Kūfuma 2

Kūbyalwa kwa ng'wa Musa

1Ū mu shikū jenījo walīho ngosha ūmò wa lūganda lwa Lawī, walī antoolile nkīma, nang'hwe wa lūganda lwa Lawī. 2Ū nkīma ng'wenūyo akabūūcha nda ūbyala ng'wana ngosha; ūmona ū ng'wana ng'wenūyo gīkī nsoga no, na lūūlū ūmisa, kūshisha ikanza lya myeji idatū. 3Alīyo aho wabona gīkī atūdūla ū kwikala amisile, ūnsolela shiseme, shibeejiwe kūfuma mu malūtende;#2:3 Malūtende: Gakabizaga makīnhū ga kwikola gītī malebelebe, gakazwaga kū ng'hilimva ya nyanza nūūlū myongo īmò. ūshibila laami īsangije maguta ga ndīlo. Hūna ūnaalīkīja mo, ūūkamisa mu madete kū ng'hilimva ya mongo. 4Ilūmbūye wa ng'wana ng'wenūyo ūja koi, wīmīīlila ka kūle amanūlola īyo īlang'wilongele. 5Kwimanīla nshīke o ng'wa Falao waja kooga ū kū mongo gwenūyo; aho akūshimīzaga ū kū mbalama ya mongo na banikī bagunanhi bakwe, ūshibona ī shiseme shenīsho ū mu madete, ūntūma ūmò wabo a bagunanhi bakwe; ūūkashenha. 6Aho washikundūla ūmona ū ng'wana alīīlīla; ūnsaatwa. Ūhaya, “Ū ng'wana ng'wenūyū atūleka kūbiza ūmò wa baana ba bakīma ba Shihebulania!” 7Hūna ū ilūmbūye wa ng'wana ūng'wīla ū nshīke o ng'wa Falao, “Naje nakakwitanīle nkīma Ng'hebulania wa kūkūlelela ū ng'wana wako?” 8Ū nshīke o ng'wa Falao ūhaya, “Jaga.” Ū ng'wanikī ūja ūūkang'witana ū nina wa ng'wana. 9Wahayūshika, ū nshīke o ng'wa Falao ūng'wīla, “Ūyū ng'wana nsolage ūnong'heje, nakūkwinha nshahala.” Ng'hana ū nkīma ng'wenūyo ūnsola ū ng'wana ūūkang'onhya. 10Aho wakūla ūntwala ū kūlī nshīke o ng'wa Falao, ūbiza ng'witūnja wakwe; ūng'winha lina lya Musa; nguno akahaya, “Nakanzubūla kūfuma mu minzī.”

Musa kūpeelela Midiani

11Ū Musa aho wakūla, lūshikū lūmò ūfuma ūja ūko baalī a banhū bang'wawe, kūbalola ūmo yabaluhījaga ī milīmo yabo. Ūmona muna Misili alīntūla Ng'hebulania, ūmò wa banhū bang'wawe. 12Wilalangīja kūūnū na kūūnū, aho wabona atīho munhū ūngī, ūmūlaga ū muna Misili ng'wenūyo, ūkula hasī ūmfukīīla mu maseni. 13Ha ntondo yaho ūja hangī, lelo ūūkababona Bahebulania bakūlwaaga boi bike. Ūyo wang'wiboneelaga ū ng'wiye ūng'wīla, “Bebe ngosha, nibūlī ūlīntūla gīko ū Ng'hebulania ng'wiyo?” 14Ū munhū ng'wenūyo ūng'wīla, “Ū bebe ī gete nani wakūtūūlile būtaale, nose ūbize wa kūyūtūlamula? Ūlīhaya ūkūnibūlaga nū nene gīt'ūmo ūkamūlagīla muna Misili?” A henaho ū Musa wibakīla; wiwīla, “Gashi gwamanīkile ū mhayo ūyo nagwītile!” 15Ū Falao aho wadeeba ūbona amūlage ū Musa, alīyo ū Musa ūng'witoloka ū Falao, ūpeelela Midiani. Aho washika ko wigasha hihī na lwinzī. 16Ū mu Midiani ng'wenūmo walīmo ngabīji walī na bashīke mpungatī; kwimanīla biza a ha lwinzī, bandya kūdaha minzī kūdītīīla mu mabbīnhī gīkī bang'wishe ng'holo ja ng'wa saabo. 17Alīyo baalīho badīīmi balebe, būbiboneela būhaya kūbapeeja ho; hūna ū Musa wīmīīla ūbagunīja a banikī benabo, nī ng'holo jabo ūbang'wisīja. 18A banikī bebano aho baja ī kaya ū kūlī saabo ū Leūli, wahayūbabona ūbabūūja, “Ni kinehe lelo ng'wangūha gīkī ū kūshoka?” 19Nabo būng'wīla, “Muna Misili nebe watūgunanha ū kūbadīīmi abo bakatūkoyaga, nī ng'holo jise ūjidahīla a minzī ūgookaja a mabbīnhī jūng'wa.” 20Ū namhala ūbabūūja a bashīke bakwe, “Hama ū wei alī halī? Nibūlī ng'waneka? Ng'witanagi ize aha alye na shilīwa!” 21Ū Musa ūzunya ū kūja ho, ūūkalenda na haho; nīyo ū munhū ng'wenūyo ūntooja ū Musa halī nshīke wakwe Sipola. 22Ū Sipola ūbyala ng'wana ngosha; ū Musa ūng'wilīka ī lina Gelishomu, nguno akahaya, “Nalī nobeji mu sī ya bangī.” 23Hanuma ya shikū ningī ū ntemi wa Misili ūcha, a Baisilaeli nabo bongeja ū kūgang'hīla kūlwa būsese wabo, būyūlīla bakūkoobaga būgunanhwa. Ī ng'hūngū īyo balīlaga kūlwa būdito wa būsese wabo yūmpandīka ū Mulungu. 24Ū Mulungu ūkwigwa ū kūlīla kwabo, ūlizūkwa ī lilagane lyakwe īlo walī walagana na Abulahamu, na Isaka, hamò na Yakobo. 25Ū Mulungu ūbalola a Baisilaeli, ūgabona a makoye gabo.

Currently Selected:

Kūfuma 2: SUKBI15

Highlight

Copy