NÁN RÓMA VɄ 9

Tayɨɨ kan Izraɛ́l, zig woo ka yee má nɔ

1Mí o̧ moo yȩ́ńne, mí nán Krístu woo nɔ, mí kɔ́n vbáddɨ né. Yigid Tayɨɨ woo wu̵ tu̵ zó̧ó̧ míí, wu̵ o̧n ba moo yȩ́ńne á̧ḿ; 2zó̧ó̧ míí ví̧i̧ mba kɛb, baa ndɔ́gɔn zá̧ga̧ 'waapád. 3Taalı̵́ ı̵́ míí máa, kan du̵u̵d zig míí ú̧ tée, mí hí̧í̧ míí Tayɨɨ kan ga'an nag, ka míń hı̵́'ı̵́n kan Krístu ú. 4Vu̵ waa Izraɛ́l vu̵ yu̵. Tayɨɨ 'yɛ́ vu̵ waa woo vu̵ yu̵, tú'ud vu̵ na"ȩ́ woo, tad vu̵ ya̧g ba bíń mbaa Tayɨɨ voo nɔ, pad vu̵ moo woo, vu̵ gaawu̵ na"ȩ́ yȩ́ńná, vu̵ nuŋ ya̧g talı̵́ woo vu̵ kə́dkə́d. 5Vu̵ zig a ba ví yée gbo̧o̧ woo vu̵ yu̵. Vu̵ ha̧a̧ Krístu zig voolı̵́ á̧ḿ, wu̵ mbaa yúú hȩn tóó vu̵lı̵́ 'waapád, wu̵ Tayɨɨ. Ba na"o̧ ví há̧á̧ káákáá, aamɛ́n.

6Mí hí̧í̧ bi o̧n ya̧g talı̵́ Tayɨɨ woo ba tiin sı̵́ hȩn lee ú̵ né, a̧máa Izraɛ́l aa yée vu̵ 'waapád vu̵ zig Izraɛ́l aga də́ń kəddɨ pɛ́lı̵́. 7Ibrahí̧í̧ma aa yée vu̵ 'waapád vu̵ waa woo vu̵ yu̵ yȩ́ńná pɛ́lı̵́ á̧ḿ, moo Tayɨɨ ká o̧d Ibrahí̧í̧ma: “Zig Iizág woo máa vu̵u̵ waa móó.”

8Hȩn yȩ tú' waa ı̵́ ku̵u̵ ha̧a̧ vu̵ kan mɛm máa, vu̵ waa Tayɨɨ woo vu̵ yu̵ pɛ́lı̵́; a̧máa waa ı̵́ ku̵u̵ ha̧a̧ vu̵ kan ya̧g talı̵́ Tayɨɨ woo máa, Tayɨɨ 'yɛ́ vu̵ yu̵ waa woo vu̵ yȩ́ńná. 9Tayɨɨ ká ta ya̧g, o̧: “Ve' dágá a ya̧a̧ tée, míń duu yaa dɨlı̵́; Sára wú̵ń nuŋ waa ú̵.”

10Hȩn yȩ nɔ dágá pɛ́lı̵́ á̧ḿ. Rebéka waa woo vu̵ idú á̧ḿ vu̵ waa ba'a dágá vu̵ yu̵, a vɔ́ yée Iizág wu̵ ha̧a̧ vu̵. 11-12Rebéka ka ha̧a̧n vu̵ lá né, ku̵u̵ kɔ́n ná hȩn ɓı̵́d tóó kan hȩn du̵u̵ né á̧ḿ máa, Tayɨɨ o̧d Rebéka: “Waa nii wú̵ńnɔ kɔ́d daa sá̧ŋ́ ba'ad.”

