Lucas 3

Som nachilaxanataxanaq mayi l'enaxat Juan da'aqtaxaalec yim tojlec 'alhua

(Mateo 3.1-12; Marcos 1.1-8; Juan 1.19-28)

1Qaq co'ollaq mashi ivi' naua quince vi'iyi da l'onataxanaxac som lta'a na nta'alpi l'enaxat Tiberio, qaq so Poncio Pilato ilotague' yi Judea, qaq so Herodes qalaq ilotague' yi Galilea, qaq so lqaÿa Felipe qalaq ilotague' yi Iturea qataq Traconítide, qaq so Lisanias qalaq ilotague' yi Abilinia. 2Qaq huetoigui se'eso na'a'q co'ollaq so Anás qataq so Caifás ña lataxala'te na ltaxaÿaxanaxanecpi na shiÿaxauapi da qaitaxaÿapegue' ñi Dios, co'ollaq ñi Dios 'enapega so Juan som llalec so Zacarías co'ollaq hualec som tojlec 'alhua. 3Ime, nachi jec da coleelec 'enauac yim sa qaÿapeque so tala Jordán da da'aqtaxanem na shiÿaxauapi da ca'aisalo naua n'onataxaco qataq qanachilaxan yaqto' na lasouaxashitpi ishit da qaÿapalaxat. 4Qaq damayi ipacchigui da l'aqtac so l'aqtaxanaxanec ñi Dios co'ollaq ÿiyiñi da l'aqtac, 'eeta':

Huo'o qome ca shiÿaxaua chimaqtapeguelec ca tojlec 'alhua,

'eeta' da lÿaxanaxac:

“Ña qauqataxañiÿai' ca nqa'aic ñi qadataxala',

ÿataqta qauauachiitegue ca llic.

5'Enauac na ca'amgue ÿataqta qanlaxatchigui,

qataq 'enauac ana qasoxonaxa qataq na comadelecpi ÿataqta qanaloqchiichiguiñi,

na nqa'aicpi mayi namaqtapigui qalaq ÿashicteec qanqoÿin,

qataq na nqa'aicpi mayi sa nala'a't na 'alhua qalaq qanaloqchiiñi,

6yaqto' 'enauac na shiÿaxauapi ila'a da nca'alaxa mayi ÿan ñi Dios.”

7Nachi na shiÿaxauapi co'ollaq nqo'oneuga so Juan da huotaique da qanachilaxan, nachi somayi 'eetega, 'eeta':

–¡Qami' n'adaxanaq llalaqpi! ¿Négue't ca qami' da'aqtaxanema da yaqto' qauataiueguesop da lchic mayi nayiitai'? 8Ÿataqta qanachaxañiita qome, yaqto' ishit da qaila'a da ÿoqta 'eesa da mashi qaualachi' naua qan'onataxacolli', qaq sa ishit da tatapigui qadvilli da qoñiita': “Qomi', maichi qomi' llalqa so Abraham,” cha'ayi aÿim qami' shinapegalo da ñi Dios ishit da ÿachigoxotaigui ne'ena coma' ca llalaqpi so Abraham. 9Aca qachipe mashi sogote da imetai' da iquesoxoñot ana qo'ipaqpi, qaq 'enauac ana qo'ipaqpi mayi sa ishit da no'on ana ala, anamayi qaiquesoq, ime, qaq qaÿasaxangui ca nodec.

10Nachi na shiÿaxauapi denataxan, 'eeta':

–Qaq, ¿huá'ago' ca shinaqtec?

11Nachi so Juan 'enapeco':

–Qomyi ca dos caua l-lomaxaqui', qalaq ÿanem ca 'oonolec cam qaica ca l-lomaxaqui, qataq cam huo'o ca aloq, qalaq ÿachit cam qaica ca aloq.

12Ime, qataq nam ÿacootapeeguet ana nshiitenaqte ca nta'a, namayi anac da ÿauotaique da qanachilaxan. Nachi qainattac so Juan, qoÿiita':

–'Am mayi 'auapaxaguenataxaatac, qaq qomi', ¿huá'ague ca shinaqtec?

13Nachi so Juan 'enapeco':

–Qom qanqachi aca lshiitenaxanaqte na shiÿaxauapi, qalaq sa ishit da napacalec qanqashiñi añi iÿaxanaique ca nta'a.

14Nataq'en anac so nallippi so nta'a, nachi qainattac somayi, qoÿiita':

–Qaq qomi', ¿huá'ague ca shinaqtec?

Nachi so Juan 'enapeco':

–Sa ishit qome da huo'o ca qanhuoyi, qataq sa ishit da huo'o ca qauayiñiitalec, nataq'en sa ishit da huo'o ca chochi qauasaqaitapeguelec ca lasouaxashit. Añim qadashivii, nachañita qauaÿamaxayiñiita.

15Nachi na shiÿaxauapi ÿataqta ÿoqochitapigui', deuennataxaatac da huo'otaq so Juan sa iuena'a da nachiso so nta'a mayi qadca'alaxaqui. 16Qalaxayi so Juan 'enapega 'enauac so shiÿaxauapi, 'eeta':

–Aÿim 'eesa da qami' ñachilaxanguilo nagui na 'etaxat, qalaxayi huo'o na aÿim nca'attalec, namayi qami' nachilaxanguilo qome ca Espíritu Santo qataq ca nodec. Qaq namayi ÿataqta ÿacteec da l'añaxac, qaq sa ishit da shin'am, qataq aÿim sa ishit da yalou'a da ñaqat naua lapela'te lque'te. 17Namayi lasoqta'a ca lchigoxosoxonaxat, da yaqto' ichigoq na trigo da iÿotauga ana ala qataq na lvi. Ime, qaq iÿotauga ana ala na trigo da ÿachaigui ca laÿi'. Qaq nam lvi qalaxayi ÿavigaxat, ÿasaxangui cam nodec mayi sa ishit da 'om.

