Debtere ba'ad waa ba'ad voo nɔ 17

Pól vu̵ dɨ kaa Tesaloníilí̧ kan Silád á̧ḿ

1Pól vu̵ kan Silád vu̵ ya̧a̧ duu kaa Amfipolíilí kan Apoloníi, vu̵ ya̧ kaa Tesaloníi. Lig sú̵ggı̵́ nán Yúúda voo ká du̵u̵lı̵́ á̧ḿ. 2Pól daa dɔ́ la wu̵lı̵́, kɔ́ ı̵́ ka baa kɔ́ see máa wɔgɔ. Vu̵ baa mba moo kan nán vu̵ wu̵lı̵́ yúú debterelı̵́, asawə ta̧a̧nɔ́. 3Baa tú'ud vu̵ moo, o̧ ı̵́ nán sənné ba a nuŋ hȩn ndɔ́gɔné pȩ́ń, ba a duu níḿ nɔmmé. Duu o̧d vu̵: “Yesu káń o̧d ví moo woo yɛ, wu̵ ı̵́ nán sənné sú̵u̵.”

4Nán Yúúda tóó ku̵u̵ ki moo yȩ máa, vu̵ fȩȩ, vu̵ sú̵g kan Pól kan Silád vu̵. Nán Gɛrɛ́g ɓu̵u̵lı̵́ na'a ku̵u̵ duu Tayɨɨ máa, vu̵ fȩȩ moo yɛ kan wakȩ́ȩ́ nag zi̧i̧lí̧ tóó vu̵ á̧ḿ.

5Nán Yúúda tóó ku̵u̵ ho̧ hȩn yȩ máa, vu̵ moo sɨg, vu̵ su̵g nán disa̧n tóó ku̵u̵ nuŋ vu̵ lummí máa vu̵, vu̵ bé' dɔg moo dámné ya voo 'waapád. Vu̵ yú daa kaa kan moo, vu̵ sú̵g yaa Yasó̧n woolı̵́ kíilí. Vu̵ soo daa Pól vu̵ kan Silád, moo bi ma' vu̵ pa̧ŋ la dúú yȩ voolı̵́.

6Ku̵u̵ ho̧n vu̵ né máa, vu̵ ma' Yasó̧n vu̵ kan nán sú̵ggı̵́ tóó vu̵ laan tíŋ́ ı̵́ nii kaa voolı̵́. Vu̵ bé' moo dámné, vu̵ o̧: “Nán yȩ vu̵ yú nán vu̵ kan moo hág 'waapád, ma 'ya̧'a̧ yɛ vu̵ yaa sı̵́ yɛlı̵́ ú̵. 7Yasó̧n dɔd vu̵ dɨ woolı̵́ kíilí. Nán yȩ vu̵ 'waapád vu̵ kɔ́n hȩn dooká gbanii Róma woo ka o̧n máa né, moo vu̵ o̧ nán tóó ba wu̵ gbanii, yéé woo ba Yesu.”

8Moo yȩ dɔ́ nán vu̵ zó̧ó̧, kan ı̵́ nii hág yȩ vu̵ á̧ḿ. 9Ɨ́ nii pee vu̵ kɔ́ Yasó̧n kan nán ı̵́ tóó yȩ vu̵, ma vu̵ sú̵ú̵ hȩn tóó pú̵ ı̵́ nii hág yȩ vu̵ nagá, ma vu̵ daa kéé vu̵ gbɔ la.

Pól vu̵ kan Silád vu̵ dɨ kaa Beeréelı̵́

10Sey vid ka sa̧' sú̵'ú̵ máa, nán sú̵ggı̵́ vu̵ ba' Pól vu̵ kan Silád gbɔ la kaa Beeréelı̵́.

Sey ku̵u̵ ya̧ la ná' máa, vu̵ daa laa lig sú̵ggı̵́ nán Yúúda voolı̵́. 11Nán Yúúda ı̵́ kaa yȩlȩ́, vu̵u̵ to̧o̧ mba ı̵́ Tesaloníilí̧ vu̵, vu̵ fȩȩ moo Tayɨɨ kan zó̧ó̧ voo 'waapád. Vu̵ baa soo hȩn debterelı̵́ zá̧ga̧ 'waapád, moo bi ho̧ hȩn Pól ka o̧ yȩ, a yagalı̵́ tɛ́ nɔ. 12Ma nán Yúúda ɓu̵u̵lı̵́ na'a vu̵ 'yɛ́ zó̧ó̧ voo Yesu woolı̵́, kan nán Gɛrɛ́g tóó vu̵, kan wakȩ́ȩ́ Gɛrɛ́g ı̵́ nag zi̧i̧lí̧ tóó vu̵ á̧ḿ.