Tayɨɨ wu̵ kɔ́ hȩn yȩ, a̧máa moo ba'ad waa voo nɔ pɛ́lı̵́; Tayɨɨ wu̵ mbɔ́g moo ma, səg ı̵́ ka hí̧í̧ máa, beewu̵ 13kɔ́ ı̵́ debtere ka o̧ wɔgɔ, o̧:

“Mí hí̧í̧ Yaakúbu,

ma mí máń Esáw.”

14Tée báń o̧ ví nɛ́nná? Tayɨɨ kɔ́n hȩn kə̧ə̧g né náa? Kɔ́n né sá̧ḿ, 15moo Tayɨɨ ká o̧d Múúsa:

“Míń kɔ́d kóó nɔ́nná zó̧ó̧ nán kɔ́ ı̵́ káń hí̧í̧ wɔgɔ.

Míń ho̧ gíḿ gaad kóó nɔ́nná kɔ́ ı̵́ káń hí̧í̧ wɔgɔ á̧ḿ.”

16Hȩn woo kɔ́y duun hí̧í̧lí̧ nánán woo nɔ né, kóó fó̧ó̧ sȩnné nánán woo nɔ né á̧ḿ, a̧máa Tayɨɨ wu̵ kɔ́ddu̵ zó̧ó̧ nán. 17Tayɨɨ o̧d Faarɔ́ŋ gbanii Mísira debterelı̵́: “Mí dɔm gbanii moo bi tú' hȩn mbalı̵́ míí móólȩ́, moo nán hág 'waapád u̵u̵ gaa yɛ́g míí wu̵lı̵́ á̧ḿ.”

18Tayɨɨ ho̧ gíḿ gaad nán ka hí̧í̧ máa vu̵ ı̵́ yo̧go̧; yú tɔ́g nán tóó voo kɔ́ ı̵́ ka hí̧í̧ wɔgɔ á̧ḿ.

Zó̧ó̧ yȩ́ȩ́ Tayɨɨ woo, kan zó̧ó̧ nán woo nɔ

19Tóó tée nán tóó wú̵ń vin: “A dɨ ı̵́ yo̧go̧ tée, moo ȩn Tayɨɨ ka sée nán vu̵lá? Nóo wú̵ń nda doo kan hí̧í̧lí̧ Tayɨɨ woolá?”

20Dan gboo, mɔ́ móó nóo káḿ faa moo Tayɨɨ woolá? Hád gbág tóó vi wakȩ́ȩ́ ka yo̧o̧wo̧ máa: “Moo ȩn mɔ́ yo̧o̧n ı̵́ yɔgɔlá?” áa? 21Wakȩ́ȩ́ gbág yo̧o̧lȩ́ kɔ́ hȩn ka hí̧í̧ máa yúú hád van woolı̵́ ú̵. Hád dágá yȩ wú̵ń yo̧o̧ gbág yȩ́ȩ́ wu̵lı̵́, a̧máa wú̵ń yo̧o̧ gbág tóó vu̵ wu̵lı̵́ kə́dkə́d á̧ḿ.

22A̧máa Tayɨɨ hí̧í̧ bi tú' zó̧ó̧ yȩ́ȩ́ bii, kan hȩn mbalı̵́ bii nu. Kóó ı̵́ yo̧go̧ si̧', nán ku̵u̵ maa ba kɔ́d vu̵ zó̧ó̧ yȩ́ȩ́, ku̵u̵ maa tunní máa vu̵, Tayɨɨ ma' zó̧ó̧ yúú voolı̵́. 23Hí̧í̧ bi tú'ud ba ví na"ȩ́ bii ba ɓu̵u̵ dɨ née yúú baa vílílá! Tayɨɨ mbɔ́g ba ví, bi ho̧ gíḿ gaad ba ví, ba aa nuŋ ví na"ȩ́ biilí á̧ḿ. 24Tayɨɨ bee ba ví, nán Yúúda vu̵ yu̵ dágá pɛ́lı̵́, a̧máa bee zig tóó vu̵ á̧ḿ. 25Tayɨɨ o̧ moo yɛ dɨ debtere Oozée woolı̵́, o̧:

“Nán ı̵́ ku̵u̵ nán zig míí pɛ́lı̵́ máa, míń bee vu̵ yu̵ zig míí;

zig ı̵́ káń sɛ́nnɔ né máa, míń bee wu̵ yu̵ ı̵́ hí̧í̧lí̧ míí á̧ḿ.

