1 Nán Koríńti vu̵ 7

Moo vilí yúú mbanné wə̧ə̧ kan kȩ́ȩ́lȩ́

1Yúú moo máa ı̵́ kíí bíńda vin ya yȩ, mí o̧d ví hȩn ka du̵u̵ máa, nán ka vu̵n één sá. 2A̧máa moo ɓáa kɔ́lı̵́ a ɓu̵u̵ sá tée, ndíga nán 'waapád a éé kȩ́ȩ́ dáń woo, wakȩ́ȩ́ a éé wə̧ə̧ dáń woo á̧ḿ. 3Wayée a kɔ́d kȩ́ȩ́ hȩn wə̧ə̧, wakȩ́ȩ́ a kɔ́d wə̧ə̧ hȩn kȩ́ȩ́ á̧ḿ. 4Kȩ́ȩ́ kan néélȩ́ yúú fó̧ó̧ woolı̵́ pɛ́lı̵́, moo fó̧ó̧ woo máa wə̧ə̧ woo nɔ. Wə̧ə̧ kan néélȩ́ yúú fó̧ó̧ woolı̵́ pɛ́lı̵́ á̧ḿ, moo fó̧ó̧ woo máa kȩ́ȩ́ woo nɔ á̧ḿ. 5Tóó a há' daga fó̧ó̧ sá. A̧máa tóó tée sey tóólı̵́ aga i mbɔ́g moo bi səə bá' tóó, bi kȩȩ fó̧ó̧ o̧d Tayɨɨ moo wu̵lı̵́ tée, pig woo víń duu mbaa mbaalı̵́ wə̧ə̧ kan kȩ́ȩ́. A pɛ́lı̵́ tée Seeɗán kan zo' ví ú, moo néélȩ́ víí ka ɓu̵u̵ né yȩ nɔ.

6A̧máa mí pú̵n ví dookáɨ né, mí tú'ud ví hi̧naa moo mbɔ́ggı̵́ɨ. 7Mí hí̧í̧ də́ń nán 'waapád ka vu̵n mbaa kɔ́ ı̵́ mí wɔgɔ. A̧máa kóó nɔ́nná a mbaa kan hȩn Tayɨɨ ka pú̵gu̵ máa. Nán tóó mbaa woo ná', tóó mbaa woo ná'.

8A̧máa mí o̧d ı̵́ bȩn vu̵, kan ı̵́ yɛd vu̵, ka vu̵n mbaa la ı̵́ yo̧go̧ kɔ́ ı̵́ mí wɔgɔ tée, kan du̵u̵ ú̵. 9A̧máa u̵u̵ kan néélȩ́ fó̧ó̧ há"ı̵́ pɛ́lı̵́ tée, u̵u̵ één éenée! Wu̵ du̵u̵ mba hȩn hí̧í̧lí̧ kɔ́lı̵́ zó̧ó̧lȩ́.

10Nán kirtȩ́n ı̵́ ku̵u̵ één máa, mí pú̵ vu̵ yu̵ dooká káń ki ı̵́ 'yɛ́lı̵́ baa ví woolı̵́ yȩ nɔ. (Moo woo moo dáń míí nu pɛ́lı̵́.) Wakȩ́ȩ́ u̵u̵ hı̵́'ı̵́n kan wə̧ə̧ sá. 11A̧máa u̵u̵ hı̵́'ı̵́n tée, wakȩ́ȩ́ yȩ a duu éé wə̧ə̧ tóó sá, tóó tée a duu mbɔ́g moo kan wə̧ə̧ nag 'maŋná. Wayée yȩ a nɛŋ kȩ́ȩ́ woo gbɔ sá á̧ḿ.

12Moo nán ı̵́ tóó voo máa, aga míi moo; ı̵́ 'yɛ́lı̵́ baa ví wu̵ o̧n né. Tow wayée kirtȩ́n tóó ka dɨ kan kȩ́ȩ́ ka kirtȩ́n pɛ́lı̵́, tow kȩ́ȩ́ yȩ ka hí̧í̧ mbaalı̵́ kannɔ ó̧ tée, a nɛŋŋɔ gbɔ sá. 13Wakȩ́ȩ́ kirtȩ́n á̧ḿ, tóó ka dɨ kan wə̧ə̧ ka kirtȩ́n pɛ́lı̵́, a̧máa tow wə̧ə̧ yȩ ka hí̧í̧ bi mbaa kannɔ ó̧ tée, u̵u̵ hı̵́'ı̵́n sá, 14moo Tayɨɨ hí̧í̧ wayée ka kirtȩ́n pɛ́lı̵́ yȩ, moo kȩ́ȩ́ woo nɔ. Wakȩ́ȩ́ ka kirtȩ́n pɛ́lı̵́ máa á̧ḿ, Tayɨɨ hí̧í̧wo̧ moo wə̧ə̧ woo nɔ. Tow a ı̵́ yo̧go̧ pɛ́lı̵́ tée, waa víí vú̵ń mbaa kɔ́ ı̵́ nán gaa Tayɨɨ sá vu̵ wɔgɔ, a̧máa vu̵ voo waa Tayɨɨ woo vu̵ yu̵. 15A̧máa nán gaa Tayɨɨ sá tóó a hí̧í̧ bi hı̵́'ı̵́n kan kȩ́ȩ́ (tóó tée kan wə̧ə̧) tée, u̵u̵ hı̵́'ı̵́n, moo hȩn woo 'yɛ́n nán kirtȩ́n vu̵ kɔ́ ı̵́ gba'a wɔgɔ né. Tayɨɨ bee ba ví aa mbaa ví ká̧'a̧dná. 16Ɨ́ móó wakȩ́ȩ́ kirtȩ́n, a̧mmɔ səd dɨ wə̧́ə̧́m zulá? Ɨ́ móó wayée kirtȩ́n, a̧mmɔ səd dɨ kȩ́ȩ́m zulá?