13A̧máa nán Yúúda ı̵́ kaa Tesaloníilí̧ ku̵u̵ ki Pól ba dɨ moo Tayɨɨ palı̵́ kaa Beeréelı̵́ á̧ḿ máa, vu̵ yaa wu̵lı̵́, vu̵ bé' moo kɔ́lı̵́, vu̵ yú daa dúú vu̵ kan moo wu̵lı̵́ á̧ḿ. 14Ma nán sú̵ggı̵́ vu̵ daa ba' Pól laan ya̧g mam gbo̧o̧lȩ́ vaŋná, a̧máa Silád vu̵ mbaa zu̵u̵ voo kaa Beeréelı̵́ wu̵lı̵́, kan Timɔtée á̧ḿ.

15Nán ı̵́ ku̵u̵ ba' Pól máa, vu̵ ba"u̵ la ya̧n kaa gbaŋ Atɛ́nné, ma vu̵ daa vȩ́' ya o̧d Silád vu̵ kan Timɔtée: “Pól moo i duu bi la vaŋná.”

Pól dɨ kaa gbaŋ Atɛ́nné

16Sey Pól ka dɨ mbaalı̵́ kaa gbaŋ Atɛ́nné, ka laa Silád vu̵ kan Timɔtée wu̵lı̵́ máa, zó̧ó̧ ví̧i̧wo̧ mba kɛb moo ka ho̧ tayɨɨ mbɔ́ggı̵́ ku̵u̵ hi̧' kaa yȩlȩ́ na'a yȩ nɔ. 17Pól baa mbad nán Yúúda vu̵ moo woo lig sú̵ggı̵́ voolı̵́, kan nán ı̵́ ku̵u̵ Yúúda pɛ́lı̵́ ma ku̵u̵ dɨ Tayɨɨ duulí máa vu̵. Mbad nán ka kan kan vu̵ saalı̵́ máa vu̵ zá̧ga̧ 'waapád á̧ḿ.

18Nán ku̵u̵ baa tú' moo taalı̵́ nánán voo vu̵ máa, vu̵ du̵u̵lı̵́ á̧ḿ. Tóó vu̵ duu moo tú"í Epikúr woo; tóó vu̵ duu voo moo tú"í nán Estosíi voo. Vu̵ mba moo kan Pól á̧ḿ, ma tóó vu̵ vi: “Nán moo dámné lee ı̵́ yo̧go̧ yȩ, hí̧í̧ bi tú' ȩná?”

Tóó vu̵ duu o̧ voo: “Hí̧í̧ bi tú'ud ba ví tayɨɨ hág tóó kə́ddɨ.”

Vu̵ víń moo yȩ, moo Pól ká tú'ud vu̵ moo yúú Yesu woolı̵́, kan moo nímní woo nɔmmé má nɔ. 19Ma vu̵ bee Pól laan ya moo mbɔ́ggı̵́ tóó ku̵u̵ bee “Areopáazə” máalȩ́, vu̵ vigi: “Vóo bi ki hȩn tú"í 'maŋ móó yȩ nɔ, 20moo vɔ́ ki mɔ́ o̧ hȩn 'maŋ tóó vu̵ yɛlı̵́ ɓu̵u̵lı̵́ na'a máalá̧! Vɔ́ hí̧í̧ bi gaa hȩn woo du̵u̵ na'a pȩ́ń, a dɨ ȩnáa tɛ́ nɔ.”

21(Moo nán Atɛ́n vu̵ kan gáá ku̵u̵ mbaa wu̵lı̵́ yȩ, vu̵ dii la də́ń moo hȩn 'maŋ vu̵ pa'anée kəd.)

