Lucas 20
20
Da 'enec so Jesús
(Mateo 21.23-27; Marcos 11.27-33)
1Qaq huo'o so na'a'q co'ollaq so Jesús huetaigui aso n'onaxanaxaqui late'edai da ÿapaxagueetac so shiÿaxauapi, qataq i'axattac da nca'alaxa. Nachi nvideuo som lataxala'pi nam ntaxaÿaxanaxanecpi da qaitaxaÿapegue' ñi Dios qataq nam dapaxaguenataxaatapeguec na nqataxacpi qataq so nquedoxonecpi. 2Nachi qainattac somayi, qoÿiita':
–Ña qomi' 'au'aqtaxanema, ¿huá'ague ca 'auachigoxota'ague ca 'an'aqtac da huo'o mshi 'au'ot de'eda? ¿Négue't ca 'am ÿanem de'eda 'adamaxasoxonaxac?
3Nachi so Jesús 'enapeco':
–Aÿim nataq'en huo'o da inataxanaxac da qami' sena't. Qaq aÿim qau'aqtaxañiim qome. 4¿Chaq négue't ca ÿamaxalec so Juan da dachilaxanataxan? ¿Ñi Dios peta'a, huo'ochaq ca chochi shiÿaxaua?
5Nachi somayipi maichi ncotatega't, 'eeta':
–¿Chaq huá'ague ca shinaqtec? Da shinaqpec da nachiñi ñi Dios da ÿamaxalec, qaq ÿoqta qome da 'eeta': “Qalaq ¿tá'ainco' qone' yi sa qau'amaqchiñi?” 6Qaq da huo'otaq shinaqpec da chochi shiÿaxaua ca ÿamaxalec, qaq 'enauac na shiÿaxauapi ÿoqta qome da qomi' ÿasa'q na coma' da qomi' ÿalaua't, cha'ayi ÿoqta 'eesa da so Juan, somayi l'aqtaxanaxanec ñi Dios.
7Nachi somayipi 'enapec da sa ÿaÿaten chaq negue't ca ÿamaxalec so Juan da dachilaxanataxan. 8Nachi so Jesús 'enapeco':
–Aÿim nataq'en shinapec da aque' sa saÿaten cam aÿim ÿamaxalec da so'ot de'eda.
Da n'aqtaguec som 'onataxanaxaicpi mayi qauemaicpi
(Mateo 21.33-44; Marcos 12.1-11)
9Qaq co'ollaq ime, nachi da'aqtaxanem so shiÿaxauapi, nachi ÿauo'o da daloqnaxana, 'eeta':
–Huo'o so shiÿaxaua ÿauo'o so lanaxanqa' da ÿaañi ana uvas. Qaq co'ollaq ime, nachi ipataxalec so l'onataxanaxanecpi. Ime, nachi taÿa ca lÿa 'alhua, nachi huo'oi naua vi'iyi da hueta'ague. 10Qaq co'ollaq ivita so laloqo' da qanqat ana ala, nachi namaq so l-latac da iÿaxanot som 'onataxanaxaicpi, da yaqto' qaicolaxateuga acam nlatac. Ime, nachi qaÿi'iguelaxatchigui. 11Nachi som 'aco' qaltaq namaq so lÿa l-latac. Qalaxayi nachi 'en'am qaishiueetac qataq qaiuaxaatac somayi, qataq sa ishit da huo'o ca qoÿami'. 12So 'aco' qaltaq ÿi'iguelaxalec da namaq so lÿa l-latac, qalaxayi som 'onataxanaxaicpi nataq'en ique'emaqchit somayi qataq i'odauec.
13Nachi som lalamaxat se'eso 'alhua nachi 'enapeco': “Qaq nagui ¿chaq huá'ago' ca shiitec? Nagui aÿim samaq ñim ÿauotaxat ÿalec, yaqto' qom qaila'a, qaq ÿoqta qome da qailo'oguet.” 14Qalaxayi som 'onataxanaxaicpi co'ollaq qaila'aguet somayi, nachi detaxaÿapega't, 'eeta': “'Ena qome na talec qanqoÿin de'eda nsallaxa. Salauataq nagui namayi, yaqto' qomi' ishit qome da qadalamaxat damayi.” 15Nachi qanqateeguesop somayi se'eso nanaxanqa'. Ime, nachi qaÿalauat.
Nachi so Jesús denataxan, 'eeta':
–Qaq ¿chaq huá'ague ca 'eetec se'eso lalamaxat so 'alhua? 16Qomyi anac somayi, nachi ÿalauat se'eso 'onataxanaxaicpi. Ime, nachi ÿami' so laÿipi 'onataxanaxaicpi som 'alhua.
