Mateo 15

Ca ishipaxanaqchit da nachaalataxac ca shiÿaxaua

(Marcos 7.1-23)

1Nachi huo'o na nquigueu'a so Jesús nam fariseopi qataq nam dapaxaguenataxaatapeguec na lqataxacpi so Moisés mayi chigoqta'ague da Jerusalén. Nachi qainattac somayi, qoÿiita':

2–¿Tá'ainco' na 'adapaxaguenatacpi yi sa ishit da ÿalaxalec dam n'onataxac som hua'au qadta'alpi? Cha'ayi namayipi sa ishit da ipaguelec da lataxac da qaiÿoi' naua nhua'q da huo'otaq yaqta'a da deque'e ca shiÿaxaua.

3Qalaxayi so Jesús nataq'en inat somayipi, 'eeta':

–Qami' nataq'en ¿tá'ainco' yi sa ishit da qaualaqaileguete naua lamaxasoxonaxaco ñi Dios, nda'a't da maichi qoquiitagueto naua qan'onataxacolli'? 4Cha'ayi ñi Dios damaxasoxoolec co'ollaxa da 'eeta': “Ÿataqta huo'o naq 'enec 'anqa'en ca 'adta'a qataq aca 'adate'e.” Qataq nataq'en 'eeta': “Ca ishiuen ca lta'a huo'otaq aca late'e, qalaq camayi qaÿalauat.” 5Qalaxayi qami' qoñiitega da ca shiÿaxaua ishit da 'enapega ca lta'a huo'otaq aca late'e da 'eeta': “Sa ishit da 'am setauan, cha'ayi 'enauac na aÿim hueto'ot mashi sogote da sanot ñi Dios.” 6Qaq camachicague't shiÿaxaua, da huo'otaq l'aqtac de'eda, nachi sa ishit da itauan ca lta'a, huo'otaq aca late'e. Qaq de'eda qoñiitec da maichi qoquiigue da llic da qan'onataxaqui, damayi ichoxot da qami' ÿataqta qaica ca naigui qanqashiñi dam lamaxasoxonaxac ñi Dios. 7¡Qami' mayi qoñiitega da qami' llalqa ñi Dios! Ÿataqta qami' tachiguilo dam ÿiyiñi co'ollaxa so l'aqtaxanaxanec ñi Dios l'enaxat Isaías, mayi 'eeta':

8Ne'ena shiÿaxauapi 'eetega da aÿim ÿi'oxodeetac,

qalaxayi da lquiyaqteÿaxac ÿataqta qaÿoqta naq'en aÿim.

9Qaq shapco' da aÿim i'otec da lli'oxonnataxanaxac,

cha'ayi naua lapaxaguenataxanaxaco,

naamayi maichi lqataxaco na shiÿaxauapi.

10Nachi iÿaxanoigui so shiÿaxauapi da nquigueuo, nachi 'enapega, 'eeta':

–Ña qan'axaÿaxañiÿa da i'aqtac, qataq qauaÿajñiiteguet qome: 11Da 'enauac na chic ca shiÿaxaua, sa ishit da nachina na ishipaxanaqchit da nachaalataxac. Chaqnata nam l'aqtacpi mayi chigaqaigui na alap mayi nachina na ishit da ishipaxanaqchit da nachaalataxac.

12Nachi soua lapaxaguenataqa so Jesús nquiguedeu'a somayi, nachi qoÿinapega, qoÿiita':

–¡Na fariseopi ÿataqta dalemata can hua'axaÿa de'eda 'ad'aqtac!

13Qalaxayi so Jesús 'enapeco':

–Camachaqaca qo'ipaq mayi sa ishit co'ollaxa da ÿaañi ñi ita'a mayi neta'ague da piguem, nachi acamayi qanapoguishiguem qome. 14Qaq ÿoqo'oyi sa ishit qome da qauqochiÿa namayipi. Cha'ayi namayi sa nauaañi qataq lauegaxala' nam sa nauaañipi. Qaq cam sa nauaañi da huo'otaq ÿauecta'aguet cam 'eeta'am sa nauaañi, nachi caamayi ishit da tayingui acam nshide.

15Nachi so Pedro 'enapego' so Jesús, 'eeta':

–Ña qomi' 'au'axatema cam naigui de'eda 'aualoqnaxaatega.

16Nachi so Jesús 'enapeco':

–¡Qachi nataq'eno' da qoñiita sa ishit da qauaÿajñi de'eda! 17Qaq ¿sa qauaÿajñiÿo' da 'enauac nam chic ca shiÿaxaua, namayi tangui ana da'am, ime, qaq huenoxoneec? 18Qalaxayi nam l'aqtacpi mayi chigaqaigui na alap, namayi chigaqaña añi lquiyaqte. Qaq 'ena nam ishit da ishipaxanaqchit camayi. 19Cha'ayi añi lquiyaqte, nachañi añi chigaqanguit nam qauem nhuennataxacpi mayi 'eeta': Qaÿalauat ca nÿa, nauatapiguiñi' aca sa nhua, quishishaxac, ncachaxac, natenataxanaxac, qataq nshiunaxanaxac. 20Qaq 'ena nam ishit da ishipaxanaqchit da nachaalataxac ca shiÿaxaua. Qaq de'eda nqui'axac da huo'otaq sa ishit da qaipaguelec da lataxac da nÿoxoc naua nhua'q, damayi sa ishit da nachida da ishipaxanaqchit ca shiÿaxaua.

