Mattayo 15
15
Ng'asheega siing'ng'wanyaana fugeaba garayi
(Mark 7:1-13)
1Hean gaweesa Farisayajeega ea ng'oorshoodiga nea gwaleabu Yerusaleemu ak ghapka heeda Yeesu ak ghoannyash, 2“Ghwasaan anda giinealangaagu maduuppa ng'asheega siing'ng'wanyaana fugeaba garayi bea ghaheanya? Iissa gweagiischi nea meahuuna geattinga.” 3Ghwasha nea gwayeeshsha, “Anda eara agooga iissa goofoolli diigheanda Aseetta aba ng'asheegeagwa oang'ng'waannyi? 4Gwayi Aseetta; ‘Sissiina mureeda gweanu ea geamadu,’ nea ‘Siida ang'eawi ghwaan ghana ghaamwat ea deenuusa.’ 5Ak gooyeennyi agooga, ‘Siida iiyyeeshsha ghwaan ghana ghaamwat, gitta gwachchi jea dagoonnyi, naadawji Aseetta.’ 6Asi aba seareeda ghaheang'wa, noanung' ghoaw ng'asheanda Aseetta gidamwadaagha. 7Ea fuga ammittu geat! Nidoabiiw ng'asheanda ghayi ramoaran sibaneeda suguura Isaaya appadahuukkeagwa nea gwayi,
8‘Fiisu iissa gwasinnean mureeda aba ghuusiga,
nea guroruunatka nyaawa ea sheageewean;
9saawa gagadoowannean mwadaagha,
nea ghoanaal giinealshooda was ng'asheega buuneeda.’”
Haleanjeeda ng'utta fii ririnnyeanda
(Mark 7:14-23)
10Gaguursa emeeda bwat geat ak gwayeeshsha, “Oalleaydiit ak ghoanalli: 11manda gichchea gwasik ghuut ak ghang'uda siida ririnnyeanda, geaghus gidarinna ghuutta, nii dea jea ghang'uda siida ririnnyeanda.” 12Ng'atta gaweay heeda giinealangaaschi ak gwayeeshsha, “Heappi ginali gideaba gwachchi Farisayajeega iyiiy ng'asheandida gwanyareesi?” 13Ghwasha nea gwayeeshsha, “Gilinyoo ea histeannyeanda gil iimahista Bwaabwa bea humng'eeda gajealoatta. 14Anung'waada saawa, suu fuga adoobiiwshi ng'oawwi. Nea siida ng'oaw iyadoabiiw siida ng'oaw, gayghoabitta duwaawi jeeda shoomanda.” 15Ng'atta gwayeeshsha Betro niny, “Ng'achcha iidigaasa aba galeesu.” 16Gwayeeshsha, “Eara agooga mandaneegwa fughareenga? 17Miianala eara ghamneawa gideaba gidanyoo gwasik ghuutta siida iissa ghang'atta gawa jeeda, amaduw gwaritta jarooda? 18Amaduukku ng'asheega rittuuna ghuutta gwaleappu gurorooda, amaduw ghang'uda siida ririnnyeanda. 19Aba gideaba jeeda gurorooda gwarittuuna gittemshajeega munyas, nuusta siida, mealuleega, hiseadayeandumeeda, mareanghumeeda, muuwunooda ng'uyeega, ea beeshta siida. 20Ng'asheesu seaniin geang'utta siida ririnnyeanda; duukku gideaba geeyeagiischi nea mehhuuna geattinga mwoammu ghang'uda siida ririnnyeanda.”
Gatmooda mideawa masaweega
(Mark 7:24-30)
21Ghabeawa Yeesu hoowa ak gawa meatkwajeega Diro ea Sidooni. 22Hean ghwahidu headannyi gatmoomba fuga Ganaayo bea ng'eanyiitta goojuur muuchchi, nea gwayeeshsha, “Bwaydanaan, Ng'uttamiida, Balleanda Dawdi, gabearji hudeanyu meangeenda.” 23Ea marukusiina eara ng'ashaan. Ng'atta ghwahidu heeda giinealangaaschi ak gamus niny nea gwayeeshsha, “Nung'waada gawa, aba gideaba goojuurra geeshteanya.” 24Ghwasha nea gwayeeshsha, “Meechcheaksean buuneessean geechcheaksean gisilga roodeadi bea gheeh Israeeli.” 25Ghwahidu gatmoota ak gwatkuy aba madeadaannyi ak gwayeeshsha, “Ee Ng'uttamiida weadaan.” 26Ghwasha nea gwayeeshsha, “Miimiy gideaba geegeanu hamitta diibiga ak geejaksa gudajeega.” 27Gwayeeshsha, “Huumwa gil, Ng'uttamiida, eara gudajeega iissa ghwaak lajanga abitpinna heeda agiischeewa ghweanda nyaawa.” 28Hean gwayeeshsha Yeesu, “Ea Gatmooda, ang'iing'i masaweagaagu aahaw! Gagasa nyasa gitta igasayiin.” Ghahaap hudannyi aba geeshangiga.
Yeesu ghoahaap fuga saang'a
29Ghabeawa Yeesu hoowa ak gawa ghuutta basooda Galilaaya, ak gwading'da giijeeda ak goopteada. 30Gaweay heeda emeetuw nea geeyeassa fuga badoojiga, ea fuga manda geeshanga, ea fuga ng'oawwi, ea fuga manda ghuusiga, ea suuk gasaang'a ak geayiin madeadaannyi ak ghoahaap. 31Ghaham ng'eanyi emeeda idaah nea gabalool fuga manda ghuusiga nea gamajeegiidi fuga badoojiga, nea gawelwel fuga manda geeshanga, nea ghoang'wearda fuga ng'oawwi, ak ghoaghambiit Aseetta Israeeli.
Yeesu ghoang'aatta fii sagalamnyooji ang'wan
(Mark 8:1-10)
32Gaguursa Yeesu giinealangaaschi ak gwayeeshsha, “Geasamsi emeani aba gideaba neandeawi eawooji samwagu nea mandeawana gilak; mwabwariinyi gideaba gaydasiksa gaweay nea mwaaga gil, gajiiduw goohiil aba naweeda.” 33Gwayeeshsha giinealangaaschi, “Aba hiji geendi dareapcheeda gajeanyasana yeenu hamitta jea goolang'u emeeda saang'a deenu?” 34Ghoanyash Yeesu gideaba, “Goondeawi mukkattaji hada?” Gwayeeshsha, “Ispwa ea ghweayeesu ng'ayi manang'i.” 35Ng'atta ghwanung' goobiitpiit emeeda aba ng'eanyi, 36gageanu mukkattajeekka as ispwaan ea ghweayeekka, ak ghamwaash ghawooda ak ghabwanajaada ak ghoadaw giinealanga, ak ghoadaw giinealanga emeeda. 37Gweagiischi sean ea gwalang'u, ng'atta ghoawaam gheaptanga ak ghwannyiit soscheew ispwa. 38Nea fuga gwachchi agiischi ea sagalamnyooji ang'wan headiga akghwahit nea meeyiitta gadeemga ea diibiiga. 39Iiduw gwaheelli emeeda ak gwading'da maleambooda ak gawa meatkweeda Magadaani.
Currently Selected:
Mattayo 15: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
