Mattayo 17
17
Yeesu ghwayamwa ormeeda
(Mark 9:2-13; Luk 9:28-36)
1Iing'atta eawooji lah ghwaat Yeesu Betro ea Yakkobo ea oorjeeda ghaamwat suguura Yohaana, ak goodeayi uhuuda giijeeda heeda geaw. 2Ghwayamwa ormeadaannyi aba madeannyaawa, ghameang'meang' gheamamdaannyi ea gawuurji aseetta, nea gaweriidi hang'weakkaschi ea ghawaar weeshinda. 3Hean gwardu Muusa ea Eliya, ak gabalool sea niny. 4Ng'atta gwayeeshsha Betro Yeesu, “Ng'uttamiida aamiy gideaba aseasa gajeeppiidana hiji; iigasayi gaydasin aba hiji udahabeaschooji samwagu, akkalealla daang'u gil annirja gaba Muusa, aniirja gaba Eliya.” 5Damani duu gabalolean deagheatta ghwahidu shamoghooda eesh ak gwadukta, ak ghwanyaasha ghuutta jeeda shamoghooda nea gwayi, “Nii Balleandeanyu abwariinyi ahoosanani, olleeysiina iit niny.” 6Iiy giinealanga ng'asheesu goobeedeayi ak ghabwada jeesinga ng'eanyi, nea ghabeal muuchchi. 7Gawa Yeesu ak ghawaas aba geattindaannyi nea gwayeeshsha, “Ang'eatng'eada, nea adoabealli.” 8Gatgat gheanyanga nyaawa, ea mwadaaha sih geaghus Yeesu nea gaba geaw. 9Iiduw nea ghwararang'aana giijeeda, gwayeeshsha Yeesu, “Adiiduw goorukusi eara sih iitteaba ng'asheesu oadayiin ea eaghus ea niduunna Balleanda Siida jeeda miyeeda.” 10Ak ghoanyash Giinealanga, “Anda gwayi ng'oorshoodiga geaghus ghannyi goosheeda ghwaan Eliya?” 11Ghwasha nea gwayeeshsha, “Eliya gaygoosheeda ghwaan, ak gwasissin halanjeassean; 12ak geayeeshshineegwa, Eliya nigeawiit ghwaan ak ea meanala, ak geesma halanjeassean gasa saawa. Gwasnu eara Balleanda Siida gaygawa ak gajeesawan aba geattinga nyaawa.” 13Ghwanal giinealanga gideaba gabaloola ng'asheega Yohaaneeda Abattiisachchi.
Yeesu ghoahaap balleanda bearji meangeenda
(Mark 9:14-29; Luk 9:37-43a)
14Iiduw nea ghwahitta heeda emeeda, gawa Siyagi headaannyi, ak gwatkuy aba madeadaannyi ak gwayeeshsha, 15“Ng'uttamiida, eaniyean bwayda balleandeanyu, aba gideaba goohiili, nea iissa gwasawana muuchchi; niny imisean gang'adeesa jeeda beasta, ghana galannya jeeda beega. 16Muchchu geayeadu heeda gineelangaagu ak ghwaraay ghoahaap.” 17Ghwalamda Yeesu nea gwayeeshsha, “Ea seaygeeda mandeawana masaweega biissa ea roodeadi, gajeendeaydooscheena ea ghoaw eeju? Agooga gaydamilikkiidaneegwa ea ghoaw eeju? Ayeanni heedeanyu” 18Ng'atta goojuursa Yeesu niny, ak gwaritteaysa meangeenda, ak ghahaap balleanda aba geeshangiga. 19Iiduw ghoahudaada Giinealanga ea gaweay heeda Yeesu, ak gwayeeshsha, “Anda aseasa gearaannyi erruutta?” 20Gwayeeshsha Yeesu, “Gwasin gheashooyda masaweegeagwa. Geayeeshshineegwa aba huumwa, inyeeda goondeawi masaweega deenna ghajilleanda haradaali, gajoammusa ayeeshshiina giijeeni, ‘Loadadawana hiji ak guwi hoowa,’ ak gaygawa, ak ghannyi ea manda ng'asheanda hang'waay mwajoammuusa sinooda. 21‘Loadadawana hiji ak guwi hoowa,’ ak gaygawa, ak ghannyi ea manda ng'asheanda hang'waay mwajoammuusa sinooda.”
Yeesu gabiikta gabaloola ng'asheega miyeadaannyi
(Mark 9:30-32; Luk 9:43b-45)
22Damanda mideayeewa sean aba Galilaaya gwayeeshsha Yeesu saawa, “Balleanda Siida gaygawa ak geayiin geattinga buuneeda, 23ak gaygwanuus, ama eaweetteaba samwagu gaygwaduudu.” Hean gagiisan giinealanga muuchchi.
Gidaydeayda gwaadeeda gheeda sibatta Aseetta
24Hitta Gapernaumu, gaweay heeda Betro Fuga ang'ng'oonyi gwaadeeda mwahitta shekkeeli ak gwayeeshsha, “Heappi! Giinealshoochcheandeang'wa goodayyiida gwaadi?” 25Gwayeeshsha, “Eah goodayyiida.” Iiduw nea nihitta ghoah, goosheeda Yeesu ghoanyaash niny nea gwayeeshsha, “Simon, iing'ulayi ang'iing'i gawuurjiin? Sugoodiga muunda ng'eanyiida goong'ng'oonyi gujaweeda ghana gwaadi aba hichpa ana fih? Aba heeda balloojiga nyaawa ghana hichpa fih suuk?” 26Eeshsha, “Hichpa fii suuk.” Gwayeeshsha Yeesu niny, “Asi iisunu abeeda gaygoobal geat balloojiga. 27Ama abeeda iimajeannyareasa, guwi jeeda basooda ak giibuutti sidageeda ghwaraja ghaang' siing'ng'oonnya ghweayeega ak gigeanu ghweayeanda madeeda jea eang'ng'waay ak giijaadi ghuutta, ak gaynyasana shekkeli; gigeanu ak giidawi heedeanyu ea headaang'u.”
Currently Selected:
Mattayo 17: DTGANT09
Highlight
Share
Copy
Want to have your highlights saved across all your devices? Sign up or sign in
Datooga New Testament © Bible Society of Tanzania, 2009.
