Ioane 13

‘Ua Fufuluina e Iesu vae o Ona So‘o

1A o le‘i o‘o i le Tausamiga o le Paseka, ‘ua silafia e Iesu ‘ua o‘o i le itūlā e tu‘ua ai e ia lenei lalolagi, ‘ae maliu atu i le Tamā. ‘Ua alofa o ia i ona tagata o i le lalolagi, ‘ua alofa lava o ia ‘iā te i latou e o‘o i le gata‘aga.#Ioane 7.30; 8.20; 15.13; Kala 2.20; 1 Ioane 3.16

2O lo‘o taumafa Iesu ma ona so‘o, a ‘ua uma ‘ona tu‘u e le tiapolo i le loto o Iuta le Sekara, le atali‘i o Simona, ia fa‘alataina Iesu. 3‘Ua silafia e Iesu ‘ua tu‘uina mai e le Tamā mea uma lava i ona ‘a‘ao, ‘ua maliu mai fo‘i o ia mai le Atua, o le a toe maliu atu fo‘i i le Atua. 4‘Ona tula‘i ai lea o ia a o fai le tausamiga, ‘ua tu‘u ‘ese ona ‘ofu, ‘ua tago i le solo, ma fusi i lona sulugātiti.#Mata 11.29; 20.28; Luka 12.37 5‘Ona liligi ai lea e ia o vai i le ‘apa fafano, ma amata ‘ona mulumulu vae o so‘o, ma solo fa‘amago ai i le solo na sulu i lona sulugātiti. 6‘Ua sau o ia ‘iā Simona Peteru, ‘ona fai atu lea o Peteru ‘iā te ia, “Le Ali‘i e, ‘e te mulumuluina ‘ea o‘u vae?”#1 Pete 5.3

7‘Ua tali atu Iesu ‘iā te ia, “O le mea o lo‘o ‘ou faia, ‘e te lē iloa nei; ‘ae mulimuli ane ‘ona e iloa lea.”

8‘Ua fai atu Peteru ‘iā te ia, “E lē mafai ‘ona e mulumuluina o‘u vae.”

‘Ua tali atu Iesu, “ ‘Āfai ‘ou te lē mulumuluina ou vae, e leai sou tofi fa‘atasi ma a‘u.”

9‘Ua tali atu Simona Peteru, “Le Ali‘i e, ‘aua la ne‘i mulumuluina na o o‘u vae, a ‘ia mulumulu fo‘i ma o‘u lima ma lo‘u ulu.”

10‘Ua fetalai atu Iesu, “O lē e tā‘ele tau o ona vae, e mamā uma ai lava, ‘ae lē aogā ‘ona mulumulu uma. ‘Ua mamā fo‘i ‘outou, ‘ae lē o ‘outou uma lava.” 11‘Ua uma ‘ona silafia e Iesu lē o le a fa‘alataina o ia; o le pogai lea na fetalai atu ai o ia, “ ‘Ua lē mamā ‘outou uma lava.”

12‘Ua uma ‘ona mulumuluina e ia o latou vae, ‘ona toe tago lea o ia i ona ‘ofu, ma toe fo‘i atu i le laulau. ‘Ua fesili atu o ia, “Po ‘ua ‘outou malamalama ‘ea i le mea na ‘ou faia ‘iā te ‘outou? 13‘Ua ‘outou ta‘ua mai a‘u o le A‘oa‘o ma le Ali‘i, e moni lava, auā o a‘u lava lea. 14‘Āfai la o a‘u o le A‘oa‘o ma le Ali‘i, ‘ua ‘ou mulumuluina o ‘outou vae, e tatau fo‘i la ‘ona ‘outou femulumulua‘i i o ‘outou vae. 15Auā ‘ua ‘ou tu‘uina atu ‘iā te ‘outou le fa‘aa‘oa‘oga; ‘ina ‘ia ‘outou faia e pei ‘ona ‘ou faia ‘iā te ‘outou. 16O le ‘upu moni lava ‘ou te ta‘u atu ‘iā te ‘outou, e lē sili le ‘au‘auna i lona matai; e lē sili fo‘i lē ‘ua ‘auina i lē e ana le fe‘au. 17‘Āfai ‘ua ‘outou iloa ia mea, ‘amu‘ia ‘outou pe a ‘outou faia.

18“ ‘Ou te lē fai atu ‘iā te ‘outou uma, ‘ua ‘ou iloa i latou na ‘ou filifilia; a ‘ia taunu‘u ai le tusi, ‘O lē ‘ua ‘ai fa‘atasi ma a‘u, ‘ua a‘a mai o ia ‘iā te a‘u i lona mulivae.’ 19‘Ua ‘ou ta‘u atu nei ‘iā te ‘outou a o le‘i o‘o mai, ‘ina ‘ia ‘outou talitonu pe a o‘o mai: o a‘u lava lea. 20O le ‘upu moni lava ‘ou te ta‘u atu ‘iā te ‘outou, o lē na te talia lē ‘ua ‘ou ‘auina atu, ‘ua talia e ia o a‘u; o lē fo‘i na te talia a‘u, ‘ua talia e ia lē ‘ua ‘auina mai a‘u.”

