1 Nán Koríńti vu̵ 10

I gág tayɨɨ mbɔ́ggı̵́ vu̵ duulíi

1Dan kirtȩ́n vu̵, mí hí̧í̧ i duu taa hȩn ka kɔ́ a ba ví yée, kú̵u̵ 'yȩm kan Múúsa hó̧g kȩŋŋı̵́ má nɔ. Mam hi̧i̧g yȩ ká fii vu̵, vu̵ ya̧a̧ duu mam yȩ́ȩ́lȩ́ ya voo 'waapád. 2Ya voo 'waapád vu̵ sú̵g woo mam Tayɨɨ woo kan Múúsa mam hi̧i̧g yȩlȩ́, kan mam yȩ́ȩ́ yȩlȩ́ á̧ḿ. 3Ya voo 'waapád vu̵ lá hȩn lálı̵́ dágá kan néélȩ́ Tayɨɨ woo. 4Ya voo 'waapád vu̵ zɔ hȩn zɔlı̵́ dágá yȩ kan néélȩ́ Tayɨɨ woo, moo vu̵ zɔ mam isȩȩm ka duu vu̵ máalȩ́. Isȩȩm sú̵u̵ ká Krístu wu̵. 5Kóó ı̵́ yo̧go̧ si̧', zó̧ó̧ dȩ'ȩn Tayɨɨ yúú nán ɓu̵u̵lı̵́ na'a voolı̵́ né, moo Tayɨɨ tud vu̵ hó̧g kȩŋŋı̵́.

6Hȩn 'waapád yȩ vu̵ kɔ́y moo aa ho̧ gaa ví wu̵lı̵́, aa mbaa ví kan hȩn ɓı̵́d hí̧í̧lí̧ kɔ́ ı̵́ vu̵ wɔgɔ sá. 7I duu tayɨɨ mbɔ́ggı̵́ vu̵ kɔ́ ı̵́ nán tóó voolı̵́ sa̧a̧mé ku̵u̵ kɔ́ máa wɔgɔ sá á̧ḿ. Debtere o̧ ı̵́ yo̧go̧, o̧: “Zig nán yȩ ká vu̵ mbaa hágá moo hȩn lálı̵́, kan doo zɔlı̵́ɨ. Ma vu̵ lúú dɔg, vu̵ bé' fóólı̵́.”

8Ba kɔ́ ví ɓáa kɔ́ ı̵́ nán tóó voolı̵́ sa̧a̧mé ku̵u̵ kɔ́ ma, ku̵u̵ nɔɔ zá̧ga̧ dágá fó̧ó̧ uzinɛɛre gbɛg zu̵u̵ ta̧a̧nɔ́ máa vu̵ wɔgɔ sá. 9Ba gu̵g ví ı̵́ 'yɛ́lı̵́ Tayɨɨ kɔ́ ı̵́ nán tóó voolı̵́ sa̧a̧mé ku̵u̵ kɔ́, ma bɨɨg ka tud vu̵ yȩ wɔgɔ sá. 10I ŋguu moo sá á̧ḿ, moo nán tóó ká vu̵ ŋguu moo sa̧a̧m voolı̵́, ma maleeka nɔm nɔɔné ya tud vu̵ 'waa.

11Hȩn yȩ vu̵ kɔ́ nán yȩ vu̵, vu̵ bíńda vu̵ 'yɛ́ moo aa gág ví wu̵lı̵́, moo ba dɨ ví baa bá' sí̧'í̧d woolı̵́. 12Moo woo nɔ nán ı̵́ ka taa ba bin nda doo sú̵'ú̵ tée, a gággú̵, moo kɔ́ kan kə̧ə̧wo̧ ó̧. 13Hȩn zo"ı̵́ ku̵u̵ ya̧ víílí yȩ vu̵ zo' nán tóó vu̵ ı̵́ yo̧go̧ á̧ḿ; Tayɨɨ wú̵ń gbɔ hȩn zo"ı̵́ tóó wú̵ń mban ví kɛb né, moo Tayɨɨ ta ya̧g tée, buu ní. A̧máa hȩn zo"ı̵́ yȩ a yɔg ví ya tée, Tayɨɨ wú̵ń pú̵ ví néélȩ́ víń mba hȩn zo"ı̵́ sú̵u̵ á̧ḿ.

14Moo woo nɔ dan gboo vu̵, i gág ba'ad tayɨɨ mbɔ́ggı̵́ voo vu̵ kɔ́lı̵́ɨ. 15Mí mbad ví moo yȩ kɔ́ ı̵́ ku̵u̵ baa mbad nán moo taalı̵́ vu̵ máa wɔgɔ; aga i tə́g ho̧ la ú̵. 16Ɗag waa kaa dȩn ví Tayɨɨ nag wu̵lı̵́ yɛ, ba sú̵gú̵n ví kan mɛm Krístu woo wu̵lı̵́ náa? Beréd máa, kaa yɨ ví yɛ, ba sú̵gú̵n ví kan fó̧ó̧ Krístu woo wu̵lı̵́ náa? 17Beréd yȩ dɨ dágá. Kóó aa ɓu̵u̵ ví ú si̧', ba dɨ ví fó̧ó̧ dágá á̧ḿ, moo ba ví 'waapád ba nuŋ ví hȩn beréd dágá yȩlȩ́.

