Debtere ba'ad waa ba'ad voo nɔ 15

Sú̵ggı̵́ gbo̧o̧ Yerúsalemmé

1Nán tóó vu̵ lúú hág Yúúdalı̵́, vu̵ zu̵u̵ kaa gbaŋ Aŋtiósdı̵́, vu̵ o̧d nán kirtȩ́n wu̵lı̵́ yȩ vu̵: “Tow i dɔ́n do̧ŋ kɔ́ ı̵́ dooká Múúsa woo ka o̧n wɔgɔ né tée, víń sə́n né.”

2Pól vu̵ kan Baanábas ku̵u̵ ki moo voo yȩ máa, vu̵ bé' moo fanné kan nán yȩ vu̵ píímná yúú moo yȩlȩ́, ma nán kirtȩ́n vu̵ mbɔ́g moo, vu̵ o̧ Pól vu̵ kan Baanábas kan nán tóó vu̵ kaa gbaŋ Aŋtiósdı̵́ ba u̵u̵ dɔgga Yerúsalemmé, u̵u̵ la mbɔ́g moo yȩ kan waa ba'ad Yesu woo vu̵, kan ı̵́ nii sú̵ggı̵́ tóó vu̵ wu̵lı̵́ pi nu.

3Nán sú̵ggı̵́ Aŋtiósdı̵́ ku̵u̵ ba' vu̵ gáá máa, vu̵ ya̧a̧ duu hág Fenisíilí kan Samaríi. Vu̵ pá'ad nán kirtȩ́n vu̵, nán ı̵́ ba ku̵u̵ Yúúda pɛ́lı̵́ máa vu̵n duu sı̵́ Tayɨɨ ú̵. Moo voo yȩ dȩ'ȩd nán kirtȩ́n vu̵ zó̧ó̧ 'waapád.

4Sey Pól kan Baanábas ku̵u̵ ya̧ Yerúsalemmé máa, nán sú̵ggı̵́ vu̵ kan waa ba'ad Yesu woo vu̵, kan ı̵́ nii sú̵ggı̵́ vu̵ á̧ḿ, vu̵ sú̵g fȩȩ vu̵. Pól vu̵ pá'ad vu̵ hȩn Tayɨɨ ka kɔ́ kan vu̵ yȩ 'waapád.

5Nán sú̵ggı̵́ tóó vu̵ du̵u̵lı̵́, ká vu̵ nán farísa vu̵ yu̵, ma vu̵ tii zó̧ó̧ 'yɛ́ Yesu woolı̵́ á̧ḿ.

Sey Pól ku̵u̵ pa'a moo 'waa máa, vu̵ lúú dɔg, vu̵ o̧: “Séý nán sú̵ggı̵́ ı̵́ ku̵u̵ nán Yúúda pɛ́lı̵́ yȩ u̵u̵ dɔ́ do̧ŋ, u̵u̵ duu dooká Múúsa woo á̧ḿ.”

6Ma waa ba'ad vu̵ kan ı̵́ nii sú̵ggı̵́ vu̵, vu̵ sú̵g bi tə́g moo yȩ ho̧ ó̧.

7Ku̵u̵ fan moo na'a máa, Piɛ́r lúú dɔg o̧: “Dan kirtȩ́n vu̵, ví gaa Tayɨɨ ba yeen sa̧a̧m víílí ɗii sú̵'ú̵, moo a̧n tú'ud zig tóó vu̵ moo to̧o̧ 'maŋ moo u̵u̵ ki, u̵u̵ fȩȩ moo woo á̧ḿ. 8A̧máa Tayɨɨ wu̵ gaa zó̧ó̧ nánán voo. Ma pú̵ vu̵ yigid woo kɔ́ ı̵́ ka pú̵ ba ví yɛ wɔgɔ. Hȩn yȩ tú' Tayɨɨ ba hí̧í̧ vu̵ sú̵'ú̵. 9Tɛ zó̧ó̧ voo, moo ku̵u̵ fȩȩ moo woo má nɔ; səgən ba ví kan vu̵ né. 10Moo ȩn ɓəə ví zo' Tayɨɨ moo, ví hí̧í̧ bi ha'ad nán sú̵ggı̵́ yȩ vu̵ hȩn gané ı̵́ a ba ví yée kú̵u̵ gaŋŋɔ mban né, kaa gaŋ mban ví ní á̧ḿ yɛlá? 11Ba taa ví ban sə́d ví kan zó̧ó̧ nán ı̵́ 'yɛ́lı̵́ Yesu woo nɔ kɔ́ ı̵́ vu̵ wɔgɔ á̧ḿ.”

