Yohana 18
18
Kūlodeelwa na kūding'wa kwa ng'wa Yesu
1Ū Yesu aho wamala kūhaya ī yenīyo wīnga a henaho, ūkīla longa lo Kiduloni; gwalīko ngūnda, ūūkingīla ng'wenūmo hamò na a bahemba bakwe. 2Ū Yuda, ū nodeeji wakwe, olī alīmanile ī lipandī lyenīlo; nguno ng'hangala ningī ū Yesu na a bahemba bakwe bamanhījaga mo. 3Hūna ū Yuda ūsola ibita lya bashilikale na balang'hani ba hekalu, kūfuma kū bagabīji bataale na Bafalisayo. Biza babachaga chenge na tala, kūnū babūūkije na shilanga. 4Ū Yesu olī ayīmanile īyo yizaga kūng'wilongela; hūna ūfumīla ha welekele ūbabūja, “Mulīnkooba nani?” 5Būnshokeja, “Yesu wa Nazaleti.” Nang'hwe ūbawīla, “Nene ūūy'aha.” Nū Yuda, ū nodeeji wakwe, walī wīmīīla hamò nabo. 6Aho wabawīla gīkī, “Nene ūūy'aha,” būshoka bashoka shigongwanuma, bukagwa ha sī! 7Nang'hwe ūbabūja hangī, “Bing'we mulīnkooba nani?” Būhaya, “Yesu wa Nazaleti.” 8Ū Yesu ūbashokeja, “Angū namuwīla hū nene. Na lūūlū ūlū mulīnikooba nene, balekagi aba baje.” 9Akahaya gīko kūlwa kūshikīlījiwa kwa mhayo ūyo walī wagūhaya; gīkī, “Abo wamalile kūninha natanjimīīgije nūūlū ūmò wabo.” 10Ū Simoni Petelo walī na līlūshū, ūlīsopoola ubuta gūtū go būlyo go ntūmami o ngabīji ntaale, gūtīnīka! Ī lina lyakwe ū ntūmami ng'wenūyo witanagwa Maluko. 11Ū Yesu ūng'wīla ū Petelo gīkī, “Bebe, lūshoshage mu shilalo ū lūshū; nibūlī naleke ū kūshing'wa ī shikombe īsho waninhile ū Baba?”
Yesu kū ng'wa ntaale o bagabīji
Mat 26:56-57; Mko 14:53-54; Luk 22:54
12Hūna ī libita lya bashilikale nū ntaale wabo, hamò na a balang'hani ba hekalu abo baalī bafuma kū Bayudaya benabo, būndima ū Yesu būntunga. 13Būntwala kū ng'wa Anasi tame; nguno walī nkwiye o ng'wa Kayafa, ūyo olī ntaale o bagabīji ū ng'waka gwenūyo. 14Ū Kayafa hū ng'wene ūyo akabawīla a Bayudaya gīkī, “Shiigelile munhū ūmò abachīlīle a banhū.”
15Ū Simoni Petelo nang'hwe ūnkūūbīja ū Yesu, hamò na ng'hemba ūngī; ū ng'hemba ū ūngī ng'wenūyo walī amanīkile a ha ng'wa ntaale o bagabīji, na lūūlū ū wei akingīla nū Yesu ū mu gwalugwa ya ha ng'wa ntaale o bagabīji. 16Ū Petelo wīmīīla hanze, ha mita. Ū ng'hemba ū ūngī, ūyo olī amanīkile a ha ng'wa ntaale o bagabīji, ūfuma wiza ūyomba nū nang'hani wa ha mita, ūng'wingīja nū Petelo. 17Hūna ū ng'wanikī ūyo walang'hanaga a ha mita ūmūja ū Petelo gīkī, “Gashinaga nang'ho ūlī ūmò wa bahemba bakwe ū munhū ng'wenūyo?” Nang'hwe ūhaya, “Yaya ū nene!” 18A batūmami na a bashilikale baalī bapemba moto bīmīīla henaho koota nguno yalī mbeho, nū Petelo ūūkīmīīla ho wandya nang'hwe koota.