I mbaa ya mbaalı̵́ víí Tayɨɨ ka bee ví wu̵lı̵́ yȩlȩ́

17Séý i mbaa ya mbaalı̵́ víí Tayɨɨ ka bee ví wu̵lı̵́ yȩ, moo ı̵́ 'yɛ́lı̵́ baa ví wu̵ mbɔ́gɔd ba ví hȩn woo. Mí pa moo yȩ nán sú̵ggı̵́ voolı̵́ ya 'waapád. 18Nán ı̵́ ka dɔ́ do̧ŋ pȩ́ń, Tayɨɨ ka beewu̵ tée, a mbaa la ı̵́ yo̧go̧. Tow nán tóó ka dɔ́n ná do̧ŋ né, ma Tayɨɨ ka beewu̵ wu̵lı̵́ tée, a duu dɔ́ sı̵́ do̧ŋ sá. 19Do̧ŋ dɔ́lı̵́ nán Yúúda voo, kan mbaalı̵́ zaga máa, ya voo idú á̧ḿ, hȩn gbo̧o̧ tóó nɔ pɛ́lı̵́. Hȩn gbo̧o̧ máa, séý ba duu ví dooká Tayɨɨ woo nɔ. 20Kóó nɔ́nná a mbaa mbaalı̵́ woo Tayɨɨ ka beewu̵ wu̵lı̵́ má nɔ. 21Ká káḿ mbaa gba'a máa, Tayɨɨ beem wu̵lı̵́, tée a̧m duu gbɔ́ dam sá, a̧máa hȩn vunní móó ka dɨlı̵́ tée, a̧m vúd la ú̵. 22Moo ı̵́ 'yɛ́lı̵́ ka bee nán ya gba'alı̵́ tée, mbaa sı̵́ go'oy vəg lee ı̵́ 'yɛ́lı̵́ woolı̵́ ú̵. Waa ha̧a̧lȩ́ baa á̧ḿ, Krístu ka beewu̵ tée, mbaa sı̵́ gba'a Krístu woo ú̵. 23Yesu hɨ ví sú̵'ú̵. I duu mbaa sı̵́ gba'a nán tóó voo sá. 24Dan kirtȩ́n vu̵, kóó nɔ́nná a mbaa mbaalı̵́ woo tíŋ́ Tayɨɨ woolı̵́, ya Tayɨɨ ka beewu̵ wu̵lı̵́ yȩlȩ́.

Moo vilí yúú nán bȩn voolı̵́, kan wakȩ́ȩ́ yɛd vu̵

25Moo ı̵́ náá gíb waa voo máa, ı̵́ 'yɛ́lı̵́ Yesu pú̵n mí dooká tóó yúú voolı̵́ né, a̧máa mí o̧d ví moo taalı̵́ ı̵́ míí, ı̵́ 'yɛ́lı̵́ wu̵ bagan hȩn, ma mí moo moo yȩ́ń.

26Moo woo nɔ, mí taa kóó nɔ́nná a mbaa kɔ́ ı̵́ ka mbaa yȩ wɔgɔ, moo hȩn kɛb mbalı̵́ ka yaa yɛ nɔ. 27Káḿ éé kȩ́ȩ́ sú̵'ú̵ tée, a̧m duu nɛŋŋɔ gbɔ sá. Káḿ ée ná né tée, a̧m duu éé sı̵́ sá. 28A̧máa káḿ éé kȩ́ȩ́ yȩ, mɔ́ kɔ́n hȩn ɓı̵́ddɨ né. Tow wakȩ́ȩ́ ka éé wə̧ə̧ tée, kɔ́n hȩn ɓı̵́ddɨ né á̧ḿ. A̧máa nán ı̵́ ku̵u̵ één máa, vu̵ nuŋ fó̧ó̧ pinní sú̵'ú̵, ma mí hí̧í̧ bi səd ví wu̵lı̵́ ú̵.

