Ioane 12

O le Fa‘au‘uina o Iesu i Petania

(Mata 26.6-13; Mare 14.3-9)

1‘Ua toe ono aso o‘o i le Paseka, ‘ona maliu atu ai lea o Iesu i Petania, i le mea sa i ai Lasalo lē na fa‘atūina e ia mai le oti. 2Na sauni e i latou se ‘aiga mo ia i lea mea, na ‘au‘auna ai Mareta; a o Lasalo sa nofo o ia i le laulau fa‘atasi ma Iesu. 3‘Ona tago lea o Maria i le paina o suāu‘u taugatā na gaosia i le nato, ‘ua liligi i vae o Iesu, ma sōloi ai i ona lauulu. Na tumu fo‘i le fale i le manogi o le suāu‘u. 4‘Ua fai ane Iuta le Sekara, o le tasi o so‘o o Iesu, lē na fa‘alataina o ia, 5“Na lē fa‘atauina atu aiseā lenei suāu‘u manogi i tenari#12.5 tenari: O le totogi o le tagata faigaluega i le aso i ona po o Iesu. e tolu selau, ma tu‘uina atu le tupe mo ē e matitiva?” 6‘Ua fai atu fa‘apea o ia, e lē ‘ona o le manatu i ē e matitiva, ‘ae ‘ona o ia o le gaoi; sa tau‘aveina e ia le taga tupe, ma sa masani ‘ona gaoi o ia mai le taga tupe.

7‘Ona fetalai atu lea o Iesu, “Tu‘u pea ia o ia! ‘Ua teuina e ia lenā mea mo le aso o lo‘u tanuga. 8Tou te fa‘atasi pea ma tagata matitiva, ‘ae tou te lē fa‘atasi pea ma a‘u.”

O le Taupulepulega aga‘i ia Lasalo

9‘Ua fa‘alogo le to‘atele o tagata Iutaia ‘ua i ai Iesu i Petania, ‘ona ō atu loa lea o i latou i ai; na ō atu i latou e lē na o Iesu a o le fia va‘ai fo‘i ia Lasalo, lē na fa‘atūina e Iesu mai le oti. 10O lea sa taupulepule ai ositaulaga sili e fasioti fo‘i ia Lasalo; 11auā e to‘atele tagata Iutaia na tu‘ua o latou ta‘ita‘i, ‘ae fa‘atuatua ‘iā Iesu.

O le Afio Atu ma le Manumālō i Ierusalema

(Mata 21.1-11; Mare 11.1-11; Luka 19.28-40)

12O le aso na soso‘o ai, na fa‘alogo ai le to‘atele o tagata na ō atu i le Tausamiga o le Paseka, ‘ua maliu atu Iesu i Ierusalema. 13O lea sa ‘ave e i latou lālā o le la‘au ma ō atu e fa‘afeiloa‘i ‘iā te ia, ‘ua ‘alalaga fo‘i i latou: “Osana, ia manuia lē o afio mai i le suafa o le Ali‘i, o le Tupu o Isaraelu!”

14Na maua e Iesu le asini ma ti‘eti‘e ai, e pei ‘ona tusia:

15“ ‘Aua ‘e te fefe, oe le ‘a‘ai o Siona,#12.15 ‘a‘ai o Siona: O le fa‘aliliuga tuai, tama fafine a Siona. #Saka 9.9; Isai 62.11

Silasila! ‘Ua afio atu lou Tupu,

o lo‘o ti‘eti‘e i le tama‘i asini.”

16Sa le‘i malamalama ona so‘o i le amataga o lenei mea, peita‘i, ‘ina ‘ua o‘o Iesu i lona mamalu, ‘ona manatua loa lea e i latou ‘ua tusia ia mea e fa‘atatau ‘iā te ia, ma ‘ua faia e i latou ia mea ‘iā te ia.#Ioane 7.39

17O tagata fo‘i o ē na fa‘atasi ma Iesu ‘ina o vala‘auina e ia Lasalo mai le tu‘ugamau, ma toe fa‘atūina o ia mai le oti, ‘ua molimau i latou i ia mea. 18O le pogai lea na feiloa‘i ai o ia ma tagata e to‘atele, auā na fa‘alogo i latou na faia e ia lenei galuega ofoofogia. 19‘Ona fetautalatala‘i ai lea o faresaio, “Tou te lē iloa ‘ea ‘ua lē aogā sa ‘outou mea e fai. Silasila fo‘i ‘ua mulimuli atu le lalolagi ‘iā te ia.”

