Lucas 1

Da hua'auchiguiñi l'aqtac so Lucas

1Cha'ayi mashi qalota na shiÿaxauapi mayi ÿacoolec da ÿachigoxottot so hua'auchiguiñi da ÿiyiñi 'enauac na qai'otpi mayi qomi' huanguilo. 2Qaq namayipi ÿiyiñi dam mashi qomi' i'axatema nam ÿauaachigui so chigoqchiguiña ne'ena qai'otpi, qata nataq'en i'axattac de'eda n'aqtac. 3Qaq aÿim nataq'en mashi ñimate' da ñapaxagueetega 'enauac so chigoqchiguiña ne'ena qai'otpi. Qaq ÿoqo'oyi aÿim ÿaÿamaqchiguiñi ñaqshin da shiyiñi 'enauac ne'ena qai'otpi, da 'am samaxa, 'am ñauochaxaua ÿaqaÿa Teófilo, 4yaqto' ÿataqta 'auauattoota ca 'eesa lataxac dam 'am qaÿapaxaguenec.

So chigaqshiguem Dios lamaxashic i'axata'a da lañoxoc so nachilaxanataxanaq l'enaxat Juan

5Qaq se'eso na'a'q co'ollaq so Herodes ilotague' yi 'alhua l'enaxat Judea, nachi huo'o so l'enaxat Zacarías mayi ltaxaÿaxanaxanec na shiÿaxauapi da qaitaxaÿapegue' ñi Dios. Somayi ÿalectaigui na ntaxaÿaxanaxanecpi mayi chigoxoguet so Abías. Qaq aso lhua l'enaxat Elisabet, asomayi nataq'en maichi laual so ntaxaÿaxanaxanec l'enaxat Aarón. 6Soomayi ÿataqta no'o'n shiÿaxa'u, ÿaÿamaxadeete' ñi Dios. Nataq'en ÿataqta ÿalaxadeguet 'enauac na lqataxacpi ñi qadataxala'. Qaq ÿoqo'oyi sa ishit da huo'o ca ishit da ÿasaxalguete ca lasouaxashi't soomayi. 7Qalaxayi soomayi qaica ca llale'c, cha'ayi aso Elisabet sa ishit da deco'o, qataq soomayi ÿataqta mashi ÿi'axaiqa.

8Qaq huo'o so na'a'q co'ollaq ivita so laloqo' da inoxoneuo da do'onataxan nam ÿalectaigui so Zacarías, da i'ot na l'onatacpi nam detaqtague' ñi Dios. 9Qaq dam n'onataxac naxa na ntaxaÿaxanaxanecpi, se'eso na'a'q nallida't, nachi tajlec so Zacarías da nachiso inoxonoigui na lauel aso n'onaxanaxaqui late'edai mayi huaigui da qaÿi'oxoden ñi qadataxala' Dios, da yaqto' ÿavigaxat na nchinaxanaxat mayi ama na laita. 10Qaq co'ollaq ña qaÿavigaxattac so nchinaxanaxat, nachi 'enauac so shiÿaxauapi nqouagaxaueetac, pa'atauga so qasoxoc. 11Huaña, nachi nachaxana so Zacarías so lamaxashic piguem l'ec ñi qadataxala'. Somayi nachattañi, pa'ata'ague da aloic asom nca'atoxolate na nchinaxanaxat mayi ama na laita. 12Nachi co'ollaq ila'a so namaxashic piguem l'ec so Zacarías, nachi ÿataqta sa ÿaÿaten ca 'eetec, qataq ÿataqta qalota da lcolanaxa. 13Qalaxayi so namaxashic 'enapeco':

