1 Nán Koríńti vu̵ 6
6
Moo mbɔ́ggı̵́ nán kirtȩ́n voo nɔ
1Sey nán kirtȩ́n tóó víílí sa̧a̧mé ku̵u̵ kɔ́ń moo ya voolı̵́ tée, moo ȩn ku̵u̵ kéé zig Tayɨɨ woo gbɔ, ku̵u̵ pa̧ŋ moo woo laan fá̧né nán gaa Tayɨɨ sá voolı̵́ máalá̧? 2Ví gaan nán Tayɨɨ woo ba vú̵ńnɔ waan gbaŋ hágá yɛlı̵́ máa náa? Tow i wu̵ dɨ gbaŋ waalı̵́ hágá yɛlı̵́ tée, maa ba vín mbɔ́g moo waa woo vu̵ sa̧a̧m nán kirtȩ́n víílí. Ɨ́ yo̧go̧ náa? 3Ví gaan ba báńnɔ sə̧'ə̧n ví moo yúú maleeka voolı̵́ á̧ḿ máa náa? Ma kɔ́ń née kan moo ı̵́ nánán voolá? 4Kíí dɨ kan moo tóó ı̵́ yo̧go̧ tée, ví pa̧ŋ moo woo laan tíŋ́ nán ı̵́ tóó nán sú̵ggı̵́ ku̵u̵ ɓéé vu̵ máa vooláa? 5Mí o̧d ví ı̵́ yo̧go̧, sȩ́ḿ a kɔ́ ví ú! Nán moo gaalı̵́ tóó a mbɔ́g moo sa̧a̧m víílí máa, dágá aga pɛ́láa? 6Yee máa, nán kirtȩ́n tóó ku̵u̵ kɔ́ń moo tée, maa ba vu̵n pa̧ŋ moo woo laan nán ku̵u̵ 'yɛ́n zó̧ó̧ voo Tayɨɨ woolı̵́ né máa vooláa?
7Moo a kɔ́y sa̧a̧m víílí tée, hȩn woo hȩn nag tunníi. Ndíga ka víńnɔ ma' zó̧ó̧ moo nán tóó u̵u̵ kɔ́d ví hȩn ɓı̵́d. Ka vu̵n vbid víw hȩn tée, kan du̵u̵. Moo ȩn ví kɔ́n ı̵́ yo̧go̧ nélá? 8A̧máa víi tii kɔ́ hȩn kə̧ə̧g vu̵. Ví vbid nán vu̵ hȩn, ví vbid kan da ví kirtȩ́n vu̵ á̧ḿ máalá̧! 9Ví gaa náa? Nán hȩn kə̧ə̧g kɔ́lı̵́ vú̵ń dɔ́n ya gbaŋ waalı̵́ Tayɨɨ woolı̵́ né. I gággú̵! Nán hȩn sí̧i̧d kɔ́lı̵́ vu̵, kan nán ku̵u̵ duu tayɨɨ mbɔ́ggı̵́ vu̵, kan nán ɓáa kɔ́lı̵́ vu̵, kan wayée ku̵u̵ ud kan daga vu̵, 10kan nán líw vu̵, kan nán zó̧ó̧ sú̵lı̵́ vu̵, kan nán doo kíílí vu̵, kan nán ya̧g vȩ́'ȩd vu̵, kan nán hȩn vbinní vu̵ 'waapád vú̵ń dɔ́n gbaŋ waalı̵́ Tayɨɨ woolı̵́ né. 11Nán tóó ká vu̵ dɨ ı̵́ yo̧go̧ sa̧a̧m víílí. A̧máa vu̵ woo ví mam Tayɨɨ woo sú̵'ú̵, ví tii mbaa sı̵́ nán Tayɨɨ woo vu̵ ú̵, ví to̧n sı̵́ kan Tayɨɨ ú̵ á̧ḿ, moo yɛ́g ı̵́ 'yɛ́lı̵́ Yesu Krístu woo, kan yigid Tayɨɨ baa ví woo nɔ á̧ḿ.
I ɓɛ fó̧ó̧ víí na'an ı̵́ 'yɛ́lı̵́ Tayɨɨ wu̵ yu̵
12“Tayɨɨ há'an mí hȩn tóó né,” a̧máa hȩn 'waapád wu̵ du̵u̵n kɔ́lı̵́ né. Ka míń o̧: “Tayɨɨ há'an hȩn tóó né,” a̧máa míń gbɔn hȩn tóó fó̧ó̧ a buun mí ní. 13“Hȩn lálı̵́ mbaa woo moo ya̧"ȩ, ya̧' mbaa woo moo hȩn lálı̵́ɨ;” kóó ı̵́ yo̧go̧ si̧', Tayɨɨ wú̵ń tud vu̵ 'waa idú á̧ḿ. A̧máa fó̧ó̧ máa, vu̵ mbɔ́gɔnɔ moo ɓáa kɔ́lı̵́ɨ né. Mbaad woo ı̵́ 'yɛ́lı̵́ baa ví nu; ı̵́ 'yɛ́lı̵́ á̧ḿ mbaad fó̧ó̧ȩ. 14Tayɨɨ nim ı̵́ 'yɛ́lı̵́ baa ví nɔmmé sú̵'ú̵; wú̵ń duu nim ba ví kan néélȩ́ woo yȩ á̧ḿ.
15Ví gaa fó̧ó̧ bii máa, ba fó̧ó̧ ka' Krístu woo nɔ máa ó̧. Míń ɓɛ fó̧ó̧ ka' Krístu woo tóó, tii fó̧ó̧ ka' wakȩ́ȩ́ ɓáa kɔ́lı̵́ woo naa? Ɨ́ yȩ máa pɛ́lı̵́ sá̧ḿ! 16Tóó tée, ví gaan nán ba ka ud kan wakȩ́ȩ́ ɓáa kɔ́lı̵́ tóó tée, ba vu̵n tii mbaan fó̧ó̧ dágáɨ máa náa? Moo debtere o̧: “Ya voo idú á̧ḿ vú̵ń tii fó̧ó̧ dágáɨ.”
17A̧máa nán ka sú̵gú̵n sı̵́ kan ı̵́ 'yɛ́lı̵́ Yesu ú̵ tée, vu̵ tii sı̵́ hȩn dágá zó̧ó̧lȩ́ ó̧. 18I ndɔg ɓáa kɔ́lı̵́ la ú̵! Hȩn ɓı̵́d ı̵́ tóó nán ku̵u̵ kɔ́ máa, mbaa dɨ woo fó̧ó̧ gɔ́ŋ́. A̧máa nán ı̵́ ka kɔ́ ɓáa máa, kɔ́d fó̧ó̧ woo wu̵ hȩn ɓı̵́d. 19Ví gaa fó̧ó̧ bii máa ba lig yigid Tayɨɨ woo nɔ máa ó̧ náa? Yigid Tayɨɨ woo víílí yȩ, Tayɨɨ wu̵ pú̵ ví náa? Aga ví mbaan dáńná né. 20Yesu hɨ ví kan fó̧ó̧ woo sú̵'ú̵. I ɓɛ fó̧ó̧ víí na'an Tayɨɨ wu̵ yu̵.
Currently Selected:
1 Nán Koríńti vu̵ 6: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
