Debtere ba'ad waa ba'ad voo nɔ 16

Pól ɓɛ Timɔtée pa̧ŋ, vu̵ sú̵g laa kan Silád á̧ḿ

1Pig woo Pól ya̧ la kaa Dɛ́rbəlı̵́, ma daa laa kaa Lístalı̵́. Nán sú̵ggı̵́ tóó ká du̵u̵lı̵́, yéé woo Timɔtée, ká waa wakȩ́ȩ́ Yúúda tóó ka tii kirtȩ́n máa woo nɔ, a̧máa ba' woo ká nán Gɛrɛ́ggɨ. 2Nán sú̵ggı̵́ ı̵́ ku̵u̵ mbaa kaa Lístalı̵́ máa, vu̵ moo yɛ́g to̧o̧ woo, kan kaa Ikónné á̧ḿ. 3Ma Pól hí̧í̧ a laa kan bi á̧ḿ, dɔddu̵ do̧ŋ, moo nán Yúúda ku̵u̵ mbaa hág yȩlȩ́ máa voo nɔ, moo nán 'waapád vu̵ gaa ba' woo ba nán Gɛrɛ́ggɨ.

4Kaa Pól ku̵u̵ ya̧a̧ wu̵lı̵́ 'waapád máa, vu̵ baa o̧d nán sú̵ggı̵́ vu̵ u̵u̵ duu hȩn waa ba'ad Yesu woo kan ı̵́ nii sú̵ggı̵́ ku̵u̵ mbɔ́g Yerúsalemmé pee nɔ.

5Nán sú̵ggı̵́ ku̵u̵ ki moo voo máa, vu̵ nda doo yúú zó̧ó̧ 'yɛ́lı̵́ voolı̵́; fó̧ó̧ tóó vu̵ baa há'ay hú' voolı̵́ zá̧ga̧ 'waapád á̧ḿ.

Pól ho̧ hȩn sa̧ga̧ kaa Trowáddı̵́

6A̧máa yigid Tayɨɨ woo big Pól vu̵ moo Tayɨɨ palı̵́ hág Aazíilí, ma vu̵ daa sə̧' ya̧a̧ la hág Firizíilí, kan hág Galád. 7Vu̵ ya̧ zu̵u̵ dáŋ́ hág Misíilí, vu̵ hí̧í̧ bi laa hág Bitiníilí̧, a̧máa yigid Yesu woo big vu̵. 8Ma vu̵ sə̧' ya̧a̧ hág Misíi, vu̵ daa zu̵u̵ kaa Trowáddı̵́ ya̧g mam gbo̧o̧lȩ́.

9Viddí máa, Pól ho̧ hȩn sa̧ga̧. Ho̧ nán Masedo̧wá̧n tóó dii beewu̵ ya: “A̧m ya̧a̧ ya maa vɔ́ hág Masedo̧wá̧nné yɛlı̵́.”

10Pig woo máa, vɔ́ lúú vaŋná, vɔ́ soo daa kɛb, bi laa wu̵lı̵́, moo vɔ́ ki Tayɨɨ wu̵ bee vɔ́ ya, moo oo pa̧n la nán hág yȩ vu̵ moo to̧o̧ 'maŋŋɨ.

Lídia 'yɛ́ zó̧ó̧ woo ı̵́ 'yɛ́lı̵́ woolı̵́ kaa Filíbbí

11Vɔ́ dɔ́ nɛ́ŋ́ kaa Trowáddı̵́, vɔ́ 'yɛ́ nɔ́ɔ́ la tə́g mam bam Samotárasdı̵́; ya̧g ka̧'a̧mé máa, vɔ́ daa laa mam dən kaa Neapolíilí. 12Vɔ́ duu lúú wu̵lı̵́, vɔ́ dɔg kaa gbaŋ Filíbbí,#16:12 Filíbbí nán Róma vu̵u̵ yo̧o̧ kaa yȩ, vu̵ 'yɛ́gɛ kaa gbaŋ voo hág yȩlȩ́; man kan “préfecture” tóó baa vílí yɛlı̵́. ká kaa gbo̧o̧ ka' hág Masedo̧wá̧nné. Nán Róma vu̵u̵ hi̧' wu̵lı̵́. Vɔ́ səə kaa yȩlȩ́ bá' waaná'.