–Zacarías, sa ishit da 'ayi'i, cha'ayi ñi Dios hua'aqtega da 'anqouagaxaunaxac. Qaq nagui añi 'adhua Elisabet huo'o qome ca llalec. Qaq camayi 'ai'anagui qome da l'enaxat Juan. 14Qaq ÿataqta huo'o qome da 'adamaxayic qataq da 'antonaxac qataq ÿataqta qalota qome na ntootapeguec de'eda lañoxoc camayi, 15cha'ayi que'eca 'ai'alec camayi ÿataqta 'amaqtaqaic qome naq'en ñi Dios. Camayi sa ishit qome da nÿomgui na ÿotta'a't lataxa, qataq ÿataqta nlaqchigui so Espíritu Santo qom saxanaxa da ñiguiñi. 16Camayi i'oteguet qome da ÿataqta qalota na Israel llalaqpi na ÿi'iguelaxa ñim lataxala' Dios. 17Qaq que'eca Juan, camayi hua'auta'ague qome da tata'ague ñi qadataxala'. Qaq ÿaatañi qome da lqui'iÿaxac qataq da l'añaxac so Dios l'aqtaxanaxanec l'enaxat Elías, da yaqto' ÿi'iguelaxateguet ca nta'a ca llalec da yaqto' saqca ca da, qataq yaqto' nam sa ishit da ÿalaq ishit da ÿaÿaten da ÿalaq. Qaq ÿaqataxanai' qome na shiÿaxauapi, da yaqto' lhuotta da ÿaconguet ca qadataxala'.

18Nachi so Zacarías inat so Dios lamaxashic, 'eeta':

–¿Huá'ago' ca 'eetec ca lataxac da yaqto' aÿim ishit da saÿateeta de'eda? Cha'ayi aÿim mashi aÿim ÿi'axaiqui, nataq'en añi iua.

19Nachi so namaxashic 'enapeco':

–Aÿim mayi nachaÿim Gabriel, mayi sooto'ot ñi Dios. Qaq ñimayi aÿim namaq da 'am setaxaÿapegue', qataq da 'am sa'axatem de'eda no'on 'ad'axaÿaxac. 20Qalaxayi 'am, yi sa ishit da 'au'amaqten da shinapec, qaq nagui sa ishit qome da huo'oi naua 'ad'aqtaqa. Sa ishit da 'autaqa, to' qom mashi ivita da ñiguiñi ca 'ai'alec. Qaq damayi ipacchigui qome qom ivita ca laloqo'.

21Qaq nam shiÿaxauapi mayi pa'atauec, iuattaique so Zacarías, namayipi ÿataqta huo'o da lqochoxo souaxat da qaÿaloqta da nnoxoneec somayi, da ca'ai aso n'onaxanaxaqui. 22Qaq co'ollaq nnoxoneec so Zacarías, nachi sa ishit da detaqa. Huaña, nachi qaÿaÿaten da somayi huo'o ca lauanaqtaguishic na pa'auo aso n'onaxanaxaqui. Nachi somayi da'aqtaxanem somayipi, qalaxayi huota'ai naua llaxaatal, cha'ayi qaicaua naua l'aqtaqa.

23Qaq co'ollaq mashi inoxoodeec soua na'axa'te mayi l'onataxanaxaqui' so Zacarías da do'onataxanoigui aso n'onaxanaxaqui, nachi queuo da taÿa ca lma'. 24Qaq co'ollaq qaÿata'ague de'eda, nachi aso lhua Elisabet hualaxai. Nachi asomayi sa ishit da npa'aueguesop so lma', chochi ividaxattrauec soua cinco ca'agoxoiqa. Da deuennataxaatac, 'eeta': 25“Ñi qadataxala' aÿim i'otec nagui de'eda, yaqto' na shiÿaxauapi sa ishit da aÿim i'otaatac.”

