Debtere ba'ad waa ba'ad voo nɔ 18

Pól vu̵ dɨ kaa gbaŋ Koríńtilí

1Pig woo máa, Pól lúú kaa Atɛ́nné, daa laa kaa gbaŋ Koríńtilí. 2Vu̵ la kan kan nán Yúúda tóó wu̵lı̵́, yéé woo Akíla, vu̵ ha̧a̧wo̧ hág Pó̧ŋŋı̵́. Akíla vu̵ há̧á̧ ya̧ ya voo kan kȩ́ȩ́ Prisíl, vu̵ lúú hág Italíilí, moo gbanii Kolóod pad nán Yúúda vu̵ moo u̵u̵ vúd kaa Rómalȩ́. Pól la nuŋ vu̵; 3ba'ad voo ka dágá máa, Pól mbaa voolı̵́ ligí, vu̵ sú̵g va̧a̧ lig sa̧a̧m á̧ḿ.

4Zá̧ga̧ asawə 'waapád, Pól baa mba moo kan nán Yúúda vu̵, kan nán Gɛrɛ́g vu̵ lig sú̵ggı̵́ nán Yúúda voolı̵́, soo kɛb bi mba vu̵ ú̵.

5Sey Silád ku̵u̵ lúú zu̵u̵ kan Timɔtée hág Masedo̧wá̧nné, ku̵u̵ ya̧ ya kaa gbaŋ Koríńtilí máa, Pól dii də́ń moo Tayɨɨ wu̵ tú"í kəd, baa tú'ud nán Yúúda vu̵ ı̵́ nán sənné ba wu̵ Yesu. 6A̧máa nán Yúúda vu̵ séewu̵, vu̵ haawu̵. Ma Pól tá'ad vu̵ nag woo,#18:6 tá'ad vu̵ nag woo vu̵ bíńda “tá'ad vu̵ sa̧a̧m woo” kan ya̧g gɛrɛ́ggɨ. o̧d vu̵: “Aga i ti tée, víi hí̧í̧; kan mí ní. A̧máa mí dɨ sı̵́ míí laalı̵́ nán ku̵u̵ Yúúda pɛ́lı̵́ máa voolı̵́ yɔ.”

7Ka lúú lig sú̵ggı̵́lı̵́ máa, daa laa nán tóó ku̵u̵ beewu̵ Titíw Yústus máa woolı̵́, ká nán Tayɨɨ duulíi. Lig woo dɨ dáŋ́ lig sú̵ggı̵́ nán Yúúda voolı̵́. 8Kirípus, ı̵́ nii lig sú̵ggı̵́ nán Yúúda voo, 'yɛ́ sı̵́ zó̧ó̧ woo ı̵́ 'yɛ́lı̵́ Yesu woolı̵́ kan nán kíi woolı̵́ vu̵ 'waapád á̧ḿ. Nán Koríńti vu̵ ɓu̵u̵lı̵́ na'a vu̵ ki moo Pól ka o̧ yȩ, vu̵ 'yɛ́ zó̧ó̧ voo Yesu woolı̵́, vu̵ woo vu̵ mam Tayɨɨ á̧ḿ.

9Vid tóólı̵́ máa, Pól ho̧ hȩn sa̧ga̧. Ɨ́ 'yɛ́lı̵́ o̧ddu̵: “A̧m kɔ́ dú̵ú̵ sá. A̧m tú' moo laan tíŋ́ tíŋ́. A̧m mbaa simná sá, 10moo mí dɨ mbaalı̵́ kan mɔ́ yo̧. Hȩn tóó wú̵ń kɔ́n mɔ́ né, moo nán ɓu̵u̵lı̵́ na'a kaa yɛlı̵́ vu̵ nán míí vu̵ yu̵.”

11Pól mbaa kaa gbaŋ Koríńtilí ve' dágá kan rééta, baa tú'ud vu̵ moo Tayɨɨ wu̵lı̵́.

12Sey Galió̧ŋ ka mbaa guvɛrnə́ər hág Akáyyı̵́ máa, nán Yúúda vu̵ kɔ́ Pól moo, vu̵ ma"o̧ laan ya moo fá̧nélȩ́, 13vu̵ o̧: “Nán yɛ tú'ud nán vu̵ u̵u̵ duu Tayɨɨ kan hi̧naa tóó dooká ka o̧n né má nɔ.”

14Sey Pól ka bi kuu ya̧g moo mooɨ máa, Galió̧ŋ fȩȩ moo yȩ, o̧d nán Yúúda vu̵, o̧: “Ɨ́ víí, nán Yúúda vu̵, moo yɛ kan moo gbo̧o̧ȩ, tóó tée kan hȩn maag tóó nɔ tée, ka míń kid ví moo woo. 15A̧máa aga ka moo fá̧né yúú moo tú"í víílí, kan moo yéé nán tóó woo, kan yúú debtere Tayɨɨ víí woolı̵́ɨ máa, aga i dii moo woo la sú̵m. Mí sə̧'ə̧n míí moo woo né.”

