Mateo 14

Da nalaataguec so nachilaxanataxanaq mayi l'enaxat Juan

(Marcos 6.14-29; Lucas 9.7-9)

1Nachi se'esoua na'axa'te som Herodes mayi ilotague' yi Galilea, somayi ÿaÿaten da n'aqtaguec so Jesús. 2Nachi 'enapego' nam hueta'aguetpi, 'eeta':

–Se'eso ÿoqta da nachiso som Juan mayi nachilaxanataxanaq da qaltaq nca'aleeguesop da nleuaxa. Ÿoqo'oyi huo'o da l'añaxac da i'ot nam sa qaÿauanapega.

3Cha'ayi som Herodes damaxasoxoolec co'ollaxa da qaÿaconeu'a so Juan, nachi qaicoñida't naq'en naua lhua'q, nachi qaÿauegueu'a aso ncoñitaxanaxaqui. Qaq damaxasoxoolec, cha'ayi souaxat aso lhua Herodías mayi lhua co'ollaxa so lqaÿa l'enaxat Felipe. 4Cha'ayi so Juan 'enapego' co'olloxochiyi so Herodes, 'eeta':

–Sa ishit qome da 'auadonguet añimayi.

5Nachi so Herodes huotaique da ÿalauat so Juan. Qalaxayi huo'o da lcolanaxa na shiÿaxauapi, cha'ayi namayipi 'eetega da so Juan ÿataqta 'eesa da l'aqtaxanaxanec ñi Dios. 6Qalaxayi co'ollaq ivita so laloqo' da deque'elec so lañoxoqui so Herodes, nachi aso llale aso Herodías dasottac, qaq 'enauac som lqui'axauapi imeteetac. Nachi so Herodes ÿataqta nqopita da lasotaxac asomayi. 7Nachi ÿanem asomayi da l'aqtac mayi 'enapec da ÿataqta ipacchigui da ÿanem cam camachaqca iÿaxanaique asomayi. 8Nachi asomayi i'auaxaañi da inat aso late'e. Qaq co'ollaq ime da qaÿaqattega, nachi 'enapego' so Herodes, 'eeta':

–Aÿim 'ai'anem qome ca nqui'axaqui, huetagui 'anqa'en ca lqaic ñi Juan mayi nachilaxanataxanaq.

9Nachi so nta'a Herodes ÿataqta daquico. Qalaxayi mashi ÿan so l'aqtac mayi 'enapec da ipacchigui, qataq souaxat so lqui'axauapi mayi hua'aqchigui co'ollaxa somayi, nachi damaxasoxoolec da qoÿami' asomayi so iÿaxaneu'a. 10Ime, nachi damaxasoxoolec da qaiquesoxouec na lqaic so Juan, huaigui naq'en aso ncoñitaxanaxaqui. 11Nachi qandouo so nqaic, qaÿachitagui so nqui'axaqui. Nachi qoÿanem aso qa'añole. Qaq asomayi ÿami' aso late'e.

12Nachi ana'c soua nale't so Juan, nachi qaidouec so l'oquiaxac, nachi qailayiñi. Qaq co'ollaq ime, nachi je'c da qai'aqtaxanem so Jesús.

So Jesús iqui'axan so cinco mil shiÿaxauapi

(Marcos 6.30-44; Lucas 9.10-17; Juan 6.1-14)

13Qaq co'ollaq ÿaÿaten de'eda so Jesús, nachi ca'ai ca hueta'a, ndoteec, nachi huenojñigui aso barco da taitague da le'ego, taÿa ca qaÿoqteuga 'alhua. Qalaxayi so shiÿaxauapi co'ollaq huo'o da l'axaÿaxac, nachi chigoqteu'alo na pueblopi da qaica'ategue somayi, qanayictelec so lqaxaÿaxa. 14Nachi co'ollaq huenoteeguesop aso barco so Jesús da le'ego, nachi chochi ilaigui so shiÿaxauapi ÿataqta qalota, nachi ÿataqta qalota da lchoxonnataxanaxa somayipi. Huaña, nachi nataden na sa no'onpi mayi qandotauo. 15Qaq co'ollaq mashi avit, nachi soua lapaxaguenataqa so Jesús ana'c da qoÿinapega somayi, qoÿiita':

–Mashi avit, qataq qaica ca netaña ne'ena 'alhua. Qaq no'on da qonapega na shiÿaxauapi, da yaqto' jec da nqo'oneu'alo naua netañalo na shiÿaxauapi da deshijnaxanaique ca aloq.

16Nachi so Jesús 'enapeco':

–Namayipi sa iuen da jec. Qami' qai'añiim qome ca aloq.

17Nachi soomayi 'ena'po':

–Qaica cam lÿa qonoq, chaq yiuate' yiua cincole pan, qataq yiua dosolqa nÿaxayi.

