Kūfuma 10

Shitūlo sha njige

1Ū SEEBA ūng'wīla ū Musa, “Jaga ū kūlī Falao, nūūlū īkī nayītile ī ng'holò yakwe nī ja batūmami bakwe kūbiza ndaamu; nguno ū mubo natogilwe kūshīīta ī shimanīkījo shane ī shakūkumya. 2Ū mu gīko a bing'we hū mukūpandīka nzīla ya kūbawīla a baana bing'we, na a baana ba baana bing'we, īyo nalībīītīla a Bamisili, nī shimanīkījo shane īsho nalībeeja mubo; hūna mudeebe gīkī ū nene nalī SEEBA.” 3Na lūūlū ū Musa nū Alooni būja ū kūlī Falao būūkang'wīla, “Ū SEEBA, ū Mulungu wa Bahebulania alīhaya gīkī, ‘Ūkūlema ū kwidohya ū kūlī nene kūshisha nanalī? Balekelage a banhū bane baje bakanilamye. 4Ūlū ūtūzunyaga ū kūbalekela, ī ntondo nakwenha njige ū mu sī yako. 5Jikwīkundīkīja ī sī kūshisha yoye ū kūbonwa, na jikūlya būlī shene īsho shalekeelilwe mbula ya mawe; pyī nī mitī īyo īzwile mu mabbaala ging'we. 6Jikookala pa ū mu numba jako, nū mu numba ja batūmami bako, pyī nī ja banhū ba mu Misili a bangī a bose. Ū mhayo gwenūyo gūkūbiza ngeni, ūyo batīnagūbona a babyaji bako, nūūlū a bakūlūgenji bako batagūbonile, kūfuma shikū ījo bandīja kwikala mu sī īyī kūshisha lelo.’” 7A batūmami ba ng'wa Falao būhaya, “Ū munhū ng'wenūyū akūtwenheleja kūgwa mu makoye mabi gīko kūshisha nanalī? Balekage a banhū benaba baje bakaanamye ū SEEBA, ū Mulungu wabo. Ū bebe ūtūbonaga gīkī nose ī Misili yakenaagūkaga?” 8Hūna a ba Musa nū Alooni benhwa hangī ū kūlī Falao. Ūbawīla, “Jagi mukanamye ū SEEBA, ū Mulungu wing'we; alīyo ī gete banhū kī abo balīja?” 9Ū Musa ūshosha, “Tūlīja bataale na bado; tūlībajana a bitūnja bise na a bashīke bise; nī ng'holo jise, pyī nī ng'ombe, nguno tūlīkang'wītīla shigukulu ū SEEBA.” 10Ū Falao ūhaya, “Ye, ye, ye! Ū SEEBA ni abizage hamò ning'we! Ū nene gete namulekele muje na bakīma hamò na baana; angū īlī hape gīkī gashi mulī na ng'hūmbū ja kwīta yabūbi! 11Gūtīho ū gwenūyo! Jagi dūhū a bing'we bagosha mukanamye ū SEEBA, nguno h'ūyo mukūgūlombaga kwīngīīla kale.” A henaho a ba Musa nū Alooni būpeejiwa ū kū būtongi bo ng'wa Falao. 12Hūna ū SEEBA ūng'wīla ū Musa, “Goloolaga ū nkono gwako a higūlya ya Misili, jiize njige jīkundīkīje pyī ī sī ya Misili, jilye būlī shikolo īsho shizwile mu migūnda; pyī īsho shalekeelilwe mbula ya mawe.” 13Ng'hana ū Musa ūgūbūūcha ū nang'ha gwakwe higūlya ya Misili, ū SEEBA ūhuuyembya nyaga gwa kūfuma kīya. Ū lūshikū lwenūlo ū nyaga gūhuuyemba līīmi jii na būjikū pe. Aho wela ī dilū, ū nyaga gūbiza gwenhaga njige. 14Jalī ningī no, jītang'anhya pyī ī sī ya Misili; pye a mapandī ga sī yenīyo jūgikalīla. Lītaalī kwilonga ihūūya lya njige ningī gīko na kamò yaya; na lītalilonga hangī. 15Jikīkundīkīja pyī ī sī, kūshisha pye a hose hūbilūhīja pi; jūlya būlī shikolo īsho shalī shalekeelwa na mbula ya mawe, pyī īsho shalī shizwile mu matogolo, nī shisuumo sha mitī. Gatasaagile madūūtū ha ntī nūūlū gūmò; nūūlū shinīlīzu shingī shose shose īsho shizwile shitasaagile ū mu sī ya Misili. 16Ū Falao ūbitana wangū wangū a ba Musa nū Alooni; ūbawīla, “Naahūbile ū kūlī SEEBA, ū Mulungu wing'we, nū kū bing'we. 17Na lūūlū nū lūkangala lwenūlū nalīmulomba munilekeje hangī ī shibi shane shenīshi, munilombele ū kūlī SEEBA, ū Mulungu wing'we anīngīje nūūlū lūkangala lwenūlū dūhū ī lihūūya lya kūbūlaja lyenīlī.” 18Ū Musa wīnga a halī Falao, ūūkanomba ū SEEBA. 19Ū SEEBA ūlūgalūcha ū lūyaga; lūjiheheeja ī jinge lūjitwalile kū Nyanza Yaza. 20Jūheheejiwa pye, ītasaagile njige nūūlū īmò hose hose ū mu sī ya Misili. Alīyo nahene ū SEEBA akīgang'hanaja ī ng'holò ya ng'wa Falao, atabazunīlīgije a Baisilaeli ū kūja.

Shitūlo sha giiti

21Ū SEEBA ūng'wīla ū Musa, “Gūgoloolage ū nkono gwako oolote kwigūlū, pyī ī Misili ībize mu giiti; nīyo giiti sha gaamha!” 22Ū Musa ūgūgoloola ng'hana ū nkono gwakwe oolota kwigūlū, giiti shūyikīīla pyī ī sī ya Misili, ikanza lya shikū idatū. 23Booya ū kwibona nūūlū hado; ikanza lya shikū idatū atigelile nūūlū ūmò wa kwīnga aho walī! Alīyo a Baisilaeli baalī n'isana ū mu mapandī ayo bikalaga. 24Ū Falao ūng'witana ū Musa ūng'wīla, “Jagi mukanamye ū SEEBA. Jagi na a bakīma bing'we, pye na a baana; jilekagi dūhū ī ng'holo nī ng'ombe jing'we.” 25Ū Musa ūng'wīla, “Shiigelile ūtūzunīlīje tūjane shitambò na shakwinha sha kūpemva, tūlakamfunīje ū SEEBA Mulungu wise. 26Tūlījijana nī mitugo jise; yaya ū kūleka kūūnū nūūlū chūūga dūhū. Nguno tūkūjitūmamīla jimò jaho mu kūnamya ū SEEBA Mulungu wise; gwike ī haha tūtamanile tūkūtūmamīla shikolo kī ū mu kūnamya ū SEEBA, kūshisha tūshike ko.” 27Alīyo ū SEEBA walī wīgang'hanaja ī ng'holò ya ng'wa Falao, ūlema ū kūbazunīlīja ū kūja. 28Hūna ū Falao ūng'wīla ū Musa, “Īngaga ī haha ū kū būtongi wane, nīyo wilang'hane ūtiziza kūnibona hangī nūūlū hado; nguno ū mu lūshikū lwa kūnibona būshū wane ūkūcha!” 29Ū Musa ūshosha, “Ūlītūngīlīja ū nene natūbonwa hangī ū kū būtongi wako.”

Currently Selected:

Kūfuma 10: SUKBI15

Highlight

Copy