Gadiyeeda Giijasoodiga 16

Dimotteo goodeay Baulo ea Sila

1Iiduw ghwahitta ng'eanyiida Derbe ea Listra. Nea abeeda gwanda hoowa ginealaneeni suguura Dimotteo, was balleanda gatmooda Yahuudi mideawa masaweega; nea ghwaan gaba emeeda suguura Yunaani. 2Nea abeeda ea nimuuwwu fuga siduupcheewi mida Listra ea Ikkoniyo ng'asheagaaschi. 3Baulo abeeda gagasa gideaba gaygoodeay sea niny; hean ghwaat ghasmeahooda aba fuga Yahuudi mida hooweanji, aba gideaba ghwanal sean gideaba ghwaan gaba emeeda Yunaani. 4Damanda beawa nea gwasik jeeda mujiinajeegean, hean ghoadaw gang'ul ng'asheega gasa giijasoodiga ea gweargwa aba Yerusaleemu. 5Hean ghwanyas ganiisajeega uurda aba masaweega, ak ghoahaada monneeda nyaawa galeagasean.

Baulo ghwadaa gissiihiimsa aba Droa

6Iiduw geesik ng'eanyiida Fregiya ea Galattiya aba gideaba ghaheawa Gurorooda Ghaydit gwarukwiida ng'asheanda aba ng'eanyiida Asiya. 7Iiduw nea geehitta monghooda ng'eanyiida Musiya, geegasa eeweay Bituuniya, hean amoadawa gheatta beatta Gurorooda Yeesu; 8hean geang'atta nea geesik ng'eanyiida Musiya, ak gaweay ea ghwahitta ng'eanyiida Drowa. 9Hean eaweedida geehiimsa Baulo siyagi bea ng'eanyiida Makkedooniya nea ghamiinaada aba hoowa ak gamus Baulo nea gwayeeshsha, “Ageawuni beenni Makkedooniya weadeasa.” 10iing'atta nea ghwadaa gitta siihiimsean, deagheatta geegasayi eng'eada eweaya Makkedooniya, eahhiida ng'asheega gurneasa Aseetta erukusiina saawa giijasta miy.

Lealnooda Lidiya aba Filippi

11Sing'eadi Drowa hean geeding'di maleambooda ak geelaji bugusta basooda ak geeweayi ea eehitta Samodrake, ammuchchu geahitti ng'eanyiida Neapoli, 12sing'eadi hoowa geehitta ng'eanyiida Filippi, mujiineeda haw mida Makkedoniya, was ng'eanyiida ambal Ruumi. Hean geeppiidi mjiineetta eawoojusu ng'ay, 13hean eaweeda Sabatto geeweayi ea eritteawana gidaghuut ak geeweayi ghuutta eenda, nea geeghanyi gideaba gwanda heeda jea eamwaashana Aseetta; hean geppiitpiichchi ak geeppaloolji gadeemsu bassageat hoowa. 14Abeeda gwanda gatmoanagi aleeyseasa iit suguura Lidiya, leabu mujiineeda Diyattira, nea gwasheahhiida hang'weakka oomng'i, haw sheayeat ak gabada Aseetta. Hean ghwajaat Ng'uttamiida guroroadaannyi goleeysiit muuchchi ng'asheega rugu Baulo. 15Iiduw nea sippattiisan, sea fugeaba gheannyi, hean gaguurneasa nea gwayi, “Iinoadaayi gideaba aniini geawoschi doabiiwaat aba heeda Ng'uttamiida, abeeda ghoapkaannyi oppiidana gheenyu.”

Ghealooniga aba Filippi

16Ghayi eaweechcha nea geeweayi heeda sibatta Aseetta, geeroonnyeewi hudi was ging'ng'oonyaneeda mideawa gurorooda ng'ushteayda, nea inyeessa aba ng'ushtaaydaannyi ghwanung' ghwanyas meanang'oodigaaschi lappiyeeda saang'a. 17Hean ghwaat hudida geeshta Baulo ea geeshteanya nea goojuur nea gwayeena, “Fiisu soomjooga Aseetta haw gil, ak ghapka gwarukuneegwa naweeda lealeanooda.” 18Seareedida bea hudideani inyeesa gwasnu askwearjoojiga saang'a, gwaybwak ea ghwanyareas Baulo, ak gwayamsa geaw meang'nyeandida bea eendean ak gwayeeshsha, “Aba gheawunga Yeesu Gristo geayi ritteawana hudi.” Hean gwaritta aba geeshangiga.

