Lucas 19

So Jesús qataq so Zaqueo

1Nachi so Jesús tau'a yi Jericó, nachi quichiguingui so la ciudad. 2Qaq se'eso la ciudad nachi naña so sallaxanec l'enaxat da Zaqueo. Somayi lataxala' nam ÿacootapeeguet ana nshiitenaqte ca nta'a. 3Qaq somayi nshitaique da ÿauatton so Jesús. Qalaxayi sa ishit da ÿañoxot da ilo'ot, souaxat somayi da huaxadenoqolec, qataq ÿataqta qalota na shiÿaxauapi. 4Nachi somayi hua'au nqalgoqta, cha'ayi nshitaique da ÿauatton somayi. Ime, qaq quishiguemec aso qo'ipaq late'edai mayi nangui som nqa'aic mayi huotaique da tateuga so Jesús. 5Qaq so Jesús co'ollaq ivita somayi, nachi ilashiguemec. Qaq 'enapega, 'eeta':

–'Am Zaqueo, sa 'anaÿaloxon qome da 'aunoteec, cha'ayi aÿim na na'a'q sou'a ca 'adma'.

6Nachi so Zaqueo ÿataqta sa naÿaloxon da huenoteec, nachi qaica ca l'aqtac da ÿauegueu'a ca lma' so Jesús. 7Qaq co'ollaq qaÿauaachigui de'eda, nachi qanayictega, qoÿiita': “So Jesús qachi tau'a yi lma' so qauemaic ÿale.” 8Nachi so Zaqueo nachajñi, nachi 'enapega so qadataxala', 'eeta':

–'Am ÿataxala', aÿim qome secolaxatchiguingui na laiñi da isallaxa. Ime, qaq sanem nam choxodaqpi. Qaq da huo'otaq huo'o ca chochi sayin co'ollaxa da secachiÿa ca 'oonolec logoxot, nachi camayi shi'iguelaxatoto caua cuatro.

9Nachi so Jesús 'enapeco':

–Nagui na na'a'q nvita da nca'alaxa ne'ena nma', cha'ayi de'eda shiÿaxaua, damayi maichi llalec so Abraham. 10Cha'ayi ne'ena shiÿaxaua llalec, namayi anac da nmitaique qataq nca'alaxateec nam shiÿaxauapi mayi isomtac.

Qaÿaloqnaxanalo soua diez lca'chole

11Qaq so shiÿaxauapi co'ollaq ñaq queta da n'axaÿaxaatega so Jesús, nachi somayi ÿauo'o da daloqnaxana, cha'ayi souaxat da mashi sa qaÿapeque yi Jerusalén. Cha'ayi somayipi ipi'itaxaatega da mashi ivita ca laloqo' da ñi Dios ilo'ogue 'enauacna. 12Nachi somayi 'enapeco':

