1 Nán Koríńti vu̵ 9

Ba'ad, kan néélȩ́ waa ba'ad Yesu woo woo nɔ

1Mí mbaa kan yúú míí dáńná. Mí waa ba'adɨ á̧ḿ. Mí ho̧ kan ı̵́ 'yɛ́lı̵́ baa ví Yesu á̧ḿ. Nag ba'ad míí káń kɔ́d ı̵́ 'yɛ́lı̵́ máa, wu̵ víw náa? 2Kóó nán tóó u̵u̵ ho̧n mí kɔ́ ı̵́ waa ba'ad Yesu woo wɔgɔ né si̧', víílí máa mí waa ba'adɨ. Moo mbaalı̵́ kirtȩ́n víí yɛ tú' ba mín waa ba'ad ı̵́ 'yɛ́lı̵́ woo nɔ.

3Mí hí̧i̧d nán ı̵́ ku̵u̵ moo moo ɓı̵́d yúú míílí̧ máa vu̵u̵ ya̧g. 4Mí o̧ ba maa ó̧, ka míń nuŋ hȩn lálı̵́ víílí moo ba'ad míí yɛ nɔ. Ɨ́ yo̧go̧ náa? 5Maa ba mín éé kȩ́ȩ́ kirtȩ́n tóó pa̧ŋ ya̧g ba'ad vóólı̵́ kɔ́ ı̵́ waa ba'ad tóó ku̵u̵ kɔ́ yȩ wɔgɔ ú̵ á̧ḿ. Ɨ́ yo̧go̧ náa? Ɨ́ 'yɛ́lı̵́ Yesu daa sá̧ŋ́ vu̵ kan Piɛ́r, vu̵ kɔ́n ı̵́ yo̧go̧ á̧ḿ náa? 6Tóó téé vɔ́nnɔ kɔ́ vóó ba'ad kan Baanábas dágá, ma vɔ́ń nuŋ hȩn sú̵ú̵lı̵́ vóó wu̵láa? 7Nóo baa kɔ́ ba'ad só̧ó̧ze kan sɨɨde dáń woolá? Nóo ka ba la' lálı̵́ woo tée, ka lán líid woo nélá? Nóo ka tu̵ ndaa tée, ka zɔn va̧a̧ woo nélá? 8Moo yɛ mí moon moolȩ́ nánánne dágá né, a̧máa debtere Múúsa woo o̧ ı̵́ yo̧go̧ á̧ḿ. 9Vu̵ bíńda debtere yɛlı̵́ o̧: “Káḿ ɓɛ ndaa kɔ́n ba'ad kɔɔgı̵́ tée, a̧m gbo'odu̵ kə́ə saa ya̧gá̧ sá.”

Tayɨɨ taa ndaa vu̵ yaa? 10O̧n moo baa ví nu náa? O̧ ba víw, moo nán ka baa hȩn máa, a 'yɛ́ zó̧ó̧ ba bíń nuŋ ka' ı̵́ bii wu̵lı̵́; nán ka gbɔ́ tú̵d máa, a 'yɛ́ zó̧ó̧ ı̵́ yo̧go̧ á̧ḿ. 11Ká vɔ́ tú'ud ví hȩn Tayɨɨ woo sú̵'ú̵, ma oo duu ɓɛ hȩn ı̵́ hágá yɛ vu̵ ka' tóó luu tée, hȩn gbo̧o̧ wu̵ yȩ naa? 12Tow nán tóó u̵u̵ nuŋ hȩn víílí tée, ı̵́ vóó kannɔ mban náa?

Kóó ı̵́ yo̧go̧ si̧', vɔ́ kɔ́n hȩn yȩ né, vɔ́ ma' zó̧ó̧ mbaa, moo ka vɔ́n há' moo to̧o̧ 'maŋ Krístu woo yɛ laan tíŋ́. 13Ví gaa nán ku̵u̵ kɔ́ ba'ad lig hȩn ha"ı̵́lı̵́ máa, vu̵ nuŋ hȩn lálı̵́ voo lig hȩn ha"ı̵́lı̵́. Nán ı̵́ ku̵u̵ ha' hȩn máa, vu̵ nuŋ ka' ı̵́ voo ya hȩn ha"ı̵́lı̵́ á̧ḿ. 14Ɨ́ 'yɛ́lı̵́ á̧ḿ pa moo o̧ nán ı̵́ ba ka pa moo to̧o̧ 'maŋ máa, ba a nuŋ hȩn sú̵ú̵lı̵́ yúú woolı̵́.