13Zá̧ga̧ asawəlı̵́ máa, vɔ́ vúd kaalı̵́, vɔ́ laa ya̧g mammé, vɔ́ taa ya sú̵ggı̵́ nán Yúúda voo ba du̵u̵lı̵́, ma vɔ́ mbaa hágá, vɔ́ mba moo kan wakȩ́ȩ́ ku̵u̵ dɨ sú̵ggı̵́ wu̵lı̵́ máa vu̵. 14Wakȩ́ȩ́ yȩ vu̵ tóó dágá, yéé woo Lídia, yaa kaa Tiatíilí, ká gí woo sa̧a̧m yɛ́g ı̵́ ku̵u̵ mbaa yȩ́ȩ́ná máa vu̵ yu̵. Dɨ Tayɨɨ duulíi. Wakȩ́ȩ́ yȩ baa ki moo tú"í Pól woo; ma ı̵́ 'yɛ́lı̵́ tú'udu̵ moo taalı̵́, 'yɛ́ tɔ́g woo wu̵lı̵́.

15Vu̵ woowu̵ mam Tayɨɨ kan nán kíi woo vu̵ 'waapád, ma bee vɔ́, o̧: “Tow i ho̧ ba mín fȩȩ moo ı̵́ 'yɛ́lı̵́ woo yȩ́ńná sú̵'ú̵ tée, i dɔ́ ya mbaa míílí̧ kíilí.”

Baa 'máá vɔ́, ma vɔ́ daa dɔ́ la woolı̵́.

Pól vu̵ dɨ lig púúsinalȩ́, kan Silád á̧ḿ

16Zá̧ga̧ tóó máa, vɔ́ duu laa ya kóó baa ɓá' Tayɨɨ peelı̵́, ma gba'a kȩ́ȩ́ tóó ya kan kan vɔ́, ká dɨ kan yigid ɓı̵́d ı̵́ gan ho̧lȩ́ȩ, baa nuŋ sɨɨde wu̵lı̵́ ɓu̵u̵lı̵́ na'a, pú̵ ı̵́ buulí woo vu̵. 17Wakȩ́ȩ́ yȩ bé' vɔ́ duulí kan Pól vu̵, baa moo dɔg moo yúba, o̧: “Nán yɛ vu̵ nán ba'ad Tayɨɨ ı̵́ be"ı̵́ zu woo nɔ. Vu̵ tú'ud ví hi̧naa sə́nnée.”

18Wakȩ́ȩ́ yȩ baa faa moo yȩ moo bá' ɓu̵u̵lı̵́ na'a.

Sí̧'í̧d woo máa, Pól kɔ́ zó̧ó̧ yȩ́ȩ́, tii daa o̧d yigid pee: “Mí o̧m kan yɛ́g Yesu Krístu woo nɔ, a̧m vúd la wakȩ́ȩ́ yȩ woolı̵́ fó̧lȩ́.”

Ma yigid pee daa vúd ya̧g woolı̵́.

19Sey nán buulí wakȩ́ȩ́ yȩ woo ku̵u̵ ho̧ ban duu nun bi sı̵́ sɨɨde né máa, vu̵ ma' Pól vu̵ kan Silád laan saalı̵́, ı̵́ nii Róma voolı̵́. 20Vu̵ pa̧ŋ vu̵ laan ı̵́ nii moo sə̧"ȩ́ voolı̵́, vu̵ o̧: “Nán yɛ vu̵ yú vɔ́ kan moo dɨ kaalı̵́, vu̵ nán Yúúda vu̵ yu̵. 21Vu̵ tú' hȩn dikab ka maan nán Róma ba ví duulí ní má nɔ. Ba kɔ́n ví hȩn ı̵́ yo̧go̧ né.”

22Dúú vu̵ kuyya Pól voolı̵́ kan Silád, ı̵́ nii moo sə̧"ȩ́ pee vu̵ sid Pól vu̵ sa̧a̧m, vu̵ vbid laan, vu̵ o̧ ba u̵u̵ gbɔ́ vu̵ kan looɨ. 23Vu̵ gbɔ́ vu̵ ɓu̵u̵lı̵́ na'a, vu̵ la tú̵' vu̵ lig púúsinalȩ́. Vu̵ o̧d ı̵́ nii só̧ó̧ze ba a tu̵ vu̵ du̵u̵ na'a.

24Sey ı̵́ nii só̧ó̧ze pee ka ki moo yȩ la ná' máa, ma' dɔd vu̵ la lig ı̵́ ku̵u̵ yo̧o̧ sa̧a̧mé máalȩ́, ga' vu̵ kpəə gbo̧o̧ tóólı̵́.