29Dan kirtȩ́n vu̵, moo káń hí̧í̧ bi o̧d ví yȩ, wu̵ yɛ nɔ. Zag zaa pɛ́lı̵́, hȩn hágá yɛlı̵́ vú̵ń 'wáa sú̵'ú̵. Moo woo nɔ, 'ya̧'a̧ yɛ nán kȩ́ȩ́ éélı̵́ u̵u̵ mbaa kɔ́ ı̵́ bȩn wɔgɔ. 30Nán ku̵u̵ ká̧ŋ́ máa, u̵u̵ mbaa kɔ́ ı̵́ zó̧ó̧ ka ví̧i̧n vu̵ né wɔgɔ. Nán ı̵́ zó̧ó̧ ka dȩ' vu̵ máa, u̵u̵ mbaa kɔ́ ı̵́ zó̧ó̧ ka dȩ'ȩn vu̵ né wɔgɔ. Nán ku̵u̵ hɨ hȩn máa, u̵u̵ mbaa kɔ́ ı̵́ ku̵u̵ 'yɛ́n hȩn né wɔgɔ. 31Nán ı̵́ ku̵u̵ dɨ kan hȩn naa hágá yɛlı̵́ vu̵, u̵u̵ mbaa kɔ́ ı̵́ ku̵u̵ kannɔ pɛ́lı̵́ wɔgɔ. Moo hág máa yɛ wú̵ń dɨ 'wáanée.

32A̧máa mí hí̧í̧ i gbɔ́ dam yúú mbaalı̵́ víílí sá. Nán ka éen kȩ́ȩ́ né máa, baa tu̵u̵ woo zó̧ó̧ yúú hȩn ı̵́ 'yɛ́lı̵́ Yesu woolı̵́, soo woo hȩn a to̧o̧d ı̵́ 'yɛ́lı̵́ má nɔ. 33A̧máa nán ı̵́ ka éé woo kȩ́ȩ́ máa, tu̵u̵ woo zó̧ó̧ moo hȩn hágá yɛlı̵́ vu̵ yu̵, soo hȩn a to̧o̧d kȩ́ȩ́ woo má nɔ. 34Tée 'yɛ́ sı̵́ zó̧ó̧ ya idú ú. Wakȩ́ȩ́ ka éen wə̧ə̧ né máa, dɨ ı̵́ yo̧go̧ á̧ḿ, kóó náá gíb waa á̧ḿ, baa tu̵u̵ woo zó̧ó̧ yúú hȩn ı̵́ 'yɛ́lı̵́ woolı̵́, moo fó̧ó̧ bii, kan zó̧ó̧ bii a mbaad wu̵ yu̵ dágá kəd. A̧máa ı̵́ ka éé woo wə̧ə̧ máa, baa tu̵u̵ woo zó̧ó̧ moo hȩn hágá yɛlı̵́ vu̵ yu̵, soo woo hȩn a to̧o̧d wə̧ə̧ woo má nɔ.

35Mí o̧ moo yɛ a du̵u̵d víw, a̧máa moo a mbaad ví kɔ́ ı̵́ hȩn zi̧i̧lí̧ tóó wɔgɔ sá. Mí hí̧í̧ i mbaa də́ń mbaalı̵́ ı̵́ ka gu̵g du̵u̵ kan ba'ad ı̵́ 'yɛ́lı̵́ Yesu woo á̧ḿ má nɔ.

36Yúú moo ı̵́ kȩ́ȩ́ sá̧á̧lȩ́ voo máa, kȩ́ȩ́ ka na', ma wayée yȩ ka taa ba i éenɔ vaŋná né, ba du̵u̵ né tée, u̵u̵ kɔ́ kɔ́ ı̵́ ku̵u̵ hí̧í̧ wɔgɔ. Vu̵ kɔ́n hȩn ɓı̵́ddɨ né, u̵u̵ één la ú̵. 37Nán ı̵́ ka sá̧á̧ kȩ́ȩ́ woo, ka 'yɛ́ zó̧ó̧ woolı̵́, tow u̵u̵ yúnnɔ kɔɔgná né, a̧máa ka hí̧í̧ bi éenɔ vaŋná né tée, kɔ́ du̵u̵ ú̵. 38Moo woo nɔ, nán ı̵́ ka éé náá gíb waa yȩ kɔ́ du̵u̵ ú̵. A̧máa ı̵́ ka éenɔ né yȩ, wu̵ kɔ́ du̵u̵ mba.

39Wakȩ́ȩ́ wə̧ə̧ máa, wə̧ə̧ ka nɔɔ ná né tée, táń sı̵́ kan wə̧ə̧ ó̧. A̧máa wə̧ə̧ ka nɔɔ sú̵'ú̵ tée, moo wə̧ə̧ búú sú̵'ú̵. Wú̵ń éé wə̧ə̧ tóó kɔ́ ı̵́ ka hí̧í̧ wɔgɔ, a̧máa tée a éé nán kirtȩ́nne á̧ḿ. 40A̧máa taalı̵́ míí máa, kan éen wə̧ə̧ tóó né tée, zó̧ó̧ kan dȩ"o̧ mba ú̵. Mí taa míí, yigid Tayɨɨ woo dɨ míílí̧ á̧ḿ.

Currently Selected:

1 Nán Koríńti vu̵ 7: DIINT

Highlight

Copy