–Huo'o so shiÿaxaua chigaqaigui nam 'amaqtaqaicpi. Somayi jec da nqo'ona ca lÿa 'alhua mayi ÿataqta qaÿoqta, da yaqto' qoÿanagui da nta'a. Qaq da ime, nachi ñi'iguelaq. 13Qaq co'ollaq yaqta'a da jec, nachi iÿaxanalo soua diez l-lataqa. Nachi ÿami' ñi 'oonolec soomayi añi 'oonole soua diez lca'chole, qaq añi 'oonole soomayi ÿataqta qaÿoqtegue añi naigui. Nachi 'enapegalo', 'eeta': “Qau'onataxañiÿa qome ana'ana aÿom, qanmiñiitac, ÿataqto' qom ivita da ñi'iguelaq.” 14Qalaxayi so shiÿaxauapi mayi lma' se'eso 'alhua ÿataqta nquiÿa somayi. Nachi qaÿauo'o so qaÿamaq da qaica'ataxanaxaalec somayi, da yaqto' qoÿinapega, qoÿiita': “Qomi' sa saÿamaxadenaq ne'ena shiÿaxaua da qadta'a.” 15Qalaxayi nachi 'en'am qoÿanagui da nta'a somayi. Ime, nachi ñi'iguelaxa so lma'. Qaq co'ollaq mashi nvi', nachi damaxasoxoneugalo soua l-lataqa som ÿanema aso alom, cha'ayi nshitaique da ÿaÿaten chaq negue't aca laueque ñi 'oonolec. 16Nachi so l'auaxanec nachaateuo, nachi 'eeta': “'Am ÿataxala', ana 'om ivi' ana diez ayi dalaxai laueque.” 17Nachi so nta'a 'enapeco': “Aja', no'on, ÿaÿamaqchiguiñi, ÿataqta 'am no'on nlatac. Qaq cha'ayi ÿataqta 'aupactelec da 'au'ot dam saq 'amaqtaq mayi 'am qaipataxalec, qaq nagui sanagui da 'am nta'a da 'aulo'oguelo caua diez puebloyi.” 18Qataq anac som nca'attauo, nachi 'enapeco': “'Am ÿataxala', ana 'om ivi' ana cinco ayi dalaxai laueque.” 19Qaq nataq'en 'enapega somayi, 'eeta': “'Am nataq'en 'am sanagui nagui da 'am nta'a da 'aulo'oguelo caua cinco puebloyi.” 20Qataq anac som lÿa som pa'ateec, nachi 'eeta': “'Am ÿataxala', 'ana ana 'om. Anamayi chochi saÿamaxat, sachalec so hualoqlaÿi, 21cha'ayi aÿim huo'o da icolanaxa da qoneta, cha'ayi ÿataqta 'am saqadamchigui da 'auacona ca sa 'adalamaxat, qataq da 'anqat na ala cam saq 'anguishic.” 22Nachi som nta'a 'enapeco': “'Am nlatac qauemaic, da maichi 'ad'aqtac, nachida da sachigoxotchigui da sauo'o ca 'anhuaxanaguec. 'Am 'auaÿateetac mque' da aÿim saqadamchigui da sacona cam sa ÿalamaxat, qataq da ñaqat na ala cam saq ÿanguishic. 23Qalaq ¿tá'ainco' yi sa 'ai'anoiguio' aÿim laÿi' ana anom, yaqto' saconguet acam laueque ana aÿom da ivita da ñi'iguelaxa yi ima'?” 24Nachi 'enapega nam hueta'a yimayi, 'eeta': “Ña qauacoñiÿa ada'ada lcatole mayi hueto'ot damayi. Ime, qaq qai'añiim dam hueto'oto daua diez.” 25Nachi somayipi 'enapeco': “'Am qadataxala', qalaxayi damayi mashi hueto'oto daua diez lca'chole.” 26Nachi som nta'a 'enapeco': “Aÿim qami' shinapegalo da ca huo'o ca hueto'ot, qalaq camayi ÿacteec qanqoÿin ca qoÿami'; qaq cam qaica ca hueto'ot, qalaq nachi 'en'am ivida'a da qaiuotaxanec cam saq 'amaqtaq mayi hueto'ot. 27Qaq nam aÿim ipa'agueetacpi mayi sa ÿaÿamaxaden da aÿim lta'a, qalaq qanaviquiu'a aÿim. Ime, qaq qaualauachi.”

So Jesús inoxoneu'a yi Jerusalén

(Mateo 21.1-11; Marcos 11.1-11; Juan 12.12-19)

28Qaq co'ollaq ime da nasaxauec de'eda so Jesús, nachi jec da tata'ague da Jerusalén. 29Qaq co'ollaq mashi nayiitau'alo yiua pueblolqa Betfagé qataq yi Betania yim sa qaÿapeque yi saqaÿoqotchiguemec 'alhua mayi nanqa' ana olivos. Huaña, nachi ÿama'q soua dos lapaxaguenataqa. 30Nachi 'enapegalo', 'eeta':

–Qanqo'oñiÿa qome nam sa qaÿapeque mayi naña nam saq 'amaqtaq shiÿaxauapi. Qaq qom qavichiÿa, nachi qauloiÿa'a ca 'ashina qaicoñittai'. Camayi saxanaqca ca ishit da nelec. Qaq qausoiuec qome, nachi aÿim qanaviquiÿa. 31Qaq da huo'o ca qami' ina't da chaq ta'ainec da qausoiuec, nachi qoñiÿapec qome da ñi qadataxala' iuen namayi.

32Nachi je'c soua lapaxaguenataqa, nachi ipacchigui 'enauac dam 'enapec so Jesús. 33Nachi co'ollaq mashi isotrapeguec so 'ashina, nachi ana'c soua lalamaxa't so 'ashina. Nachi denataxaata'pe, 'eeta':

–¿Tá'ainco' yi qausoitapeguec na 'ashina?