18Nachi so Jesús 'enapeco':

–Ñaq aÿim qandoiua'alo caamayi.

19Nachi 'enapega so shiÿaxauapi da nso'ooñi, nso'oolec na 'auaqpi dadala. Ime, nachi ÿaconalo soua cincole pan qataq soua dos nÿaxayi. Nachi ÿamato'ot na piguem, nachi ÿanot da n'achiquiaxac ñi Dios. Ime, qaq ncolaxajyiñi soua pan, nachi ÿanema soua lapaxaguenataqa. Qaq soomayi nachi ÿanoiguilo na shiÿaxauapi. 20Nachi 'enauac somayipi deque'e qataq ÿataqta comadaxaicpi. Qaq co'ollaq ime, nachi qaiÿoxoguilo soua doce canasta som ñi'iÿoxotpi, nachi ÿataqta nlaqchiguilo. 21Qaq som deque'epi co'ollaxa ivi' na cinco mil shiÿaxauapi. Qaq sa ishit da qanaloqneuo nam 'alpi qataq na ñaqpiolec.

So Jesús quetalec so 'etaxat

(Marcos 6.45-52; Juan 6.16-21)

22Nachi so Jesús 'enapegalo soua lapaxaguenataqa da huenojyingui aso barco da yaqto' hua'autrague da le'ego. Qaq somayi n'onañi da ña ncoyigueetague' so shiÿaxauapi. 23Qaq co'ollaq ime da lcoyiguenataxanaxac, nachi so Jesús tashiguemec aso saqaÿoqotchiguemec 'alhua, da yaqto' ndoteec da natamen. Qaq co'ollaq mashi pe, nachi so Jesús ñaq huetashiguemec yi'iyi 'alhua. 24Qaq aso barco ñaq huetangui na laiñi aso lapel late'edai. Qaq ana lapaxa na 'etaxat ÿataqta iuaxaatacot asomayi, cha'ayi so l'at ÿataqta datateguet somayipi. 25Qaq co'ollaq mashi sa qaÿapeque so na'a'q, nachi so Jesús nqo'oneueegue somayipi, petalec na 'etaxat. 26Nachi somayipi co'ollaq ila'aguet somayi da petalec na 'etaxat, nachi ÿataqta huo'o da lcolanaxa, nachi i'alaqtagui, 'eeta':

–¡Ña qauloÿa na nqui'i!

27Nachi so Jesús 'enapegalo soomayi, 'eeta':

–¡Qan'añaxachi qome, sa ishit da qayi'ii, nachaÿim!

28Nachi so Pedro detaqa, 'eeta':

–'Am qadataxala', qom ÿoqta 'eesa da nachi'am, qaq no'on qome da aÿim 'auashiitem da sapelec na 'etaxat, da yaqto' 'am ñoqo'oneuga.

29Nachi so Jesús 'enapeco':

–Aja', 'ayala.

Nachi so Pedro huenoteeguesop aso barco, nachi petalec na 'etaxat da nqo'oneuga so Jesús. 30Qalaxayi co'ollaq nomteguet da l'añaxac so l'at, nachi ÿataqta huo'o da lcolanaxa. Nachi somayi iyiiñi, nachi i'alaq, 'eeta':

–¡'Am ÿataxala', aÿim 'anca'alaxateec!

31Nachi so Jesús ÿacooteguet na lhuaq. Nachi 'enapega, 'eeta':

–¡Ÿataqta qapi'olec da 'adpi'iÿaxac! ¿Tá'ainco' yi 'auqolguetaxan?

32Nachi soomayi co'ollaq mashi huenojyingui aso barco, nachi vi'iiguet so l'at. 33Nachi soua netanguilo aso barco, soomayi i'adoto naua l-llicte so Jesús, nachi 'eeta':

–Ÿoqta 'eesa da nachi'am mayi 'am llalec ñi Dios.

So Jesús nataden na sa no'onpi yi Genesaret

(Marcos 6.53-56)

34Qaq co'ollaq mashi qai'axasoxoolec aso lapel, nachi qaivitta yi 'alhua mayi huaigui yi Genesaret. 35Nachi na shiÿaxauapi mayi lma' se'eso 'alhua co'ollaq ÿauatton so Jesús, nachi qai'aqtaxanem 'enauac nam netalec se'eso 'alhua, nachi qandou'a 'enauac na sa no'onpi cam hueta'a. 36Nachi qanachoxodeetacot da nai'ctaxa da chochi qaipoteu'a na laÿi so lapo'. Nachi 'enauac som ipoteu'a na laÿi so lapo', nachi no'oita.

Currently Selected:

Mateo 14: TBSNT

Highlight

Copy