Aso chigaqauec 'alo i'amaqten so Jesús

(Marcos 7.24-30)

21Nachi so Jesús ca'ai yi'iyi hueta'a, nachi taÿa so 'alhua mayi sa qaÿapeque yi Tiro qataq Sidón. 22Nachi aso 'alo mayi Canaán lashi mayi netaña yi'iyi 'alhua, asomayi anac, i'alaqtalec so Jesús, 'eeta':

–¡'Am ÿataxala' mayi 'am llalec so nta'a David, aÿim 'auchoxoden qome! Añi ÿale huo'o so l'ec leguemaxaic, añimayi ÿataqta lta'adaic da nque'ejnaxac.

23Qalaxayi so Jesús sa ishit da ÿasateguet asomayi. Nachi soua lapaxaguenataqa ana'c da nachoxodeetracot somayi, qoÿiita':

–Ña 'ai'anem cam iÿaxaataique, ten, qomi' nca'attalguete anamayi, i'alaqtai'.

24Nachi so Jesús 'enapeco':

–Ñi Dios ndoqteeteec da aÿim namaxa nam Israel llalaqpi mayi 'eeta'am aca qagueta mayi isomtac.

25Qalaxayi aso 'alo nquigueuo, nachi i'adoto naua l-llicte so Jesús. Nachi 'eeta':

–¡'Am ÿataxala', aÿim 'autauan qome!

26Nachi so Jesús 'enapeco':

–Sa ÿaÿamaxañi da qaÿacona ca aloq na ñalaqpi, ime, qaq qoÿanoigui ca pioxotpi.

27Qalaxayi asomayi 'enapeco':

–Aja', 'eesa, 'am ÿataxala', qalaxayi ivida'a nataq'en na pioxotpi ishit da chictac nam aloq lsochi mayi najñi cam lqui'axala' ca n'aco'pi.

28Nachi so Jesús 'enapeco':

–¡'Am 'alo, ÿataqta 'eesa da lta'adaic da 'adpi'iÿaxac! Qaq nagui ÿataqta ipacchigui qome cam qonetapeguec.

Qaq co'ollaq chochi qoÿan da n'aqtac, nachi aso llale no'oita.

So Jesús nataden so qalota sa no'onpi

29So Jesús ca'ai yi'iyi hueta'a, nachi queto'ot so loigue aso lapel late'edai mayi huaña yi Galilea. Ime, nachi tashiguemec aso saqaÿoqotchiguemec 'alhua, nachi nso'ooñi. 30Nachi ÿataqta qalota so shiÿaxauapi nauga ca hueta'a somayi. Nachi nauectauo nam qaica lchi lÿa, qataq nam sa nauaañi, qataq na qaicaua naua l'aqtaqa, qataq na qaica ca lhuaq lÿa, qataq qalota na laÿi sa no'onpi. Nachi qaÿacho'oto naua lchil so Jesús, nachi somayi nataden 'enauac somayipi. 31Ÿoqo'oyi so shiÿaxauapi ÿataqta huo'o da l'aalaxa, souaxat da ÿauaachigui na qaicaua naua l'aqtaqa, qalaq detaqa, qataq na qaica na lhuaq lÿa, qalaq huo'o na lhuaq, qataq na qaica ca lchi lÿa, qalaq huo'o na lchi, qataq na sa nauaañi, qalaq ishit da nauaañi. Huaña, nachi qaÿi'oxodeetac ñi lta'a Dios nam llalaqpi so Israel.

So Jesús iqui'axan so cuatro mil shiÿaxauapi

(Marcos 8.1-10)

32Nachi so Jesús iÿaxanoiguilo soua lapaxaguenataqa. Nachi 'enapegalo, 'eeta':

–Ÿataqta huo'o da ichoxonnataxanaxa ne'ena shiÿaxauapi, cha'ayi mashi ivi' naua tres na'axa'te da aÿim hueta'aguet, qataq namayipi yi qaica ca aloq. Qaq aÿim sa saÿamaxaden da huo'otaq samaq namayipi da huo'otaq saxanaxa da deque'e, cha'ayi sa iuena'a da huo'o ca decopchi na nqa'aic.

33Nachi soua lapaxaguenataqa 'ena'po':

–Qaq ¿huá'ago' ca shinaqtec da sanataxa cam aloq nam ÿataqta qalota shiÿaxauapi, yi nam souaqta'a yi qaica ca netalec?

34Nachi so Jesús 'enapeco':

–¿Chaxan lcate' caua qanqolli' pan mayi huo'oi?

Nachi soomayi 'ena'po':

–Qomyi sietole qataq yiua saq 'amaqtachi nÿaxayolqa.

35Nachi somayi ÿamaxalec so shiÿaxauapi da nso'oolec na 'alhua. 36Nachi ÿaconalo soua siete pan qataq soua nÿaxayi, nachi ÿanot da n'achiquiaxac ñi Dios. Ime, nachi ncolaxajyiñi soua pan, nachi ÿanoiguilo soua nale't. Qaq soomayi nachi ÿanoiguilo so shiÿaxauapi. 37Nachi 'enauac somayipi deque'e qataq ÿataqta comadaxaicpi. Ime, nachi qalapona't so ñi'iÿoxotpi, qaÿachanguilo soua siete canastas, ÿataqta nlaqchiguilo. 38Qaq som deque'e ivi' cuatro mil shiÿaxauapi. Qaq sa ishit da qanaloqneuo na 'alpi qataq na ñaqpiolec. 39Qaq co'ollaq ime, nachi so Jesús ncoyiguene' so shiÿaxauapi, nachi huenojñigui aso barco, nachi taÿa yi 'alhua l'enaxat Magdala.

Currently Selected:

Mateo 15: TBSNT

Highlight

Copy