34Nachi soomayi 'ena'po':

–Qomyi iuen namayi ñi qadataxala'.

35Nachi qaÿauega somayi so Jesús. Ime, nachi qaÿasaxalguete soua alogo so 'ashina, nachi qoÿanaxanaxaalec somayi. 36Nachi co'ollaq queta so Jesús, nachi qalapaxangui so nqa'aic na npo'pi da ñi'oxonnataxanaxa. 37Qaq co'ollaq mashi qanayiita'a so ca'amgue asom saqaÿoqotchiguemec 'alhua mayi nanqa' ana olivos, nachi 'enauac nam i'amaqteetac somayi qataq quetague', nachi i'alaqtagui souaxat da ntonaxac. Nachi ÿi'oxodeetac ñi Dios souaxat 'enauac nam sa qaÿauanapigui mayi i'ot da n'aalaxa mayi qaÿauaachigui da i'ot somayi. 38Nachi qoÿiita':

–¡Ÿataqta no'on da lliquiaxac na qadta'a mayi nactaigui da l'enaxat ñi qadataxala'! ¡Huo'o qome da nlagaxayic na piguem, qataq da lli'oxoyic ñi Dios!

39Nachi nam fariseopi mayi ÿalectaigui se'eso shiÿaxauapi nachi 'eeta':

–'Am mayi 'auapaxaguenataxaatac, no'on quetaxa da 'anhuogaxa na 'am ca'attague'pi.

40Qalaxayi so Jesús 'enapeco':

–Qami' shinapegalo da nañaxaañi ne'enapi, nachi na coma'pi ishit da i'alaq.

41Qaq co'ollaq mashi nayiitau'a so Jerusalén, nachi co'ollaq ilau'a so la ciudad, nachi so Jesús noÿiilec somayi. 42Nachi 'eeta':

–¡Qami' da qauaÿajñíictaxa ne'ena na'a'q cam ndoi' da qadlagaxayiqui! Qalaxayi nagui damayi sa ishit da yi'oq, qaq sa ishit da qauloiÿa'a. 43Qalaxayi huo'o qome ca na'a'q, qaq qami' qavichiÿalo caua na'axa'te mayi ÿataqta qauema, qom ca qanpa'aguenaxauai nauaxaÿaxaashiguem ca lpaqtaxanaxat da qami' iconnaxaasopa. Ime, qaq qami' coleesopa, ÿataqta sa ÿauo'o ca qaddaqa'ai da qami' iloquiaxa'n. 44Nachi qami' ÿamaxagueta ana 'alhua. Ime, qaq ÿalauat nam netalec na qadmayi, qataq sa ishit da huo'o ca nachattañi naq'en na coma'pi, cha'ayi qami' sa qauauattoñi na laloxoqui da qami' namaqtegalo ñi Dios.

So Jesús do'otaxaalec aso n'onaxanaxaqui late'edai

(Mateo 21.12-17; Marcos 11.15-19; Juan 2.13-22)

45Nachi so Jesús inoxonoigui aso n'onaxanaxaqui late'edai. Ime, nachi i'odauec 'enauac nam nmeetega'tpi mayi huetaigui asomayi. 46Nachi 'enapega, 'eeta':

–Naua ñiyigui'shi l'aqtaqa ñi Dios 'eeta': “Na ima', namayi qouagaxaunaqa';” qalaxayi qami' qau'ochiic namayi da nqañoxotaqa' na cachaxaicpi.

47Nachi 'enauaque se'esoua na'axa'te so Jesús dapaxaguenataxaatac, huetaigui aso n'onaxanaxaqui late'edai. Qalaxayi nam lataxala'pi na ntaxaÿaxanaxanecpi da qaitaxaÿapegue' ñi Dios, qataq nam dapaxaguenataxaatapeguec na nqataxacpi, qataq nam lta'alpi na shiÿaxauapi, namayipi ilotaique ca lataxac da ishit da ÿalauat so Jesús. 48Qalaxayi sa ishit da qaÿanata ca qoÿiitec, cha'ayi 'enauac nam shiÿaxauapi ÿataqta ÿi'imaqtom da n'axaÿaxaatega somayi.

Currently Selected:

Lucas 19: TBSNT

Highlight

Copy