15A̧máa kóó ı̵́ yo̧go̧ si̧', mí lán hȩn tóó wu̵lı̵́ né sá̧ḿ. Mí o̧n moo i pú̵n bi hȩnne né á̧ḿ. Séý míń nɔɔ tíŋ́ hȩn vilílí ı̵́ yo̧go̧! Hȩn káń dəm fó̧ó̧ míí yúú woolı̵́ yȩ, nán tóó u̵u̵ tiiwu̵ hȩn lee sá. 16Kóó a̧n dɨ moo to̧o̧ 'maŋ tú"íi si̧', hȩn woo tiin mí hȩn fó̧ó̧ dəmné né, moo Tayɨɨ wu̵ dɔn ba'ad yɛlı̵́ kɔɔgná. Tow a̧n tú'u ní tée, zó̧ó̧ wú̵ń ví̧i̧n á̧ḿ. 17Tow ka míń kɔ́ hȩn yȩ kan hí̧í̧lí̧ míí nu tée, ka míń nuŋ hȩn sú̵ú̵lı̵́ míí wu̵lı̵́ á̧ḿ. A̧máa moo ba'ad Tayɨɨ ka gbɔn nagá yɛ nɔ ma, mí kɔ́. 18Hȩn sú̵ú̵lı̵́ míí wu̵ ȩná? Wu̵ káń tú' moo to̧o̧ 'maŋ té' má nɔ; mí lán hȩn ka míń lá yúú moo to̧o̧ 'maŋŋı̵́ máa né á̧ḿ.

19Mí mbaa kan yúú míí dáńná tíŋ́ nánán voolı̵́ 'waapád. A̧máa kóó ı̵́ yo̧go̧ si̧', mí tii mbaa gba'a nán voo 'waapád, moo bi nuŋ nán vu̵ ɓu̵u̵lı̵́ na'a. 20Ka' nán Yúúda voolı̵́ máa, mí mbaa kɔ́ ı̵́ nán Yúúda vu̵ wɔgɔ, moo bi woo nán Yúúda vu̵ yaan á̧ḿ. Mí duun dooká Múúsa woo vu̵ kɔɔgná né, a̧máa ka mbaad nán tóó vu̵ hȩn kɔɔg máa, mí mbaa ı̵́ yo̧go̧ á̧ḿ, moo bi woo vu̵ yaanɔ́. 21Ka' ı̵́ nán ku̵u̵ gaan dooká Múúsa woo vu̵ né máa voo, mí mbaa kɔ́ ı̵́ vu̵ wɔgɔ á̧ḿ, moo bi woo vu̵ yaanɔ́. A̧máa mí ɓéen dooká Tayɨɨ woo vu̵ yu̵ né, mí duu də́ń dooká Krístu woo vu̵ yu̵. 22Ka' ı̵́ nán ı̵́ zó̧ó̧ 'yɛ́lı̵́ voo ka ɓu̵u̵ né máa voo, mí mbaa kɔ́ ı̵́ zó̧ó̧ 'yɛ́lı̵́ míí ka ɓu̵u̵ né máa wɔgɔ á̧ḿ, moo bi woo vu̵ yaanɔ́. Mí mbaa mbaalı̵́ nán voo ya 'waapád, moo bi səd nán tóó vu̵ wu̵lı̵́ ú̵. 23Mí kɔ́ hȩn yȩ vu̵ 'waapád moo moo to̧o̧ 'maŋ, moo bi nuŋ hȩn ka' ı̵́ bii wu̵lı̵́ á̧ḿ.

24Ví gaa á̧ḿ, nán ku̵u̵ fan ɗug tée, ya voo 'waapád vu̵ kɛ ɗug, a̧máa nán dágá 'nɛ́ŋ́ wu̵ nuŋ hȩn sú̵ú̵lı̵́ woo wu̵lı̵́ náa? Tée, i kɛ ɗug kɔ́ ı̵́ kíí hí̧í̧ bi nuŋ hȩn sú̵ú̵lı̵́ víí wu̵lı̵́ máa wɔgɔ á̧ḿ. 25A̧máa nán ı̵́ ku̵u̵ mbɔ́g sı̵́ fó̧ó̧ moo ɗug kɛlı̵́ ú̵ máa, vu̵ sȩn fó̧ó̧ voo 'waa, moo bi nuŋ hȩn sú̵ú̵lı̵́ ı̵́ ka mbaa né máa wu̵lı̵́. A̧máa ı̵́ baa ví máa, báń nuŋ ví baa hȩn sú̵ú̵lı̵́ ı̵́ ka mbaa má nɔ. 26Moo woo nɔ mí kɛn ɗug leená té' né, mí zuŋ hȩn sɔn né á̧ḿ. 27A̧máa mí sȩn fó̧ó̧ míí kɔ́ ı̵́ gba'a wɔgɔ, moo aga ı̵́ míí káńnɔ tú'ud nán vu̵ hȩn yɛ, Tayɨɨ kan vȩ'ȩn pigim.

Currently Selected:

1 Nán Koríńti vu̵ 9: DIINT

Highlight

Copy