1 Nán Koríńti vu̵ 11
11
1I 'yȩ́ŋ́ hȩn kɔ́lı̵́ míí kɔ́ ı̵́ káń 'yȩ́ŋ́ hȩn kɔ́lı̵́ Krístu woo yɛ wɔgɔ.
Wakȩ́ȩ́ ka laa lig Tayɨɨlı̵́ tée, a wáá sa̧a̧m yúlí
2Mí dəm ví, moo ví taan yúú hȩn 'waapáddı̵́, ví duu hȩn káń tú'ud ví máa 'waapád. 3Kóó ı̵́ yo̧go̧ si̧', mí hí̧í̧ i gaa Krístu ba wu̵ gbanaa wayée voo 'waapád, wayée wu̵ gbanaa kȩ́ȩ́ woo, Tayɨɨ wu̵ gbanaa Krístu woo á̧ḿ. 4Wayée ka wáá sa̧a̧m yúlí o̧d Tayɨɨ moo wu̵lı̵́, tóó tée moon moo Tayɨɨ wu̵lı̵́ tée, ɓéé Krístu wu̵. 5A̧máa wakȩ́ȩ́ ka dɨd Tayɨɨ moo o̧lȩ́, tóó tée ka dɨ moo Tayɨɨ moolȩ́, ma ka wáan sa̧a̧m yúlí né tée, ɓéé wə̧ə̧ȩ, mbaa kɔ́ ı̵́ ka yu̵ yúú#11:5 yu̵ yúú sey Pól woolı̵́ máa, wakȩ́ȩ́ vu̵ yu̵ yúú sey sȩ́ḿ ka kɔ́ vu̵ máalȩ́, tóó tée sey nán ku̵u̵ sɛ́n vu̵ né máalȩ́. wɔgɔ. 6Tow wakȩ́ȩ́ tóó a sɛ́n sa̧a̧m wáálı̵́ né tée, a yu̵ yúúi! A̧máa yúú sə̧"ȩ́, kóó yu̵lı̵́ wú̵ń kɔ́gɔ sȩ́ḿme; ndíga a wáá sa̧a̧me! 7Wayée a wáá sa̧a̧m yúlí sá, moo wayée máa tú' fóto Tayɨɨ woo nɔ, kan na"ȩ́ Tayɨɨ woo nɔ á̧ḿ. A̧máa wakȩ́ȩ́ máa hȩn na"ȩ́ wə̧ə̧ woo nɔ, 8moo Tayɨɨ ɓɛ ka' wakȩ́ȩ́ woo mbɔ́gɔn wayée wu̵lı̵́ né, a̧máa ɓɛ ka' wayée woo mbɔ́gɔn wakȩ́ȩ́ wu̵ yu̵. 9Tayɨɨ mbɔ́gɔn wayée moo wakȩ́ȩ́ woo nɔ né, a̧máa mbɔ́g wakȩ́ȩ́ moo wayée woo nɔ. 10Moo woo nɔ, wakȩ́ȩ́ a ki tɔ́g, a wáá sa̧a̧m yúlí moo maleeka voo nɔ. 11Kóó ı̵́ yo̧go̧ si̧', ı̵́ 'yɛ́lı̵́ woolı̵́ máa, wakȩ́ȩ́ mbaan kan dáń woo, wayée á̧ḿ, mbaan kan dáń woo né, 12moo Tayɨɨ ká ɓɛ ka' wayée woo mbɔ́gɔn wakȩ́ȩ́ wu̵ yu̵, ma wakȩ́ȩ́ ha̧a̧ wayée. Tayɨɨ wu̵ kɔ́ hȩn yȩ vu̵ 'waapád ı̵́ yo̧go̧.
13Aga i taa la á̧ḿ. Wakȩ́ȩ́ ka dɨd Tayɨɨ moo o̧lȩ́ ya sú̵ggı̵́lı̵́, ka mbaa yúú leená tée, du̵u̵ áa? 14Aga hȩn Tayɨɨ ka mbɔ́g máa tú'ud ba ví wayée ba ka dii yúú hú̧' tée, ba hȩn sȩ́ḿme. 15A̧máa wakȩ́ȩ́ voo máa, fȩn vu̵ ú̵. Tayɨɨ pú̵ vu̵ yúú hú̧' kɔ́ ı̵́ sa̧a̧m wáálı̵́ wɔgɔ. 16A̧máa tow nán tóó ka hí̧í̧ moo fanné yúú hȩn yȩlȩ́ tée, vɔ́ kan hȩn dikab tóó ı̵́ yo̧go̧ pɛ́lı̵́, kóó nán sú̵ggı̵́ Tayɨɨ woo voolı̵́ á̧ḿ.
