Debtere ba'ad waa ba'ad voo nɔ 14

Pól vu̵ kan Baanábas vu̵ dɨ kaa Ikónné

1Pól ku̵u̵ ya̧ la kan Baanábas kaa Ikónné máa, hȩn woo kɔ́y kɔ́ ı̵́ tíŋ́ pee wɔgɔ, vu̵ dɔ́ lig sú̵ggı̵́ nán Yúúda voolı̵́, vu̵ duu moo moo dágá pee há̧á̧ nán Yúúda ɓu̵u̵lı̵́ na'a vu̵ fȩȩ moo Tayɨɨ kan nán ı̵́ ku̵u̵ Yúúda pɛ́lı̵́ máa vu̵ á̧ḿ. 2A̧máa nán Yúúda ı̵́ ku̵u̵ ma moo yȩ máa, vu̵ zo' nán ı̵́ ku̵u̵ Yúúda pɛ́lı̵́ máa vu̵, ba u̵u̵ máń nán kirtȩ́n yȩ vu̵ ú̵.

3Pól vu̵ kan Baanábas vu̵ mbaa wu̵lı̵́ ɗiilí na'a. Vu̵ moo moo kan zó̧ó̧ voo 'waapád, vu̵ pa moo zó̧ó̧ nán ı̵́ 'yɛ́lı̵́ woo ka kɔ́ yȩlȩ́. Tayɨɨ pú̵ vu̵ néélȩ́ hȩn sa̧ga̧ vu̵ kɔ́lı̵́ kə́dkə́d, kan hȩn zálı̵́ tóó vu̵, moo nán u̵u̵ gaa moo voo yȩ ba moo yȩ́ńne. 4A̧máa nán kaa vu̵ pə́gə́n zu̵u̵, tóó vu̵ duu moo nán Yúúda voo, tóó vu̵ duu voo moo waa ba'ad Yesu woo voo. 5Nán Yúúda vu̵ kan nán ı̵́ ku̵u̵ Yúúda pɛ́lı̵́ máa, vu̵ sú̵g kan ı̵́ nii kaa vu̵, vu̵ mbɔ́g moo yúú Pól woolı̵́ kan Baanábas, bi duun vu̵ kan moo, bi gbóo vu̵ nɔɔ kan 'yɛgɛɨ.

6Nán idú yȩ ku̵u̵ ki moo yȩ máa, vu̵ daa lúú ɗug laa kaa Lístalı̵́ kan Dɛ́rbə kan kaa tóó vu̵ á̧ḿ, hág Likawníilí. 7Vu̵ dəŋ moo to̧o̧ 'maŋ palı̵́ wu̵lı̵́.

Pól vu̵ dɨ kaa Lístalı̵́ kan Baanábas á̧ḿ

8Nán kpee tóó ká ka̧a̧ mbaa la hágá kaa Lístalı̵́, moo ká mbaa kpee diga ha̧a̧lȩ́ woolı̵́, ká 'yȩm né sá̧ḿ, kóó bá' dágá aga. 9Nán yȩ baa ki moo Pól ka dɨ moolȩ́ sey yȩlȩ́.

Pól ka tə́ggu̵ máa, gaa ba nán moo fȩȩlȩ́ ı̵́ ho̧o̧ a ka̧"o̧ má nɔ. 10Ma o̧ddu̵ dɔg moo yúba, o̧: “A̧m lúú dii dɔg yúba sə́g!”

Ma nán pee wa̧ŋ daa dii la, bé' 'yȩ́m.

11Sey dúú ku̵u̵ ho̧ hȩn Pól ka kɔ́ yȩ máa, vu̵ moo dɔg moo yúba kan ya̧g Likawníi, vu̵ o̧: “Tayɨɨ vu̵ tii mbaa kɔ́ ı̵́ nánán vu̵ wɔgɔ, vu̵ yaa baa vílí sú̵'ú̵.”

12Vu̵ 'yɛ́d Baanábas yéé Zɛúd, Pól woo Hɛrɛmɛ́d,#14:12 Zɛúd... Hɛrɛmɛ́d Zɛúd máa, ká gbanaa tayɨɨ nán gɛrɛ́g voo nɔ; Hɛrɛmɛ́d ká waa ba'ad tayɨɨ gɛrɛ́g voo nɔ. moo wu̵ baa moo moo.

13Lig ku̵u̵ mbaa ha'ad tayɨɨ Zɛúd hȩn wu̵lı̵́ máa, ká dɨ ya̧g dɔ́m dɔ́lı̵́ la kaalı̵́; ma nán hȩn ha"ı̵́ woo kan dúú vu̵, vu̵ su̵u̵ ndaa voo vu̵ kan hȩn kó̧'o̧d vu̵, vu̵ laan vu̵ ya̧g dɔ́mmé moo bi ha'ad Pól vu̵ hȩnne.

