Gadiyeeda Giijasoodiga 14

Aba Ikkoniyo

1Hitta ng'eanyiida Ikkoniyo gaweay jeeda ghooriida sinnealashachcheewa bea fuga Yahuudi, ng'atta ghamiinaada ak gwarukuta ng'asheega Aseetta ak ghamwas fuga saang'a, was fuga Yahuudi ea gea Yunaani. 2Nea fuga Yahuudi suuk heawa ng'asheesu goong'uchchi buuneeda was Emoojiga suurja ak ghwadattas fughareenga nyaawa ghaheawa fuga siduupcheewi. 3Iiduw goobiida hoowa ea gageawiit, nea gabaloola meaynatta appadayda Ng'uttamiida, nea gamuuwwu ng'asheanda dagheerjeandumeadaannyi, nea ghoadaw gwadeagooda ea ng'asheega deamdeameadi jea gwasin aba geattinga nyaawa. 4Gwaheelli fugeaba mujiineedida; gea maba meatkweeda fuga Yahuudi suuk gaba meatkweeda giijasoodiga. 5Hean gagasa fuga Emoojiga ea fuga Yahuudi, ea fuga nyaawa ambaliischi ak geegasa naweeda jea esawana giijasoodiga nea geefta lagheanga, 6iiduw nea gwajeeng'u ng'asheanji gwasalda gaweay ng'eanyiida Listra ea Derbe, mida jeeda ng'eanyiida Lugaonia, ea ng'eanyiida neekkeewa; 7hit goobiida hoowa nea gwarukwiida giijasta miy.

Aba Listra ea Derbe

8Aba ng'eanyiitta bea Listraan gwanda siisi apteada bea geeshanga badeeda; ghang'eada deaghayi sijiila mii ghanyi gaweelweel. 9Siisi abeetta gooleeysiit Baulo damanda baloola; hean gang'ulla Baulo siisi muuchchi, ak ghwadaa gideaba siisi gwandeawa masaweega jea eahhaabwa, 10hean gwayeeshsha aba ghuutta haw, “Miinaadawana geeshangaagu.” Hean ghang'eat siitta aba geeshangiga ak gawa. 11Daa emeetuw gidasin Baulo, hean goojur aba ghuutta haw nea gwayi, Lugaonia nea gwayi, “Niiiseasa aseechcheekka nea gawuurji buuneeda!” 12Gaba siisi sing'assa gheawungaaschi Barnaba geeguura Seu nea Baulo, aba gideaba niny siida gwachchi balooli, geeguura Heeme. 13Iiduw ghwahidu ashoohoochcheanda gheeda sibatta Aseetta bea Seu mida ritteayda mujiini, nea gweadu heewga ea shiipka deakghweeda ak ghwayiin gidaghuutta mujiini, ak gagasa emeeda ghoadaw haleanjeeda sisappa geadi bea ghadooweedean. 14Iiy giijasoodiga was Barnaba ea Baulo ng'asheanji, hean ghabwaashaada hang'weakka nyaawa ak gwasalda gaweay jeedeaba emeetta nea gooyyeawda. 15Nea geeyi, “Buneeda, ghwasaan andagoosinnyi ng'asheesu? Aseasa geawoschi buuneeda mideawa searoojiga uurjeewaneegwa, ak geapkaannyi erukuneegwa giijasta miy, ak ghoanung'waadi haleanjeeni bea mwadaaghaan, ak gooyamsi geat Aseetta majeek ghayi bwat humng'eeda ea ng'eanyiida ea basooda ea haleanjeessean mida jeeda. 16Ghayi garay Aseetta ghwanung'waada gilinyoo ea emoojiga gil gwasin gidagasa; 17ak eara aba sarean ea mii ghwanung'waada muwwunoodeaba geaw aba ng'asheega miyaas sin, gagooneegwa roopta leabu humng'eeda ea booga aba damandaannyi, ak ghwanung' gwalang'u guroruunatkeagwa aba daghwara ea hooseaneega.” 18Eara gabalooldunu ghwaraay gideaba gajeatteala buuneeda amoadawa giijasoodiga haleanjeeda sisapa geadi bea ghadooweeda.

19Iiduw ghapka fuga Yahuudi leabu ng'eanyiida Antiyokiya ea Ikkoniyo; ak gafoolan buuneeda, ak geefutta Baulo lagheanga ak geengiir ea erruutteawa jeeda mujiini, nea geaghayi gili nimi. 20Hean iiduw nea gwaneaweesa ginealanga hean ghang'eat ak gabiikta jeeda mujiini; muchchu eaweedeabiyyeenya goodeayi Barnaba ng'eanyiida Derbe.

Biikteayda Antiyokiyayda mida Siriya

21Ahiit rukwiideayda giijasta miy aba mujiini nea ninyas ginealanga saang'a, hean ghang'eatng'eat gabiikta Listra ea Ikkoniyo ea ghwahitta Antiyokiya, 22hean goomajeek guroruunatka ginealanga, nea gobaloola gideaba oppiidana jeeda masaweega, ak gwayeeshsha gajeanyasa sawanaduutka saang'a ijea eweaya jeeda sugoochcheandumeeda Aseetta. 23Iiduw nea niloat gweargwa jea ghoahaaghwa aba jeeda ganiisa, aba mooshta Aseetta ea raditta jalooda, ghwayiin geattinga Ng'uttamiida was dea mwas saawa.

24Iiduw ghang'eatng'eat gaweay nea gwasik ng'eanyiida Bisidiya, ak ghwahitta Bamfiliya. 25Iiduw nea ghoahiit rukwiideayda ng'asheanda aba ng'eanyiida Beerge, hean ghang'eat gaweay Attaliya; 26hean ng'eada hooweanji gealach bugusta basooda nea geeding'da maleambooda haw nea geebiikta Antiyokiya; heeda ghayi siittawa dagheerjeandumeeda Aseetta aba gadiyeeda nihiit. 27Iiduw nea ghwahitta, geebwadageat ganiisa ak geerukusa ng'asheega sean nisissa Aseetta saawa, ea gidanijaatta Aseetta gidaghuutta masaweega aba heeda fuga Emoojiga. 28Hean goobiida hooweanji ea gageanu eawoojiga saang'a sea ginealanga.

Currently Selected:

Gadiyeeda Giijasoodiga 14: DTGANT09

Highlight

Copy