Gadiyeeda Giijasoodiga 15

Girgweageeda aba Yerusaleemu

1Iiduw ghapka fiisu ng'ay leabu ng'eanyiida Yahuudi ak ghoanal fuga siduupcheewi, nea gwayeeshsha, “Imeayaadeagwa ghasmeahooda gawuurji gidaghayi bea deaweedeeda Muusa, abeetta ea majeelealneegwa.” 2Ng'asheanji ghwanung' gwardu sheang'nyeeda ak gobalool Baulo ea Barnaba sea saawa, ak gealoat Baulo ea Barnaba sea buuneeda mwaatkwa ak geanung' gaweay Yerusaleemu heeda giijasoodiga ea heeda gweargwa ghoanyaashta ng'asheanji. 3Iiduw nea goojeakta ganiisa gaweay gwasik dageascheeda Foynikke ea dea Samariya, nea gwarukku gideaba fuga Emoojiga niyamsa geat Aseetta, ak gahoosan buuneessean appadayda fuga siduupcheewi. 4Hean gaweay amahitta Yerusaleemu, ghwadeapta fuga ganiisa bea hooweanjiin ea giijasoodiga ea gweargwa, hean geerukuta ng'asheega sean sin Aseetta aba badahuukka nyaawa. 5Iiduw ghang'eat fii suuk mideawa masaweega was fuga Farisayo, ak gwayi, “Ghwahit gideaba gajeeyaat fiisu ghasmeahooda, ak geerukusi ghoang'ng'waay deaweedeeda ghayi bea Muusa.”

6Hean ghabwat geat giijasoodiga ea gweargwa ak gabaloola badaydeaba ng'asheanji. 7Geebalool ea gageawiit baloolda, hean ghang'eat Betro ak gwayeeshsha, “Ea fuga eaduupcheewi, agooga ghoanalli gideaba ghayi ammwadi Aseetta ghwaloadan aba bugusteang'wa, ak aba ghuutteanyu ghwayiiy fuga Emoojiga ng'asheanda giijasta miy ak ghammwas. 8Nea Aseetta nal guroruunatka buuneeda gamuwwu ng'asheanji ak ghoadaw saawa Gurorooda Ghaydit gawuurji gidaghayi gondaneasa aseasa; 9ak ea masna shiitmeeda aba aseasa ea saawa, ak goohuun guroruunatka nyaawa aba masaweega. 10Asi ghwasaan andagoosimsimnyi Aseetta ak ghoayiinnyi gheatkweakka ginealanga jokki nea eara ghweanigaasa ghana aseasa ameammuusi? 11Ak geamwaschi gideaba aseasa gajeelealneasa aba naweeda dagheerjeandumeeda Ng'uttamiida was Yeesu ewuurjeewana saawa.”

12Gwayi buuneessean saw; ak gooleeysiit Barnaba ea Baulo nea gwarukwiisa buuneeda gwadeagooda ea ng'asheega deamdeameadi sin Aseetta aba jeannyaawa aba jeeda fuga Emoojiga. 13Ahiit baloolda nyaawa, ghwasha Yakkobo nea gwayeeshsha, “Fuga eaduupcheewi, 14Simon ghwasaan nea nirgu gidaghayi deaptaayda Aseetta fuga Emoojiga, ak ghwaloat fiisu ng'ay aba jeannyaawa ghoaw fugaaschi. Ak aba nii ghamwas ng'asheega sibanga, gawuurji gissung'waarda. 15Nea ng'asheanji ghamwas muuchchi ng'asheega sibanga, gawuurji gissung'waarda,

16‘Iing'atta ng'asheesu gaydabiigu,

ak gaydadeas gichcha gheedida bea Dawdiin, ghayi abeadaan;

gaydabiikta dadeas heeda nyar,

ak gaydanung' ghamiinaada,

17ak buneesuurja gaygagasa Ng'uttamiida,

sea Emoojiga sean ghayi sigurriisiina gheawungeasu,

18gwayi Ng'uttamiida, ng'eaha siida ghayi nung' ghwanal buuneeda ng'asheesu ammwadi.’

19“Asi aba girgweageedeanya nihi, adootteawiichchi fuga Emoojiga yamsa geat Aseetta, 20ak ging'oorsi gideaba adoayaaji hamichchoojiga mideawa ririnnyeanda gidamawosa Aseetta ak ghwasaja geat hiseadayeandumeeda ea gida sing'ng'waay ghuutta ea foojeanda. 21Aba gideaba ghang'eada seaygoojiga gwandeawa Muusa fuga rukkwiida ng'asheagaaschi aba jeesinga giliwas mujiini, iissa geassoamwa gilinyoo ea sabatto gil aba jeesinga ghoorajeega sinnealshachcheewa.”

