NÁN RÓMA VɄ 10
10
1Dan kirtȩ́n vu̵, hȩn káń hí̧í̧ kan zó̧ó̧ míí 'waapád, káń ɓá' Tayɨɨ yúú woolı̵́ á̧ḿ máa, wu̵ yɛ nɔ; nán Yúúda u̵u̵ sə́ddú̵. 2Mí gaa vu̵ pi zó̧ó̧ yúú moo Tayɨɨlı̵́ 'yɛ́nné, a̧máa zó̧ó̧ pilí voo yȩ tú'un ba hȩn gaalı̵́ɨ né á̧ḿ, 3moo vu̵ gaan Tayɨɨ ba tii nán vu̵ ı̵́ to̧o̧g woo vu̵ nɛ́nná máa né. A̧máa aga vu̵ hí̧í̧ bi soo to̧o̧g Tayɨɨ woolı̵́ kan hi̧naa dáń bii nu. Ma vu̵ 'yɛ́n zó̧ó̧ yúú hȩn Tayɨɨ ka kɔ́ ma, bi to̧n kan vu̵ wu̵lı̵́ yȩ né. 4Krístu ka yaa máa, dooká Múúsa woo vu̵ sí̧' sú̵'ú̵, moo nán zó̧ó̧ 'yɛ́lı̵́ u̵u̵ to̧n kan Tayɨɨ wu̵lı̵́.
Nán ı̵́ ku̵u̵ 'yɛ́ zó̧ó̧ voo ı̵́ 'yɛ́lı̵́ Yesu woolı̵́ máa, vú̵ń sə́d waapád
5Hȩn Múúsa ka bíńda yúú to̧nné kan Tayɨɨ hi̧naa dooká woo vu̵lı̵́ máa, wu̵ yɛ nɔ: “Nán ka duu dooká Múúsa woo vu̵ máa, wú̵ń nuŋ vágád yȩ́ńná ó̧.”
6A̧máa yúú to̧nné kan Tayɨɨ yúú zó̧ó̧ 'yɛ́lı̵́lı̵́ máa, debtere o̧: “A̧m o̧ zó̧ó̧ móólȩ́: ‘Nóo wú̵ń ɗáá dɔg be"ı̵́lá?’ sá.” (Moo yɛ tú' “Nóo wú̵ń sid zu̵u̵ Krístu be"ı̵́ pilá?”)
7A̧m o̧: “Nóo wú̵ń sí zu̵u̵ hágá zulílá?” sá á̧ḿ. (Moo yɛ tú' “Nóo wú̵ń sí zu̵u̵ la vud dɔg Krístu kaa nɔmmélá?”) 8A̧máa debtere o̧ nɛ́nná? O̧:
“Moo Tayɨɨ woo dɨ bə́' kan mɔ́,
dɨ ya̧g móólȩ́, dɨ zó̧ó̧ móólȩ́ á̧ḿ;”
moo máa yɛ wu̵ ya̧g ba'ad zó̧ó̧ 'yɛ́lı̵́ woo, ma kóó pa moo yúú woolı̵́ yɛ nɔ.
9Tow a̧m o̧d nán vu̵ kan ya̧g móó Yesu ba wu̵ ı̵́ 'yɛ́lı̵́, tow a̧m fȩȩ zó̧ó̧ móólȩ́ Tayɨɨ ba nimmɔ sı̵́ nɔmmé ó̧ tée, mɔ́ń sə́ddú̵. 10Moo ȩná? Moo nán ka fȩȩ moo zó̧ó̧lȩ́ tée, Tayɨɨ to̧n kannɔ sú̵'ú̵. Nánán ka moo moo kan ya̧g woo tée, Tayɨɨ səddu̵ sú̵'ú̵ á̧ḿ. 11Debtere o̧: “Nán a 'yɛ́ zó̧ó̧ woo wu̵lı̵́ tée, sȩ́ḿ wú̵ń kɔ́nnɔ né.”
