Gadiyeeda Giijasoodiga 5

Ananiya ea Safira

1Ghayi gwanda siisi suguura Ananiya ak gwandeawa gatmoodaannyi suguura Safira, ghwashaayda haleanjeeda nyaawa mwaatkwa, 2iiduw nea ghwanal gatmoadaannyi ghafuy haleanjeeda mwaatkwa, ak gweadu mwaatkwa ak ghwayiin geattinga giijasoodiga. 3Ghwalamda Betro ak gwayeeshsha, “Ananiya ghwasaan andaginung' goobal guroroadaang'u Shattaani ea ghwanung' reenganna Gurorooda Ghaydit ak gifunyi haleanjeeda mwaatkwa bea madamnyeandean? 4Madamnyeanda damanda mii shaaydaawana, abeeda mii daang'u? Ama ning'atta sheaydeayda, abeeda haleanjeeda ea manda geattingaagu? Abeeda ginyastiin gideaba gaysina ng'asheanji aba jeeda guroroadaang'u? Ang'iing'i mireenganni buuneeda gireenganayi Aseetta.” 5Iiy Ananiya ng'asheesu, ghoabeada ak ghami. Hean iiyi buneessean ghabeal muchchi. 6Ng'atta ghapka ghearemmanga ak geakwealsa hang'da ak geerutta jarooda ak geayat eebuy.

7Iiduw nea ning'atta roobuut samwagu bea aseetta ghwahidu gatmoadaannyi jeeda gheeda, nea mwanala gidanupnu. 8Ng'atta gwayeeshsha Betro gatmooda, “Rukunean monneeda oashaaydaawi madamnyeanda gwandeenu?” Gwayeeshsha gatmooda, “Ea gwadeenu.” 9Ghwalamda Betro ak gwayeeshsha gatmooda, “Ghoanyastiin gideaba gajahelleesiina duwaawi ak goosimnyi Gurorooda Ng'uttamiida? Ng'ulla, geeshanga fuga buy siyeadaang'u gwanda gidaghuut, ak gaygooruuttaneey jarooda earang'iing'i.” 10Deagheatta goobeedeaysa ng'eanyi madeeda geeshangaaschi ak ghami. Yamu geat gheareemanga ghwahidu nea nimi, ak geeruutta jarooda ak geebung'sa murdeeda siyeadaannyi. 11Iiduw ghang'ut muwda haw muuchchi ganiiseeda sean ea fuga sean iiy iitteaba ng'ashsheesu.

Gwadeagooda ea ng'ashsheega deamdeameadi

12Gwadeagwajeega saang'a ea ng'asheega deamdeameadi geesissa bugusta buuneeda nea gwasin geattinga giijasoodiga. Nea abeeda abwadageat sean aba Dodooda Sulemaani. 13Ak ea manda aba jeedeaba fukka siida badaksa guyeedeaba fukka, amaduw ghoang'ng'waay buuneeda muuchchi ak gwasissa mureeda. 14Ghoahaada muuchchi fuga mwas ak gooheadeesa Ng'uttamiida, fuga was emeetuw headiga ea gadeemga, 15ea iissa eeyibwak ea easar fuga miyeani eayiin gheatkweakka naweadinga, ak geanung' gwalil appadahuukka bulaleenga ea likkajeega, ama abeeda hidu Betro earaghanyi goojiroon jirooneadaannyi buuneeda mwaatkwa. 16Ghabat geat fuga leabu mujiinajeega neaweesa Yerusaleemu, nea gweadu fuga miyeani ea fuga beardooschi meangeenda, ak geahaap sean.

Giijasoodiga geaghabwas

17Ng'atta ghang'eat ashoohoochcheanda haw sea fuga sean mideawa, nea fuga mwaatkwa was Sadukayajeega, hean gwashissa ghaang' 18ghoang'ng'waay giijasoodiga ak geayiin ghealooniga. 19Iiduw eawa ghwahidu malaykajeanda Ng'uttamiida ak goottin gidaghuutta gheeda ghealooniga; ak goruutta jarooda ak gwayeeshsha, 20“Aweayeena ak ghoominaadi aba jeeda gheeda Sibatta Aseetta ak gooruksi buuneeda ng'asheega sean bea eaweesuun.” 21Iing'atta nea niyiiy ng'asheesu, muchchu gaweay jeeda gheeda sibatta Aseetta askweari ak goonealshi.