‘Ua Sā‘ili Tagata Eleni ‘iā Iesu

20Sa i ai nisi tagata Eleni sa fa‘atasi ma ē na ō atu i Ierusalema e tapua‘i, i le taimi o le tausamiga. 21Na ō atu i latou ia Filipo, o le Petesaita i Kalilaia o ia, ma ōle atu, “Le ali‘i e, matou te manana‘o e fia va‘ai ‘iā Iesu.”

22‘Ua alu atu Filipo ma ta‘u ia Anetere‘a, ‘ona ō lea o i lā‘ua ma ta‘u atu ‘iā Iesu. 23‘Ua tali atu Iesu ‘iā te i lā‘ua, “ ‘Ua o‘o mai le itūlā e o‘o atu ai le Atali‘i o le Tagata i lona mamalu. 24O le ‘upu moni lava ‘ou te ta‘u atu ‘iā te ‘outou, ‘āfai e lē pa‘ū le fua o le saito i le ‘ele‘ele ma pala ai, e tumau pea o le mea e tasi. ‘Āfai e pala, ‘ona fua mai ai lea o fua e tele. 25O lē e fa‘apelepele i lona lava ola e maumau, a o lē e ‘ino‘ino i lona ola i lenei lalolagi, e fa‘asaoina o ia e o‘o i le ola e fa‘avavau. 26So o se isi e mana‘o e ‘au‘auna mai ‘iā te a‘u, e ao ‘ina mulimuli mai ‘iā te a‘u, ‘ina ‘ia i ai la‘u ‘au‘auna i le mea ‘ou te i ai. A ‘au‘auna mai fo‘i se isi ‘iā te a‘u, e vi‘ia o ia e lo‘u Tamā.

‘Ua Fetalai atu Iesu e uiga i Lona Maliu

27“ ‘Ua ātu lava lo‘u loto. Se ā ‘ea sa‘u ‘upu a fai atu? ‘Ou te fai atu ‘ea, ‘Le Tamā e, ia e lavea‘i ‘iā te a‘u i lenei itūlā’? ‘Ae peita‘i o le pogai tonu lava lenā na ‘ou o‘o mai ai i lenei itūlā. 28Le Tamā e, ia mamalu lou suafa!”

‘Ona o‘o mai ai lea o le si‘ufofoga mai le lagi, “ ‘Ua ‘ou tu‘uina atu le mamalu, ‘ou te toe tu‘uina atu fo‘i le mamalu.”

29‘Ua fa‘alogo ai le to‘atele o tagata na tutū ai i le si‘ufofoga, ‘ona fai ane lea, “O le ta‘alili o le faititili!” A ‘ua fai ane nisi, “ ‘Ua tautala le agelu ‘iā te ia.”

30‘Ua fetalai atu Iesu ‘iā te i latou, “E le‘i o‘o mai lenei si‘ufofoga ‘ona o a‘u, a ‘ona o ‘outou. 31‘Ua fa‘amasinoina nei le lalolagi; e tuli‘esea fo‘i le ali‘i o lenei lalolagi. 32‘Āfai e si‘itia i luga a‘u mai le ‘ele‘ele, ‘ou te tosina mai tagata uma ‘iā te a‘u.” 33‘Ua fai atu e ia lenā ‘upu e fa‘ailoa atu ai le uiga o le maliu o le a maliu ai o ia.

34‘Ua tali mai tagata ‘iā te ia, “ ‘Ua ta‘u mai ‘iā te i matou e la matou tulafono, e soifua pea le Keriso e fa‘avavau. E fa‘apefea la ‘ona e fai mai, e tatau ‘ona si‘itia i luga le Atali‘i o le Tagata? O ai ‘ea la lenei Atali‘i o le Tagata?”

