Lucas 2

Da lañoxoc so Jesús

(Mateo 1.18-25)

1Qaq se'esoua na'axa'te, nachi so lta'a na nta'alpi l'enaxat Augusto, somayi ÿan so l'aqtac da 'enauac na shiÿaxauapi qoÿideuo na l'enaxatpi da qanaloqna't. 2Qaq se'eso hua'auchiguiñi nedaxanaxac huetoigui so na'a'q co'ollaq ña ilotague' yi 'alhua l'enaxat Siria so nta'a l'enaxat Quirinio. 3Nachi 'enauac na shiÿaxauapi taÿalo naua chigoqchiguiñalo da nanedeuo. 4Qaq ÿoqo'oyi so José chigoqchiguiña yi pueblo l'enaxat Nazaret, huaigui yi 'alhua Galilea, da nqo'ona yi pueblo l'enaxat Belén huaigui yim 'alhua l'enaxat Judea yim lañoqo' so David, cha'ayi so José maichi chigoxoguet so David. 5Qaq nqo'ona yi Belén da nanedeuo, nnaictague' aso María asom huotaique da lhua, qaq asomayi hualaxai. 6Qaq co'ollaq mashi huetra'a yi Belén, nachi ivita so laloqo' da deco'o aso María. 7Nachi huaña yimayi co'ollaq ñiguiñi so l'auaxanec llalec. Nachi lpataxangui so lapo', ime, nachi ÿachangui aso lqui'axaqui na nlo shiguiÿacpi, cha'ayi souaxat da qaica ca lma't soomayi som noÿic mayi n'ochaqa'.

So chigaqshiguem Dios lamaxashicpi qataq so qagueta l'opi

8Qaq yim lshicteuga yi Belén huo'o so shiÿaxauapi mayi ilotague' ana lalo qagueta, huetauga na n'onaxa se'eso pe. 9Nachi nque'elaxatta da nachaxana so lamaxashic ñi qadataxala'. Nachi da lli'oxoyic ñimayi ÿataqta icoÿadelec somayipi, nachi ÿataqta lta'adaic da lcolanaxa. 10Qalaxayi so lamaxashic ñi Dios 'enapeco':

–Sa ishit qome da qayi'ii, cha'ayi aÿim qami' ñida'alo da no'on qad'axaÿaxaqui. Qaq damayi i'ot qome da ntonaxac 'enauac na shiÿaxauapi. 11Qaq damayi 'eeta': nagui lañoqo' yi npueblo so David cam qaÿauotaique da qadca'alaxaquii l'enaxat da Cristo cam qadataxala'. 12Qaq 'eda qome da qad'anaqui, 'eeta': qauloÿalec qome ca nogotolec, qoÿaxatta'ague ca lapo', nnaatangui qanqoÿin aca lqui'axaqui na nlo shiguiÿacpi.

13Huaña, nachi nque'elaxatta da nachaxan so laÿipi so lamaxashic ñi Dios, ÿataqta qalota somayipi, ÿi'oxodeetac ñi Dios, 'eeta':

14¡Ÿataqta lta'adaic da ñi'oxonnataxanaxac ñi Dios mayi neto'ot na piguem,

nataq'en na 'alhua huo'o da l-lagaxa na shiÿaxauapi mayi ÿaÿamaxadeeta ñimayi!

15Nachi so lamaxashicpi ñi Dios co'ollaq mashi ÿi'iguelaxague da piguem, nachi som qagueta l'opi detaqtega't, 'eeta':

–'Onaxaic da saxague da Belén da semejnaxanaxague chaq 'eetec dam da' qai'axattac dam qomi' i'axatema ñi qadataxala'.

16Nachi ÿataqta iÿalapigui' da jec somayipi. Ime, qaq qaÿanata aso María qataq so José nataq'en so nogotolec huetangui aso lqui'axaqui na nlo shiguiÿacpi. 17Qaq co'ollaq mashi qaila'a, nachi qai'axattac da l'aqtac so lamaxashic ñi Dios co'ollaq i'axattac so nogotolec. 18Nachi 'enauac nam hua'aqchigui de'eda qai'axattac, ÿataqta huo'o da l'aalaxa. 19Qalaxayi aso María ÿoxochigui añi lquiyaqte 'enauac de'eda qataq ÿataqta naloqteetac damayi. 20Qaq so qagueta l'opi co'ollaq ime, nachi ÿi'iguelaq, ÿataqta ntootapigui', qataq ÿi'oxodeetac ñi Dios, souaxat 'enauac nam hua'aqchigui qataq nam ÿauaachigui, cha'ayi ÿataqta ipacchigui 'enauac nam qai'axat.

