Kūfuma 1
1
Baisilaeli Kūluhiwa
1Aya h'a mina ga bitūnja ba ng'wa Isilaeli abo bakasaamīla Misili hamò na saabo Yakobo, būlī ng'wene na kaya yakwe. 2Lubeni, Simioni, Lawī na Yuda; 3Isakaali, Zabuloni na Benjamini; 4Dani na Nafutali, Gadi na Asheli. 5A banhū a bose ū mu būbyīlebo ng'wa Yakobo baalī makūmi mpungatī; ū Yosefu ū ng'wene walī watonga ko ī Misili. 6Hanuma ya myaka kūbīta, ū Yosefu na a baana bang'wawe būzumalīka; kūshisha pye a banhū ba shibyalīlwe shenīsho būshila kūcha. 7Alīyo īkī a Baisilaeli baalī bibyaji no no no, bakakwīla kīngī nasho, kūshisha bookala hose pyī ū mu sī yenīyo. 8Kwimanīla watema ntemi mpya ū mu sī ya Misili, ūyo walī atang'witegelegije ū Yosefu. 9Hūna ūbawīla a banhū bakwe, “Bing'we a banhū benaba a Baisilaeli balīkwīla no, kūtūheeba a bise. 10Tūbachagūkagi, batizikala bongeja ū kūkwīla; nguno būlūgū būshikile kūbūūka, bisanja kū lwandī lwa banishi bise, būūlwa nise, būpandīka ng'wanya gwa kwīnga ū mu sī īyī.” 11Na lūūlū bandya kūyūbatūmamya milīmo midito, būbatūūlīla banhū ba kūbīmīīla ū mu būtūmami wabo; būnzengela ū Falao mizengo ya Pitomu na Lamesesi, ya kūbīkīla sabo jakwe. 12Alīyo nūūlū īkī a Baisilaeli baluhiagwa gīko, nahene bongejaga dūhū ū kūkwīla, na kūtang'anha hose pye, kūshisha a Bamisili būbogoha no; hūna bongeja 13Ū kūbadidoheja ī milīmo yabo. 14Babaluhyaga no; nīyo ū būpanga wabo būbiza mu makoye mataale, kūlwa būdito bo milīmo ya kūluba būlongo na kūbeeja madafaali, na milīmo ya kū malaale. A Bamisili babatūmamyaga a Baisilaeli pyī ī milīmo yabo mu wiboneeji būtaale no.
Baana bagosha kūbūlagwa
15Wanoga nose ū Falao ūbitana ba Shifula na Pua, bakīma ba Shihebulania, abo baalī na nīmo gwa kūbagunanha babyīle ng'wikanza lya kwitūūla; ūbawīla gīkī, 16“Ūlū mulībagunanha kwitūūla a bakīma ba Shihebulania, ng'ūlola chiza. Ūlū ng'ūbona gīkī ū ng'wana ūyo alībyalwa ngosha, mūlagagi; ūlū nkīma nekagi ikale mpanga.” 17Alīyo īkī a bagunanhi benabo baalī bang'ogohile Mulungu, batīītile ūmo akabalagīīlīla kwīta ū ntemi wa Misili; būyūbaleka a baana a bagosha bikala bapanga. 18Hūna ū ntemi wa Misili ūbitana a bakīma benabo ūbabūūja, “Nibūlī mulīyūbaleka na a baana a bagosha bikala bapanga? Mhayo kī gūlīng'wenheleja ng'wīte gīko?” 19A bakīma benabo būnshokeja ū Falao, “A bakīma ba Shihebulania batī gīt'ūmo balī a Bamisli a bakīma; a bene balī na nguzu no, a bagunanhi ūlū balīshika ho bakabasangaga bamalaga kūbyala.” 20Kūlwa mhayo gwenūyo, ū Mulungu akabīītīla yawiza a bagunanhi benabo; nabo a banhū bongeja ū kūkwīla. 21Na lūūlū īkī a bagunanhi benabo baalī bang'ogohile ū Mulungu, nang'hwe akabinha kaya jabo benekīlī. 22Hūna ū Falao ūbakomeleja pye a banhū bakwe alīhaya, “Būlī ng'wana ūyo ūbyalwa, ūlū ngosha nsolagi mukamponye mu mongo; ū nkīma nekagi ikale mpanga.”
Currently Selected:
Kūfuma 1: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