25Vid sa̧a̧m ka ya̧ máa, Pól vu̵ kan Silád vu̵ o̧d Tayɨɨ moo, vu̵ bee yéé na"o̧. Daga vu̵ baa ki vu̵. 26Vaŋná hág gbo̧o̧ tóó nam. Lig púúsina nam 'waa, kan do̧do̧o̧ woo á̧ḿ; ya̧gníim vu̵ tú̵'ú̵ 'waapád; ɗág ku̵u̵ ga'a púúsina vu̵ wu̵lı̵́ máa yú̵'ú̵ 'waapád. 27Ɨ́ nii só̧ó̧ze pee níḿ dɔg, ho̧ ya̧gníim ku̵u̵ mbaa tə́ədná máa, taa nán púúsina ba vu̵n lúú ɗug 'waa sú̵'ú̵, ma woo pag bi sa fó̧ó̧ bii wu̵lı̵́. 28A̧máa Pól ka ho̧ máa, sȩn fó̧ó̧, moo dɔg moo yúba, o̧: “A̧m nɔɔ fó̧ó̧ móó sá! Ya vóó 'waapád, vɔ́ dɨlı̵́.”

29Ma só̧ó̧ze gbɔ bee, u̵u̵ pa̧n bi ya veeɨ, laa ɗug lig tíŋ́, baa tu̵u̵ 'waa daa kan fó̧ó̧ á̧ḿ, kə̧ə̧ la tíŋ́ Pól voolı̵́ kan Silád.

30Pig woolı̵́ máa, vud vu̵ la gɔ́ŋ́, vi vu̵: “Ba'á vu̵, yee míń kɔ́ née, ma míń sə́ddá?”

31Ma vu̵ hí̧i̧du̵: “A̧m 'yɛ́ zó̧ó̧ móó ı̵́ 'yɛ́lı̵́ Yesu woolı̵́ tée, mɔ́ń sə́d kan nán kíi móólȩ́ vu̵ 'waa á̧ḿ.”

32Vu̵ tú'udu̵ moo ı̵́ 'yɛ́lı̵́ woo, kan nán kíi woolı̵́ vu̵ á̧ḿ.

33Ɨ́ nii só̧ó̧ze pee ɓɛ vu̵ viddí wu̵lı̵́ á̧ḿ, tɛ vu̵ ndɔ́g. Ma Pól vu̵ woo vu̵ mam Tayɨɨ zu̵u̵ ya̧g woolı̵́, kan nán kíi woolı̵́ vu̵ 'waapád. 34Daa ɓɛ Pól vu̵ laan woolı̵́ ligí, pú̵ vu̵ hȩn lálı̵́. Nán pee zó̧ó̧ dȩ' vu̵ ya voo 'waapád, moo ku̵u̵ 'yɛ́ sı̵́ zó̧ó̧ voo Tayɨɨ woolı̵́ ú̵ yȩ nɔ.

35Ya ka tú máa, ı̵́ nii moo sə̧"ȩ́ Róma pee vu̵ ba' nán vu̵ ba u̵u̵ la o̧d ı̵́ nii só̧ó̧ze pee ba a vud Pól vu̵ gbɔ la ú̵. 36Ma ı̵́ nii só̧ó̧ze ya o̧d Pól: “Ɨ́ nii pee vu̵ ba' ya a̧n vud ví gbɔ la ú̵. I lúú la sı̵́ ví ú, i laa nánná.”

37A̧máa Pól o̧d nán vu̵n ba' vu̵ ya pee: “Vu̵ gbɔ́ vɔ́ la kan loo zo"ı̵́, vu̵ kin ná moo vóólı̵́ ya̧gá̧ né á̧ḿ. Vɔ́ vóó waa hág Róma vu̵ yu̵! Vu̵ dɔd vɔ́ lig púúsinalȩ́ á̧ḿ, ma vu̵ hí̧í̧ bi yu̵g vud vɔ́ gbɔ la dimnáa? Ɨ́ yȩ máa pɛ́lı̵́. Ʉu̵ ya vud vɔ́ kan fó̧ó̧ voo nɔ.”

38Waa ba'ad pee vu̵ pa̧ŋ moo yȩ la o̧d ı̵́ nii moo sə̧"ȩ́ pee vu̵.

Sey nán yȩ ku̵u̵ ki Pól vu̵ kan Silád á̧ḿ vu̵n waa hág Róma vu̵ yu̵ máa, dú̵ú̵ kɔ́ vu̵. 39Vu̵ ya vi Pól vu̵ kan Silád u̵u̵ kéé hȩn ɓı̵́d bii gbɔ la ú̵. Vu̵ vud vu̵ lig púúsinalȩ́, ma vu̵ duu dȩn vu̵ nag, vu̵ vi vu̵ u̵u̵ lúú la kaa bii yɛlı̵́. 40Pól vu̵ vúd la lig púúsinalȩ́, vu̵ daa laa lig Lídia woolı̵́. Vu̵ la ho̧ daga kirtȩ́n vu̵, vu̵ zigid vu̵ zó̧ó̧, vu̵ daa lúú kaa yȩlȩ́.

Currently Selected:

Debtere ba'ad waa ba'ad voo nɔ 16: DIINT

Highlight

Copy