Qaq co'ollaq qai'aqchigui de'eda, nachi qoÿiita':
–¡Me ishito' da 'eetec de'eda ñi Dios!
17Qalaxayi so Jesús ÿamataigui somayipi, nachi 'eeta':
–Qaq ¿huá'ago' ca 'eetec naua ñiyigui'shi l'aqtaqa ñi Dios? Mayi 'eeta':
Ca coma' mayi i'otan co'olloxochiyi nam noÿic l'opi,
nachica nagui ca qadamchiguiñi naq'en cam noÿic.
18Qaq da huo'o ca camachaqca talec se'eso coma', nachi camayi dolagui; qaq se'eso coma' da huo'o ca talec, nachi camayi ÿataqta ilaxatchigui.
Qainataxaatapeguec da nshiitenaguec ca nta'a da qaishiiten
(Mateo 21.45-46; 22.15-22; Marcos 12.12-17)
19Nachi so lataxala'pi nam ntaxaÿaxanaxanecpi da qaitaxaÿapegue' ñi Dios qataq so dapaxaguenataxaatapeguec na nqataxacpi, somayipi nshitaique da nachi ÿaconeu'a se'eso na'a'q so Jesús, cha'ayi ÿaÿaten da nachiso somayipi ÿalamaqchigui de'eda qaÿaloqnaxaatega. Qalaxayi qañi'itega som shiÿaxauapi. 20Nachi qaÿauo'o so qanamaxai'pi chochi npi'itaxanaxanec. Somayipi chochi n'enaqchin da 'eetega no'on shiÿaxauapi, da yaqto' isomaxanaqchi't naua l'aqtaqa somayi, nachi ishit da huo'o ca qaÿachigoxotchigui ca lasouaxashit, nachi qoÿaneu'a so nta'a. 21Qaq ÿoqo'oyi somayipi ÿauo'o da nnataxanaxac, 'eeta':
–'Am mayi 'auapaxaguenataxaatac, qomi' saÿajnaq da ca qonapec qataq nam 'adapaxaguenataxanaxaco ÿataqta ÿaÿamaqchiyiñi, qataq sa ishit da chochi 'aulotagui ca shiÿaxaua da 'anmit da 'auauo'o ca lasouaxashit. Chaqdata da 'am 'auapaxaguenataxaatapeguec ca ÿoqta 'eesa nqa'aic ñi Dios. 22Qaq qomi' 'au'aqtaxanema qome: ¿peta'a ÿaÿamaqchiguiñi da qaishiiten ñim nta'a mayi ilo'ogue nam nta'alpi, loqo' chaq sa ishit?
23Qalaxayi so Jesús ÿauattooteguet da qauem lhuennataxac somayipi, nachi 'eeta':
–¿Tá'ainco' yi chochi aÿim qauayiñiitac? 24'Ego', ñaq aÿim qauachaxañiÿa acam lcatole. ¿Négue't lashic ñim huetalec? qataq ¿négue't l'enaxat yim huetalec?
Nachi somayipi 'enapeco':
–Qomyi nachiñi ñim ilotague' nam nta'alpi.
25Nachi somayi 'enapeco':
–Qai'añiim ñim ilotague' nam nta'alpi cam maichi lalamaxat, nataq'en qai'añiim ñim Dios ca maichi lalamaxat.
26Nachi sa ishit da huo'o ca qaÿachigoxotchigui lasouaxashit qanqoÿin dam 'enapec co'ollaq datataigui so shiÿaxauapi. Chaqdata da ÿataqta huo'o da l'aalaxa somayipi dam 'enapec so Jesús. Huaña, nachi ÿi'imaqtom.
Qainataxaatapeguec ca 'eetec da qaltaq nca'aleec ca shiÿaxaua
(Mateo 22.23-33; Marcos 12.18-27)
27Qaq co'ollaq ime, nachi qaltaq anac nam ÿalectaigui nam saduceopi da qanqo'oneu'a so Jesús. Namayipi 'enapec yi sa ishit da qaltaq nca'aleec na leuaxaicpi. Nachi qoÿiitega so Jesús, qoÿiita':
28–'Am mayi 'auapaxaguenataxaatac, so Moisés qomi' n'onaxataiguilo naua lqataxaco, 'eeta': Ca shiÿaxaua da huo'otaq ileu, nachi n'oichigui aca lhua da huo'otaq qaica ca llalec, nachi cam lqaÿa ishit da qaltaq huadonguet asom lli'oxoua da yaqto' huo'o ca llalec naq'en som lqaÿa mayi saqca. 29Qaq cha'ayi huo'oi soua siete nqaÿa't. Som ÿi l'auaxanec da huadon, qalaxayi somayi ileu, qaq qaica ca llalaqpi. 30Nachi som lqaÿa nachi huadonguet asom lli'oxoua, qaq somayi nataq'en ileu, qaq sa ishit da huo'o ca llalaqpi. 31Qataq jec so lÿa qaltaq huadonguet asom lli'oxoua, qaq nachi jec 'enauac som nqaÿañicpi. Qalaxayi 'enauac som siete nqaÿañicpi ileu, qaq qaica ca ishit da huo'o ca llalaqpi. 32Qaq pa'ateec nachi nataq'en aso 'alo ileu. 33Nachi da qaltaq ivita da qanca'alaxateec na leuaxaicpi, qaq ¿chaq négue't cam ÿoqta 'eesa da lhua asomayi?, cha'ayi 'enauac som siete nqaÿañicpi huadonguet asomayi.
