Luka 13

Ūlū mutagalūkile mukūyagala

1Ī likanza lyenīlo, bamò abo baalī henaho būng'wīla mihayo ya bana Galilaya balebe, abo Pilato walī wababūlaga ng'wikanza lya kūfunya shitambo shabo! 2Nang'hwe ū Yesu ūbashokeja alīhaya, “Muliganika gīkī a bana Galilaya abo īkabilongela ī yenīyo, baalī na shibi kūtinda pye a bana Galilaya a bangī? 3Nalīmuwīla ītī gīko na hado yaya, alīyo ūlū mutagalūkile, na a bing'we pyī mukūyagala gīko! 4Nūūlū hamo muliganika gīkī a banhū abo ikūmi na banaane abo bakagwīlwa numba mu Siloamu būūcha, baalī bakenaagūji no kūtinda pye a bikaji ba Yelusalemu? 5Nalīmuwīla ītī gīko na hado yaya, alīyo ūlū mutagalūkile na a bing'we pyī mukūyagala gīko!”

Lūsumo lwa ntini gūtatwajaga

6Hūna ūbinha lūsumo ūhaya gīkī, “Munhū nebe walī wahamba ntini mu ngūnda gokwe, alīyo būlī ikanza ūlū wiza ho kūlola matwajo walī atapandīkaga! 7Nose ūng'wīla ū nīmi, ‘Ūlībona gīkī yashikaga myaka idatū ī haha nakūmanaga niza a ha ntini gwenūyū kūlola matwajo, alīyo ndūhū nūūlū kūpandīka; ī gete gūbbutage wa, nibūlī gwikale gūnikenaagūja ilaale lyane sagala dūhū!’ 8Nang'hwe ū nīmi ūng'wīla, ‘Baba gūlekage nahene ū ng'waka gwenūyū dūhū nagūgeme kūgūbeeja beegeja, nagūtūūlīle na maboleela boleela. 9Ūlū gūtwaja īkūbeelela, alīyo ūlū ītī chene, nahene ūkūgūbbuta!’”

Kūpījiwa kwa nkīma nemehazu

10Lūshikū lūngī yalī sabato, ū Yesu walangaga ng'wisinagogi līmò lyaho. 11Walīmo na nkīma walī wagung'humiwa moyo gwa būgokolo; walī atadūgije kūgūngūmūka kūshisha ikanza lya myaka ikūmi n'īnaane! 12Ū Yesu aho wamona ūng'witana ūng'wīla gīkī, “Bebe mayū otaligūlagwa ū mu makoye gako.” 13Ūntūūlīla makono, haho na haho ūgūngūmūka wandya kūnkumīlīja Mulungu. 14Ū ntaale w'isinagogi akapelana no aho wabona gīkī ū Yesu wampīja munhū ha sabato, ūbawīla a banhū gīkī, “Bing'we jilīho shikū itandatū ī ja kūtūmama milīmo, mulizage ng'wapījiwa ū mu jenījo, yaya a ha lūshikū lo sabato!” 15Nang'hwe ū Yesu ūnshokeja gīkī, “Bing'we bibeeleja, ī gīsī a ha sabato būlī ng'wene ū mu bing'we atataligūlīlaga ng'ombe nūūlū nzobe yakwe waja kwīng'wisha? 16Al'ū munhū ūyū oluhiwa na Shetani ikanza lya myaka ikūmi n'īnaane ī yose īyo, nīyo hangī nshīke o ng'wa Abulahamu gete, nibūlī atigeleelilwe ū ng'wene ū kwifuujiwa a ha sabato?” 17Aho wīhaya ī yenīyo pye abo bang'wītīlaga wilu bakagooka kībi no! Pyī ī libita lya banhū bīkumīlīja ī yawiza īyo akabeeja.