Hȩn lálı̵́ Tayɨɨɨ
(Matío 26:26-29; Márkus 14:22-25; Lúg 22:15-20)
17Moo káń o̧d ví yɛ, hȩn ka kéé máa wu̵ yɛ nɔ. Mí dəm ví ní, moo kíí dɨ sú̵ggı̵́ tée, ví kɔ́ hȩn ɓı̵́d wu̵ mba hȩn du̵u̵. 18Vu̵ o̧n ba kíí dɨ sú̵ggı̵́ tée, hú' tóó ba vu̵n hɨ' ya̧g. Mí taa ka' tóólı̵́ máa moo yȩ́ńne á̧ḿ. 19(Hȩn ı̵́ yo̧go̧ yȩ a kɔ́yyú̵ á̧ḿ, moo u̵u̵ gaa nán tóó vu̵ sa̧a̧m víílí, ı̵́ ku̵u̵ buun ya̧g talı̵́ voo né máa vu̵ yu̵.) 20Moo kíí sú̵g moo hȩn lálı̵́ tée, ví kɔ́n moo hȩn lálı̵́ Tayɨɨɨ né. 21A̧máa kíí sú̵g sú̵'ú̵ tée, aga nóo lúú la gaŋ hȩn lálı̵́ woo ha̧d, tée go̧o̧m dɨ woo nán tóó vu̵ ya̧lȩ́, a̧máa nán ı̵́ tóó vu̵ dɨ voo doo kíílí. 22Máa ví kan lig vín lán hȩn víí, vín zɔn hȩn víí vu̵ wu̵lı̵́ máa pɛ́láa? Ɨ́ yȩ ví ɓéé sú̵ggı̵́ Tayɨɨ woo nɔ náa? Tóó tée ví hí̧í̧ bi kɔ́d nán gíḿ vu̵ yu̵ hȩn sȩ́ḿmaa? Tée a̧n o̧d ví nɛ́nná? A̧n dəm ví áa? Pɛ́lı̵́ sá̧ḿ!
23Hȩn ı̵́ 'yɛ́lı̵́ ka o̧ máa wu̵ yɛ nɔ, ma mí duu o̧d ví wu̵ yu̵ á̧ḿ. Vid nán u̵u̵ ma' ı̵́ 'yɛ́lı̵́ baa ví Yesu wu̵lı̵́ máa, ɓɛ beréd, 24dȩn Tayɨɨ nag, yɨ zu̵u̵ o̧: “Ɨ́ yɛ fó̧ó̧ míí moo víí nu.#11:24 moo víí nu tóó vu̵ bíńda “káń dɨ pú̵lı̵́ moo pílí víí má nɔ” kan ya̧g gɛrɛ́ggɨ. I kɔ́ ná', moo ví taan wu̵lı̵́.”
25Pig hȩn lálı̵́lı̵́ máa, duu ɓɛ ɗag waa o̧: “Hȩn ɗag waalı̵́ yɛ wu̵ hȩn ya̧g talı̵́ 'maŋ kan mɛm míí. Kíí dɨ zɔlı̵́ tée, i baa kɔ́ ná', moo ví taan wu̵lı̵́.”
26I baa lá hȩn yȩ, i baa zɔ hȩn yȩ ı̵́ yo̧go̧ tée, tú' ba vín du̵ ya̧g yúú nɔm ı̵́ 'yɛ́lı̵́ baa ví woolı̵́ sú̵'ú̵ há̧á̧ a ya̧ bá' yaalı̵́ woolı̵́.
27Moo woo nɔ, kóó nɔ́nná ka dɨ hȩn ı̵́ 'yɛ́lı̵́ woo yȩ lálı̵́, ka dɨ zɔlı̵́, ma a kɔ́ hȩn ka maan kɔ́lı̵́ né tée, kɔ́ hȩn ɓı̵́d yúú fó̧ó̧ ı̵́ 'yɛ́lı̵́ woolı̵́ kan mɛm woolı̵́ á̧ḿ sú̵'ú̵. 28A̧máa kóó nɔ́nná a gu̵g zó̧ó̧ woo ho̧ tée, wú̵ń lá beréd yȩ, wú̵ń zɔ hȩn ɗag waalı̵́ yȩ á̧ḿ, 29moo nán a lá, a zɔ, a̧máa a səgən ba fó̧ó̧ ı̵́ 'yɛ́lı̵́ woo nɔ né tée, wú̵ń lá, wú̵ń zɔ, a̧máa aga soo moo gbɔ sı̵́ yúú woolı̵́ ú̵. 30Moo woo nɔ nán ɓu̵u̵lı̵́ na'a víílí sa̧a̧mé hȩn ho̧o̧ vu̵, vu̵ ta̧a̧ 'waapád, tóó vu̵ nɔɔ sú̵'ú̵ á̧ḿ. 31Kaa dɨ ví lálı̵́ tée, ba tə́g ví zó̧ó̧ baa ví pȩ́ń, moo Tayɨɨ kan sə̧' moo yúú baa vílí. 32Ɨ́ 'yɛ́lı̵́ si̧'i̧d ba ví kɔ́ ı̵́ waa ba'a ka si̧'i̧d waa woo vu̵ máa wɔgɔ, moo a duu sə̧'ə̧d ba ví moo kan nán hágá yɛ vu̵ sá.
33Moo woo nɔ dan kirtȩ́n vu̵, kíí sú̵g moo hȩn lálı̵́ Tayɨɨ ɓɛlı̵́ tée, i láán ya víílí ú. 34Go̧o̧m ka ya̧ nán tóó tée, aga a lá woolı̵́ ligí, moo Tayɨɨ a sə̧'ə̧d ví moo ya sú̵ggı̵́ víílí sá. Moo ı̵́ tóó vu̵ máa, a̧n laa víílí tée, míń mbɔ́g moo woo vu̵.
Currently Selected:
1 Nán Koríńti vu̵ 11: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
