Gadiyeeda Giijasoodiga 4

Betro ea Yohaana aba madeeda girgweageeda

1Damanda duu goorgweaksiina buuneeda, ghapka heannyaawa ashoohoodiga sea shirikkarajeanda haw ng'ula gheeda sibatta Aseetta sea fuga suguura Sadukayajeega ghapka heannyaawa. 2Gwanyareesi muuchchi aba gideaba ghoanaal buuneeda nea gwarukkwiida gideaba Yeesu niduuna miyeeda. 3Geang'ng'waay saawa ak geehisa ghealooniga ea gamuchchu, aba gideaba niiw shing'ada. 4Nea abeeda fukka saang'a iiy ng'asheesuun ghamwas; nea monneeda headiga ghwahitta sagalamnyooji muut.

5Iimuuchchu ghabwat geat fuga ambaliischi sea gweargwa sea ng'oorshoodiga aba Yerusaleemu, 6seat ashshoochcheanda haw sugura Annasi, ea Gayafa, ea Yohaana, ea Iskaanda, ea fuga sean bea dooshshta ashoohoochcheanda haw. 7Iiduw nea niyiin bugusta nyaawa geannyaash gideaba, “Ngasheesu goosinnyi aba anuur ghana aba gheawungeabeang'a?” 8Ng'atta ghwanyas Betro Gurorooda Ghaydit, ak gwayeeshsha saawa, “Fuga ambal buuneeda ea gweargwa, 9asi ghamneawa iyoannyashcheasa iitta ng'asheanda miy sisissa siida badeeda, ea gidasihhaapta siida, 10gagasa anala oogasean, sea fuga sean bea Israeeli, aba gheawunga Yeesu Gristoyda Nasareetti, ghayi ongoorji, ak gooduunna Aseetta miyeeda, appadaydeaba niny siisi ghamiinaada aba madeedeang'wa nea majeek. 11Nii lagheaneeda ghayi heawa fuga deekshi, ak ghoaw lagheaneeda washiin akkar gheeda. 12Ak ea manda lealeanooda aba hichpa siinnuut, aba gideaba manda gheawun suuk hing'eadayda humng'eeda ghayi siittaw buuneeda jea gwalealneasa.”

13Daa saawa meaynatta Betro sea Yohaana, ak gwajeeng'u gideaba mii ghoassoamwa, fuga geallaan gil, hean ghahamng'eanyi; ak gwajeeng'u gideaba gwandeaydooschi sea Yeesu. 14Iiduw nea ghwadaa siitta siihaabiin nea ghamiinaada aba murdeeda nyaawa, ghwaraay gwarguu gil aba gichchea ghwashaang'da. 15Iiduw nea gwarukusa saawa gideaba aritteawana jeeda girgweageeda, hean goobalool geat saawa nea gwayi, 16“Asi gajeesmana naaha fiisu? Aba gideaba ng'asheanda damdaamwaat sisin aba saawa ak ea nidaajiit aba heeda buuneessean abiitta Yerusaleemu, ak ea meammuusi eashaang'a. 17Iimayghaghayda ng'asheesu muuchchi aba jeeda buuneeda, ghang'wana gereekusi saawa eamabiikta gwarukusa siida wassean aba gheawung'su.” 18Ng'atta gaguursa saawa ak gereekusa saawa ea mabaloolana ghana ghoanaal aba gheawunga Yeesu. 19Ghwalamda Betro ea Yohaana ak gwayeeshsha saawa, “Heappi nii humeandea gideaba gajeelleayseagwa iit ak ea mealleysini iit Aseetta asi girgeageeni alaja agooga; 20aba gideaba meammuusi easiinda gajeerukuna iitta gissidaayi ea gissiyiinyi.” 21Hean nea nimuuw saawa, ghwanung'waada gaweay, aba gideaba mwanyasa gheatta gichchea ghwaakta aba ghorjooda, aba gideaba gwanda hiji buuneeda; aba gideaba gwaduumsheesa buuneessean Aseetta aba ng'asheega bunu. 22Nea abeeda siisi gwachchi sihabin abeatta gweanyeegaaschi ea ninaawa haradam.

Fuga mideawa masaweega gamus meaynatta

23Iiduw nea geettin gaweay heeda fuga duupchi ak gwarukusa saawa gitta gasa ashoohoodiga heesiin ea gweargwa. 24Nea ghwayiiy, gagatkat sean daghanuunatka nyaawa nea googeal heeda Aseetta nea gwayi, “Ng'uttamiida Haw, ghayi sin humng'eeda ea ng'eanyiida ea basooda ea haleanjeessean mida jeeda, 25nea aba ghuutta ghweandeanya was Dawdi, was soomjeandaang'u, ak gwargu aba naweeda Gurorooda Ghaydit,

‘Ghwasan anda Emoojiga gwanyareesi,

anda buuneeda gootteemsheesa haleanjeeda mwadaagha?

26Sugoodiga ng'eanyiida nijip geat, nea fuga ambaliischi ea nubwatgeat,

ak ghaheawa Ng'uttamiida ak ghaheawa eara dea simmwaar,’

27nea aba huumwa jeedeaba mujiineeni gabattiisa geat fuga heawa soomjeandaang'u ghaydit was Yeesu, was dea ghayi imwaari, sean Heroode sea Bontiyo Bilatto, sea fuga Emoojiga ea fuga Israeeli, 28ak gwasin gidawassean ghayi bean gagasa geattindaang'u ea fughareadaang'u gideaba gaygwasa. 29Asi ghamneawa, Ng'uttamiida, ng'ulla gimuuwda nyaawa, ak giidawi soomjoagaagu ak gwarukkwiida ng'asheandaang'u aba meaynatta sean, 30ak giihaakti geattindaang'u ak ghoahaap siida, nea gwadeagwajeega ea deamdeamanga iissa geesin aba gheawunga soomjeandaang'u ghaydit was Yeesu.” 31Iiduw nea sihhit mooshta Aseetta, gwadumdum heeda gwachcha bassa geat; ak gaba nii sinnyiit Gurorooda Ghaydit ak gwarukwiida giijasta miy bea Aseetta aba meaynatta.

Fuga mideawa masaweega goobareannyi haleanjeeda mideawa

32Nea ghamneawa bareannyeedeaba fukka ghayi mwasiin gaba guroroanagi ak ghanyea manda siida ayi haleanjeessean mideawa ghanyea maygwayi geasu, nii abeeda saawa goobareannyi haleanjeessean. 33Iiduw gaweay giijasoodiga nea gwandeawa uurda haw muuchchi ak gamuuwwu iitta duunnooda Ng'uttamiida was Yeesu, ak ghwanyas sean dagheerjeandumeeda haw. 34Ak ea manda eara siisi gasa gil aba jeannyaawa, aba gideaba fuga mideawa madammeega ghana gealga gayghwashaayda, ak gweadu lappiyeetta bea gidasishaaydaan, 35ak lappiyeetta geayiin geattinga giijasoodiga; ak iiduw geallaja gaba niisiittaw gidagasa. 36Nea Yoseefooda ng'assa giijasoochcheanda gheawunga siyigheawunga siyi Barnaba (nea gideaba, Balleanda jea goomajeek gil), nea niny ea siida Laawi, siida ng'eanyiida Gupro, 37ng'atta ghwashaayda madamnyeanda was daannyi, ak gweadu lappiya ak ghwayiin geeshanga giijasoodiga.

Currently Selected:

Gadiyeeda Giijasoodiga 4: DTGANT09

Highlight

Copy