12Ma nán sú̵ggı̵́ vu̵ 'waapád, vu̵ mbaa sı̵́ simmm. Vu̵ baa ki moo Baanábas voo kan Pól, ku̵u̵ pá'ad vu̵ hȩn sa̧ga̧ kan hȩn zálı̵́ Tayɨɨ ka kɔ́ kan vu̵ sa̧a̧m nán ı̵́ ku̵u̵ Yúúda pɛ́lı̵́ máa voolı̵́ yȩ 'waapád.

13Sey ku̵u̵ moo moo yȩ 'waa sú̵'ú̵ máa, Yaakúbu ka moo o̧: “I ki lée, dan kirtȩ́n vu̵. 14Simɔ́ŋ ba dəŋ pá'ad ba ví, Tayɨɨ ba dəŋ yee nán tóó ba ku̵u̵ zig Yúúda pɛ́lı̵́ máa vu̵, moo ba u̵u̵ mbaa nán bii nu náa? 15Ɨ́ yɛ man kan moo anábi voo kííd, moo Tayɨɨ o̧:

16‘Pig woo tée, míń duu ya

yo̧o̧ lig Daavíd woo ka túḿ yȩ nag 'maŋná;

míń duu yo̧o̧ gbɔmvəg woo vu̵ luu dɔg,

míń duu wɔddu̵ á̧ḿ.

17Ma nán ı̵́ tóó ku̵u̵ kéé máa, vú̵ń soon,

kan zig ı̵́ káń bee vu̵ 'waapád u̵u̵ mbaa nán míí nu yȩ vu̵ á̧ḿ.

18Hȩn ı̵́ 'yɛ́lı̵́ ka o̧ máa, wu̵ yȩ nɔ, wu̵ kɔ́ á̧ḿ, wu̵ tú' hȩn yȩ gbó̧ŋ́ na'a.’ ”

19Yaakúbu duu ha' moo tóó, o̧: “Moo woo nɔ mí taa, nán ı̵́ tóó ku̵u̵ Yúúda pɛ́lı̵́, ku̵u̵ bi duu Tayɨɨɨ tée, ba duu yı̵́b vu̵ ví hȩn tóó a təə vu̵ kɔ́lı̵́ máa sá. 20A̧máa ba bíńda o̧d vu̵ ví, u̵u̵ lá hȩn mɛm ku̵u̵ sə̧'ə̧d tayɨɨ lee vu̵ sá, u̵u̵ gág hȩn sí̧i̧d kɔ́lı̵́, u̵u̵ lá pú̵g sə́g vəgə́ sá, u̵u̵ lá mɛm sá á̧ḿ, 21moo ká vu̵ baa pa ya sı̵́ dooká Múúsa woo gbó̧ŋ́ na'a kaa kan kaa, vu̵ baa záŋ́ga sı̵́ lig sú̵ggı̵́ nán Yúúda voolı̵́ zá̧ga̧ asawə 'waapáddú̵ á̧ḿ.”

Ɗerwəl ku̵u̵ ba'ad nán zó̧ó̧ 'yɛ́lı̵́ ı̵́ ku̵u̵ Yúúda vu̵ pɛ́lı̵́ máa, wu̵ yɛ nɔ

22Sey woo waa ba'ad Yesu woo vu̵ kan ı̵́ nii sú̵ggı̵́ vu̵, kan nán sú̵ggı̵́ vu̵ 'waapád, vu̵ mbɔ́g moo bi yee nán tóó vu̵ ba' la kaa gbaŋ Aŋtiósdı̵́, kan Pól vu̵ kan Baanábas á̧ḿ. Ma vu̵ yee Yúúda, yéé woo tóó Baasába vu̵ kan Silád. Ya voo idú á̧ḿ, ká vu̵ ı̵́ nii sú̵ggı̵́ɨ. 23Vu̵ pú̵ vu̵ ɗerwəl nagá. Hȩn ku̵u̵ bíńda wu̵lı̵́ máa, wu̵ yɛ nɔ, vu̵ o̧: “Vɔ́ waa ba'ad Yesu woo vu̵ yu̵, vɔ́ sú̵g kan ı̵́ nii sú̵ggı̵́ vu̵ yu̵, vóo ba'ad nán kirtȩ́n ı̵́ ku̵u̵ nán Yúúda pɛ́lı̵́, ku̵u̵ mbaa kaa gbaŋ Aŋtiósdı̵́, kan hág Siiríi kan Silisíilí yȩ vu̵ yu̵ ɗerwəl yɛ nɔ. Ba ví baa nán kirtȩ́n vu̵ yu̵. Vɔ́ vá' ví wu̵lı̵́. 24Vɔ́ ki nán tóó ba vu̵n lúú vóólı̵́ yɛlı̵́, ba vu̵n la yú ví kan moo, ba vín gbɔ́ dam yúú moo voo yȩlȩ́ máa, vóo ba'an vu̵ vóó né. 25Moo woo nɔ ma vɔ́ mbɔ́g moo ya vóó 'waapád, vɔ́ yee nán tóó vu̵ ba'ad ví, vu̵ sú̵g laa kan da vɔ́ gboo kóó hí̧í̧ vu̵ na'a yɛ vu̵ yu̵, Baanábas vu̵ kan Póllu̵, 26ı̵́ zaa ka vu̵n nɔɔ vu̵ yúú ba'ad ı̵́ 'yɛ́lı̵́ baa ví Yesu Krístu woolı̵́ yɛ vu̵ yu̵. 27Vɔ́ ba' Yúúda vu̵ kan Silád, vú̵ńnɔ o̧d ví moo hȩn kóó bíńda yɛlı̵́ kan ya̧g voo, 28moo vɔ́ sú̵g kan yigid Tayɨɨ woo, ma vɔ́ mbɔ́g moo bi ha'an ví hȩn gané tóó né. Séý hȩn ı̵́ kóó dɨd ví o̧lȩ́ yɛ vu̵ yu̵: 29I lá hȩn mɛm ku̵u̵ sə̧'ə̧d tayɨɨ lee vu̵ sá, i lá mɛm sá, i lá pú̵g sə́g vəgə́ sá, i gág hȩn sí̧i̧d vu̵ kɔ́lı̵́ á̧ḿ. I kɔ́n hȩn yȩ vu̵ né tée, du̵u̵ ú̵. I mbaa nánne.”

