Mattayo 16
16
Gassooda ng'asheega deamdeameadi
(Mark 8:11-13; Luk 12:54-56)
1Gaweay heeda Farisayajeega ea Sadukkayajeega ak gwasimsim nea gamus gideaba, eadaaha gwadeagooda leabu humng'eeda. 2Ghwasha nea gwayeeshsha saawa, “Iissa ihitta shing'ada gooyeennyi, ‘Jeammeeda numuji gajaamiy aba gideaba humng'eeda ea areara.’ 3Iighar gayeew iissa gooyeennyi, ‘Askwareani gaygwaduksa, aba gideaba humng'eeda ea areara nea ghwang' eabeal.’ Ghoammuschi anala damannyoojiga iyoong'ulayi humng'eeda, nea mwoammuusi anala gwadeagwajeega damannyoonyiga. 4Seaygeeda munyas mealuuleadi ak gagasa gwadeagooda, ak ea mwajeattaw geaghus gwadeagooda ghayi bea Yoona.” Ng'atta ghwanung'wa heeda ak ghang'eat gawa.
Gidaguuda mukkattajeega bea Farisaayajeega ea Sadukkayajeega
(Mark 8:14-21)
5Gaweay giinealanga ea ghwahitta gigheawda, nea nuroossa eaditta mukkattajeega. 6Gwayeeshsha Yeesu, “Ang'ulla nea gooshageachchi geat aba hamiiraayda Farisayajeega ea dea Sadukkayajeega.” 7Gwasheang'nyi saawa nea gabwa geat, nea gwayi, “Miyeeyeanna mukkattajeega.” 8Gwajeeng'u Yeesu gidabaloola saawa ak gwayeeshsha, “Ghwasaan anda agooga goosheang'nyi sea fuga manang'i masawi, aba gideaba moondeawani mukkattajeega? 9Miiyanala eara ghamneewa? Mwoapkaadi eara mukkattajeekka ammut aba fukka as sagalamnyooji muudiin, ak goowweamsi gheaptanga sooscheew hada? 10Ghana mukkattajeekka assispwa silakkiisa fukka assagalamaji ang'ng'waaniin, heappi ghoawwaamnyi soscheew hada nyiit gheaptanga? 11Gayghoawattaan amwoapkaadi gideaba meabaloolani ng'asheega mukkattajeega? Asi ashageada geat aba hamiiraayda Farisayajeega ea Sadukkayajeega.” 12Gwajeeng'u gideaba gwachchi mabaloolana gideaba mayeeshshiinu ashageada geat aba hamiira, gabaloola ginealshooda Farisayajeega ea Sadukkayajeega.
Betro goodeaga geaw Yeesu
(Mark 8:27-30; Luk 9:18-21)
13Muchchu nea gawa Yeesu ng'eanyiida Gaysariyeeda Filippi, ghoanyaash giinealangaaschi nea gwayeeshsha, “Buuneeda gwayeena Balleanda Siida ng'eaha?” 14Geyeeshsha, “Buuneeda mwaatkwa gwayeena Yohaaneeda Abattiisachchi, suurja gwayeena Eliya, suurja gwayeena Yeremiya ghaneah siyagi gil aba jeeda sibanga.” 15Gwayeeshsha, “Ama agooga gooyeenayi aniini geewoschi ng'eaha?” 16Ghwasha Simoneeda was Betro nea gwayeeshsha, “Ang'iing'i guwosi Gristo, Balleanda Aseetta majeek.” 17Ghwasha Yeesu nea gwayeeshsha niny, “Ging'wani ang'iing'i, Simoneeda Bar-Yoona! Aba gideaba ng'asheanji moadaajiida saseeda ea foojeanda nii ghoahiimneey Bwaabwa mida humng'eeda. 18Ak geayeeshshineey, ang'iing'i guwosi Betro, ak badaydeaba laghaneani gaydadeeksa ganisedeanyu, ak eara uurda miyeeda ea mayghoammu ghwajoar. 19Ak aniini gaydagoonnyi gichchea attinana sugoochcheandumeeda humng'eeda, ak gidiradi aba hiji bea muunda ng'eanyiidean abeeda gajeasirat aba hoowa bea humng'eedean, ak gidawassean iittini aba hiji bea muunda ng'eanyiidean abeeda gajeettin aba hoowa bea humng'eedean.” 20Iing'atta ghaweada muuchchi giinealangaaschi eamarukusiina siida wassean gideaba niny Gristoohi.
Yeesu gabaloola iitta sawanadeadaannyi ea miyeeda
(Mark 8:31—9:1; Luk 9:22-27)
21Ghang'eada damandida gwaruksa Yeesu giinealangaaschi gideaba gammiissa beatta jea gawa Yerusaleemu, ak aba hoowa gayghwanyas sawanadeeda haw aba heeda gweargwa ea ashoohoodiga hees ea ng'oorshoodiga, ak geenuus, ama eaweetteaba samwagu gwaduudu. 22Ghwaat Betro ea gameaji gwadilda ak goojuursa nea gwayeeshsha, “Mwayiinya Aseetta, Ng'uttamiida! Ng'asheesu mayghwanyasnyi.” 23Gwayamsa geaw ak gwayeeshsha, Betro, “Una badaydeanyu shattaani! Adirussean; aba gideaba mindani meatkweeda Aseetta, gindi dea buuneeda.” 24Damandida gwayeeshsha Yeesu giinealangaaschi, “Siida wassean iigasa gweadu geeshteanyu ea dafoola geaw ak ghwasar behiidaannyi ak gweadu geeshteanyu. 25Aba gideaba siida gasa ghoaghu aweagaaschi gaygahutteawi, nea siida hutteawi aweagaaschi appadaydeanyu, gayghwadaah. 26Ama siida gaygwaloosa naaha iinyas halanjeassean bea muunda ng'eanyiida, amaduw gahutteawi aweagaaschi? Ghana siida gayghoadayda naaha ak ghoaghiisa aweagaaschi? 27Aba gideaba Balleanda Siida gayghoana gigheambiitta Ghwaan nea goodeana malaykajeega ak abeeda gayghoadaw gilinyoo asihi gidageattindaannyi aba sinaweagaaschi. 28Aba huumwa geayeeshshineegwa, gwanda hiji bea jeedeang'wean fuga maygameewa, ea eaghus anidaah Balleanda Siida nea ghwaana jeeda sugoochcheandumeadaannyi.”
Currently Selected:
Mattayo 16: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
