Gadiyeeda Giijasoodiga 17

Aba Desalonikke

1Muchchu ghang'eatng'eat gaweay nea gwasik ng'eanyiida Amfipooli ea Appoloniya, ghwahitta ng'eanyiida Desalonikke, mida ghooriida sinnealshachcheewa bea fuga Yahuudi. 2Hean gawa Baulo jeeda ghooriida, gawuurji gideabeawoojusu bea geallaan, ak gwasheang'dooschi sea buuneeda aba ng'asheega Ng'ooruutka Ghaydit eawooji diktam ea agi; 3abeeda gwarukusa buuneeda gidanyaah ng'ooruutka bea gideaba Gristo gayghwanyas hang'weaniidooda ak gwaduuna miyeeda, ak gabiikta gwayeeshsha, “Yeesuheeni ghamneawa earukuneegwean, Gristo gil.” 4Hean iiduw ghamwas fuga mwaatkwa ak ghwaat geeshta Baulo ea Sila; ak eara fuga saang'a bea Yunaani awali gheang'da Aseetta ea gadeemga saang'a was fuga hees. 5Gwashissa ghaang' fuga Yahuudi, ak gaweay ghamwaghaada fuga munyas seara saang'a aba jeeda mujiini ak gooyuuk buuneeda, hean geeng'eessa gheeh Yason, nea geegasa erruudu jarooda ak geayaat madeeda buuneeda. 6Ama iiduw nea mudeanyas, hean geengiir Yason eayaat sea fiisu ng'ay siduupcheewi ak geayaat ea eehitta madeeda sugoodiga mujiini, nea geechchuur nea geeyi, “Fiisu yam ng'eanyiidean nupka eara hiji, 7ak Yason ea nideapta fiisu; ak fiisu seaniin eanisin ng'asheanda meatteayi sea digheanda sugoochcheanda suguura Gaysaari, nea gwayi, gwanda sugoochcheanda nuut suguura Yeesu.” 8Hean gwahirbaban sugoodiga ambal mujiin iiyiy ng'asheanji. 9Iiduw geeyaaga ghoorjooda Yason ea fugaaschi, amahit geesiksa gaweay.

Aba Berooya

10Deagheatta gojeakta fuga siduupcheewi Baulo ea Sila eawa gaweay Berooya; hean hitta hooweanji geeweay jeeda ghooriida sinnealshachcheewa bea fuga Yahuudi. 11Fugeaba ng'eanyiitta gooleehiidiit muuchchi mawuurji fuga ng'eanyiida Desalonikke, aba gideaba ghwadeapta ng'asheanda aba hooseaneega, ak ghwasikkiideawa ng'ooruutka ghaydidi galagasean ghwadaa gideaba ng'asheega huumwa gil. 12Ak ghamwas fuga saang'a, aba jeedeaba fiisu eara gadeemga mii ng'ay was fuga hees bea fuga Yunaani ea headiga. 13Iiduw nea ghwayiiy fuga Yahuudi bea ng'eanyiida Desalonikke gideaba Baulo gwarukwiida ng'asheega Aseetta earaba ng'eanyiida Berooya, geeweay ama sihitta geeyuuk buuneeda nea geang'uda foolayda. 14Deagheatta gojeakta fuga siduupcheewi Baulo gawa ng'eanyiida ghuutta basooda nea Sila ea Dimotteo saawa goobiida hoowa. 15Iiduw fukka ghwanyawa adoabiiw Baulohiin ghwaat ea ghoahiitta Adene; hean ghwanung' eyeassa Sila ea Dimotteo, gideaba abeanni alamwajaana hean ghang'eatng'eat gaweay.

