Popular Bible Verses from Kūfuma 2

Share

Ū Mulungu ūkwigwa ū kūlīla kwabo, ūlizūkwa ī lilagane lyakwe īlo walī walagana na Abulahamu, na Isaka, hamò na Yakobo. Ū Mulungu ūbalola a Baisilaeli, ūgabona a makoye gabo.

Hanuma ya shikū ningī ū ntemi wa Misili ūcha, a Baisilaeli nabo bongeja ū kūgang'hīla kūlwa būsese wabo, būyūlīla bakūkoobaga būgunanhwa. Ī ng'hūngū īyo balīlaga kūlwa būdito wa būsese wabo yūmpandīka ū Mulungu.

Aho wakūla ūntwala ū kūlī nshīke o ng'wa Falao, ūbiza ng'witūnja wakwe; ūng'winha lina lya Musa; nguno akahaya, “Nakanzubūla kūfuma mu minzī.”

Wahayūshika, ū nshīke o ng'wa Falao ūng'wīla, “Ūyū ng'wana nsolage ūnong'heje, nakūkwinha nshahala.” Ng'hana ū nkīma ng'wenūyo ūnsola ū ng'wana ūūkang'onhya.

Kwimanīla nshīke o ng'wa Falao waja kooga ū kū mongo gwenūyo; aho akūshimīzaga ū kū mbalama ya mongo na banikī bagunanhi bakwe, ūshibona ī shiseme shenīsho ū mu madete, ūntūma ūmò wabo a bagunanhi bakwe; ūūkashenha.

Ū Musa aho wakūla, lūshikū lūmò ūfuma ūja ūko baalī a banhū bang'wawe, kūbalola ūmo yabaluhījaga ī milīmo yabo. Ūmona muna Misili alīntūla Ng'hebulania, ūmò wa banhū bang'wawe. Wilalangīja kūūnū na kūūnū, aho wabona atīho munhū ūngī, ūmūlaga ū muna Misili ng'wenūyo, ūkula hasī ūmfukīīla mu maseni.