Luka 5

Kwitanwa kwa bahemba ba kwandya

Mat 4:18-22; Mko 1:16-20

1Lwise lūngī walī wīmīīla ha ng'walo gwa nyanza ya Genesaleti, a banhū būng'okalīīla kūdegeleka mhayo go ng'wa Mulungu. 2Ūbona mato abīlī galī a ha ng'walo gwa nyanza; alīyo a bategi baalī bagaleka, boojaga mitego ha mhūjo. 3Wingīla mu līmò lyago, lyalī lya ng'wa Simoni, ūng'wīla alīsegeje ho hado, lībize gītī lyagwīngīla ū ng'walo. Hūna wigasha mo, wandya kūbalanga a banhū. 4Aho wamala ū kūlanga ūng'wīla ū Simoni gīkī, “Bukaga ūje kū būjiba, ūkategele kwene ī mitego ying'we, mukūgwasha.” 5Nang'hwe ū Simoni ūng'wīla, “Seeba twakoyaga no būjikū pe, alīyo ndūhū nūūlū kūgwasha shose shose; gwike īkī ūlīhaya, nahene naje ko nakītege ī mitego.” 6Aho wīta gīko būgwasha ndīlo ningī no, nose ī mitego yabo yandya kūtandūka! 7Baalī na bichabo mu lyato līngī, būbashinyela bize babambīlīje. Aho bashika būgokaja pyī būbīlī wago a mato, nose gūyūhaya kūtubīla kūlwa būdito bo ndīlo! 8Ū Simoni aho wabona gīko, ūtuja mazwi ū kū būtongi bo ng'wa Yesu ūhaya gīkī, “Īngaga Seeba ūnileke ū nene, nguno nalī munhū wa shibi!” 9Nguno aho bapandīka ndīlo ningī gīko, akakumya no, pye na a bangī abo walī nabo. 10Pye na a bategi biye ū Simoni, a ba Yakobo nū Yohana, a bitūnja ba ng'wa Zebedayo nabo bakakumya no. Hūna ū Yesu ūng'wīla ū Simoni gīkī, “Ūtogohage; kūfuma haha ūkūbiza nzubi wa banhū, kūbingīja mu būpanga.” 11Aho bagakoja ha ng'walo a mato, būleka pyī ī shikolo, būnondeela wei.

Kwejiwa kwa munhū wa mbiji

Mat 8:1-4; Mko 1:40-45

12Ikanza ilebe walī mu nzengo gūmò gwaho, walīho ngosha ūmò walī watowa mbiji, aho wamona ū Yesu, winama kūshisha ha sī; kūnū alīng'wikūmbīlīja alīhaya, “Seeba ūlū ūtogwa ūdūgije kūneeja!” 13Ū Yesu ūgoloola nkono ūnkuumya; kūnū alīng'wīla gīkī, “Natogagwa elaga!” Haho na haho ī mbiji jūng'wīnga. 14Hūna ūnkomeleja ū munhū ng'wenūyo gīkī atizūng'wīla munhū nūūlū ūmò, alīyo ūng'wīla, “Jaga ūkiyooleche kūlī ngabīji, ūkafunye na shakwinha kūlwa kwejiwa kwako, gīt'ūmo Musa alagīlile; būbize ho būkaanīji kūbo.” 15Ū lūkumo lokwe lūkasambaala, būyūng'okalīīla banhū bingī kwiza kūndegeleka, na kūpījiwa ndwala jabo ja būlī mbika. 16Gwike ū wei wisundaga waja kū mapandī gatī na banhū, kūjūlomba iyene.