Ng'atta ghwahidu ashoohoochcheanda haw sea fuga mideawa ak gaguursa gweargwa girgweada ea fuga sean argweaji bea Israeeli, ak goojeakta gaweay ghealooniga gweadu fukka. 22Hitta fukka heesiin, ea mwanyasana saawa ghealooniga, gwayamu geat ak ghoadaw iitta, nea gwayeeshsha, 23“Geehissi ghooriidida siratiisa buneedean nea radaat nea furischoodiga ghamiinaada aba gidaghuudajeega, ama siittinnyi ea meanyasani eara sih.” 24Iiy shirikkarajeanda haw ambal gheeda sibatta Aseetta sea ashoohoochcheanda haw ng'asheesu, ghahamng'eanyi appadahuukka nyaawa, nea gwayeena ng'asheesu gayghoaw naaha. 25Deagheatta ghwahidu sii aba geshangiga ak gwayeeshsha, “Fugigeanji heetta oojaksi ghealoonigean, ghamneawa gwanda jeeda gheeda sibatta Aseetta ghwannaal buuneeda.” 26Ghang'eat shirikkarajeanda haw nea goodeay shirikkareadaannyi ak gaweay ama hitta geeyeadu saawa nea meang'ng'wanyana uurda, aba gideaba ghoawal ea mafutteewana buuneeda lagheanga.

27Iiduw nea siyeadu saawa, geanung' ghamiinaada aba madeeda girgweageeda. Ak ghoang'eat ashoohoochcheanda haw ghoanyaash nea gwayeeshsha, 28“Ghwasaan nea geaheawi gideaba gajoannaala buuneeda aba gheawung'su, ak ghamneawa ea noannyiichchi Yerusaleemu ginealshoodeang'wa aba gideaba googasay ayeanni foojeandeaba siisi badahuukkaasa.” 29Ghwalamda Betro sea giijasoodiga ak gwayeeshsha, “Gamiiseasa gideaba gajeawwala gheang'da Aseetta mwasamwa siida. 30Aseetta ghweanigaasa gooduudu Yeesuuyda ghayi onuuschi aba damanda ongoorsiini uhuuda geettean. 31Nii deaghayi adiing'u Aseetta gil ak gawa geattindaannyi bea dugwa ak ghoaw siida haw ea lealnoochcheanda, ak ghwanung' gwaduukuuna fuga Israeeli ak geesamsa ring'eega. 32Aseasa geewoschi muushoodigeaba ng'asheesu, ak gwasnu eara Gurorooda Ghaydit adaw Aseetta fukkeanji sissa niny mureedean.”

33Iiy fukkeanji ng'asheesu gwanyareesi muuchchi, ea gagasa gwanuus saawa. 34Hean gwanda Farasayajeanda girgweageeda suguura Gamaliyeeli, was ginealshoochcheanda deaweeda, adawi buuneessean mureeda, ng'atta ghamiinaada ak ghwanung' erruutta buuneeda jarooda gilinuwaas. 35Ama ng'atta gwayeeshsha fukkeanji, “Ea fuga Israeeli, ang'ulla muuchchi gichchea ahinda fiisu. 36Nea damanda mii ghwahinna askwearjoojiga ghang'eat Dewdas, nea ghoahiimu geaw gideaba niny gili, nea niny gaba jeedeaba fukka, ramagu ghwahitta bughalaji ang'waniin, hit godeayi sea niny; amaduw gealach gheatta sea fuga sean aat geeshta ak geattaarda ea ghoaw haleanjeeda mwadaagha. 37Iing'atta niny ghwahidu Yuudayda was siida Galilaayaan aba askwearjoojikka bea iittooda buneedean ak ghwaat buuneeda mwaatkwa; ak eara niny ghami, nea fuga sean aat geeshta ghwadarda. 38Asi aba damani bea ghamneawean gaydayeeshshiineegwa, ohhelleewana geat fiisu ak ghoanung'waadi; aba gideaba badiini ghana fughareani ibea buuneeda, gayghoabeada; 39ama iileabu heeda Aseetta, ea mwajoommuusa abwaanya fiisu aba gideaba gajiiduw geejeeng'u gideaba gosheang'nyeewi Aseetta!”

40Ng'atta geesin gidagasa, iiduw nea geeguursa giijasoodiga, geabwar amahit geeruksa gideaba adagudoannalli buuneeda aba gheawunga Yeesu, iiduw geesiksa gaweay. 41Gwaritta ak ghang'amwa madeeda girgweageeda, nea gahoosan aba gideaba gamiissa sawanadeeda aba gheawunga Yeesu. 42Nea galeagasean iissa aba jeeda gheeda sibatta Aseetta ea aba ghoah ea mii ghwanung'waada ginealshooda ea rukkwiideayda Yeesu gideaba Gristohi.

Currently Selected:

Gadiyeeda Giijasoodiga 5: DTGANT09

Highlight

Copy