12Hȩn ba səg nán Yúúda vu̵ kan nán ı̵́ ku̵u̵ Yúúda pɛ́lı̵́ máa vu̵ á̧ḿ, pɛ́lı̵́, moo Tayɨɨ wu̵ ı̵́ 'yɛ́lı̵́ nán voo 'waapád. Ɓɛ hȩn naa woo na'a yȩ 'waapád, pú̵ nán ı̵́ ku̵u̵ duu yɛ́g woo máa, 13moo debtere o̧: “Nán ı̵́ ku̵u̵ duu ı̵́ 'yɛ́lı̵́ máa, vú̵ń sə́d 'waapád.”
14A̧máa u̵u̵ 'yɛ́n zó̧ó̧ voo woolı̵́ né tée, vú̵ń dəŋ née duuwu̵lá? Ʉu̵ kin ná moo woo né tée, vú̵ń dəŋ née 'yɛ́ zó̧ó̧ voo wu̵lı̵́lá? Nán tóó a o̧n vu̵ moo woo né tée, vú̵ń dəŋ née kilá? 15Tow u̵u̵ ba'an nán tóó vu̵ la né tée, nóo wú̵ń la o̧d vu̵lá? Debtere o̧ ı̵́ yo̧go̧, o̧: “Nán ku̵u̵ pa̧ŋ moo to̧o̧ 'maŋ yaan máa, hȩn zó̧ó̧ dȩ"ȩ́ȩ.”#10:15 hȩn zó̧ó̧ dȩ"ȩ́ȩ vu̵ bíńda “doo voo du̵u̵ ho̧lȩ́ ó̧” kan ya̧g gɛrɛ́ggɨ. 16A̧máa nán 'waapád ká vu̵ fȩȩn moo to̧o̧ 'maŋ né, moo Esáya o̧: “Ɨ́ 'yɛ́lı̵́ vóó, nóo fȩȩ moo vóó ya̧gá̧lá?”
17Nán vu̵ ki ya̧g ba'ad, ma vu̵ 'yɛ́ zó̧ó̧ voo wu̵lı̵́. Ya̧g ba'ad yɛ wu̵ moo palı̵́ yúú Krístu woolı̵́. 18A̧máa mí vi moo pȩ́ń, yee tée vu̵ kin ya̧g ba'ad yɛ náa? A̧máa vu̵ ki sú̵'ú̵! Debtere o̧:
“Yɛ́g voo kiy hág 'waapád;
moo voolı̵́ ya̧gá̧ vu̵ kiy há̧á̧ ya̧ hág sí̧'í̧d vu̵lı̵́ á̧ḿ.”
19Mí duu vi moo tóó pȩ́ń, yee zig Izraɛ́l vu̵ kin náa? Hȩn Tayɨɨ ka o̧ ya̧g Múúsa woolı̵́ máa, wu̵ yɛ nɔ:
“Míń kɔ́, víń mood nán ı̵́ ku̵u̵ zig yȩ́ń pɛ́lı̵́ máa vu̵ sɨg.
Míń kɔ́, víń kɔ́d zig ı̵́ ka kan moo taalı̵́ pɛ́lı̵́ máa wu̵ zó̧ó̧ yȩ́ȩ́.”
20Esáya vud o̧ la ha̧d á̧ḿ, Tayɨɨ o̧:
“Nán ı̵́ ku̵u̵ soon mí ní máa, vu̵ nugun sú̵'ú̵.
Nán ı̵́ ku̵u̵ been mí ní máa, mí tú'ud vu̵ fó̧ó̧ míí á̧ḿ.”
21A̧máa Esáya o̧ moo yúú nán Izraɛ́l voolı̵́ á̧ḿ, o̧ Tayɨɨ ba o̧: “Mí baa ȩ́ȩ́ nag laan zig ki tɔ́g sá yȩ vu̵ zá̧ga̧ga̧, bi fȩȩ vu̵ ú̵, a̧máa vu̵ ma sú̵'ú̵.”
Currently Selected:
NÁN RÓMA VɄ 10: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