Kūpījiwa munhū wa būsaatu wa mangwisha

Mat 9:1-8; Mko 2:1-12

17Na lūshikū lūngī hangī walangaga, baalī bigasha ho na Bafalisayo hamò na balangi ba shilagīlo, ba kūfuma mu magūngūli gose, a ga mu Galilaya, nī Būyudaya; pye na Yelusalemu. Ū būdūla bo ng'wa Seeba boolī hamò nang'hwe kūlwa kūpīja basaatu. 18Kūhayimanīla bashika bagosha babūūkije munhū ha shilago, walī na būsaatu wa mangwisha; ī ng'hūmbū jabo jalī kūnshisha ha būtongi bo ng'wa Yesu. 19Alīyo īkī a banhū baalī bingī būgayiwa ī nzīla ya kūnshisha aho walī ū Yesu. Būlinha kwigūlya ya numba būūkagahega a malongo na a mazengo,#5:19 Mazengo: Ī numba ja Baisilaeli ī shikū jenījo jaalī ja mbika ya matembe. hū būng'wicha nī shilago shakwe būntūūla ha gatī gatī ha būtongi bo ng'wa Yesu. 20Ū Yesu aho wakūbona ū kūzunya kwabo, ūhaya, “Bahebu olekejiagwa ī shibi shako.” 21A balangi ba shilagīlo na a Bafalisayo bandya kūng'ung'uula balīhaya, “Ū munhū ng'wenūyū ni nani ī gete agūhayaga mihayo ya nyagimu gīko? Nani ūyo adūgije kūlekeja shibi ūlū atī Mulungu dūhū!” 22Ū Yesu ūbūdeeba ū būng'ung'uuji wabo, hūna ūshosha alībawīla gīkī, “Nibūlī mukūng'ung'uulaga ū mung'holò jing'we? 23Ī gīsī, ū nogu ni gūlī ginehe? Ū gwa kūhaya gīkī, ‘Walekejiagwa ī shibi shako;’ nūūlū hamo ū gwa kūhaya gīkī, ‘Būūkaga ūshimīze?’ 24Ali lūūlū, shiigelile mumane gīkī ū Ng'wana o Munhū alī nabo ū būdūla bo kūlekeja shibi ū mu sī.” Hūna ūng'wīla ū nsaatu gīkī, “Nalīkūwīla būūkaga, ūshibūūche ī shilago shako ūje kaya.” 25Ng'hana ūbūūka haho na haho mu būtongi wabo, ūshibūūcha ī shilago īsho walī ashilaalīlile, ūgumha ajile kaya akūnkumīlījaga Mulungu. 26Pye būgwīlwa idedebaja, bogoha no; būyūnkumīlīja Mulungu gwike, kūnū bakwiwīlaga gīkī, “Lelo twabona mihayo ya kūkamaaja!”

Kwitanwa kwa ng'wa Lawī

Mat 9:9-13; Mko 2:13-17

27Yahayūbīta ī yenīyo, ūfuma wīnga a henaho; ūmona ntobisha wa goodi, lina lyakwe Lawī, igashije ng'witobisījo lya goodi; ūng'wīla, “Nilondeelage.” 28Ūshileka pyī ī shikolo, ūbūūka ūnondeela. 29Ū Lawī aho washika ha ng'wakwe ūmeegeja shigukulu shitaale ū Yesu. Lyalīho n'ibita itaale lya batobisha ba goodi na banhū bangī; nabo bigasha ū kūlya ī shilīwa. 30Gwike a Bafalisayo na a balangi babo ba shilagīlo būyūduguma ū kū bahemba bakwe; bakūbawīlaga gīkī, “Nibūlī mukūlyaga na kūng'wa hamò na batobisha ba goodi, būyaga na banhū ba shibi?” 31Alīyo ū Yesu ūshosha ūbawīla, “A banhū a bapanga batī na nguno na mfumu, alīyo a basaatu h'abo bakankoobaga. 32Ū nene natizile kwitana batūngīlīja, alīyo ba shibi; gīkī bagalūke.”

Shīmīle sha kūfunga

Mat 9:14-17; Mko 2:18-22

33Hūna būng'wīla gīkī, “Ng'hangala ningī a bahemba ba ng'wa Yohana bakabizaga na ikanza lya kūfunga na kūlomba, pye na a ba Bafalisayo bakīītaga ī gīko; lelo a bako bene ni bakūlyaga na kūng'wa dūhū shi!” 34Nang'hwe ū Yesu ūbawīla gīkī, “Mudūgije kūbīīta bafunge a bageni ba ha būkwīlīma, alīyo nū ntooji ataalī hamò nabo? 35Jikūshika ī shikū ja kwīngījiwa ū ntooji, ū mu shikū jenījo hū bakūyūfunga!” 36Ūbawīla lūsumo gīkī. “Atīho ūyo akatandūlaga shilaka kwīnga ha ng'wenda mpya wasumīīla ha ng'wenda nkūlūkūlū. Ūlū wīta gīko akūbiza wagūtandūla nū mpya, yūkenaagūka būbīlī wayo; nguno ū ng'wenda ū nkūlūkūlū gūtizunīlīja nī shilaka ī shipya. 37Na hangī atīho ūyo akabīkaga mvinya mhya ng'wibīkīlo ikūlūkūlū, ūlū wīta gīko, ī mvinya ī mhya īkūlītandūla ī libīkīlo ī likūlūkūlū; yidīka ha sī ī mvinya, nī libīkīlo lyūkenaagūka. 38Alīyo ī mvinya ī mhya shiigelile ībīkwe ng'wibīkīlo ipya. 39Nūūlū hangī atīho munhū wa kūng'wa shakūng'wa sha kale hūna hangī ūshoka kwikūmva shisūhya; nguno akūhaya gīkī ī sha kale shinonu!”

Currently Selected:

Luka 5: SUKBI15

Highlight

Copy