1 Nán Koríńti vu̵ 5
5
Nán tóó sa̧a̧m nán sú̵ggı̵́ voolı̵́ éé kȩ́ȩ́ ba"oo woo
1Vu̵ ki ya 'waapád nán tóó vu̵n kɔ́ hȩn ɓı̵́d sa̧a̧m víílí. Hȩn kɔ́lı̵́ ı̵́ yȩ woo, kóó a nán gaa Tayɨɨ sá vu̵ yu̵ si̧', ba kin voolı̵́ sa̧a̧mé né, moo vu̵ o̧ nán tóó víílí sa̧a̧mé ba éé kȩ́ȩ́ ba"oo woo nɔ. 2Maa zó̧ó̧ kan ví̧i̧ ví wu̵lı̵́ máa, ví tii na' yúú mɛ́ńnaa? Maa ka víń nɛŋ nán ka kɔ́ hȩn ı̵́ yo̧go̧ yȩ vud víílí sa̧a̧mé má nɔ. 3Kóó a̧n mbaan sa̧a̧m víílí kan fó̧ó̧ míí ní si̧', mí mbaa kan ví dɨ zó̧ó̧ míílí̧. Mí mbaa kɔ́ ı̵́ káń du̵u̵lı̵́ zu wɔgɔ, ma mí sə̧'ə̧d nán ı̵́ ka kɔ́ hȩn ı̵́ yo̧go̧ yȩ moo. 4I su̵g ya̧g kan mí, kan néélȩ́ ı̵́ 'yɛ́lı̵́ baa ví Yesu woo, kan yɛ́g ı̵́ 'yɛ́lı̵́ baa ví Yesu woo, 5i 'yɛ́ nán yȩ nag Seeɗán woolı̵́, moo fó̧ó̧ woo a lı̵́d, moo nán woo a sə́d zá̧ga̧ ı̵́ 'yɛ́lı̵́ woolı̵́.
6Hȩn máa kíí dəm fó̧ó̧ víí wu̵lı̵́ yȩ, hȩn du̵u̵ɨ pɛ́lı̵́; ví gaa ya̧g zílí ka o̧: “Wág waaná' wu̵ kɔ́, ma zu̵m beréd ka fúŋ́ 'waapád yȩ nɔ.”
7I vud wág see yȩ gbɔ la ú̵, woo hȩn ɓı̵́ddɨ. I mbaa dȩ"ȩ́ na'a kɔ́ ı̵́ zu̵m lee wɔgɔ, moo i man kan beréd 'yɛ́ wág sáɨ. Ba dəŋ vúd ví mam páska sú̵'ú̵, moo vu̵ sə̧' mbee waa páska baa ví wu̵lı̵́ sú̵'ú̵, wu̵ Krístu wu̵. 8Moo woo nɔ ba vúd ví mam baa ví kan wág see sá; wág yɛ wu̵ lı̵́nné kan hȩn ɓı̵́d kɔ́lı̵́; a̧máa ba vúd ví mam yɛ kan ba'ad 'yɛ́ wág sáɨ, wu̵ hȩn ka tú' mbaalı̵́ dȩ"ȩ́ na'a kan moo yȩ́ń má nɔ.
9Ɗerwəl ká káń ba'ad ví tíŋ́ máa, mí o̧d ví wu̵lı̵́, i dɔ́ yá̧á̧n kan nán ɓáa kɔ́lı̵́ vu̵ sá. 10Máa mí taan moo nán ɓáa kɔ́lı̵́ hágá yɛlı̵́ voo, kan nán zó̧ó̧ sú̵lı̵́ voo, kan nán líw vu̵, kan nán ku̵u̵ duu tayɨɨ mbɔ́ggı̵́ máa voo nɔ 'waapád né. A ı̵́ yo̧go̧ tée, ka víń kéé hág yɛ gbɔ ú̵! 11A̧máa ká mí hí̧í̧ bi o̧d ví, nán ku̵u̵ 'yɛ́ yéé voo kirtȩ́n, ma ku̵u̵ duu mbaa nán ɓáa kɔ́lı̵́ vu̵, tóó tée nán zó̧ó̧ sú̵lı̵́ vu̵, tóó tée ku̵u̵ duu tayɨɨ mbɔ́ggı̵́ vu̵, tóó tée ku̵u̵ mbaa nán ya̧g vȩ́'ȩd vu̵, tóó tée nán doo kíílí vu̵, tóó tée nán líw vu̵ máa, tée i dɔ́ń kan vu̵ sá, i lá hȩn kan vu̵ sá á̧ḿ.
12-13Moo yȩ́ńne, nán ı̵́ ku̵u̵ nán kirtȩ́n pɛ́lı̵́ máa, mí sə̧'ə̧n míí moo yúú voolı̵́ né; aga Tayɨɨ wú̵ńnɔ sə̧'. A̧máa i sə̧' nán baa ví vu̵ moo kɔ́ ı̵́ debtere ka o̧ wɔgɔ: “I nɛŋ nán hȩn ɓı̵́d kɔ́lı̵́ luu sa̧a̧m víílí la ú̵!”
Currently Selected:
1 Nán Koríńti vu̵ 5: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
