LUK 2

Jisume Oname

(Mt 1:18-25)

1Delo longe kídí delo Agostos Kaisar bí Rom aralok ami takamem atla, sandope hukum bito. 2(Si amín atla sandope inamsi Siria amolokke ruutum Kurenike longelo kera yalumpe ilento.) 3Depe ila takam amie agí agí amínem atlík sudope agí agí doolupe enyintoku.

4Dekepe iname Josephkom Galil lokke Najareth taonlok gíla Judia lokke Dabidme oko Bethlehem taonlo gíto, kapeila bí Dabidke opíne delokke odonge. 5Bíkke méépe laapenam delokke oogena Marime gíbola delo amín atlík kosupe emla gíto. 6Bulu duudungem Marike koodem odíe pííla, 7bíkke opo yalumnam uem oto. Bí oodem gasorlok yéllumla dotkolo ketmoto, kapeila huteldelo bulu jéga paamato.

Mér Kaabomna Kídíelang Delokke Teyong Kotoki Kídíe

8Delo amodelo mér kaabomna kídíeke agí agí mérem yuem kaabomla dungai. 9Delo Ruutumke teyong kotokiko bulum lengkansuto, depe iduem bulu pesue ito. 10Idakkom Teyong kotokide bulum pokai, “Pesomapeka, ngo ami takamke legape ashénam tatporuna koborko bomabidung. 11Silo, Dabidke taonlo noluke legape mopít kupena Ruutumem oto; bí Messiah emnam Kristo Ruutum bí. 12Noluke bím kangkén nape sikepe iyé; koodem gasor kolok yéllumla dotko kolo keddope kaayé.”

13Delo menang asak teyong amolokke maklíng opéékone delo kotoki delo dakbosula Shédíme yidge dakla sikepe poto:

14“Teyong yalum Shédíkíng angune

delokke amoso bíkke aipe míínam tani kídílo

ayange duudak langka.”

15Bulum megeyéla Teyong kotoki kídíe teyong amope saarong kuem, mér kaabomna kídíe mipile sikepe pobosuto, “Kaju Ruutum bí ngolum pokan namde ingkona atíkodí, dem kaadope supak Bethlehemlo gílaju.”

16Delo bulu menape gíla, Mari, Joseph delokke dotkolo ketmonam koodem mapaato. 17Bulu koodem kaayédem, bíkke legangem teyong kotokie ingko ingkona agom ekedí pokantone, dem takam pokan biyinto, 18delokke mér kaabomna kídílokke bulum ponamem tatna takamde sai emla mííyinto. 19Mari bí sim takam sim míngkum geyéla agí aapí arasulo mesuto. 20Mér kaabomna kídíde buluke tatnam kaanam atí takamde aropakpe inamem kaapala Shédíme erkígela yidge langaala gítoku.

Jisume Amín Mínname

21Longe píínyi nanadelo bím dínbíng iyoddíe pííyédem, akiilo gemangada pekai bím Teyong kotokie binam amínem, Jisu emla mínlíkto.

Kumkeng Ekumlo Jisume Aaboname

22Méélamdem edílo Mosike ayonlok, buluke deedope pídéé sudíe píítodí, delo bulu koodem Jirusalemlo Ruutumkíng melíkdope emla enboto. 23Buluke en gade Ruutumke ayonlo, “Kera yalumpe ogenam takam oodem Ruutumke keralo kumlíkpe aido” emla kape kísa attudí delokke legape enboto. 24Delokke teyolote, Ruutumke Ayon kitablok pokampe, “Pekí pumsu kolang parong oo annyiko” gatlíkpe emla bulu ento.

