Kūfuma 9

Ikūla lya kūcha mitugo

1Ū SEEBA ūng'wīla hangī ū Musa, “Jaga ū kūlī Falao ūkang'wīle gīkī, ‘Ū SEEBA ū Mulungu wa Bahebulania alīhaya, Balekelage a banhū bane baje bakanilamye. 2Ūlū ūleme, wikale ūbadimīīlile batizūja, 3Ū nkono go ng'wa SEEBA gūkwenha ikūla lyabūbi no ū kū mitugo jako ījo jilī hanze kū madīīmīlo, ī falasa, nī nzobe, nī ngamīla jako; pyī nī ng'ombe, nī mbūli nī ng'holo jako. 4Alīyo ū SEEBA akūtūūla būsolanhya a ha gatī ya mitugo ja Baisilaeli nī ja Bamisili; gūtūūcha nūūlū ntugo gūmò gwa Baisilaeli.’” 5Hūna ū SEEBA wei ng'wenekīlī ūtūūla ī likanza; ūhaya, “Ntondo ū SEEBA akūgwīta ū mhayo gwenūyū ū mu sī yenīyī.” 6Na ng'hana a ha ntondo yaho ū SEEBA ūgwīta, pyī ī mitugo ja Bamisili jūshila kūcha; alīyo gūtachile nūūlū ntugo gūmò ū gwa Baisilaeli. 7Ū Falao ūtūma kūjūgīsīlīja, ūbona gīkī ng'hana gūtachile ntugo gwa Baisilaeli nūūlū gūmò; alīyo ī ng'holò yakwe ītagalūkile, atabazunīlīgije a banhū ū kūja.

Shitūlo sha kūsaata mabute

8Ū SEEBA ūbawīla a ba Musa nū Alooni, “Solagi ipī lya mabu kwīngīīla ha liiko, ū Musa alagasaamule ng'wigūlya ū kū būtongi bo ng'wa Falao. 9A mabu genayo gakūgalūka lūbize lūbuubu lūnogu no no no pye a hose ū mu sī ya Misili; ū lūbuubu lwenūlo lūkwenha mabute pye a hose ū mu sī yenīyī, ū kū banhū nī mitugo; gakūyūbimba gatwinīka būhila!” 10Ng'hana būsola mabu kwīngīīla ha liiko, būnsanga ū Falao būshika bīmīīla ū kū būtongi wakwe, hūna ū Musa ūgasaamula ng'wigūlya a mabu genayo; a banhū būgulumūkīlwa mabute, pyī nī mitugo ī jose, gūyūtwinīka būhila. 11A bagòta būlemeelwa ū kūng'wīmīla ū Musa kūlwa nguno nabo a mabute gakabadima, hamò na a Bamisili a bangī. 12Alīyo ū SEEBA walī wīgagabaja ī ng'holò ya ng'wa Falao, atabadegelekile a ba Musa nū Alooni, gīt'ūmo ū SEEBA walī wang'wīlīla ū Musa.

