Gadiyeeda Giijasoodiga 13

Barnaba ea Saulo gealoat ak geechcheakta

1Asi jeeda ganiiseeda Antiyokiya abeeda gwanda sibanga, ea ginealshoodiga, nea geaba Barnaba gil, ea Simoneeda suguura siittuw, ea Lukiyoyda ng'eanyiida Gurene, ea Manaeni dea ghayi hissaheeda aba gheeda sugoochcheanda suguura Herode ea Saulo. 2Ghayi eaweechcha nea ghabwat Ng'uttamiida, nea ghwarat jalooda, hean gwayeeshsha Gurorooda Ghaydit, “Aloada Barnaba ea Saulo gwasin gadiyeeda eaguursi gwasin.” 3Iing'atta radooda jalooda ea mooshta Aseetta ghwayiin geattinga nyaawa iheengeaba fiisu ak geesiksa gaweay.

Aba Saypras

4Hean iiduw ea niijeakta Gurorooda Ghaydit, ghwararang'aada ea ghwahitta ng'eanyiida Seleugiya; ak geeng'eada hoowa ak gwading'da maleambooda haw ea ghwahitta ng'eanyiida Saypras. 5Iiduw nea ghwahitta Salami, gwarukkwiida ng'asheega Aseetta aba jeesinga ghoorajeega sinealshachcheewa bea fuga Yahuudi. Nea abeetta gwandeayi sea Yohaana nea ghaweat saawa. 6Iiduw nea geesuut ng'eanyiida neaweesa basooda hean geahitta ng'eanyiida Bafo, sihitta geanyasa hoowa siisi was beeneetkweanda, bea emeeda Yahuudi was sibaneeda ng'uyyeega suguura Bar-Yeesu. 7Siisi abeeda gwandeayi sea sugoochcheanda ahaghwa ng'eanyiida, suguura Sergio Baulo, ak ea siida mideawa fughareeda, hean gaguursa Barnaba ea Baulo aba gideaba gagasa ghwayiiy ng'asheega Aseetta. 8Nea Eliimayda was benetkweanda (aba gideaba nii gidawas gheawungaaschi) ghaweada saawa, nea gagasa ghwayam sugoochcheanda goheelli masaweega. 9Iiduw Sauloyda amaduw geeguura Baulo ghwanyas uurda Gurorooda Ghaydit geehhang'ooysa gheang'da siidida ak geeyi, 10“Ang'iing'i guwosi balleanda meang'nyeandeenda, ak guwosi weajoochcheanda haleanjeesean doobiiweadi, ak gaba ng'uyya muuchchi ea munyinda, ak ea minung'waadani eara hutteayda naweadinga doobiiweadi bea Ng'utamiida? 11Ng'ulla ghamneawa, gay ghwalasnyi Ng'uttamiida, ak gay ng'oawiida ea eamuttaaha weeshinda aseetta ea ghwahitta damwan.” Deagheatta aba geeshangiga ghwahidu headaannyi dung'usta ea misaneeda ak gagaseada buuneeda jea ghoang'wanyaada geattinda. 12Iiduw ghamwas sugoochcheanda, iidaa ng'asheega bunu, aba gideaba ghabeal aba ginealshooda Ng'uttamiida.

Aba Antiyokiyayda mida Bisidiya

13Ghang'eat Baulo ea barandaannyi ak gwading'da maleambooda ghabeawa Baafo, ak gaweay ea ghwahitta Berga mida ng'eanyiida Bamfiliya. Ghwanung'wa heeda Yohaana fiisu ak gabiikta Yerusaleemu, 14ak iiduw ghang'atta ea ghwahitta Berga hean geeweay ea ghwahitta mujiineeda Antiyokiyaayda mida Bisidiya. Hean eaweeda Sabatto gaweay jeeda ghooriida sinealshachcheewa ak goobiitpiit. 15Iing'atta nea nihit giissoomanda digheanda ea gittaabooda deayeega Muusa ea gea ng'ooruutka sibanga, hean ghang'eat fuga hees bea ghooriida sinealshachcheewa ak geechcheaksa nea geeyeeshsha, “Fuga siduupcheewi, iyoondeawi ng'asheanda ogasayi amusa appadahuukkeaba fiisu ak goomajeek goorugu.” 16Hean ghang'eat Baulo ak googeachchi buuneeda nea ghamiinda geattingaaschi ak gwayeeshsha;