25Delo longedelo, Jirusalemlo Simion emnam amiko deenamlok jégappe yénako kato. Bí Israel amiem mopít kupe namem toyala yéto, delo Deena Aide bíkkíng duumín geto. 26Bí Ruutumke Kristome kaamang tetengem sipong mayé emla bím Deena Aide pokanbito. 27Deena Aidlok kénla bí kumkeng ekumlo gíto. Edílo ane abude koo Jisume Ayonke pokorlok aralo bím aabotodí; 28delo Simion bí alaglo bodola Shédíme yidgedola pokai:

29“E, Edíína Ruutuma, no agíke agomsulok,

supak no nokke béérangem aipe gímotoku.

30Kapeila ngokke agí amige nokke turmonamem kaasuto,

31de nokke ami takam kangkolo,

32Mipak kídílo angunem lengkan binape

delokke nok Israel amikídí kepe angun ralnampe iruubiname.”

33Koo delokke legangem Simionke ponamem koo delokke ane abue irisinyo kísape mííto. 34Simion bí delokrongem bulum lubéé líkpala delokke koo delokke ane Marime poto, “Deddína Israel amikídíem ayokonem oletmola, ayokonem gerepmola, amie géépenam iyodem ibodope emla sim koo sim tosaktung, 35kapeila bí deddína ami aapí ainangem lengkan biyé. Delokke si yoksa si nok agí aapí emkom níkyé.”

36Asher opínlokke Panuelke ome Anna emnam kaaluna mime miriko kato. Bí eejorunge ikai; bí dítag kínít petomko miloem duubosuto, 37delokrongem bí tagying píínyi kolang tagpikope meyépe duusuto. Bí kumkeng ekum dem mepakmape longe yohpe kumtísula dobom tííbom suyimape yéto. 38Depe idungem bí bulukíng aala, Shédíme yidgela delokke Jirusalem em mopít kupenamem toyala duuna kídí takamke keralo koo delokke legangem pokanto.

Najarethpe Enkuname

39Edílo Josephlang Mari bí Ruutumke pokampe takamem iyintodí, delo bulu Galil lokke agí Najareth taonlo entoku. 40Delokrongem koode siirepkai delokke botte lenkai; bí kénname ikai, delokke Shédíke ayange bíkkíng duumínto.

Koo Jisuke Kumkeng Ekumlo Gíname

41Gíbong gíídí doman legape dítag miyolo bíkke ane abue Jirusalemlo enyarto. 42Edílo bíkke dítage íying kolang annyiko itodí, delote buluke enyasupe, adeng ape legape ento. 43Gíídí domane iyinrongem, bíkke ane ekumlo entoku, idokom koo Jisu bí Jirusalemlo yépooto. Dem bíkke erange kénmato. 44Bím ami kídílo enmín gedung kupe emla mííla longe bedangkope entoku. Delokrongem bulu buluke edung erang kídí delokke angong arum kídílo matakíto. 45Bulu bím paamape iyédem, Jirusalemlo bím mata kakupe emla enlat sutoku. 46Longum nanalo bulu bím luyil poyilna kídíem kumkeng ekumlo duubosula, buluke agomem tatgapla delokke bulum íngkí tatkíla idope mapaato. 47Bíkke kénnam paanamem delokke íngkí lupuem tatna takame tarí tatnyope tatto. 48Bíkke ane abue bím kaala irisinyo kísape mííto. Bíkke anede bím poto, “Ue, kapeila no ngolum sikepe imokane? Ngolang nokke Yayi nom ankíe sikí matídung.”

49“Ngokke legape nolu kapeila matídune?” emla bí poyansuto. “Ngokke Abu ekumlo ngo duupe aido, sim nolu kénmanía?” emto. 50Idakkom bíkke ponam agomem bulu tatkénmato.

51Delokrongem bí bulukíng Najarethlo entoku delokke buluke agompe yétoku. Bík anede legang takamdem agí aapí aralo gesiisuto. 52Delokrongem Jisu bí Shédíke kera lolang tani gooralo aapí aang kénnam elang amíle siisala yékai.

Currently Selected:

LUK 2: adiBSI

Highlight

Copy