Gadiyeeda Giijasoodiga 3

Giheapta siida badeeda

1Ng'atta gaweay Betro ea Yohaana gheeda sibatta Aseetta damanda simwaasha Aseetta nea gaba Aseetta shageash. 2Hean geesareenu siida badeeda ng'eada deaghayi sijiila, nea iissa gamuchchu ak geayiin gidaghuutta gheeda sibatta Aseetta suguura Gidaghuutta miy ak gamus haleanjeeda sisappa geadi bea ghadooweeda aba heeda fuga weay jeeda gheeda sibatta Aseetta. 3Iiduw nea ghwadaa siidida Betro ea Yohaana nea ghwariikghta gaweay jeeda gheeda sibatta Aseetta, gamus eattaw haleanjeeda sisappa geadi bea ghadooweeda. 4Ng'atta goohang'ooysa Betro ghaang' niny sea Yohaana, ak gwayeeshsha, “Heappi ng'ulleassa.” 5Goofursa geaw sawa, nea ghaghayi gilijea ghwanyas gil aba heennyaawa. 6Ghwalamda Betro ak gwayeeshsha, “Aniini meandeawani lappiya ghana lagheanga meeng'meeng'i, ak gaydagonnyi gideandeawi; aba ghawunga Yeesu Gristoyda Naasareet, ng'eada ak guwi.” 7Ng'atta ghoang'ng'waay aba geattinda dugwa ak gagatkat ghamiinaada; deagheatta ghwanyas geeshangaaschi ea gheatkweakka geeshangaaschi uurda. 8Gotgweala ng'enyi ak ghaminada ak gawa jeeda gheeda sibatta Aseetta nea goodeayi saawa, nea gootkwealeada aba hooseaneega nea gwaduumsheesa Aseetta. 9Nea abeetta ghwadahada buuneessean gidaweeda siida, ea gidaduumsheesiinda Aseetta, 10gwajeeng'u buuneeda gideaba nii siidida eawoajusu muusisachchi abiitta ghuutta gheeda sibatta Aseetta sugura, “Gidaghuutta Miyiin; hean ghabeal nea ghahamng'eanyi aba ng'asheega bussa siitta.”

Gidargweechchta Betro aba jeeda gheeda sibatta Aseetta.

11Damanda neawsiina geaw siidida Betro ea Yohaana, gwasalda buuneessean gaweay heannyaawa aba doodooni sugura doodooda Solomon nea ghahamng'eanyi. 12Daa Betro fugiga goorgweaksa buuneeda, “Ea fuga Israeeli, andagooga ghahameagwa ng'eanyi aba ng'asheanji, ak ghwasaan anda gong'ulleasa, nea ghoaghanyi gideaba siisi ghoahaap uurdeanya ghana doobiiwnatteanya ak geenung' gawa? 13Aseetta Abrahaamu ea Isakka ea Yakkobo, Aseetta ghweenigaasa, nighambiit soomjeandaannyi was Yeesu ak siisi eadeaghayi oyiinnyi geattinga fuga hees gil ak goodardeaysi aba madeeda Bilatto, eara aba damandiida gasa gwasikksina ninyiin. 14Amaduw ghoashaang'nyi dea Ghaydit was dea Assagi Doabiiwaat, ak googasayi siida nuusa buuneeda egooneegwa, 15ak goonuuschi Siitta goona eaweegean, ak gooduudu Aseetta aba jeeda miyeeda. Ak aseasa geawaschi muushoodigeaba ng'asheanji. 16Nea gheawungaaschi, ak aba masaweega aba gheawungaaschi, ea niidaw siisi majeeknatta was siida noadaayi ak ghoanalli; nea masaweekka sinyassa naweeda Yeesuun ea niidaw siida majeeknatta hit aba madeedeang'wa oogasean.

17“Asi ghamneawa, fuga eaduupcheewi, ghoanalli gideaba iissa goosinnyi ng'asheega aba lendeeda, gawuurji gissinda fuga ahaaghwaneegwa. 18Nea ng'asheanda ghayi bay ghwaramoar Aseetta aba ghuusiga sibangaaschi, nea gideaba Gristoheani gaygwasawana gil ak ea nisa. 19Asi aduukkuunana, ak goobiikti ayamni geat, ak abeeda gegeanda ring'eegeagwa, ak abeeda ghwahidu damanda hawdeayda jea gwaleabu heeda Ng'uttamiida, 20ama abeeda goojeagu Gristoyda ghayi siloat appadahuukkeagwa, was Yeesu, 21was dea gasa goobiida humng'eeda ea ghwahitta damanda jea eang'ng'eada ng'asheega sean ghayi rugu Aseetta aba ghuusiga sibangaaschi ghaydidi ghang'eada dea waas. 22Aba gideaba gwayi Muusa, ‘Ng'uttamiida was Aseetta gaygageanu sibaneeda aba jeeda fuga oduupcheewi gawuurji gidaloattanaan. Ak gooleeysiit niny aba ng'asheega wassean jea gwarukuneegwa. 23Ak abeeda giliwas sii meeleeysiina iit sibaneeda gajeenuus gwaheelli buuneeda.’ 24Nea sibanga sean balool, ng'eada Samweeli ea gea duubu geashtaannyi, earaga gwargu iitteaba askweajoojusu. 25Agooga goowoschi balloojiga sibanga ea helleesiinda ghayi adaw Aseetta ghweanigeagwa, nea gwayeeshsha Abrahaamu, ‘Aba jeattaang'u gayghwanyas fuga sean bea muunda ng'eanyiida ghawooda.’ 26Iiduw nea niduudu Aseetta soomjeandaannyi, goojeakta niny gaweesa fuga madeeda, ak abeeda gabadiischeesa giliwas sii aba jeedeang'wa arinnana jeeda munyasnachcheekkeagwa.”

Currently Selected:

Gadiyeeda Giijasoodiga 3: DTGANT09

Highlight

Copy