“Ea fuga ng'eanyiida Israeeli, ea fuga sean awali gheang'da Aseetta oalleaydiit. 17Aseetteaba emeeni bea Israeeli ghayi ghwaloat gheamba ghweanigaasa ak ghwanung' ghoaw fuga hees damandida mideewa ng'eanyiida Misri, ak goruudu aba geattindaannyi. 18Nea aba gweannyeew haradam ghamilikghta sea saawa aba dareapcheeda. 19Iiduw nea nilas uhuudeaba daroorakkiga assispwaan mida ng'eanyiida Gananiin, ghoadaw saawa ng'eanyiida nyaawa gwahearan, aba gweannyeew bughalaji ang'wan ea haradam ea damanamughuush. 20Ng'atta hiji hean ghoadaw fuga laja girgweaguutka ea ghwahitta sibaneeda suguura Samweeli. 21Ak iiduw gagasa eattaw sugoochcheanda; hean iiduw ghoadaw Aseetta Saulo balleanda Gishi, bea dooshta Benjamin ea ghoaw gweannyeew haradam. 22Iiduw nea gegeanda niny, hean ghwaloat Dawdi ghoaw sugoochcheanda nyaawa; hean gamuuwwu ng'asheega badaydaannyi nea gwayi, ‘Naanyaschi aba jeeda Dawdi balleanda Yese siida mwas guroroodeanyu, ak nii ea siichchea gwasin ng'asheega sean eagasayi dasini.’ 23Aba siisi jea ghwahiduun niidaw Aseetta fuga Israeeli lealnoochcheanda, Yeesu, gawuurji gidaghayi helleesiinda. 24Damanda mii ghwahinna ghanyi gooshoohu Yohaana ak gwarukkwiisa fuga sean bea Israeeli gideaba gammiissa gwaduukkuuna ring'eega nyaawa ak geeppattiisan. 25Iiduw nea niihiit Yohaana gadiyeadaannyi gwayeeshsha, ‘Ghoaghanyi gili aniini eawoschi ng'eaha? Aniini meawosi siitta oofurdiin. Manda, ak gwanda siida jea gamaseawnean, ak aniini ea mammiisean deattin deandooda geakkaaschiin.’

26“Fugeaduupcheewi, balloojiga dooshta Abrahaamu, ea buuneessean mida jeedeang'wa awali gheang'da Aseettean, giijasi bea lealnoodean siyanneasa. 27Aba gideaba fuga mida Yerusaleemu ea fuga nyaawa ambaliischi, ak ea mwanala niny ghana gwajeeng'u ng'asheega sibanga sissoomani aba giliwas sabatto, hean ghoahiit aba girgweaksiinda. 28Ak earappeadi ea meadaaha ramaseanda miisa nuustaannyi, geemus Bilatto ak ghwanung' eenuus. 29Iiduw nea geehiit ng'asheega sean ghayi sung'oorsa badaydaannyi, gerrareang'na uhuuda geetta, ak geeyiin jeeda bung'eeda. 30Ak gooduuna Aseetta jeeda miyeeda; 31ak gabussa eawoojiga saang'a fukka ghayi adeana aba Galilaaya ea ghwahitta Yerusaleemuun, was ghamneawa muushoodigaaschi aba heeda buuneeda. 32Aseasa geapkaannyi eyeaneegwa giijasta miy ng'asheandida ghayi heelleesa Aseetta gheamba ghweanigaasaan. 33Ak ea nisissa aba heedeanya suwoschi diibigaaschi aba duunnooda Yeesu; gawuurji gidaghayi sung'waarda aba jeeda gittaabooda nyiigheegeaba iyyeenya gideaba,

‘Ang'iing'i guwosi Balleandeanyu,

aniini eanean neajiilleey.’