So lamaxashic ñi Dios i'axata'a da lañoxoc so Jesús

26Qaq co'ollaq mashi inoxoodeec soua seis ca'agoxoiqa, nachi ñi Dios ÿamaxa so Gabriel yi pueblo Nazaret mayi huaigui yi 'alhua l'enaxat Galilea, 27da namaqtega naq'en aso 'alo ñaq lamaxai l'enaxat María. Asomayi mashi huotaique da huadonguet so ÿale l'enaxat José. Somayi maichi laual so nta'a l'enaxat David. 28Nachi so lamaxashic ñi Dios pa'aigui so lma' mayi netaigui asomayi. Nachi iquin, 'eeta':

–¡'Am mayi nachi'am nqouaguec ñi Dios! Ñi qadataxala' 'am hueta'aguet. Ñimayi 'am ÿanem da lqouagaxanaqtaic, qaq sa ishit da qoneta'am 'enauac na 'adaÿipi 'alpi.

29Qalaxayi asomayi co'ollaq ila'a so Dios lamaxashic, nachi ÿataqta i'elaxam de'eda l'aqtac, nachi asomayi nchimaxatteguela't, 'eeta': “¿Chaq 'éetec ca naigui de'eda nquinaxanaxac?” 30Nachi se'eso namaxashic 'enapeco':

–María, 'am sa ishit da 'ayi'i, cha'ayi ñi Dios ÿataqta 'am ÿaÿamaxadeeta. 31Nagui 'am hualaxai qome. Ime, qaq huo'o ca 'ai'alec, nachi 'ai'anagui qome da l'enaxat Jesús. 32Camayi ÿataqta 'amaqtaqaic, qataq qaÿamata'ac qome da llalec ñim Dios mayi 'amaqtaqaic. Qaq ñi qadataxala' Dios ÿanagui qome camayi da nta'a, 'eeta'am som hua'au lta'a l'enaxat David, 33yaqto' camayi chochi tateec qome da ilotague' na llalaqpi so Israel. De'eda l'onataxanaxac da nta'a, damayi qaica ca loga't.

34Nachi aso María inat so lamaxashic ñi Dios, 'eeta':

–¿Chaq huá'ague ca 'eetec ca lataxac de'eda? Yi aÿim saxanaxa da sauana ca ÿale.

35Nachi so namaxashic 'enapeco':

–Qomyi ca Espíritu Santo qome 'am tanguit, nachi da l'añaxac ñi Dios mayi 'amaqtaqaic 'am ipelteelec, 'eeta'am ca l'oc. Qaq ÿoqo'oyi que'eca nogotolec mayi ñiguiñi, camayi ÿataqta qoÿanot da hueto'ot ñi Dios, nachi qaÿamata'ac da llalec ñimayi. 36Nataq'en añi 'adhuo' lashi Elisabet, añimayi huo'o ca llalec, nai'ctaxa da mashi ÿi'axaina'. Añim qoÿiitegacnaxa da qaica ca llalec, qaq nagui mashi ivi' naua seis ca'agoxoiqa da hualaxai. 37Cha'ayi ñi Dios qaica ca ishit da ÿaqalanapec.

38Nachi aso María 'enapeco':

–Aÿim maichi aÿim l-lata ñi qadataxala'. Qaq no'on qome da ipacchigui da l'aqtac ñi Dios.

Huaña, nachi jec so namaxashic.

Aso María namaqtega aso Elisabet

39Qaq se'esoua na'axa'te nachi aso María iÿalapigui' da nqo'ona so pueblo mayi huaigui som saqaÿoqotchiguemec na 'alhua l'enaxat Judea, 40nachi tau'a so lma' so Zacarías, nachi iquin aso Elisabet. 41Nachi aso Elisabet co'ollaq hua'axaÿa da nquinaxanaxac, nachi so nogotolec mayi huetagui na lauel ndashiguem, nachi asomayi ÿataqta nlaqchigui so Espíritu Santo. 42Nachi asomayi ÿataqta nlamaxaden, 'eeta':

–Ñi Dios 'am ÿanem da lqouagaxanaqtaic, qaq sa ishit da qoneta'am 'enauac na laÿipi 'alpi. Nataq'en ca 'ai'alec ÿanem da lqouagaxanaqtaic. 43Qaq ¿négue't aÿim da huo'otaq aÿim namaqtega adam late'e ñi ÿataxala'? 44Cha'ayi can chochi sa'axaÿa da 'adquinaxanaxac, nachi idaxanapec da ntonaxac yi nogotolec mayi huetaigui na iuel. 45Qaq ÿataqta 'auamachiguiñi, cha'ayi 'au'amaqten de'eda qoÿinapec, cha'ayi ÿataqta ipacchigui qome da 'enapec ñi qadataxala'.