35‘Ua tali atu Iesu ‘iā te i latou, “E itiiti le taimi o le a i ai ‘iā te ‘outou le malamalama. Sāvavali ia manū o ‘iā te ‘outou le malamalama, ‘ina ne‘i o‘o mai le pouliuli ‘iā te ‘outou; auā o lē e savali i le pouliuli, na te lē iloa le mea e alu i ai. 36Talitonu ia i le malamalama manū o ‘iā te ‘outou le malamalama, ‘ina ‘ia ‘avea ‘outou ma fānau a le malamalama.”

O le lē Talitonu o Tagata Iutaia

‘Ua uma ‘ona fetalai atu Iesu i ia mea, ‘ona maliu atu lea o ia ma lafi ‘iā te i latou. 37E ui lava ‘ina tele fa‘ailoga ofoofogia na faia e ia i o latou luma, ‘ae le‘i talitonu i latou ‘iā te ia, 38‘ina ‘ia taunu‘u ai le ‘upu na fai mai ai le perofeta o Isaia:

“Le Ali‘i e, o ai ‘ea ‘ua talitonu i la matou ‘upu?

‘Ua fa‘aalia ‘iā te ai le ‘a‘ao o le Ali‘i?”#Isai 53.1; Roma 10.16

39O le mea lea ‘ua lē mafai ai ‘ona talitonu i latou. E pei ‘ona fai mai o le perofeta o Isaia:#Isai 6.9,10; Mata 13.14,15

40“ ‘Ua fa‘atauasoina e le Atua o latou mata,

‘ua fa‘ama‘a‘aina fo‘i o latou loto,

‘ina ne‘i va‘ai o latou mata,

ma malamalama o latou loto,

‘ina ne‘i liliu mai fo‘i i latou ‘iā te a‘u,

ma ‘ou fa‘amālōlōina i latou.”

41‘Ua fai atu Isaia i lea mea auā na va‘ai o ia i le mamalu o le Atua, ma tautala atu e uiga ‘iā te ia.

42‘Ae peita‘i e to‘atele ta‘ita‘i o Iutaia na talitonu ‘iā Iesu; ‘ae le‘i ta‘utino atu e i latou ia mea ‘ona o le fefefe i faresaio, ‘ina ne‘i tuli‘esea i latou mai le sunako. 43Auā na manana‘o i latou i le vi‘iga mai tagata, ‘ae lē o le vi‘iga mai le Atua.

O le Fa‘amasinoga i le ‘Upu a Iesu

44‘Ua fetalai leo tele atu Iesu, “O lē e talitonu mai ‘iā te a‘u, e lē o a‘u ‘ua talitonu i ai o ia, a o lē na ‘auina mai a‘u. 45O lē ‘ua va‘ai mai ‘iā te a‘u, ‘ua va‘ai fo‘i o ia i lē na ‘auina mai a‘u, 46O a‘u o le malamalama, ‘ua ‘ou sau i le lalolagi, ‘ina ‘ia lē nonofo pea i le pouliuli i latou o ē e talitonu ‘iā te a‘u. 47O lē e fa‘alogo i la‘u ‘upu ‘ae lē talia e ia, ‘ou te lē fa‘amasinoina o ia; auā ‘ou te le‘i sau e fa‘amasino le lalolagi, a ‘ia fa‘aolaina le lalolagi. 48O lē na te te‘ena a‘u ma lē talia a‘u ‘upu, e i ai lē na te fa‘amasinoina o ia. O le ‘upu ‘ua ‘ou tautala atu ai, e fa‘amasinoina ai o ia i le aso gata‘aga. 49Auā ‘ou te lē o tautala atu i la‘u lava pule, a o le Tamā o lē na ‘auina mai a‘u, o ia lea na tu‘uina mai ‘iā te a‘u le poloa‘iga i mea e tatau ‘ona ‘ou tautala atu ai, ma mea e lē tatau ‘ona ‘ou tautala atu ai. 50‘Ua ‘ou iloa fo‘i o lana poloa‘iga e maua ai le ola e fa‘avavau. O le mea lea, o mea ‘ou te tautala atu ai, o mea lava ia na fetalai mai ai le Tamā ‘iā te a‘u ‘ou te fai atu ai.”

Currently Selected:

Ioane 12: SCNT

Highlight

Copy