34Damandida gooduunna jeeda fuga nimeewean, aba gideaba adagabiikta gichcha hooweanji ak gamunyiit, hean gwayi,

‘Gaydagooneegwa ghwaooda ghaydit bea huumwa ghayi bea Dawdi.’

35Ak gwayi aba jeemba gittaabwajaan bea nyigheega,

‘May nung'waada Siidaang'u Ghaydit ghwanyas munyida.’

36Eara Dawdi iing'atta sinooda gadiyeeda Aseetta damanda seaygeadaannyi, hean ghami, ak gebunyuudayyi ghwanigaaschi, ak ghwanyas saseadaannyi munyinda; 37Nea siitta aduuna Aseetta jeeda miyeedean amwanyasa munyinda. 38Ak ghoanalli ng'asheanji, fugeasu eaduupcheewi gideaba aba naweedeaba siisi gajeerukuneegwa samsiinda ring'eeda, 39ak aba niny siisi nyoo ghamwas gaygoobal geaw aba haleanjeessean gidagwachchi maygwasa aba deaweedeeda ghayi bea Muusa. 40Asi ashageada geat, adaghwanyaseagwa gea ghayi beangwargu subanga nea gwayi:

41‘Ang'ulla, agooga fuga foolafii, ahamwang'eanyi, ak goroodayi;

aba gideaba geasinnyi ng'asheanda aba damandeang'wa,

ng'asheanda mwajamwasa gil, eara gwarukuneegwa siida.’”

42Damanda ritteawa hean gamus buuneeda gabiigu gichcha eaweeda sabattoyda jea ghwaan gwargu muuchchi iitteaba ng'asheesu. 43Iiduw nea ghwadardaawa buuneeda girgweageeda gheeda sinneaoshachcheewa, hean ghwaat geeshta geaba Baulo ea Barnaba fuga saang'a bea Yahuudi ea fuga emoojiga suuk ghayi weay dineeda Yahuudi, hean goobaloola saawa gideaba aweayeena mwadi aba jeeda dagheerjeandumeeda Aseetta.

44Hitta eaweeda sabattoyda bassa ghabwat geat fugeaba mujiineedida gooleeysiit ng'asheega Aseetta. 45Hean ghwadaa fuga Yahuudi fuga saang'a, nea ghapka gwashissa ghaang', hean geeheawa ng'asheega gwachchi rukku Baulo, nea geebiissa eng'ng'eawi. 46Gabalool Baulo ea Barnaba aba meaynatta nea gwayi, “Gammiisa gideaba gayghanyi erukuneegwa ammadeeda ng'asheanda Aseetta. Amaduw nea ghoaheawi ak gohindi geat gili mammiiseegwa eaweega manda muudeanooda, ang'ulla, gajeeyamsiina geat Emoojiga. 47Aba gideaba nii gidaghayi rukuneasa Ng'uttamiida, nea gwayi,

‘Naanung' huwa weeshinda Emoojiga,

ak gihuwi lealeanooda ea ghwahitta muudeanooda ng'eanyiida.’”

48Iiy fuga Emoojiga ng'asheanji, gahoosan ak geakghambiit ng'asheanda Aseetta; nea giikka ghayi sirarsean ghwanyas eaweega manda muudeanoodean hean ghamwas Aseetta. 49Ghaghayda ng'asheanda Ng'uttamiida aba ng'eanyiitta seaniin. 50Iiduw ghwahaak fuga Yahuudi gadeemga was fuga hees ghayi bada Aseetta ea headiga hees siiwali gheang'da bea mujiineedida, hean ghaghabwas Baulo ea Barnaba, ak gehoan ghang'amwa ng'eang'da nyaawa. 51Ng'atta gabardeaysa birjeanda geeshanga nyaawa, ak gaweay ng'eanyiida Ikonio. 52Gahoosan ginealanga nea ghwanyas Gurorooda Ghaydit.

Currently Selected:

Gadiyeeda Giijasoodiga 13: DTGANT09

Highlight

Copy