Shigemeng'hejo shibīlī sha būtemi

Mat 13:31-33; Mko 4:30-32

18Hūna ūhaya gīkī, “Ū būtemi bo ng'wa Mulungu būbizile gītī kī? Hīmba ūlū kūwikolanīja na kī? 19Ū boi būlī gītī kabīyū ka haladali, ako munhū akakasola ūūkakahamba mu ngūnda gokwe. Kahayūzwa kūkūla gūbiza ntī ntaale, kūshisha nose na noni ja kūlala jūpandīka wikalo ū mu matambī gago.” 20Hanuma hangī ūhaya, “Nawikolanīje na kī ū būtemi bo ng'wa Mulungu? 21Wiyikolile na shibimbya, īsho nkīma akasola ūgulanya mu ngele idatū ja būsu, shūbūdudumya pyī ū bose.”

Kwingīlīla ha mita mpine

Mat 7:13-14,21-23

22Ū Yesu aho alīja Yelusalemu, waja akūlangaga ū mu mizengo nū mu magūngūli. 23Kūhayimanīla munhū nebe omūja gīkī, “Seeba angū mmho ī gete abo bakūpījiwa balī bagehu no?” Nang'hwe ūbawīla gīkī, 24“Igaganījagi ū kūbītīla a ha mita ū mpine, nguno balī bingī abo bakūgema ū kwingīla alīyo bakūlemeelwa! 25Managi gīkī, ū ng'wenekīlī kaya ūlū ūlinda wīmīīla kūgūlugala ū nyango, ning'we ng'ūsangwa mutaalī hanze, mukūhoodisha no, kūnū mukūhayaga; ‘Seeba tūlugūlīlage nise!’ Alīyo ū wei akūmushokeja amuwīle gīkī, ‘A bing'we natūmumanaga, pyī nū kūko mulīfuma!’ 26Ning'we mukūhaya, ‘Angū twalyaga na kūng'wa hamò nang'ho; hama nīyo ū bebe walomeelaga nū mu mapanda gise!’ 27Akūmushokeja amuwīle gīkī, ‘Bing'we bīīti ba mihayo yabūbi, nalīmuwīla natūmanaga ūko mulīfuma, nīngīlagi a henaha!’ 28Kūkūbiza ho kūlīla, na kūshelanya mino; ūlū ng'ūbabona ū mu būtemi bo ng'wa Mulungu a ba Abulahamu na Isaka na Yakobo; hamò na a bahangi a bose, alīyo a bing'we ng'waponyiagwa hanze! 29Banhū bakūfuma kīya na ng'weli, bangī sukuma na dakama bize bigashe kūlya shilīwa ū mu būtemi bo ng'wa Mulungu. 30Gwike balīho aha abo balī kū numa, alīyo bakūbiza kū būtongi, na a babo balī kū būtongi, abo bakūbiza ba kū numa!”

Kūgūlīlīīla nzengo gwa Yelusalemu

Mat 23:37-39

31Ī likanza lyenīlo biza Bafalisayo kūng'wīla gīkī, “Ni wīnga a henaha, nguno ū Helode alīkooba kūkūbūlaga!” 32Nang'hwe ūbawīla, “Jagi mukīwīle ī nyamhawa yenīyo gīkī, ‘ī lelo nī ntondo nalīmalīja kūpeeja masamva na kūpīja banhū, ū lo kadatū lwaho nakūbiza namala maja.’ 33Gwike īnigeleelilwe nabize mu lūgendo ī lelo nī ntondo, nī ntondo būngī; nguno ītadūlīkanile ū ng'hangi achīle hanze ya Yelusalemu! 34Ee, Yelusalemu, Yelusalemu mūlagibo bahangi; bebe ūyo ūkabapondaga mawe abo ūkatūmīlagwa. Nashishaga ng'hangala jinga nakūgemaga kūbakuminga kuminga a baana bako, gīt'ūmo ngoko īkakumingīlaga zwiyū jayo, yajibandīla mu manana gayo; alīyo mutatogilwe! 35Managi gīkī ng'walekelagwa ī numba ying'we. Nguno nalīmuwīla mutūnibona hangī kūshisha aho mukūhaya gīkī, ‘Alī na lubango ūyo aliza mu lina lya ng'wa Seeba!’”

Currently Selected:

Luka 13: SUKBI15

Highlight

Copy