‘Ua Valo‘ia e Iesu le Fa‘alataina o Ia

(Mata 26.20-25; Mare 14.17-21; Luka 22.21-23)

21‘Ua uma ‘ona fetalai atu Iesu i ia mea, ‘ona ātu ai lea o lona finagalo ma ‘ua fetalai atu, “O le ‘upu moni lava ‘ou te ta‘u atu ‘iā te ‘outou, o le a fa‘alataina a‘u e se tasi o ‘outou.”

22‘Ua feva‘aia‘i so‘o, ‘ua matuā fa‘alētonu po o ai ‘ua fetalai i ai o ia. 23O le tasi o ona so‘o, o lē na alofa i ai o ia, sa nofo e latalata ane ‘iā Iesu. 24‘Ona geno atu lea o Simona Peteru ‘iā te ia ma fai atu, “Fesili ia ‘iā te ia po o ai e fa‘asino i ai ana ‘upu.”

25A o ta‘oto o ia e latalata i le fatafata o Iesu, sa fesili atu o ia ‘iā Iesu, “Le Ali‘i e, o ai ‘ea?”

26‘Ona tali atu lea o Iesu, “O lē ‘ou te fufuiina le fasi mea‘ai i le ipu ma tu‘uina atu i ai, o ia lea.” O lea na fufui ai e ia le fasi mea‘ai i le ipu ma tu‘uina atu ‘iā Iuta le Sekara, le atali‘i o Simona. 27‘Ina ‘ua uma ‘ona talia e ia le mea‘ai, ‘ona ulu lea o Satani ‘iā te ia. ‘Ua fetalai atu Iesu ‘iā te ia, “ ‘Ia vave ia ‘ona fai le mea ‘e te loto i ai.” 28E le‘i iloa e i latou na ‘a‘ai pe aiseā ‘ua fetalai ai Iesu ‘iā te ia. 29‘Ona o Iuta sa pule o ia i le taga tupe, o lea sa manatu ai nisi o so‘o ‘ua fetalai atu Iesu ‘iā te ia e alu e fa‘atau mai ni mea‘ai mo le tausamiga, po o le fetalai atu fo‘i ‘iā te ia e avatu i ē e matitiva ni a latou mea‘ai.

30Na talia e Iuta le mea‘ai, ‘ona alu ‘ese vave loa lea o ia i fafo; ‘ua po.

O le Poloa‘iga Fou

31‘Ina ‘ua alu o ia i fafo, sa fetalai atu Iesu, “ ‘Ua vi‘ia nei le Atali‘i o le Tagata; ‘ua vi‘ia nei fo‘i le Atua ‘iā te ia. 32‘Āfai ‘ua fa‘aalia le mamalu o le Atua ‘iā te ia, ‘ona fa‘aalia lea e le Atua lava ia le mamalu o le Atali‘i o le Tagata, ma o le a fa‘apea lava ‘ona faia loa. 33La‘u fānau e, e lē o toe umi se taimi ‘ou te i ai ‘iā te ‘outou. Tou te sā‘ili ‘iā te a‘u; ‘ae ‘ou te ta‘u atu nei ‘iā te ‘outou le mea na ‘ou ta‘u atu i tagata Iutaia, ‘Tou te lē mafai ‘ona ō mai i le mea ‘ou te alu i ai.’ 34‘Ou te tu‘uina atu ‘iā te ‘outou le poloa‘iga fou: ‘ia ‘outou fealofani. Fa‘apei ‘ona ‘ou alofa atu ‘iā te ‘outou, ia fa‘apea fo‘i ‘ona ‘outou fealofani. 35‘Āfai tou te fealofani ‘ona iloa ai lea e tagata uma o o‘u so‘o ‘outou.”

‘Ua Valo‘ia e Iesu le Fa‘afitiga a Peteru

(Mata 26.31-35; Mare 14.27-31; Luka 22.31-34)

36‘Ua fai mai Simona Peteru ‘iā te ia, “Le Ali‘i e, o fea ‘e te maliu atu i ai?”

‘Ua tali atu Iesu, “E lē mafai ‘ona e mulimuli mai ‘iā te a‘u i le mea ‘ou te alu atu i ai; peita‘i ‘e te mulimuli mai ‘iā te a‘u i se taimi mulimuli ane.”

37‘Ua fai mai Peteru ‘iā te ia, “Le Ali‘i e, e lē mafai aiseā ‘ona ‘ou mulimuli atu nei ‘iā te oe? ‘Ua ‘ou sauni e tu‘uina atu lo‘u ola mo oe.”

38‘Ua tali atu Iesu, “ ‘E te tu‘uina atu ‘ea lou ola mo a‘u? O le ‘upu moni lava ‘ou te ta‘u atu ‘iā te oe, e lē vivini moa se‘ia e fa‘afiti fa‘atolu mai ‘iā te a‘u.”

Currently Selected:

Ioane 13: SCNT

Highlight

Copy