30Nán vu̵n yee vu̵ pee ku̵u̵ ya̧ zu̵u̵ kaa gbaŋ Aŋtiósdı̵́ máa, vu̵ su̵g nán sú̵ggı̵́ vu̵ wu̵lı̵́ 'waapád, vu̵ pú̵ vu̵ ɗerwəl pee.

31Ku̵u̵ záŋ́ga máa, nán 'waapád vu̵ dȩ' zó̧ó̧ yúú moo zó̧ó̧ ziginí yȩlȩ́. 32Yúúda vu̵ kan Silád á̧ḿ, ká vu̵ anábi vu̵ yu̵, vu̵ o̧d nán kirtȩ́n yȩ vu̵ moo fáá fáá fá, moo bi zigid vu̵ zó̧ó̧, bi sȩn vu̵ fó̧ó̧ á̧ḿ.

33Ku̵u̵ səə wu̵lı̵́ bá' ɓu̵u̵lı̵́ na'a máa, nán kirtȩ́n vu̵ ba' vu̵ gáá kan fó̧ó̧ ká̧'a̧d, vu̵ daa fíí dɔg nán vu̵n ba' vu̵ pee voolı̵́.

[ 34A̧máa Silád tii mbaa daa woo wu̵lı̵́.] 35Pól vu̵ mbaa voo kan Baanábas dɨ kaa gbaŋ Aŋtiósdı̵́ á̧ḿ, kan nán tóó vu̵ ɓu̵u̵lı̵́ na'a, vu̵ tú' moo, vu̵ pa moo ı̵́ 'yɛ́lı̵́ Yesu woo wu̵lı̵́.

Pól vu̵ hı̵́'ı̵́n kan Baanábas

36Bá' waaná' pig woolı̵́ máa, Pól o̧d Baanábas: “Ba vȩ́' la gii da ba ví kirtȩ́n ı̵́ kaa tú'ud vu̵ moo ı̵́ 'yɛ́lı̵́ Yesu woo yȩ vu̵ pȩ́ń. Ba ho̧ vu̵ duu kaalı̵́ kaalı̵́, vu̵ mbaa lá nɛ́nná?”

37Baanábas hí̧í̧ bi pa̧ŋ Yoohá̧na ı̵́ ku̵u̵ beewu̵ Márkus máa nagá á̧ḿ, 38a̧máa Pól sɛ́n né, moo Márkus ká ba kéé bi gbɔ hág Pa̧mfilíilí, ba maan bi ba'ad né.

39Vu̵ fá̧ŋ́ moo gbo̧o̧ ba'a, vu̵ hı̵́'ı̵́n wu̵lı̵́. Baanábas ɓɛ Márkus vu̵ daa laa á̧ḿ, vu̵ dɔ́ nɛ́ŋ́ laa mam bam Kíipərəlı̵́; 40Pól ɓɛ woo Silád, bi sú̵g laa kannɔ á̧ḿ. Nán kirtȩ́n vu̵ vi ı̵́ 'yɛ́lı̵́ ba a bag Pól vu̵ hȩnne; ma vu̵ daa laa. 41Vu̵ ya̧a̧ duu hág Siiríilí kan Silisíi á̧ḿ, vu̵ zigid nán sú̵ggı̵́ vu̵ zó̧ó̧ wu̵lı̵́.

Currently Selected:

Debtere ba'ad waa ba'ad voo nɔ 15: DIINT

Highlight

Copy