19Daa meanang'oodigiga bea hudideaniin ng'asheanji ea gideaba naweedida eawoojusu nyassa meanang'oochcheandumeedean biissa mutgwanda, hean geang'ng'waay Baulo ea Sila ak geengiir ea ehiitta jeannaada was madeeda fuga hees ambaliischi; 20ak iiduw geayaat heeda fuga laja girgweaguutka ak geeyeeshsha, “Fiisu fuga Yahuudi gil ak ghwadattas mujiineedeanya. 21Aba gideaba gwarukwiisa buuneeda deaweedeeda mammiiseasa aseasa fuga Ruumi gideaba gajeeng'ng'waanya ak geeyaachchi geeshta.” 22Ghwaat geeshta nyaawa emeetuw nea ninyareas nea geegasa eabwar ak gageanu fuga laja girgweaguutka ak ghwanung' efakta hang'weakka Baulo ea Sila aba uurda ak ghwanung' ebwar aba ng'aritka. 23Iiduw nea nihit bayiiga nea sisawan muuchchi, hean geejaksa ghealooniga, ak geeyeeshsha furiischoochcheanda gheeda sirattiisa buuneeda gideaba furiischeena muuchchi. 24Iiy ng'asheanji, hean gageanu ak ghwaat jeeda ghooriida duukteawa niirja mida hoowa bea gahiin ak geerassa geeshanga nyaawa gumsheekka daranajeega.

25Hitta bugusta eaweeda abeeda Baulo ea Sila ghamwaash Aseetta nea gwasarman sarmeeda gigheambiitta Aseetta, nea gooleeysiit buneesuurja bea ghealooniga, 26deagheatta gwasimgeaw ng'eanyiida, ak ghwanung' gwadumdum sindeetta gheeda sirattiisa buuneeda; miighoaw gil goottina gidaghuudajeega ak goottineada eara munyalaalajeega siratta fukka bea ghealoonigean. 27Iiduw nea ghang'eat shirikkarajeanda gwachchi furiischi nea ghwadaa gidaghuut ajaadaat, hean gafagu bwaangeadaannyi ak gagasa gwanuus geaw, nea ghaghay gil nuwaapta buuneeda mida ghealooniga. 28Hean gaguurda Baulo nea goojuur nea gwayeeshsha, “Adinuusi geaw aba gideaba aseasa geendi hiji sean.” 29Hean gaguurda shirikkarajeanda eyeadu gheaboong'nyeanda amahit ghafwach gawa gah, nea ghabwaadan aba muuwda ak goobeedeaysa madeeda Baulo ea Sila, 30hean gooruudu jarooda ak goobearsa nea gwayeeshsha, “Ea fuga Mureeda, ak daysin naaha ijea dalaalaan?” 31Ghwalamda saawa ak gwayeeshsha, “Mwasa Ng'uttamiida was Yeesu, ak gajeelealneey, ea fugeaba gheang'u.” 32Hean geerukusa ng'asheega Ng'uttamiida niny ea fugeaba gheanyi sean. 33Iiduw ghwaat shirikkarajeandida ghoah ak goohuun deaneaduutkeaba fukkeani eaweedida, hean geeppattiisan aba geeshangiga niny ea fugeaba gheanyi. 34Ng'atta ghwaat shirikkarajeandida gheanyi, ak ghoadaw gichchea ghwaak; ak gahoosan sea fugeaba gheanyi aba gideaba nimwas Aseetta.

35Muchchu sakteayda, goojeakta fukka laja girgweaguutkean shirikkara nea gwayeeshsha, “Aweayeena ak goosiksi fukka mida ghealoonigean.” 36Gawa shirikkarajeandida gwachchi furiischiin ak gwarukusa Baulo ng'asheega nea gwayeeshsha, “Niijeagu fukka laja girgweaguutkean eesikseegwa; asi arinni ak gooweayi nea goobea hoyyoo.” 37Ghwalamda Baulo ak gwayeeshsha, “Aseasa geebwareasa aba madeeda buuneeda, nea meergweakseasa, ak gabiissa aseasa eawosa fuga ng'eanyiida Ruumi, hit geejakseasa ghealooniga; ak ghamneawa geegasa esikseasa aba makcheameeda? Manda! Nung'waada ghapka saawa gwasikseasa.” 38Goodeelsa shirikkarajeega ng'asheanji heeda fuga laja girgweaguutkean, iiduw nea ghwanyas iitta gideaba fuga ng'eanyiida Ruumi gil; 39ghapka gamearmearani. Gooruuna gah ak gwayeeshsha abeawana jeedeaba mujiineedida. 40Iiduw nea gwaritteawa ghealooniga ak gaweay gabareassa Lidiya; hitta nea ghwadaa fuga duupchi, hean goomajeek amahit ghang'eang'eat gaweay.

Currently Selected:

Gadiyeeda Giijasoodiga 16: DTGANT09

Highlight

Copy