16Ma Galió̧ŋ daa nɛŋ vu̵ luu la ya moo fá̧nélȩ́. 17A̧máa vu̵ tii ma' Sostɛ́n, ı̵́ nii lig sú̵ggı̵́ nán Yúúda voo, vu̵ gbɔ́gɔ zu̵u̵ ya moo fá̧né peelı̵́. Kóó ı̵́ yo̧go̧ si̧', hȩn tóó gbɨn Galió̧ŋ né sá̧ḿ.

Pól duu vȩ́' laa kaa Aŋtiósdı̵́

18Pól duu səə kan nán sú̵ggı̵́ vu̵ wu̵lı̵́ bá' ɓu̵u̵lı̵́ na'a kaa Koríńtilí; pig woo máa daa lúú laa kaa Sa̧ŋkeréelı̵́, vu̵ kan Prisíl kan Akíla vu̵ á̧ḿ. Pól yu̵ yúú, moo ká ta sı̵́ ya̧ggú̵, ma Pól vu̵ dɔ́ nɛ́ŋ́ŋı̵́, bi daa laa hág Siiríilí. 19Vu̵ ya̧ la kaa gbaŋ Ɛfɛ́ɛzlı̵́, ma Pól gbɔ Akíla vu̵ kan Prisíl kaa yȩlȩ́. Pól daa laa woo lig sú̵ggı̵́ nán Yúúda voolı̵́, mbad nán Yúúda vu̵ moo wu̵lı̵́. 20Vu̵ vigi a mbaa kan bi waaná' pȩ́ń, a̧máa Pól sɛ́n né.

21Sey ka dɨ lúúlí wu̵lı̵́ máa, o̧d vu̵: “Tayɨɨ a hí̧í̧ ú̧ tée, míń duu vȩ́' ya dɨlı̵́.”

Ma dɔ́ la nɛ́ŋ́ tóólı̵́ kaa gbaŋ Ɛfɛ́ɛzlı̵́, daa lúú.

22Sey ka ya̧ la kaa Sezaréelı̵́ máa, daa dɔg Yerúsalemmé moo bi la vá' nán sú̵ggı̵́ vu̵ yu̵, ma daa zu̵u̵ kaa Aŋtiósdı̵́.

23Ka səə wu̵lı̵́ waaná' máa, duu daa lúú, pú̵d laa tíŋ́ tíŋ́, hág nán Galád voolı̵́, kan hág Firizíi, zigid nán ku̵u̵ duu Yesu máa vu̵ zó̧ó̧ duu wu̵lı̵́.

Apolóo dɨ kaa gbaŋ Ɛfɛ́ɛzlı̵́ kan Koríńti

24Nán Yúúda tóó ká du̵u̵lı̵́, yéé woo Apolóo; vu̵ ha̧a̧wo̧ kaa gbaŋ Alegza̧ŋnderíilí. Apolóo ya̧ ya woo kaa gbaŋ Ɛfɛ́ɛzlı̵́. Nán yȩ ya̧g woo yu̵u̵ mbaa ná', ká gaa debtere du̵u̵n də́ń né á̧ḿ. 25Ká kúgú woo moo ı̵́ 'yɛ́lı̵́ woo 'yɛ́ zó̧ó̧lȩ́, gaa hȩn kɔ́lı̵́ Yesu woo 'waapád, baa tú' moo woo du̵u̵lı̵́ na'a, a̧máa moo mam Tayɨɨ wooné máa, gaa woo də́ń ı̵́ Yoohá̧na woo nɔ. 26Ya mbí nɔ́ɔ́, moo moo lig sú̵ggı̵́ nán Yúúda voolı̵́.

Prisíl ku̵u̵ ki moo mbalı̵́ woo kan Akíla máa, vu̵ ɓɛgɛ laan voolı̵́, vu̵ duu tú'udu̵ moo Tayɨɨ woo 'waa du̵u̵lı̵́ na'a.

27Pig woo, Apolóo ka hí̧í̧ bi laa hág Akáyyı̵́ máa, nán sú̵ggı̵́ vu̵ zigidu̵ zó̧ó̧, vu̵ bíńda ɗerwəl pú̵ waa duulí ı̵́ hág yȩlȩ́ vu̵, moo u̵u̵ fȩȩwo̧ nag idú.

Tíŋ́ Apolóo ka ya̧n ndɛ́ né máa, Tayɨɨ pú̵ nán tóó vu̵ zó̧ó̧ nán woo, vu̵ 'yɛ́ zó̧ó̧ voo Tayɨɨ woolı̵́; ma Apolóo maa nán zó̧ó̧ 'yɛ́lı̵́ yȩ vu̵ ba'ad kɔ́lı̵́ du̵u̵lı̵́ na'a. 28Apolóo baa vud moo o̧d nán Yúúda vu̵ la zo"ı̵́ had had, ba vu̵n bá̧a̧ ó̧. Baa tú'ud vu̵ debterelı̵́, ma o̧d vu̵ ı̵́ nán sənné ba wu̵ Yesu. Nán Yúúda vu̵ diin tíŋ́ woolı̵́ kan moo né sá̧ḿ.

Currently Selected:

Debtere ba'ad waa ba'ad voo nɔ 18: DIINT

Highlight

Copy