18Qaq 'eda da 'eetec da ltaxaÿaxac, qataq qalota na laÿipi nqataxacpi mayi ÿan so Juan co'ollaq i'axattapeguem 'enauac na shiÿaxauapi da no'on l'axaÿaxac. 19So Juan nataq'en ividaxato'ot so nta'a Herodes souaxat da huadonguet aso Herodías asom lhua so lqaÿa Felipe, qataq nataq'en souaxat nam laÿipi i'otpi mayi sa ÿaÿamaxañi, 20qalaxayi so Herodes sa ishit da ÿalaq. Chaqdata da nquigaxatteec da i'ot sa ÿaÿamaxañi co'ollaq icoñi' so Juan, ÿanaigui aso ncoñitaxanaxaqui.

Da nachilaxanataguec so Jesús

(Mateo 3.13-17; Marcos 1.9-11)

21Qaq co'ollaq saxanaxa da qaicoñi' so Juan, nachi somayi nachilaxaatac 'enauac na shiÿaxauapi, qaq nataq'en so Jesús anac da qanachilaxan. Qaq somayi co'ollaq ña nqouagaxaueetac, nachi na piguem 'ico' da qaÿauatoigui. 22Nachi so Espíritu Santo anaÿaña somayi, 'eeta'am na qoto' ÿataqta yi'oqta. Ime, nachi chimqot na piguem so n'aqtac, 'eeta':

–'Am mayi nachi'am ÿalamaxat ÿalec, 'am ÿauotaxat, aÿim ÿataqta 'am ñitootapeguec.

So chigoxoguet lta'alpi so Jesucristo

(Mateo 1.1-17)

23Qaq so Jesús mashi ivi' na treinta vi'i co'ollaq cot da do'onataxan. Somayi qoÿiitega llalec so José, qaq so José nachi lta'a so Elí, 24qaq so Elí nachi lta'a so Matat, qaq so Matat nachi lta'a so Leví, som llalec so Melquí, qaq so Melquí nachi lta'a so Janai som llalec so José, 25qaq so José nachi lta'a so Matatías, qaq so Matatías nachi lta'a so Amós, qaq so Amós nachi lta'a so Nahúm, qaq so Nahúm nachi lta'a so Eslí som llalec so Nagai, 26qaq so Nagai nachi lta'a so Máhat, qaq so Máhat nachi lta'a so Matatías, qaq so Matatías nachi lta'a so Semeí, qaq so Semeí nachi lta'a so José so llalec so José som llalec so Judá, 27qaq so Judá nachi lta'a so Johanán, qaq so Johanán nachi lta'a so Resá, qaq so Resá nachi lta'a so Zorobabel, qaq so Zorobabel nachi lta'a so Salatiel som llalec so Nerí, 28qaq so Nerí nachi lta'a so Melquí, qaq so Melquí nachi lta'a so Adí, qaq so Adí nachi lta'a so Cosam, qaq so Cosam nachi lta'a so Elmadam som llalec so Er, 29qaq so Er nachi lta'a so Josué, qaq so Josué nachi lta'a so Eliézer, qaq so Eliézer nachi lta'a so Jorim som llalec so Matat, 30qaq so Matat nachi lta'a so Leví, qaq so Leví nachi lta'a so Simeón, qaq so Simeón nachi lta'a so Judá, qaq so Judá nachi lta'a so José, qaq so José nachi lta'a so Jonam som llalec so Eliaquim, 31qaq so Eliaquim nachi lta'a so Meleá, qaq so Meleá nachi lta'a so Mená, qaq so Mená nachi lta'a so Matatá som llalec so Natán, 32qaq so Natán nachi lta'a so David, qaq so David nachi lta'a so Isaí, qaq so Isaí nachi lta'a so Obed, qaq so Obed nachi lta'a so Booz, qaq so Booz nachi lta'a so Sélah som llalec so Nahasón, 33qaq so Nahasón nachi lta'a so Aminadab, qaq so Aminadab nachi lta'a so Admín, qaq so Aram nachi lta'a so Hesrón, qaq so Hesrón nachi lta'a so Fares, qaq so Fares nachi lta'a so Judá, 34qaq so Judá nachi lta'a so Jacob, qaq so Jacob nachi lta'a so Isaac, qaq so Isaac nachi lta'a so Abraham, qaq so Abraham nachi lta'a so Térah, qaq so Térah nachi lta'a so Nahor, 35qaq so Nahor nachi lta'a so Serug, qaq so Serug nachi lta'a so Ragau, qaq so Ragau nachi lta'a so Péleg, qaq so Péleg nachi lta'a so Heber som llalec so Sélah, 36qaq so Sélah nachi lta'a so Cainán, qaq so Cainán nachi lta'a so Arfacsad, qaq so Arfacsad nachi lta'a so Sem, qaq so Sem nachi lta'a so Noé som llalec so Lámec, 37qaq so Lámec nachi lta'a so Matusalén, qaq so Matusalén nachi lta'a so Henoc, qaq so Henoc nachi lta'a so Jéred, qaq so Jéred nachi lta'a so Mahalaleel, qaq so Mahalaleel nachi lta'a so Cainán, 38qaq so Cainán nachi lta'a so Enós, qaq so Enós nachi lta'a so Set, qaq so Set nachi lta'a so Adán som llalec ñi Dios.

Currently Selected:

Lucas 3: TBSNT

Highlight

Copy