18I ho̧ lá ví nán Izraɛ́l vu̵ yu̵. Nán ku̵u̵ lá hȩn hȩn ha"ı̵́ máa, vu̵ to̧n kan Tayɨɨ ku̵u̵ ha'adu̵ hȩn yȩ á̧ḿ náa? 19Hȩn káń o̧d ví yȩ, mí hí̧í̧ bi o̧d ví hȩn ku̵u̵ ha'ad tayɨɨ mbɔ́ggı̵́ vu̵ yȩ ba hȩn gbo̧o̧ tóó naa? Kóó tayɨɨ mbɔ́ggı̵́ vu̵u̵ hȩn gbo̧o̧a̧? 20Pɛ́lı̵́ sá̧ḿ! A̧máa hȩn nán gaa Tayɨɨ sá ku̵u̵ ha' máa, vu̵ ha'ad yigid ɓı̵́d vu̵ yu̵. Vu̵ ha'an Tayɨɨɨ né. Mí hí̧í̧ i to̧n kan yigid ɓı̵́d vu̵ sá! 21I zɔ hȩn ɗag waa ı̵́ 'yɛ́lı̵́ Yesu woolı̵́ tée, i duu zɔ sı̵́ hȩn yigid ɓı̵́d voo sá sá̧ḿ! 22Ba soo ví ı̵́ 'yɛ́lı̵́ a moo sɨggaa? Ví taa bannɔ mba ví Tayɨɨ kan néélá̧a̧?

Ba kɔ́ ví hȩn 'waapád Tayɨɨ a nuŋ na"ȩ́ wu̵lı̵́

23“Tayɨɨ há'an hȩn tóó né,” a̧máa hȩn 'waapád wu̵ du̵u̵n kɔ́lı̵́ né. “Tayɨɨ há'an hȩn tóó né,” a̧máa hȩn 'waapád wu̵ du̵u̵n zó̧ó̧ baa vílí ní. 24Nán tóó a soo hȩn ka du̵u̵d fó̧ó̧ woo má nɔ sá, a̧máa a sood daga vu̵ yu̵.

25Pú̵g ku̵u̵ gí lummí máa, i ká̧ŋ́ lálı̵́ɨ, i vi sá, moo zó̧ó̧ kan víń ví mooɨ, 26moo debtere o̧: “Hág kan hȩn tíŋ́ woolı̵́ 'waapád Tayɨɨ woo nɔ.”

27Nán tóó ka kirtȩ́n pɛ́lı̵́ ka bee ví hȩn lálı̵́, kíí hí̧í̧ bi laa ú̵ tée, i ká̧ŋ́ hȩn ka 'yɛ́d ví tíŋ́ yȩ lálı̵́ɨ. I vi sá, moo zó̧ó̧ kan víń ví mooɨ. 28A̧máa nán tóó ka o̧d ví: “Wi' hȩn ha"ı̵́ tayɨɨ mbɔ́ggı̵́ wu̵ yɛ nɔ,” tée i lá sá, moo nán yȩ ka o̧d ví sú̵'ú̵ má nɔ, moo zó̧ó̧ kan víńnɔ mooɨ. 29Mí o̧n moo zó̧ó̧ vínní ı̵́ víí nu né, a̧máa moo nán ı̵́ ka o̧d ví yȩ woo nɔ.

Nánán tóó wú̵ń o̧: “Nán tóó a víń moo zó̧ó̧ woolı̵́ tée, moo ȩn ka sə̧' moo yúú mbaalı̵́ vəg lee míí yɛlı̵́lá? 30Mí dȩn Tayɨɨ nag pȩ́ń, mí lá hȩn; moo ȩn vu̵ lágán mí moo yúú hȩn káń dȩn Tayɨɨ nag wu̵lı̵́ yɛlá?”

31Kóó i lá hȩn, kóó i zɔ hȩn, kóó i kɔ́ hȩn woo ȩná, tée i kɔ́ 'waapád moo Tayɨɨ a nuŋ na"ȩ́ wu̵lı̵́. 32I kɔ́ hȩn tóó a sa nán tóó vu̵ zó̧ó̧ sá, kóó nán Yúúda vu̵, kóó nán Gɛrɛ́g vu̵, kóó nán sú̵ggı̵́ Tayɨɨ woo vu̵ á̧ḿ. 33Mí baa kɔ́ ı̵́ yo̧go̧, mí baa sȩn fó̧ó̧ sood míí nán 'waapád vu̵ hȩn du̵u̵ɨ; mí soon moo míí nu dágá né, a̧máa moo a du̵u̵d nán vu̵ ɓu̵u̵lı̵́ na'a, u̵u̵ sə́ddú̵.

Currently Selected:

1 Nán Koríńti vu̵ 10: DIINT

Highlight

Copy