Aba Adeene

16Damani ammuukghna Baulo saawa aba Adeenehiin, abeetta ea ninyareas muuchchi aba gideaba ghwadaa mujiineedida nea saang'a duguuga sinung' ghoaw aseechcheekka. 17Aba damani mideawa jeeda ghooriida sinnealshachcheewean hean gwasheang'nyi sea fuga Yahuudi ea Emoojiga suurja awalli gheang'da Aseetta, ea fuga naadi galagasean ea fuga mida hoowa. 18Iiduw gwaroannyi sea fuga suguura Eppikuriya ea Stoigi mideawa fughareenga. Hean gwayeeshsha fuga mwaatkwa, “Siisi ajuuriin gagasa gwayiin?” Gwayi mwaatkwa, “Iisung'ulayi ea rabascheanda rukkwiida giijasta aseechcheekka meenala,” aba gideaba gwarukku ng'asheega Yeesu ea ng'asheega dunnooda. 19Hean geang'ng'waay amahit geayaat heeda Areopago, ak geeyeeshsha, “Geegasayi eanala gidawas ginealshooni eesh gwachchi igooniin? 20Aba gideaba ng'asheesu iyeaduun aba idigaasa gidabunu gil; asi geegasayi eanala deayeegeaba ng'asheesu gidawas.” 21Fuga ng'eanyiida Adene ea rabasta abiitta hoowa ea mandeawana gheatta jea gwasna gil nuut geaghus rukwiideayda ng'asheega ea giileeysiindeabiit bea ng'asheega bunu.

22Hean ghamiinaada Baulo aba madeeda emeeda mida hiji suguura Areopagohiin ak gwayeeshsha, “Ea fuga ng'eanyiida Adeene ghaadaayi gideaba agooga ghoabwariinyi muuchchi ng'asheega diini. 23Aba damanda ang'attaawi, ghaadaayi haleanjeedeang'wa bea ghadoweeda, ghaadaayi aba heeda wagiida heeda sung'oorsa ng'asheesu, ‘Heeda aseetta meadaaha.’ Siida obadayi nea moanaliin, dea earukuneegwa iittaannyi. 24Aseetta ghayi bwat muunda ng'eanyiida ea haleanjeesean, niny Ng'uttamiida humng'eeda gil ea ng'eanyiida, niny moobiitteena jeeda gealga sibatta Aseetta sideasa geattinga, 25ak niny ea moammu geattinga buuneeda gagadiiyeesa, gawuurji gili niny gasa gil, deagoona eaweega gil, ak ghoadaw buuneeda gisimeanda ea haleanjeesean. 26Ak gwasin niny aba siyagi emoojiga sean was buuneeda ak ghwanung' goobiida badayda ng'eanyiida, ama ng'atta nea niidaw damannyoojiga ghayi bay gwarukuta niny, ea monghajeega gibinda nyaawa. 27ak abeeda gagasa Aseetta earappeadi rar gideaba eara ghanyi ghawaas niny ak ghwanyas niny. Nea niny ea mii sheageewa siida wassean.

28‘Iisindi jeadaannyi aseasa gendeawi eaweega, ak geeweelweelli, ak gendeawi sasanuukkaasa;’

gawuurji gidanyaashta siyagi aba duumdaannyi nea gwayi,

‘Aba gideaba geewoschi diibigaaschi.’

29Ak aseasa iisiwoschi diibiga Aseetta, ea mwahida gideaba geenung' gawuurji Aseetta lagheanga meang'meang'i, ghana lappiya, ghana lagheaneeda, sin siida ea ghwadaamdaam aba gearinda. 30Damanda lendeeda ninaawa geaw Aseetta, ak ghamneawa gwarukusa buuneeda gideaba aduukkuunana ring'eegeagwa, 31aba gideaba nisin eaweeda jea goorgweaksiina fuga muunda ng'eanyiida nea ghoadoabiiw, aba siitta ghayi loat ninyiin, ak ea niidaw buuneessean ng'asheesu nea goomajeek aba gidaduutteayda aba jeeda miyeeda.”

32Siyiiy iitta ng'asheega duunnooda miyeeda, hean gwajuuga nwaatkwa; nea mwaatkwa gwayeeshsha, “Geegasayi elleeysiiniit gichcha ng'asheanji.” 33Hean ghang'eat Baulo gwanung'usa heeda fukka. 34Iiduw ghwaat geeshtaannyi fuga mwaatkwa ak ghamwas, aba jeedeaba fiisu siyagi Dionisiya gil was siida gheeda girgweageeda bea Areopago, ea biissa gatmooni suguura Damaari ea fii suuk mideawa.

Currently Selected:

Gadiyeeda Giijasoodiga 17: DTGANT09

Highlight

Copy