46Nachi aso María 'enapeco':

Da ivilÿaxac ÿataqta ÿi'oxoden ñi qadataxala',

47qataq da iquiyaqteÿaxac ÿataqta machiguiñi souaxat ñi Dios mayi ica'alaxaqui.

48Cha'ayi ñi Dios tachigui lauel ana qaica ca l'amaqchic l-lata,

qaq nagui nachi chigoqchiguiña da 'enauac na shiÿaxauapi aÿim ÿamata'ac da ÿataqta samachiguiñi.

49Cha'ayi ñi Dios mayi qaica ca ÿaqalanapec ÿataqta lta'adaic da aÿim i'otec;

da l'enaxat ñimayi ÿataqta qui'itta.

50Ñimayi nachi 'eetai' da huo'o da lchoxonnataxanaxac nam ÿataqta ñi'iÿa ñimayi.

51Qataq ñimayi ÿataqta qaica ca 'en'am da l'amaqchic da i'ot,

cha'ayi loxonec 'enauac na ñi'oxonnaxaicpi.

52Qataq nam 'añaxaicpi ca'aisalo naq'en naua l'onataxanaxaco,

qaq nam choxodaqpi qalaq nauaxaÿaxaashiguem.

53Qataq nam deuenaxaatac, qalaq ÿanem da qaica ca iuen naq'en,

qaq nam sallaxanecpi,

qalaq ÿataqta qui'itchiguilo naq'en naua lhua'q da ÿamaqhuec.

54Qataq itauan nam llalaqpi so Israel mayi l-latac,

qaq sa ishit da icoua'ai da lchoxonnataxanaxac somayi.

55Qaq damayi nachi 'eetai' da ÿachaxanapeguem co'olloxochiyi so hua'au qadta'alpi,

som Abraham qataq so llalaqpi.

56Nachi aso María n'onaisop aso Elisabet, ivi' naua tres ca'agoxoiqa. Qaq co'ollaq ime, nachi ÿi'iguelaxa ca lma'.

Da lañoxoc som nachilaxanataxanaq l'enaxat Juan

57Qaq ipacchigui da co'ollaq mashi ivita so laloqo' da deco'o aso Elisabet, nachi huo'o so llalec. 58Nachi na lauodeuapi qataq nam lauo' l'ecpi qanqo'oota asomayi da qantootapeguec co'ollaq qaÿaÿaten da ñi qadataxala' ÿataqta lta'adaic da lchoxonnataxanaxa asomayi. 59Qaq co'ollaq mashi ivi' naua ocho na'axa'te, nachi qaidouo so nogotolec da qaÿauo'o so n'anaxashit na l'oc. Nachi qaÿauotaique da qoÿanagui da l'enaxat so lta'a Zacarías. 60Qalaxayi aso late'e 'enapeco':

–'A'i, namayi l'enaxat qome da Juan.

61Nachi qoÿiitego' asomayi, qoÿiita':

–¿Tá'ainco'? yi qaica ca l'enaxat de'eda nam 'adhuo' l'ecpi.