So nogotolec Jesús qaidou'a aso n'onaxanaxaqui late'edai

21Qaq co'ollaq mashi ivi' naua ocho na'axa'te, nachi qaÿauo'o so n'anaxat na l'oc so nogotolec. Ime, qaq qoÿanagui da l'enaxat Jesús, dam n'enaxat mayi i'axatem aso María so lamaxashic ñi Dios co'ollaq saxanaxa da hualaxai asomayi.

22Qaq co'ollaq mashi ivi' so na'a'q da aso María qataq so José da i'o't na nqataxac mayi chigoqo'ot so Moisés co'olloxochiyi da nqui'itaxa't, nachi qaidou'a yi la ciudad Jerusalén so nogotolec da qoÿanot ñi qadataxala'. 23Qaq soomayi i'o't de'eda, cha'ayi da lqataxac ñi qadataxala' nanettañi 'eeta': “'Enauac qome na n'auaxanec ñalec qoÿanot ñi qadataxala'.” 24Ime, qaq je'c soomayi, qaÿauo'o aso nachitaqtaxanaqte da qaÿavigaxat. Qaq qaipacchigui da lqataxac ñi qadataxala', 'eeta': qoÿaadeuo qome caua dos na qoto' huo'otaq dos caua llalqa na 'ollolec.

25Qaq se'eso vi'i netaña yi Jerusalén so shiÿaxaua l'enaxat Simeón. Qaq somayi ÿataqta soxodaic qataq ÿi'oxodeetac ñi Dios, nataq'en iuattaique ca na'a'q da imeuo qanqoÿin da nque'ejnaxac na Israel llalaqpi. Qaq somayi hueta'aguet so Espíritu Santo, 26qataq da'aqtaxanem da sa ishit da imeuo da nachaalataxac qome huo'otaq saxanaxa da ilogui ca nta'a mayi qadca'alaxaqui cam namaq ñi qadataxala'. 27Qaq so Espíritu Santo ÿauec se'eso shiÿaxaua da tau'a naq'en aso n'onaxanaxaqui late'edai. Nachi soua lta'al so nogotolec Jesús co'ollaq mashi ndodeu'a aso n'onaxanaxaqui da yaqto' qai'ot 'enauac nam damaxasoxoolec na nqataxacpi, 28nachi so Simeón ÿaconguet so nogotolec da ÿachalguete naua lhua'q. Ime, qaq ÿi'oxodeetac ñi Dios, 'eeta':

29'Am ÿataxala', nagui mayi ishit da aÿim 'ai'anem ca saqca ca da loga't da ñachaalataxac,

cha'ayi ipacchigui dam 'ad'aqtac mayi 'auachaxanapecot co'olloxochiyi na 'adlatac.

30Cha'ayi aÿim ñima'ai' nagui da sauaachigui nam qadca'alaxaqui

31mayi 'ai'anagui da 'auataxaalec 'enauac na shiÿaxauapi.

32Namayi nachina na 'ico' ncoÿadaxanaqte mayi icoÿadelec nam sa ishit da Israel l'ecpi,

nataq'en i'ot da lli'oxoyic nam Israel llalaqpi nam 'adalamaxatpi.

33Nachi so José qataq aso María mayi late'e so Jesús ÿataqta huo'o da l'aalaxa' nam hua'aqchiyigui l'aqtacpi so Simeón co'ollaq detaqtapeguelec so nogotolec. 34Nachi so Simeón ÿan da no'on l'aqtac. Ime, nachi 'enapega aso María asom late'e so Jesús, 'eeta':

–Ña 'aumeten ne'enatai' nogotolec, namayi qoÿanagui da ÿataqta qalota qome naq'en na huañi huo'otaq ñishiguem na Israel llalaqpi. Namayi nachina na l'anaxat da ÿataqta qalota qome na sa da'amqajnataxan, 35qaq yaqto' ishit da qaÿaÿaten ca lhuennataxac añi lquiyaqte ñi 'oonolec shiÿaxaua. Qaq 'am qome, qalaxayi 'enauac de'eda 'eeta'am ca ÿiilonec da huo'otaq qai'ayigui añi 'adquiyaqte.

