Gadiyeeda Giijasoodiga 18

Aba Goriinto

1Ng'atta ng'asheesu ghang'eat ghabeawa Adeene ak gawa ng'eanyiida Goriinto. 2Hitta hoowa ghwanyasa siispa Yahuudi suguura Akkila, ghayi sijiilsa ng'eanyiida Bontas, nea ris gwaleabu ng'eanyiida Italiya sea gatmoadaannyi suguura Brisila, aba gideaba Glaudio abeeda ninung' gwaritteawa fuga sean bea Yahuudi ng'eanyiida Ruumi. Hean ghang'eat Baulo gawa ghwadaa fiisu; 3iiduw aba gideaba gwasin gadiyeanagi gopteada sea saawa, ak gagadiiyi, aba gideaba gadiyeeda nyaawa sinooda udahabaschajeega. 4Inyeessa eaweeda Sabatto, gawa jeeda ghooriida sinnealshachcheewa ak gabalool nea ghaghurghur fuga Yahuudi ea gea Yunaani.

5Iiduw nea ghapka geaba Sila ea Dimotteo nea gwaleabu Makkedoniya, ghoang'eat Baulo rukwiideayda giijasta, nea gwarukusa fuga Yahuudi gideaba Gristo niny Yeesu. 6Iiduw nea ghaheawa nea geeng'ng'eawi, hean ghang'eat ghwalalakta hang'weakaaschi nea gwayeeshsha, “Foojeandeang'wa gagasa goobiida iheengeagwa! Aniini meandeawani gidamuy. Ak gidang'eada ghamneawa gaydaweesa Emoojiga.” 7Ng'eada hoowa gawa goobiida gheapa siisi suguura Ditto Yusto, was siida bada Aseetta, nea gheedeaba siisi gwanda murdeeda ghooriida sinnealshachcheewa. 8Nea Grispayda was siida ahaaghwa ghooriida sinnealshachcheewa, ghamwas Ng'uttamiida, sea fugeaba gheanyi sean; nea eara fuga Goriinto iiy gidabaloolda Baulo ghamwas ak geppattiisan. 9Ghayi aweanagi gwayeeshsha Ng'uttamiida Baulo aba jeeda girgweatka, “Adibeali, rukwiida giijasta miy nea adisiindi. 10aba gideaba aniini ea ang'iing'i geendeayi, manda siisi jea ghwasannyi ghana gwasawannyi; aba gideaba hiji bea mujiiniin geandeawi fuga saang'a.” 11Hean goobiida ng'eanyiitta ea gwaduulu gweanyagi ea shealah nea ghoanaal ng'asheanda Aseetta aba jeannyaawa.

12Ak damanda waseewa Galiyo sugoochcheanda ahaghwa ng'eanyiida Akkaya, gaguuyi fuga Yahuudi ak gang'eessa Baulo ak geayaat gheeda sirgweachcha, 13nea geeyi, “Siisi ghaghurghur buuneeda ghabwat Aseetta aba naweeda mwaada geeshta deaweeda.” 14Damanda mii gabaloola Baulo, ghwalamda Galiyo ak gwayeeshsha fuga Yahuudi, “Gwachchi inyeeda eanisin gidamuy ghana ng'asheanda mwadoabiiwa, abeeda gaydealeeyseegwa iit, Ea fuga Yahuudi; 15ama sughus ng'asheega sheang'nyeeda bea ng'asheega ea gheawunga deaweedeedeang'wa, adaaha agooga nea goobeayi geat; aniini ghaheawi doaw sichchea gorgweakkiisa ng'asheesu.” 16Ak ghahoan gooruutteawa jeeda gheeda sirgweachcha. 17Hean geeng'eessa sean ak geeng'ng'waay Sostene, was siida ambal ghooriida sinnealshachcheewa, ak geebarsa madeeda girgweageeda. Nea Galiyo gang'ula nea maduupeewana gil ng'asheanji.

Baulo gabiikta Antiyokiya

18Iing'atta ng'asheesu gobiida Baulo hoowa eawoojiga saang'a, hean ghang'eat gwanung'usa heeda fuga duupchi ak gawa ng'eanyiida Sirya, nea godeayi Brisila sea Akkila. Ng'atta ghwareakghu budeagaaschi aba Gengreya, aba gideaba ghayi gwandeawa radannyeanda. 19Gabiikta ng'eanyiida Efeeso, ak gwanung'usa saawa hoowa; hean gawa niny jeeda ghooriida sinnealshachcheewa ak gwasheang'dooschi sea fuga Yahuudi. 20Hean geemus endeayi gilgeaw, ak ghaheawa. 21Damani ng'eada gawean gwayeeshsha, “Gaydabiigu heedeang'wa gichcha ng'eang'deang'wa iimwas Aseetta.” Hean ghang'eat gwading'da maleambooda ak ghabeawa Efeeso.

22Gawa amahitta ng'eanyiida Gaysariya, ghwararang'aana ak gawa googeechchi fuga ganiisa, amahit ghang'eat gawa Antiyokiya. 23Hit goobiida hoowa eawoojusu ng'ay ak gawa nea ghabeawa daroar ak gawa daroar nea gwasik ng'eanyiida Galittiya ea Firgia, nea goomajeek ginealanga.

Appolo aba Efeeso ea Goriinto

24Ghayi gwanda siispa Yahuudi suguura Appolo sijiilsa ng'eanyiida Aleksandariya, ghwahidu ng'eanyiida Efeeso. Siisi abeeda baloolaneeda gil, ak gabiissa ghwanal muuchchi ng'ooruutka ghaydidi. 25Aba gideaba niny ghayi sinnaal naweani bea Ng'uttamiidean; ak ea guduashang'shang' guroroadaannyi, hean ghoanaal muuchchi nea gabaloola badayda Yeesu, nea ghwadoabiiw ak siisi ghwanal gibattiisanda ghayi bea Yohaana akghwahit. 26Hean ghoang'eat balooldaannyi aba muraneandumeeda aba jeeda ghooriida sinnealshachcheewa; hean iiduw nea ghwayiiy Brisila sea Akkila ghuuttaannyi, geayaat ak geennaal muuchchi ng'asheega Aseetta. 27Iiduw nea gagasa ghoaghaaw gawa Akkaya, gageanu fuga siduupcheewi ak gommajeek niny, ak geeng'waar barawajeanda gaweesa ginealangiga ghwadeapta siisi. Damanda hittaawa hoowa, ghaweat fukkeanji muuchchi ghayi mwas aba dagheerjeandumeedean, 28aba gideaba gabalool nea mwaawala gil ea ghwajoar fuga Yahuudi aba eeshpwaara, nea ghoahiimu aba ng'ooruutka ghaydidi gideaba Gristo niny Yeesu.

Currently Selected:

Gadiyeeda Giijasoodiga 18: DTGANT09

Highlight

Copy