Barawajeanda sing'oorsa fuga Emoojiga mideawa masaweega

22Ng'atta ghwadaa giijasoodiga ea gweargwa gideaba amiy ea fuga sean bea ganiisa, gideaba ghwaloat fii iyyeenya aba jeannyaawa ak ghwanung' gaweay ng'eanyiida Antiyokiya sea Bauoo ea Barnaba. Hean gealoat Yuudaayda suguura Barsaba, ea Sila, ak fiisu geannaal muuchchi aba jeeda fuga siduupcheewi, 23ak ghwaat barawajeanda sung'waardunu, “Fuga eaduupcheewi was giijasoodiga ea gweargwa, heeda fuga siduupcheewi was fuga Emoojiga mida Antiyokiya ea Siriya ea Gilikiya, ghaghachcheagwa. 24Geeyiinyi gideaba gwanda fiisu ng'ay leabu ng'eang'deanya ak ghamwanmwaneagwa aba ng'asheega nyaawa, nea ghwanung' ea moapta ng'eanyi fughareengeagwa, nea ng'asheesu sin fiisuun ea meattawi aseasa, 25ak aba heedeanya amiy gideaba gajeeneajeatta gilagi, ak gealoat buuneeda ak geechcheagu ng'eang'deang'wa nea goodeana fuga subwariinyi was Barnaba ea Baulo, 26fuga ghayi ramagu gabeagu eaweega nyaawa aba badayda Ng'uttamiida was Yeesu Gristo. 27Ghamneawa geechcheagu heedeang'wa Yuuda ea Sila, ak gaygwarukuneegwa saawa ng'asheega uurji suu aba ghuusiga nyaawa. 28Ak amiy aba heeda Gurorooda Ghaydit ea heedeanya gideaba majeesareenneegwa sarean nuut geaghus haleanjeetta miseegwean: 29nea gideaba anung'waada hamichchoojiga sighadoawana gidamawosa Aseetta ea foojeanda adoayaaji bannyeega gidasing'ng'waay ghuutta ea hiseadayeandumeeda. Abeeda iyohhelleewi geat haleanjeani abeeda ghoattoabiiwji. Ebeaseayu.”

30Iiduw geechcheakta gaweay, ng'eanyiida Antiyokiya ghabwada geat fuga mwas Aseetta, amahit geettayda barawajeanda. 31Hean nea geassoamwa barawajeandida ghwanung' gahoosan aba ng'asheega ammajeek saawa. 32Nea Yuuda ea Sila, abeeda saawa ea sibanga gil, hean goomajeek fuga siduupcheewi aba ng'asheega saang'a ak ghwanung' gamajeekcheewiidi. 33Ng'atta nea nibiida hoowa askwearjoojusu ng'ay gojeakta fuga siduupcheewi nea ghabeawa weada gabiiksa fukka ghayi ajeaguun. [ 34Ng'asheesu manda jeeda ng'ooruutkeaba garay, Ghwadaah Sila gideaba ghwahit gobiida hoowa.] 35Hean iiduw goobiida Baulo ea Barnaba Antiyokiya, nea gonnealshi nea geerukkwiida ng'asheanda Ng'uttamiida, sea fii suuk saang'a.

Baulo ea Barnaba gwaheelli

36Iing'atta eawoojusu ng'ay gwayeeshsha Baulo Barnaba, “Beenni eebiikta mujiinajeega ghayi surukwiideaysi ng'asheega Ng'uttamiida, eadaaha fuga siduupcheewi gissin.” 37Gagasa Barnaba gideaba gaygoodeayi sea Yohaaneeda suguura Marko. 38Hean ghwadaa Baulo gideaba mwahida gideaba gaygodeayi siida ghayi nung'usa heeda saawa aba ng'eanyiida Bamfiliya, ak ea meadeayi saawa gadiyeeda. 39Hean gwardu sheang'nyeeda haw aba dageascheeda nyaawa ea iiduw gwaheelli; hean goodeayi Barnaba Marko ghwalach bugusta basooda ak gaweay ng'eanyiida Saypras, 40ng'atta ghwaloat Baulo Sila ak godeayi, ak ghwanung' fuga siduupcheewi ghabeawa dagheerjeandumeeda Ng'uttamiida. 41Hean ghang'eat gwasik ng'eanyiida Siriya ea Gilikiya nea goomajeek ganiisajeega.

Currently Selected:

Gadiyeeda Giijasoodiga 15: DTGANT09

Highlight

Copy