Shitūlo sha mbula ya mawe

13Ū SEEBA ūng'wīla ū Musa, “Ī ntondo dilū ng'wipuunīīlage ū Falao ūkamanhye nag'hwe ūng'wīle, ‘Ū SEEBA, ū Mulungu wa Bahebulania alīhaya gīkī, Balekelage a banhū bane baje bakanilamye. 14Nguno ī haha lūūlū nakūkūgwisīja ihūūya idito no, nakūbatūla a batūmami bako na a banhū bako, ūmane gīkī atīho ūngī ū mu sī wa kūbiza gīt'ūmo nalī nene. 15Nguno ī haha ni naamalile kūgūgoloola ū nkono gwane, nūūlū kūkūkenaagūla gete ū mu sī ū bebe ng'wenekīlī na a banhū bako. 16Alīyo ūtaalī ūlīho, nakūlekile wikale mpanga kūlwa mhayo gwa gīkī, nakoolekeje ū būdūla wane; na gīkī ī lina lyane līkumūchiwe hose pyī ū mu sī. 17Gwike kūshisha haha ūtaalī ūkwigūngūhyaga higūlya ya banhū bane, ūtaalī ūlemile ū kūbazunīlīja ū kūja. 18Na lūūlū ī ntondo ūlū lyūshika ikanza gītī īlī, nakūtūma mbula ya mawe yabūbi no, īyo ītaalī kūtūla na kamò kūfuma aho banhū bandīja kwikala mu Misili. 19Ī haha lagījaga jenhwe mu kaya pyī ī mitugo jako ījo jilī kū matogolo, nī shikolo ī shingī īsho shilī hanze shingījiwe mu kaya. Nguno ī mbula ya mawe yenīyo īkūbatūla pye a banhū abo balasangwe balī hanze, pyī nī mitugo ījo jikūbiza kū matogolo; īkūshibūlaga pyī ī shose.’” 20A batūmami ba ng'wa Falao abo bakagogoha ū mhayo go ng'wa SEEBA bakabenha a basese babo mu kaya nī mitugo jabo. 21Alīyo abo bakagūdalaha ū mhayo go ng'wa SEEBA, a bene bakabaleka hanze a basese babo nī mitugo jabo. 22Hūna ū SEEBA ūng'wīla ū Musa, “Gūgoloolage ū nkono gwako oolote kwigūlū, ītūle mbula ya mawe ū mu Misili; ībatūle a banhū nī mitugo, pyī nī shisho shizwile ū mu migūnda ya Misili.” 23Ū Musa aho wagūgoloola ū nkono gwakwe koolota kwigūlū, ū SEEBA ūtūma ū mu sī yenīyo mbula nhaale no, ya mawe na kūpalalūka na ndabi ningī. Ū SEEBA wenha ū mu Misili mbula ya mawe; 24gandya kūgwa mawe ga mbula, na ndabi jiyūlabya būlī kwene. Yalī mbula yabūbi no kūfuma aho ī sī ya Misili yandīja kūbiza ihanga. 25A mawe ga mbula gakashitūla pyī ī shikolo sha mu migūnda hose pyī ū mu Misili; yūbatūla na a banhū nī mitugo. Pyī īsho shaalī shizwile mu migūnda yūshikenaagūla, yūyīkongoola nī mitī pyī ī yose. 26Ī lipandī īlo ītatūlile na mawe ga gīko, yalī mu sī ya Gosheni dūhū; ūko bikalaga a Baisilaeli. 27Ū Falao ūbitana hangī a ba Musa nū Alooni ūbawīla, “Ūlū ī lelo ū lūgendo ūlū nalī ng'hūbi no, ū SEEBA ng'wene ntūngīlīja; ū nene na a banhū bane tūlī bahūbi. 28Nombagi ū SEEBA, nguno twigejaga lūūlū ī mbula ya mawe na kūpalalūka yenīyī; nakūmulekela muje, mutikala hangī ū mu sī īyī.” 29Ū Musa ūshosha, “Ūlū nalīnge ū mu nzengo, nakūmūūkīja makono hangī ū SEEBA nanombe, yooye ū kūtūla ī mbula ya mawe na kūpalalūka yenīyī; hūna ūkūmana gīkī ī sī īlī ya ng'wa SEEBA. 30Alīyo namanile hape ū bebe na a batūmami bako mutaalī ū kūng'ogoha ū SEEBA Mulungu.” 31(Ī kitaani nū būsīga shikakenaagūlwa, nguno ū būsīga boolī bomala kūhoola, ī kitaani jalī jamala kūlaba. 32Alīyo ī ngano nū būlegi shikapīla nguno ī shoi shikabizaga sh'ikanza lya kū numa.) 33Hūna ū Musa wīnga ū kūlī Falao, ūja hanze ya nzengo ūūkamūūkīja makono ū SEEBA; ī mbula ya mawe na kūpalalūka yūgata, yooya ū kūtūla ū mu sī yenīyo. 34Ū Falao aho wabona gīkī ī mbula ya mawe na kūpalalūka yooya ū kūtūla, akagwa hangī ū mu shibi shakwe; ū wei na a batūmami bakwe būgang'hanaja ī ng'holò jabo. 35Na lūūlū ī ng'holò ya ng'wa Falao īkikala ndaamu dūhū, ūlema ū kūbazunīlīja a Baisilaeli ū kūja, gīt'ūmo SEEBA walī wahayīla mu nzīla ya ng'wa Musa.

Currently Selected:

Kūfuma 9: SUKBI15

Highlight

Copy