26Ya tóó kú̵u̵ o̧d vu̵: ‘Ví víí zig míí pɛ́lı̵́’ máa,

vú̵ń bee vu̵ ‘Waa Tayɨɨ ı̵́ zá̧a̧d woo vu̵ yu̵.’ ”

27Esáya bíńda moo yúú waa Izraɛ́l voolı̵́, o̧: “Kóó waa Izraɛ́l u̵u̵ ɓu̵u̵ kɔ́ ı̵́ hád sagad ya̧g mammé wɔgɔ si̧', nán waaná' aga nɔ voolı̵́ sa̧a̧mé vú̵ńnɔ sə́d, 28moo ı̵́ 'yɛ́lı̵́ Tayɨɨ wú̵ń kɔ́ moo moolȩ́ woo a kɔ́y vaŋná hágá yɛlı̵́ 'waapád.”

29Esáya dágá yȩ ká moo moo tóó tíŋ́ sú̵'ú̵ á̧ḿ, o̧:

“Tow ı̵́ 'yɛ́lı̵́ Tayɨɨ ka mba hȩn 'waapád yȩ, kan gbɔn ba ví waa woo tóó vu̵ hágá yɛlı̵́ né tée,

ka ban tii mbaa ví sı̵́ ı̵́ kaa Súúduma wɔgɔ ú̵,

ka ban man ví kan kaa Gomóorɨ.”

Zig Izraɛ́l vu̵ kan moo to̧o̧ 'maŋŋɨ

30Tée báń o̧ ví nɛ́nná? Nán ı̵́ ku̵u̵ nán Yúúda pɛ́lı̵́, ku̵u̵ soon to̧o̧g Tayɨɨ woolı̵́ né pee, vu̵ tii nán to̧o̧g Tayɨɨ woo yúú zó̧ó̧ 'yɛ́lı̵́ voolı̵́ sú̵'ú̵. 31Zig Izraɛ́l vu̵ duu dooká vu̵ ɓu̵u̵lı̵́ na'a moo Tayɨɨ ba a 'yɛ́ bi ı̵́ to̧o̧g woo vu̵ yu̵, a̧máa vu̵ nugun hȩn dooká ku̵u̵ o̧n yȩ né á̧ḿ. 32Moo ȩná? Moo vu̵ soon hȩn a to̧o̧d Tayɨɨ máa kan zó̧ó̧ 'yɛ́lı̵́ né, vu̵ taa ba bíń nuŋ kan ba'adɨ. A̧máa hȩn woo mbaad vu̵ kɔ́ ı̵́ 'yɛgɛ tóó ku̵u̵ fə́ń yúú woolı̵́ máa wɔgɔ, 33kɔ́ ı̵́ Tayɨɨ ka o̧ debterelı̵́ wɔgɔ, o̧:

“I ki pȩ́ń, mí 'yɛ́ 'yɛgɛ kaa Sió̧ŋŋı̵́ yɔ; nán vú̵ń baa fə́ń wu̵lı̵́; vú̵ń ii wá̧á̧#9:33 fə́ń...wá̧á̧ fə́nné kan wá̧a̧né máa, tú' ku̵u̵ 'yɛ́n zó̧ó̧ voo woolı̵́ né má nɔ. wu̵lı̵́.

A̧máa nán a 'yɛ́ zó̧ó̧ woo wu̵lı̵́ tée, sȩ́ḿ wú̵ń kɔ́nnɔ né.”

Currently Selected:

NÁN RÓMA VɄ 9: DIINT

Highlight

Copy