Bí ngoluke abu buku Abrahamke keralo pésula;
74ngoluke miru keralok ngolum mosing langkula,
delokke bím kumsukolo ngolu peso atí kamadope;
75ngoluke yéname bíkke keralo deenampe
yédope emla pébisuto.
76Delokke nom koo nom kedon yalumna Kaaluna miri emyé;
kapeila no Ruutumke keralo gígela bíkke bedangem mogebiyé,
77buluke paab kídarem maab bila
bíkke amikídíem turku nana gyanem bidope,
78ngoluke Shédíke aapíe remak bikolok
doonyi arsange teyo telok ngoluke teyolo saabomyé.
79Kaamo ruruklo duuna kídílo delokke gíímangko dungkolo
angun dokupe ngoluke ale bedangem yépoko bedalo gíbonape iyé.”
80Delokrongem koode siisala aidlok ralkai; delokke bí Israel opín keralo lengkan sudí longe loope moonamlo yéto.
Currently Selected:
LUK 1: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
