Lucas 18
18
Qaÿaloqnaxana aso 'alo pa'ai qataq som nmit na nasouaxashit
1So Jesús huo'o da daloqnaxana co'ollaq huotaique da dapaxaguenataxanec da iuen ca shiÿaxaua da nachi 'eetai' da nqouagaxaueetac, sa ishit da nasamñi. 2Nachi 'enapeco':
–Huo'o so pueblo netaña som nmit na nasouaxashitpi. Somayi ÿataqta qaica ca 'enec naq'en ñi Dios qataq 'enauac nam shiÿaxauapi. 3Qaq se'eso pueblo nataq'en netaña aso 'alo pa'ai. Nachi asomayi ÿi'iguelaqtau'a se'eso shiÿaxaua, iÿaxaatacot da ña iuejlec asomayi souaxat so npa'aguenaxaua. 4Qalaxayi se'eso shiÿaxaua ÿataqta huo'oi soua na'axa'te da sa ishit da ilo'oguet asomayi. Qalaxayi co'ollaq qaÿoqtegue, nachi somayi deuennataxaatac, 'eeta': “Aÿim nai'ctoxo' da sa ishit da huo'o ca 'enec ñaq'en ñi Dios qataq 'enauac nam shiÿaxauapi, 5qalaxayi asom aso' pa'ai yi ÿapacteec da aÿim sa ÿalemaxat, qaq no'on da aÿim seuejlec asomayi, yaqto' ÿaxaañi da aÿim ñi'iguelaqtau'a. Ten, qom imateuo da iualaxavic.”
6Nachi so qadataxala' 'enapeco':
–Qaq 'eda da 'enapec som nmit na nasouaxashit mayi qauemaic. 7Qaq ñi Dios ¿peta'a saq 'eeteco' nataq'en de'eda, da iuejlec cam lca'aguishic mayi nachoxodeetacot ñimayi naua na'axa'tesa'chi qataq naua pe'? Qaq ¿peta'a huo'o ca ÿictega? 'A'i. 8Qaq aÿim shinapec da ÿataqta qaica ca ÿiga ñimayi da iuejlec ca shiÿaxaua. Qalaxayi ne'ena shiÿaxaua llalec qom ñi'iguelaq, qaq ¿peta'a ñaq huo'o qome nam i'amaqteetac namayi nam huetalec ana 'alhua?
Qaÿaloqnaxana so fariseo qataq som ÿacootapeeguet anam nshiitenaqte ca nta'a
9Qaq souaxat nam ipi'itaxaatega da no'on shiÿaxauapi qataq i'otan ca lÿa, nachi so Jesús qaltaq ÿauo'o da daloqnaxana, 'eeta':
10–Huo'oi soua dos shiÿaxa'u tadeu'a aso n'onaxanaxaqui late'edai da nqouagaxaue'n. Qaq so 'oonolec soomayi chigaqaigui na fariseopi, qaq so lÿa chigaqaigui nam ÿacootapeeguet ana lshiitenaxanaqte nam shiÿaxauapi da ishiiten ca nta'a. 11Nachi som chigaqaigui nam fariseopi nachattañi co'ollaq nqouagaxaueetac, 'eeta': “'Am ita'a Dios, 'am sanot da ñi'achic, cha'ayi aÿim sa ishit da shin'am ca camachaqca shiÿaxaua, mayi cachaxaic, qauemaic, qataq lauatapiguiñi' aca sa lhua. Qataq sa ishit da shiita'am de'eda ÿacootapeeguet ana nshiitenaqte ca nta'a. 12Aÿim dos da shi'iguelaxalec da ñoqouaqchijla't naua siete na'axa'te, qataq aÿim seÿotauga añi 'oonole nam diez mayi ñauectacpi da 'am sanot.” 13Qaq som ÿacootapeeguet ana nshiitenaqte ca nta'a, qalaq nachi qaÿata'a ca hueta'a, qataq sa ishit da ÿamato'ot na piguem. Chaqdata da iuaxaalec ana ltogue, nachi 'eeta': “¡'Am ita'a Dios, aÿim 'auchoxoden qome, cha'ayi aÿim huo'oi naua sasouaxa't!” 14Qaq aÿim shinapec da se'eso shiÿaxaua co'ollaq ÿi'iguelaxa ca lma', qalaq ÿataqta ÿaÿamaxadeeta ñi Dios, qaq sa ishit da 'eeta'am so fariseo. Cha'ayi ca maichi n'amaqten, qaq nachica cam qaica ca l'amaqchic qanqoÿin; qaq cam sa n'amaqten, qalaq nachica cam 'amaqtaq qanqoÿin.