34Nachi so Jesús 'enapeco':
–Ne'ena 'alhua mayi souaqta'a na shiÿaxauapi qataq nam 'alpi ishit da huadona't. 35Qalaxayi cam tachigui qominchiyi da inoxoneu'a cam lÿa 'alhua qom mashi qanca'alaxateec nam leuaxaicpi, que'eca 'alhua, huaña, nachi sa ishit da huo'o ca huadon, qataq sa ishit da huo'o ca ÿadonaxanaxan aca llale. 36Cha'ayi huaña, qaq sa ishit da huo'o ca ileu. Cha'ayi namayipi 'eeta'am nam piguem l'ec lamaxashicpi ñi Dios. Cha'ayi mashi qaltaq qanca'alaxateec, nachi namayipi ÿataqta llalaqpi ñi Dios. 37So Moisés nataq'en i'axat da ishit da qaltaq nca'aleec na leuaxaicpi da n'aqtaguec co'ollaq hueta'a aso qo'ipaq lapole mayi 'ettaigui, qalaxayi sa ishit da ÿoqta ÿavic. Huaña, nachi ñi qadataxala' 'eeta': “Aÿim mayi nachaÿim nDios so Abraham, Isaac, qataq so Jacob.” 38Qaq sa ishit da nDios ñimayi na leuaxaicpi, chaqnata nam nca'altaicpi, cha'ayi ñimayi 'enauac nca'altaic naq'en na shiÿaxauapi.
39Nachi huo'o som dapaxaguenataxaatapeguec na nqataxacpi 'eeta':
–'Am mayi 'auapaxaguenataxaatac, ÿataqta ÿaÿamaqchiguiñi da 'ad'aqtac.
40Huaña, nachi sa ishit da qaÿi'iguelaxalec da qaltaq qainat somayi.
¿Chaq négue't cam llalec cam nta'a mayi nca'alaxaqui?
(Mateo 22.41-46; Marcos 12.35-37)
41Nachi so Jesús 'enapeco':
–¿Chaq tá'ainecnaxa da qoÿiitega llalec so David cam nta'a mayi nca'alaxaqui? 42Yi som nta'a David 'enapec da l'aqtac mayi nanettañi anam lede mayi l'enaxat Salmos, 'eeta':
Ñi qadataxala' Dios 'enapega ñi ÿataxala', 'eeta':
“'Anso'oota'ague qome da aÿoic,
43to' qom mashi ime da sacho'oto naua 'adapia'te nam 'am ipa'agueetacpi.”
44Qaq ¿huá'ago' ca 'eetec so David da llalec cam nta'a mayi nca'alaxaqui, yi som David ÿamata'ac camayi da lataxala'?
So Jesús devitaqteetega nam dapaxaguenataxaatapeguec na nqataxacpi
(Mateo 23.1-36; Marcos 12.38-40; Lucas 11.37-54)
45Qaq 'enauac so shiÿaxauapi n'axaÿaxaatac, co'ollaq 'enapega so lapaxaguenatacpi so Jesús, 'eeta':
46–Maxatchoxo' qome, qadvichiÿa'a nam dapaxaguenataxaatapeguec na nqataxacpi. Cha'ayi namayipi nqopita da ÿaatrañi naua logodaiqa anogo mayi ÿi'oxoda'q, qataq nqopita da qaiyaata da qaiquin da huaña ca naponqa', qataq namayipi nmitta'ai anam so'onaxaqui mayi ÿataqta ÿi'oxodaq anam naponaxaquipi qataq nam ÿataqta no'on nqui'aqa'pi. 47Nataq'en namayipi ÿataqta iÿalaxat na huetañalo naua lma'te nam pa'aipi, nachi namayipi chochi nqañoxotoigui da i'ot da ÿataqta logodaic naq'en da nqouagaxaunaxac. Qaq ÿataqta ÿacteec qome da nhuaxanaguec namayipi.
Currently Selected:
Lucas 20: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