22Pól ka ki moo yȩ máa, lúú dii dɔg sa̧a̧m nán yȩ voolı̵́ Areopáazəlı̵́, o̧: “Nán Atɛ́n vu̵, mí ho̧ ví gaa moo tayɨɨ tóó vu̵ kə́dkə́d ɓu̵u̵lı̵́ na'a. 23Káń 'yȩm daa tíŋ́ kaalı̵́, káń tə́gə hȩn kíí na' vu̵ yȩ máa, mí ho̧ gbaa tóó á̧ḿ, vu̵ bíńda hȩn yúú woolı̵́, o̧: ‘Tayɨɨ ı̵́ kóó gaanɔ né maa woo nɔ.’ Máa, mí yaa bi tú'ud ví Tayɨɨ ı̵́ kíí ndɔggu̵, kíí gaanɔ né sú̵ nɔ. 24Tayɨɨ ı̵́ ka yɨb be' kan hág kan hȩn 'waapád yúú woolı̵́ máa, wu̵ 'yɛ́ be' kan hág á̧ḿ. Tayɨɨ yȩ mbaan woo lig hȩn ha"ı̵́ tóó nán ku̵u̵ yo̧o̧n vu̵ máalȩ́ né. 25Tayɨɨ nugun néélȩ́ moo hȩn pú̵lı̵́ nánán voo nɔ né. A̧máa Tayɨɨ aga wu̵ pú̵ nán vu̵ néélȩ́, ma vu̵ mbaa zá̧a̧d. Pú̵ vu̵ hȩn tóó vu̵ 'waapád á̧ḿ. 26Tayɨɨ ka dəŋ máa, yɨb nánán dágá, ma zig 'waapád vu̵ vúd wu̵lı̵́. Yȩ' vu̵ hág, ma vu̵ fȩȩ hág 'waapád. Tayɨɨ yɨb sey, yɨb gaag kan yı̵́g, yɨb hág vu̵ kan ya 'yɛ́nné voo, moo nán 'waapád u̵u̵ baa duu wu̵lı̵́. 27Tayɨɨ kɔ́ hȩn yȩ vu̵ 'waapád, moo nán u̵u̵ kpá'a bi ú, u̵u̵ soo bi daa; tóó tée ba vú̵ń nuŋ bi ú. A̧máa Tayɨɨ mbaa ɗiin kan ba ví ní sá̧ḿ.

28“Dɨ ı̵́ yo̧go̧; ‘Ba mbaan ví kan wu̵ yu̵, ba nam ví, ba mbaa ví zá̧a̧dná kan wu̵ yu̵.’ Nán moo ɨgɨné víí tóó vu̵ o̧ ı̵́ yo̧go̧ á̧ḿ, vu̵ o̧:

‘Ba ví zig woo vu̵ yu̵ á̧ḿ.’

29“Kaa ví zig woo yɛ, tée ba taa ví Tayɨɨ ban man kan do̧' vu̵, kan sardi, kan 'yɛgɛ ı̵́ ku̵u̵ du̵d kan nɔ́ɔ́ kɛb, kan moo taalı̵́ nánán voo má nɔ sá. 30Sey nánán kú̵u̵ gaan hȩn né máa, Tayɨɨ ho̧n hȩn ɓı̵́d voo né. A̧máa 'ya̧'a̧ yɛ Tayɨɨ bee sı̵́ nán vu̵ 'waapád, ya 'waapád, u̵u̵ tii zó̧ó̧ duu bi ú. 31Tayɨɨ 'yɛ́ zá̧ga̧ tóó dɨlı̵́ á̧ḿ, moo bi sə̧' moo yȩ́ń wu̵lı̵́ yúú nán voolı̵́ 'waapád. Tayɨɨ yee ı̵́ moo sə̧"ȩ́ woo sú̵'ú̵; nán yȩ ká nɔɔ, ma Tayɨɨ nimmɔ nɔmmé, moo i gaa ba moo yȩ́ńne.”

32Sey nán ku̵u̵ ki Pól ka o̧ moo nímní nɔmmé máa, nán tóó vu̵ hı̵́'ɨwu̵, tóó vu̵ o̧ddu̵: “Sey tóólı̵́ tée, mɔ́ ya duu o̧d vɔ́ moo yȩ tóó.”

33Ma Pól daa lúú ka la. 34A̧máa nán tóó vu̵ ya maa Pól. Nán ı̵́ tóó yȩ máa, yéé woo Denís, ká nán moo mbɔ́ggı̵́ Areopáazəlı̵́, kan wakȩ́ȩ́ tóó, yéé woo Damaríi. Nán yȩ vu̵ 'yɛ́ zó̧ó̧ voo Yesu woolı̵́, kan nán tóó vu̵ á̧ḿ.

Currently Selected:

Debtere ba'ad waa ba'ad voo nɔ 17: DIINT

Highlight

Copy