36Qaq nataq'en hueta'a yimayi aso 'alo mayi l'aqtaxanaxana ñi Dios. Asomayi ÿataqta ÿi'axaina', l'enaxat Ana. Asomayi llale so l'enaxat Penuel som chigoxoigui so llalaqpi so Aser. Qaq asomayi huadon co'ollaq ñaq qa'añolom, qaq ivi' naua siete vi'iyi da neta'aguet so lhua. 37Qaq nagui asa'aso pa'ai mashi ivi' na ochenta y cuatro vi'i. Qaq ÿataqta sa ishit da ca'ai aso n'onaxanaxaqui da ÿi'oxodeetac ñi qadataxala' naua na'axa'tesa'chi qataq naua pe', da i'ottac da nqouagaxaunaxac qataq da nqouaqchittac. 38Qaq aso Ana nataq'en ÿalectauo se'eso na'a'q. Qaq co'ollaq ime da ÿaatacot da n'achiquiaxac ñi Dios, nachi i'axattac so nogotolec Jesús, da'aqtaxaatapeguem 'enauac nam iuattaique cam na'a'q qom ÿataqta huesochiguiñi qanqoÿin yi Jerusalén.

Qaÿi'iguelaxague da Nazaret

39Qaq co'ollaq mashi ime da qai'ot 'enauac nam damaxasoxoolec nam lqataxacpi ñi qadataxala', nachi soomayi ÿi'iguelaxadegue da Galilea da nqo'ooda yim lalamaxa't npueblo l'enaxat Nazaret. 40Huaña, nachi so nogotolec nquictashiguem da llaxa qataq da l'añaxac qataq da lauattonaxanaxac, qaq ñi Dios ÿataqta ÿanem somayi da lqouagaxanaqtaic.

So nogotolec Jesús huetau'a aso n'onaxanaxaqui

41Nachi soua lta'al so Jesús 'enauaque naua vi'iyi ÿi'iguelaqtra'ague da Jerusalén quenaxa da iviteuga so laloxoqui da qaiuennate so na'a'q co'ollaq qanayica'ai yi Egipto. 42Nachi so Jesús co'ollaq mashi ivi' naua doce vi'iyi, nachi 'enauaque soomayi tadegue da Jerusalén, cha'ayi nachi n'onataxac quenaxa da iviteuga se'eso na'a'q naponaxaqui. 43Qaq co'ollaq mashi ÿi'iguela'q soomayi co'ollaq mashi ime so naponaxac, nachi so nogotolec Jesús n'onaña yi Jerusalén. Qalaxayi aso late'e qataq so José sa ishit da qananoma somayi. 44Cha'ayi qaipettega so Jesús da huo'otaq quetaigui 'enauac so shiÿaxauapi. Qaq mashi ivi' 'oonolec na'a'q da quete' soomayi, qalaxayi co'ollaq qanmittapigui 'enauac so nhuo' l'ecpi qataq som auattonaxauapi, 45nachi sa ishit da qaÿanata somayi. Huaña, nachi soomayi ÿi'iguelaxadegue da Jerusalén da qanmitegue.

46Qaq co'ollaq mashi inoxoodeec soua tres na'axa'te, nachi qaÿanata somayi, huetaigui aso n'onaxanaxaqui late'edai, nso'ootañi, datataigui som dapaxaguenataxaatapeguec na nqataxacpi, n'axaÿaxaatega qataq huo'o na nnataxanaxacpi. 47Nachi 'enauac nam n'axaÿaxaatega somayi ÿataqta huo'o da l'aalaxa souaxat da ÿataqta ÿaÿaten da i'axategue nam qainataxaatapeguecpi. 48Nachi soua lta'al co'ollaq iloda'a somayi, nachi ÿataqta i'ela'q. Nachi aso late'e 'enapego' somayi, 'eeta':

–'Am ÿalcolec, ¿tá'ainco' yi qomi' 'au'oteque de'eda? Ña 'aumeten da 'adta'a qataq aÿim ÿataqta huo'o da qadhuogoxo da 'am ñimitaqtaique.

49Nachi so Jesús 'enapeco':

–¿Tá'ainco' yi aÿim qanmichiitaique? ¿Sa qauaÿajñiÿo' da aÿim iuen da souapegue' na l'onataxanaxacpi ñi ita'a?

50Qalaxayi soomayi sa ishit da ÿaÿateedeguet ada l'aqtac somayi.

51Huaña, nachi ÿi'iguelaq somayi, queuoiguilo soua lta'al, tadegue da Nazaret. Nachi somayi quetot da ÿataqta ÿalaxalguete soua lta'al. Qaq aso late'e ÿataqta ÿoxochigui añi lquiyaqte 'enauac de'eda. 52Nachi so Jesús nquictashiguem da llaxa qataq da lauattonaxanaxac. Qaq ñi Dios ÿataqta ÿaÿamaxadeeta somayi, nachi 'en'am 'enauac na shiÿaxauapi.

Currently Selected:

Lucas 2: TBSNT

Highlight

Copy