19Hūna ū ntaale o bagabīji wandya kūmūgīlīja mihayo ya bahemba bakwe, nī ya kalangīle kakwe. 20Ū Yesu ūnshokeja gīkī, Ū nene nalūbalangaga bo hape hape a ba mu sī; būlī gwa naalūlangaga mu masinagogi na mu hekalu, ūmo bakibilingīlaga pye a Bayudaya, natalangile mu kwibisa bisa na hado yaya. 21Nibūlī ūlīnibūja nene? Babūjage abo baliigwaga īyo nalūlangaga; baaba ūlībabona abo bīmanile īyo nalūlangaga.” 22Aho wahaya gīko, ūmò wa balang'hani ba hekalu abo baalī bīmīīla hihī nang'hwe, ūntūla ipī ū Yesu. Ūng'wīla gīkī, Ūlīnshokeja ginehe ī gīko ū ntaale o bagabīji?” 23Nang'hwe ū Yesu ūhaya, Ūlū nahaya mhayo gūhūbile būkaanīlage ū būhūbi, alīyo ūlū natūngīlīja, numho ūlīnitūlīla kī?” 24Hūna ū Anasi ūntwala atungilwe, kū ng'wa Kayafa.
25Ū Simoni Petelo walī ataalī īmīīlile akootaga moto; kwimanīla bamūja hangī gīkī, “Bebe ūtī ūmò wa bahemba bakwe gete ū munhū ng'wenūyo?” Ūlema no; alīhaya, “Yaya natī ng'wene!” 26Hūna ūmò wa batūmami ba ha ng'wa ntaale o bagabīji ntaale, ndūgūye ūyo Petelo akantīna gūtū; ūhaya gīkī, “Bebe tūngīlījaga; natakūbonile nang'hwe gete ū mu ngūnda?” 27Ūlema no hangī ū Petelo; haho na haho yūhīla ng'hungulume!
28Hūna mu dilū, būng'wīnja ū Yesu a ha ng'wa Kayafa, būntwala kwikūlū. Gwike a boi būleka ū kwingīla ū mu numba ya h'ikūlū, gīkī batizūsosohala, bakaduuma kūlya pasaka. 29Hūna ū Pilato ūfuma ī hanze aho baalī; ūbabūja gīkī, “Bing'we mulī na mihayo kī ī ya kūmūūla ū munhū ng'wenūyū?” 30Būnshokeja būhaya gīkī, Ū ng'wenūyū ūlū ni atīītile yabūbi ni tūtang'wenhile ū kūlī bebe.” 31Hūna ū Pilato ūbawīla gīkī, “Nsolagi bing'we benekīlī mukaanamule gīt'ūmo shihayīlile ī shilagīlo shing'we.” A Bayudaya būng'wīla hangī gīkī, “A bise tūtazunīlījiwe kūbūlaga munhū ose ose!” 32Īkaja gīko kūlwa kūshikīlījiwa kwa mhayo gwakwe ū Yesu, ūyo walī wagūhaya mu koolecha mbika ya lūfu ūlo akūcha. 33Ū Pilato wingīla hangī ū mu kaya, ūng'witana ū Yesu ūmūja gīkī, Ū bebe, ūlī ntemi o Bayudaya?” 34Nang'hwe ū Yesu ūnshokeja, Ū gwenūyo ūlīgūhaya bebe ng'wenekīlī dūhū, nūūlū bangī bakūwīlaga?” 35Ū Pilato ūshosha, Ūliganika gīkī ū nene nalī Nyudaya? Angū a banhū b'ihanga lyako na a bagabīji bataale hū bene bakwenhaga ū kūlī nene; okenije kī?” 36Ū Yesu ūshosha gīkī, Ū būtemi bone būtī bo mu sī; ū būtemi bone ūlū ni bo mu sī, ni banilwīlīlaga a batūmami bane, natizūtūūlwa mu makono ga Bayudaya, alīyo ī haha ū būtemi bone būtī bo heneha.” 37Hūna ū Pilato ūng'wīla; “Gashinaga hū kūhaya ūlī ntemi ng'hana!” Nang'hwe ū Yesu ūshosha, “Bebe ūlīhaya gīkī nalī Ntemi. Ū nene nakabyalwa kūlwa nguno ya mhayo gwenūyū, nizile ū mu sī ūmu kūlwa kwīkaanīla ī ng'hana; būlī ng'wene ūyo alīmo ū mu ng'hana akwīdegelekaga īyo nakwīhayaga.” 38Ū Pilato ūmūja gīkī, “Ī ng'hana ni kī?”
Ū Pilato aho wamala kūhaya ī gīko ūfuma hangī ū kū Bayudaya. Ūbawīla gīkī, Ū nene natūbonaga būbi ū mulī munhū ng'wenūyū. 39A bing'we mulī na shīmīle sha kūtaligūlīlwa munhū ūmò a ha pasaka, hamo namutaligūlīle ū ntemi wing'we Bayudaya?” 40Būyoganya balīhaya gīkī, “Yaya ū ng'wenūyū; ūlū Balaba.” Alīyo ū Balaba olī nsambo!
Currently Selected:
Yohana 18: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.