62Nachi qaÿauota'ai naua ñaxaatal co'ollaq qainat so lta'a so nogotolec da yaqto' qaÿaÿaten da chaq negue't ca n'enaxat mayi ÿaatapigui somayi. 63Nachi so lta'a iÿaxanaique so ledaxanaxala'. Nachi ÿidelec, 'eeta': “Namayi l'enaxat Juan.” Nachi 'enauac qai'aalatapeguec de'eda. 64Nachi huaña, co'ollaq so Zacarías qaltaq ÿi'iguelaxalec da huo'oi naua l'aqtaqa, nachi ÿi'oxodeetac ñi Dios. 65Huaña, nachi 'enauac se'eso lauodeuapi ÿataqta huo'o da l'aalaxa, qataq nataq'en 'enauac som netalec se'eso saqaÿoqotchiguemec 'alhua l'enaxat Judea, somayipi ÿataqta n'aqtaxaatapigui de'eda qanayiuaigui. 66Qaq ÿataqta deuennataxaatac 'enauac nam ividauga da ÿaÿaten de'eda, qataq nnattega't, 'eeta':

–¿Chaq huá'ague qome ca 'eetec ca taÿa'a se'eso nogotolec?

Cha'ayi ÿataqta 'eesa da ñi qadataxala' hueta'aguet da itauaatac somayi.

Da l'onec so Zacarías

67Nachi so lta'a Zacarías ÿataqta nlaqchigui so Espíritu Santo, nachi i'axattac da l'aqtac ñi Dios mayi ÿami', 'eeta':

68Ÿataqta qaÿi'oxoden qome ñi qadataxala' mayi nDios na Israel l'ecpi,

cha'ayi ñimayi qomi' naÿalo da qomi' nca'alaxatreec,

cha'ayi maichi qomi' lalamqa'te.

69Ñimayi qomi' ÿanema cam ÿataqta 'añaxaic nca'alaxaqui,

chigoqtoigui naq'en na llalaqpi som l-latac l'enaxat David.

70Qaq damayi nal'ena da qomi' ÿachaxanapeguema co'ollaq i'axatta'aguet naq'en 'enauac som qui'itta l'aqtaxanaxanecpi som hua'a'u vi'iyi:

71da ÿauotaique qomi' nca'alaxateeguesopa nam qomi' ipa'agueeta'pe qataq 'enauac nam qomi' nquiÿatapegalo,

72nataq'en da ÿataqta huo'o da lchoxonnataxanaxa som hua'au qadta'alpi,

qataq da sa ishit da icoua'ai dam naÿamaxataxac mayi ÿanem somayipi.

73Qaq 'eda dam ÿachaxanapec ñi Dios co'ollaq ÿan so l'aqtac da ÿami' so qadta'a Abraham:

74da qomi' nca'alaxateeguesopa nam qomi' ipa'agueeta'pe,

yaqto' sa ishit da huo'o ca shi'oqtaique da shi'oxodenaqtac ñimayi,

75nataq'en da yaqto' qomi' ÿaÿamaxadeete' da ñañanqot ñimayi da qomi' qui'itte' 'enauaque naua na'axa'te da qanachaalataxac.

76Qaq 'am ÿalcolec, 'am qoÿanagui qome da 'am l'aqtaxanaxanec ñim Dios mayi 'amaqtaqaic,

cha'ayi 'am qai'auaxaata'ague qome na llic ca qadataxala' da yaqto' 'auqataxanai',

77da yaqto' 'au'aqtaxanem nam lalamaxatpi da qaÿapalaxat da lasouaxashit,

qataq yaqto' ÿaconguet da nca'alaxa.

78Cha'ayi nachida da maichi lsoxoyic qataq dam lqouagaxanaqtaic ñi qadta'a Dios

da huo'o mshi chigoqtot naq'en na piguem da qomi' ÿanema aca 'ico' nala' mayi icoÿadelec ca dalaxaic na'a'q,

79da yaqto' icoÿadelec nam huetaigui na napalaxa qataq da lchic da nleuaxa,

qataq yaqto' qomi' ÿachaxaateguelo ca nqa'aic mayi nlagaxayic.

80Nachi so nogotolec nquictashiguem da llaxa qataq da l'añaxac da lauattonaxanaxac. Qaq netalec so tojlec 'alhua, chochi ivitta'a so na'a'q co'ollaq nachaxana so Israel llalaqpi.

Currently Selected:

Lucas 1: TBSNT

Highlight

Copy