Yohana 17
17
Kūlomba kwa ng'wa Yesu
1Ū Yesu aho wamala kūhaya ī yenīyo, ūlangamīla kwigūlya. Ūlola ng'wigūlū wandya kūhaya gīkī, “Baba lyashika ī likanza; nkūjage ū Ng'wana wako, nang'hwe ū Ng'wana wako akūkūje ū bebe. 2Nguno wang'winhile būsugi higūlya ya banhū bose, gīkī pye abo wang'winhile abinhe būpanga butashilaga. 3Ū būpanga butashilaga wene kūkūmana bebe ūyo ūlī Mulungu wa ng'hana; Mulungu ūmò wike, hamò na Yesu Kilisito, ūyo ūntūmile bebe. 4Ū nene naagūshikīlīgije ū nīmo ūyo ūninhile kūgūbeeja, nūkwenhela ikūjo ū mu sī. 5Ali lūūlū Baba, nigūngūhyage hamò nang'ho ī haha, nabize mo ū ng'wikūjo īlo naalī nalyo hamò nang'ho kūfuma na a haho sī ītaalī kusumvwa. 6A banhū abo ūbasolile kūfuma mu sī ūninha nene, naaboolekegije ī lina lyako. A boi baalī bako, alīyo waninhile nene, nīyo ī haha bagūdimile ū mhayo gwako. 7Bamanile gīkī pyī ī shikolo īsho ūninhile shilī shako. 8Nguno ī mihayo yako īyo ūninhile nene, naamalile kūbinha būyanukūla. Hūna lūūlū, ī haha bamanile gete gīkī, ū nene nafumile kūlī bebe. Na bazunije gīkī ū bebe hū ng'wene ūyo ūnitūmile. 9A benaba h'abo nalībalombela; natūlombelaga banhū ba mu sī, alīyo abo ūninhile, nguno a benaba balī bako. 10Pye a bane balī bako, na a bako balī bane. Na lūūlū nakūkūjiwagwa ū mubo. 11Ū nene ī haha natīmo ū mu sī, naliza kūlī bebe; alīyo a bene bataalī balīmo ū mu sī. Baba ng'wela, balang'hanage mu lina lyako īlo ūninhile, babize mu būmò, gīt'ūmo bise tūlī ūmò. 12Aho naalī nataalī hamò nabo, nalūbalang'hanaga mu lina lyako īlo ūninhile, hangī naalī nabakīngītīīlile, atachile nūūlū ūmò wabo, ūlū atī ū ng'wana wa kucha dūhū; gīkī shishikīlījiwe ī shandīkwa. 13Ī haha naliza kūlī bebe, ī mihayo yenīyī nalīyīhaya mu sī, gīkī babize nabo ū būyegi bone ū mubo; nīyo būbize būshikanu. 14Ū nene naamalile ū kūbinha ū mhayo gwako, hūna lūūlū a ba mu sī baabakolilwe īkī a bene batī ba mu sī, gīt'ūmo nene natī wa mu sī. 15Natūlombaga ūbīnje ū mu sī, alīyo ūbalang'hane ū kūlī Mi. 16A boi batī ba mu sī gīt'ūmo nene natī wa mu sī. 17Beejage mu ng'hana yako; ū mhayo gwako hū yene ī ng'hana. 18Ūmo ūkanitūmīla nene ū mu sī, nū nene h'ūmo nalībatūmīla a boi ū mu sī. 19Naliyeeja nene ng'wenekīlī kūlwa nguno yabo, gīkī nabo babize beejiwagwa mu ng'hana. 20“Natūbalombelaga aba dūhū, alīyo na a babo balanizunye kūlwa mhayo gwabo aba. 21Nabo pye babize balī mu būmò gīt'ūmo bebe Baba ūlī mulī nene, nū nene ūmo nalī mulī bebe. Na a bene babize ū mu bise; ī sī īzunye gīkī ng'hana ūnitūmile bebe. 22Na hangī ū nene naabinhile ī likūjo īlo ūninhile ū nene, gīkī babize balī mu būmò, gīt'ūmo bise tūlī būmò. 23Ū nene mubo nū bebe mulī nene; ū būmò wabo būshikane mu gīko, ī sī īmane gīkī ū bebe h'ūyo ūnitūmile, na hangī gīkī ūbatogilwe nabo gīt'ūmo ūnitogelilwe ū nene. 24Baba, natogilwe abo wamalile kūninha babize hamò nane. Balībone ī likūjo īlo ūninhile, nguno ūnitogilwe kwīngīīla kale, na a haho sī ītaalī kusumvwa. 25Baba ntūngīlīja, a banhū ba mu sī batakūmanile, alīyo ū nene nakūmanile; na a benaba ī bamanile gīkī hū bebe ūyo ūnitūmile. 26A benaba naabalangile ī lina lyako, hangī nakongeja ū kūbalanga, ū būtogwa wako ūmo ūnitogelilwe na a bene babize nabo, nū nene nabize hamò nabo.”
Currently Selected:
Yohana 17: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.