So Jesús ÿanem da no'on lliquiaxac so ñaqpiolec
(Mateo 19.13-15; Marcos 10.13-16)
15Qaq nataq'en qanauegueu'a na ñaqpiolec so Jesús, da yaqto' somayi ishit da ÿashil-lec. Qalaxayi som lapaxaguenatacpi co'ollaq ÿauaachigui de'eda, nachi qanlaqtega nam nauegaqtaxaneuopi. 16Qalaxayi so Jesús damaxasoxoneuga somayipi, nachi 'enapego' so nallippi, 'eeta':
–Ña qauaqaÿa'a qome na ñaqpiolec ñaq aÿim nau'a, sa ishit da qananaxachiitac, cha'ayi ca huetaigui da l'onataxanaxac ñi Dios da ilo'ogue 'enauacna, camayi 'eeta'am ca 'oonolec namayipi. 17Cha'ayi aÿim shinapec da ca ÿaconguet da l'onataxanaxac ñi Dios da ilo'ogue 'enauacna, da huo'otaq sa ishit da 'eeta'am ca nogotolec, nachi camayi sa ishit da ÿañoxot da inoxoneuo.
So nsoq mayi sallaxanec detaqtapegue' so Jesús
(Mateo 19.16-30; Marcos 10.17-31)
18Nachi anac som 'oonolec nam nataxala'pi. Nachi inat so Jesús, 'eeta':
–'Am soxodaic mayi 'auapaxaguenataxaatac, ¿chaq huá'ague ca shiitec, da yaqto' aÿim taÿot ca nca'alaxa mayi chochaq tateec?
19Nachi so Jesús 'enapeco':
–¿Tá'ainco' yi qonetega da aÿim soxodaic? Yi qaica ca lÿa ñim soxodaic, 'oonolec Dios. 20'Am peta'a 'auaÿaten nam nqataxacpi mayi 'eeta': “Sa ishit da 'adauañi' aca sa 'adhua; sa ishit da 'aualaataxan; sa ishit da 'aucachi; qataq sa ishit da huo'o ca 'aucachiÿa'a da 'au'axat da saq 'en; 'aualaxalec ca 'adta'a qataq aca 'adate'e.”
21Nachi somayi 'enapeco':
–Aja', 'enauac namayipi ÿataqta salaxalec, chigoqchiguiña co'ollaq ñaq aÿim nogotolec.
22Nachi co'ollaq hua'aqchigui de'eda so Jesús, nachi 'eeta':
–Huo'o da 'oonolec ña daqaptauec, 'eeta': 'Aumen qome 'enauac na 'am hueto'ot, ime, qaq 'ai'anoigui nam choxodaqpi, yaqto' huo'o ca 'adsallaxa hua'ague da piguem. Qaq qom ime, nachi 'auanac, aÿim 'auca'ategue.
23Qalaxayi se'eso shiÿaxaua co'ollaq hua'axaÿa de'eda, nachi ÿataqta daquicota, cha'ayi somayi ÿataqta sallaxanec. 24Nachi so Jesús co'ollaq ila'a somayi da ÿataqta daquicota, nachi 'enapeco':
–¡Ÿataqta huo'o da lta'adaic lqalaic na sallaxanecpi da inoxoneu'a dam l'onataxanaxac ñi Dios da ilo'ogue 'enauacna! 25Ÿataqta huo'o da lqalaic aca shiguiÿac l'enaxat camello da taigui qanqoÿin ca qana lauac, qalaxayi ÿapacteec da lqalaic ca sallaxanec da inoxoneu'a da l'onataxanaxac ñi Dios da ilo'ogue 'enauacna.