14Sey waa ba'ad Baanábas kan Pól ku̵u̵ ki moo yȩ máa, vu̵ dee sa̧a̧m voo, vu̵ kɛ ɗug dɔ́ la dúú yȩ voolı̵́ sa̧a̧mé, vu̵ moo dɔg moo yúba, 15vu̵ o̧: “Dag gboo vu̵, moo ȩn ví kɔ́ hȩn ı̵́ yo̧go̧lá? Vɔ́ nánánne; ba ví hȩn dágáɨ. Vɔ́ pa̧n ví ya moo to̧o̧ 'maŋ moo i gbɔ tayɨɨ lee yȩ vu̵, i tii ya Tayɨɨ ı̵́ zá̧a̧d ka mbɔ́g be' kan hág kan mam gbo̧o̧ kan hȩn 'waapád ku̵u̵ du̵u̵lı̵́ máa woolı̵́. 16Ká tíŋ́ máa, Tayɨɨ gbɔ zig nán vu̵ duu moo taalı̵́ dáń voo vu̵. 17Kóó ı̵́ yo̧go̧ si̧', baa tú'ud nán vu̵ zó̧ó̧ to̧o̧ woo, pú̵ ví mam naŋ zu̵u̵ be"ı̵́, ví sə̧' tú̵d, pú̵ ví hȩn lálı̵́, kɔ́ zó̧ó̧ víí vu̵ dȩ' á̧ḿ.”

18Kóó waa ba'ad yȩ ku̵u̵ dɨd vu̵ moo yȩ moolȩ́ ı̵́ yo̧go̧ yȩ si̧', vu̵ kəə ha̧a̧g ná', ma nán vu̵ ha'an vu̵ hȩn né.

19A̧máa nán Yúúda tóó vu̵ yaa diga kaa Aŋtiós ı̵́ hág Pisidíilí kan kaa Ikónné á̧ḿ, vu̵ zo' dúú vu̵, vu̵ gbóo Pól kan 'yɛgɛ, vu̵ woo fó̧ó̧ woo la gbɔ kaa pigim, moo vu̵ taa ba nɔɔ sú̵'ú̵. 20A̧máa sey waa duulí Yesu woo ku̵u̵ ya gbɔ daa kannɔ máa, Pól lúú dɔg, vu̵ daa dɔ́ la kaalı̵́.

Ya̧g ka̧'a̧m woo máa, vu̵ daa laa kan Baanábas kaa Dɛ́rbəlı̵́.

Pól vu̵ duu vȩ́' la kaa gbaŋ Aŋtiós ı̵́ hág Siiríilí

21Pig woo Pól vu̵ kan Baanábas vu̵ duu pa moo to̧o̧ 'maŋ Dɛ́rbəlı̵́, ma nán vu̵ tii waa duulí Yesu woo vu̵ wu̵lı̵́ ɓu̵u̵lı̵́ na'a.

Pig woolı̵́ máa, vu̵ daa vȩ́' la kaa Lístalı̵́ kan Ikón kan Aŋtiós ı̵́ hág Pisidíilí á̧ḿ. 22Vu̵ zigid waa duulí vu̵ zó̧ó̧, vu̵ o̧d vu̵ u̵u̵ nda doo yúú moo ku̵u̵ fȩȩ yȩlȩ́. Vu̵ duu o̧d vu̵: “Báń nuŋ ví hȩn ndɔ́gɔné ɓu̵u̵lı̵́ na'a pȩ́ń, báń dɔ́ ví gbaŋ waalı̵́ Tayɨɨ woolı̵́.”

23Pól vu̵ kan Baanábas vu̵ 'yɛ́ ı̵́ nii sú̵ggı̵́ vu̵ duu ya sú̵ggı̵́ voo vu̵lı̵́ 'waapád. Vu̵ baa kȩȩ hȩn lálı̵́, vu̵ baa ɓá'ad vu̵ Tayɨɨ, ma vu̵ gbɔ vu̵ ı̵́ 'yɛ́lı̵́ ku̵u̵ fȩȩ moo woo yȩ, woolı̵́ nagá.

24Ku̵u̵ ya̧a̧ daa hág Pisidíi máa, vu̵ duu ya̧ la hág Pa̧mfilíilí. 25Vu̵ tú' moo Tayɨɨ kaa Pɛ́ɛzəlı̵́, ma vu̵ daa zu̵u̵ kaa Atalíilí. 26Vu̵ dɔ́ nɛ́ŋ́ tóólı̵́, vu̵ lúú wu̵lı̵́, vu̵ daa fíí la kaa gbaŋ Aŋtiós ı̵́ hág Siiríilí, kaa woo nán sú̵ggı̵́ ká vu̵ gbɔ waa ba'ad yȩ vu̵ nag Tayɨɨ woolı̵́ moo u̵u̵ kɔ́ ba'ad yȩ nɔ.

27Sey ku̵u̵ ya̧ la kaa gbaŋ Aŋtiósdı̵́ máa, Pól vu̵ kan Baanábas vu̵ su̵g nán sú̵ggı̵́ vu̵, vu̵ pá'ad vu̵ hȩn Tayɨɨ ka maa vu̵, ka tu̵'u̵ zó̧ó̧ nán ı̵́ ku̵u̵ Yúúda pɛ́lı̵́ máa voo, ku̵u̵ fȩȩ moo Yesu woo á̧ḿ yȩ. 28Vu̵ səə mbaa kan waa duulí vu̵ wu̵lı̵́ bá' ɓu̵u̵lı̵́ na'a.

Currently Selected:

Debtere ba'ad waa ba'ad voo nɔ 14: DIINT

Highlight

Copy