Kūfuma BŪSOMBOOJI BO KŪGUNANHA
BŪSOMBOOJI BO KŪGUNANHA
A bose tūmanile gīkī a makūlū ga “Kūfuma” galī kwīnga ipandī ilebe kūja ipandī līngī. Ū mhayo gwenūyū gūshomelejiwe kūfuma mu mhayo gwa koolecha ibità lya banhū kwīnga mu sī ndebe kūja ipandī līngī. Ūmu Bibilia ū mhayo ntaale ūyo gūlīhoyelwa ū mu shitabo shenīshi gūlī gwihanga lya Baisilaeli kwīnga mu sī ya Misili ūmo baalī mu būsese.
Ū munhū ntaale ū mu shitabo shenīshi ūyo walī asolilwe na Mulungu kūlwa nīmo gwa kwīshikīlīja ī yose yenīyo, na kūbatongeela a Baisilaeli kwīnga ū mu sī ya Misili, walī Musa. Ī libudīka īlo līmanīkile kūtinda gose ū mu shitabo shenīshi līlī mu sula ya makūmi abīlī, ūmo tūloolekejiwa shilagīlo ikūmi sha ng'wa Mulungu. Ū Musa ng'wenūyo hū ng'wandīki washo ī shitabo shenīshi, nūūlū īkī atihayile wei hape hape. Alīyo īlī hape gīkī hū wei ūyo wayandīka ī mihayo mingī īyo īlīmo ū mu shitabo shenīshi. Galīho a mapandī ū mu shitabo shenekīlī ayo galoolecha gīkī wagandīka Musa (17:14; 24:4; 34:27). Ū mu shitabo sha ng'wa Yoshwa (8:31) tūlībona alīshihaya (lenganī. Kūf 20:25). Nū Ng'wilagano Ipya tūlībona ū Seeba Yesu walī ashiitegelegije ī shitabo shenīshi gīkī shandīkwa na Musa (Mak 7:10; 12:26). Nū ng'wandīki wa shitabo sha ng'wa Luka alītoolekeja gīko (Luk 2:22-23). Nīyo īkī ū Musa walī alangilwe chiza (Shī 7:21-22), hama walī wasolwa na Mulungu, hū kūhaya walī adūgije ū kwandīka; na ng'hana washandīka wei ī shitabo shenīshi.
Ī shitabo shenīshi shidūgije kūgabanhyiwa magelè mataale adatū: 1. Baisilaeli kūpandīka wiyaabī, na kwandya lūgendo lwa kūja kū lūgūlū lwa Sinai. 2. Mulungu kūbeeja Ilagane nabo kū lūgūlū lwa Sinai; na kūbinha shilagīlo sha kūbatongeela mu kikalīle ka būlī lūshikū, mu mihayo ya būsugi bo sī, na ya kajīle ka dini yabo. 3. Kūzengwa Ipandī lya kūlamīja, na kūtūūlwa mo ī shiseme shamo; na kūtūūlwa shilagīlo sha bagabīji, na mbika ja kūnamya Mulungu. Ū mhayo ntaale kūtinda yose ūyo gūloolechiwa ū mu shitabo shenīshi, gūlī gwa kūbona īyo akīīta ū Mulungu ū ng'wikanza lya kūbakomoola a banhū bakwe, ūbīīta kūbiza ihanga na kūbisagīja mihayo ya kū būtongi.
ĪYO ĪLĪMO
Baisilaeli na wiyaabī bo kūfuma mu Misili 1:1–15:21
a)Būsese mu sī ya Misili 1:1-22
b) Kūbyalwa Musa, na myaka ya wandījo 2:1–4:31
c) Musa na Alooni kwibona na ntemi wa Misili 5:1–11:10
d) Pasaka na kūfuma mu sī ya Misili 12:1–15:21
Kwīngīīla ha Nyanza Yaza kūshisha kū lūgūlū lwa Sinai 15:22–18:27
Kūfunyiwa shilagīlo, na kwinhwa Ilagane 19:1–24:18
Iheema ly'ilagane na kūtongwa mbika ja kalamīje 25:1–40:38
Currently Selected:
Kūfuma BŪSOMBOOJI BO KŪGUNANHA: SUKBI15
Highlight
Share
Copy
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.