26Nachi nam n'axaÿaxaatacpi 'eeta':
–Qaq ¿négue'to' cam ishit da qanca'alaxateec?
27Nachi so Jesús 'enapeco':
–Cam sa ishit da ÿañoxot na shiÿaxauapi, qalaxayi ñi Dios mayi ishit da i'ot.
28Nachi so Pedro 'enapeco':
–'Am qadataxala', qomi' mashi sogote da soqolqa'ai 'enauac nam qomi' hueto'oto, da yaqto' 'am seca'ataxague.
29Nachi so Jesús 'enapeco':
–Ÿataqta 'eesa de'eda qami' sa'axatema, da nagui ca ca'ai ca lma', huo'otaq caua lta'al, ca lqaÿañicpi, aca lhua, ca llalaqpi, souaxat da l'onataxanaxac ñi Dios da ilo'ogue 'enauacna, 30qaq camayi ÿapacteec qalota qome ca taÿot nagui ne'enaua souaqtaiguilo na'axa'te, nataq'en cam nca'alaxa mayi chochaq tateec cam ñaq natauo.
So Jesús qaltaq i'axata'a da l-leuaxa
(Mateo 20.17-19; Marcos 10.32-34)
31Nachi so Jesús iÿaxana so doce lapaxaguenatacpi da iÿotauga, nachi 'enapega, 'eeta':
–Nagui qomi' saxague da Jerusalén, nachi huaña qome yimayi da ipacchigui 'enauac dam n'aqtaguec na shiÿaxaua llalec dam ÿiyiñi co'olloxochiyi som l'aqtaxanaxanecpi ñi Dios. 32Qaq namayi qome qoÿanoigui nam chigaqauec shiÿaxauapi, da yaqto' i'enai', ishiueetac, qataq nqaigoqot. 33Qataq qaiuaxaatac qome. Qaq qom ime, nachi qaÿalauat. Qalaxayi qom mashi ivi' naua tres na'axa'te, nachi qaltaq nca'aleec.
34Qalaxayi somayipi sa ishit da ÿaÿajneguet de'eda. Sa ÿaÿaten negue'to'ca cam qoÿiitega. Cha'ayi dam qai'axattac sa ishit da nqat cam naigui.
So Jesús nauaañi naq'en so qanamaic huaña yi Jericó
(Mateo 20.29-34; Marcos 10.46-52)
35Qaq so Jesús co'ollaq mashi nayiitau'a yi la ciudad Jericó, nachi huo'o so qanamaic nso'ootañi, netau'a na laÿi so nqa'aic. Somayi dashilaxaatac. 36Qaq somayi co'ollaq hua'aqtague' so qalota shiÿaxauapi, nachi denataxaatac da chaq negue't cam huo'o. 37Nachi qai'aqtaxanem somayi da Jesús, Nazaret l'ec, som nlectelec yim hueta'a somayi. 38Nachi se'eso qanamaic deÿaxan, 'eeta':
–¡Jesús, mayi nachi'am llalec so nta'a David, aÿim 'auchoxoden!
39Nachi som hua'autapi nhuogoqtega somayi, da yaqto' de'enaxaatai', qalaxayi somayi qaltaq nquigaxatteec da lÿaxanaxac, 'eeta':
–¡'Am llalec so nta'a David, aÿim 'auchoxoden qome!
40Nachi so Jesús vi'iiguet, nachi damaxasoxona somayi da qanavigui'. Qaq co'ollaq mashi sa qaÿapeque somayi, nachi inat, 'eeta':
41–¿Négue't ca 'anshitaique da 'am so'otec?
Nachi somayi 'enapeco':
–'Am ÿataxala', qomyi ñishitaique da nauaayiñi naua i'ai'te.
42Nachi so Jesús 'enapeco':
–¡Nagui 'anauaañi! 'Am no'oita, cha'ayi 'au'amqajnataxan.
43Huaña, nachi se'eso qanamaic ishit da nauaañi, nachi ca'ategue so Jesús, ÿi'oxodeetac ñi Dios. Qataq 'enauac so shiÿaxauapi mayi ÿauaachigui de'eda, nataq'en somayipi ÿi'oxodeetac ñi Dios.
Currently Selected:
Lucas 18: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
