Lucas 15

Qaÿaloqnaxana asom qagueta mayi isomapec

(Mateo 18.10-14)

1Huaña, nachi anac da n'axaÿaxana so Jesús 'enauac nam 'itaxaloxoicpi qataq nam ÿacootapeeguet ana nshiitenaqte ca nta'a. 2Nachi nam ÿalectaigui na fariseopi qataq nam dapaxaguenataxaatapeguec na nqataxacpi nachi quetapeguelec somayi, 'eeta':

–De'eda shiÿaxaua qachi ÿaconguet na 'itaxaloxoicpi qataq lqui'axaua namayipi.

3Nachi so Jesús ÿauo'o so daloqnaxana, 'eeta':

4–Da huo'o ca 'oonolec da qoñiita da huo'o aca cien lalopi qagueta, qaq isomapec aca 'oonole acamayipi, qaq ¿peta'a sa ishito' da n'onaxatchigui aca noventa y nueve da n'onaxatalec ca n'onaxa, ime, qaq nmitaique aso isomapec, chochi ivitta'a da ÿanata? 5Qaq da huo'otaq mashi ÿanata, nachi ÿachilec na lallac, nachi ÿataqta machiguiñi. 6Qaq da ivideu'a ca lma', nachi lapona't ca nauochaxauapi qataq ca lauodeuapi. Nachi 'enapega, 'eeta': “Ÿataqta qantoñiitapigui' qome qoñiita'am aÿim, cha'ayi mashi sanata añi ilo qagueta mayi isomapec.” 7Qaq aÿim shinapec da nachi 'eetec nataq'en na hueto'ot na piguem ÿataqta huo'o qome ca lta'adaic ntonaxac, qom huo'otaq ÿaxaadeec naua n'onataxaco ca shiÿaxaua 'itaxaloxoic, qaq saq 'en'am cam noventa y nueve no'on shiÿaxauapi mayi sa iuen da ca'aisalo naua n'onataxaco.

Qaÿaloqnaxana asotai' lcatole mayi daqat

8Qataq aca 'alo da huo'otaq hueto'oto caua diez lca'chole da huo'otaq daqat aca 'oonole, qaq ¿peta'a sa ishito' da iqueteteu'a aca lcoÿadaxanaxaqui, ime, qaq ÿataqta huo'o da ltelaxa da iqueloc ca lma', chochi ivitta'a da ÿanata? 9Qaq qom mashi ÿanata, nachi lapona't aca nauochaxauapi qataq acam lauodeuapi. Nachi 'enapega, 'eeta': “Qantoñiitapigui' qome, qoñiita'am aÿim, cha'ayi mashi sanata ayi aÿom lÿa mayi daqat.” 10Qaq aÿim shinapec nataq'en da ÿataqta huo'o da ntonaxac nam Dios lamaxashicpi piguem l'ecpi, da huo'otaq ÿaxaadeec naua n'onataxaco ca shiÿaxaua 'itaxaloxoic.

Qaÿaloqnaxana so ñalec mayi ÿaqataqchit da lsallaxa

11So Jesús nataq'en 'enapeco':

–Huo'o so shiÿaxaua huo'oi soua dos llalqa. 12Nachi so n'asa soomayi 'enapega so lta'a, 'eeta': “'Am taxade, aÿim 'ai'anem qome dam isallaxa mayi 'auqataxaatapigui' da aÿim talec.” Nachi so lta'a icolaxachigui dam lsallaxa, nachi ÿanoiguilo. 13Qaq co'ollaq saxanaxa da qaÿa'aguelo soua na'axa'te, nachi som ñalec n'asa imen 'enauac som lalamaxat. Nachi aso lashiue ÿachi da nqo'ona so lÿa 'alhua, som huaña co'ollaq chochi ÿi'en aso alom, qataq taigui da qauem da lliquiaxac. 14Qaq co'ollaq mashi imateuo 'enauac aso alom, nachi anac so lta'adaic nqouaxa se'eso 'alhua. Huaña, nachi somayi ÿataqta huo'o na lqouaxa. 15Nachi jec da nmitaique ca l'onatac. Nachi nqo'ona so shiÿaxaua mayi lma' se'eso 'alhua. Nachi se'eso shiÿaxaua ÿamaxa somayi so n'alhua da ilo'ogue naq'en aso lalo cos late'epi. 16Nachi somayi ÿataqta huo'o da lyaxa da icomatec na amap mayi chictac ana cos late'epi, qalaxayi sa ishit da huo'o ca ÿanem ca amap. 17Huaña, nachi deuennataxaatac, 'eeta': “¡Ÿataqta 'enauac na l'onataxanaxanecpi ca ita'a chochaq huañi na aloq yi lma', qaq aÿim na soota'a ÿataqta aÿim ÿalauat na ÿoqouaxa! 18Aÿim shi'iguelaxa qome yi lma' ca ita'a. Ime, qaq shinapega qome, shiita': ‘'Am taxade, aÿim huo'o da ÿasouaxashit hueto'ot ñi Dios qataq'en 'am.’ 19Qaq ÿoqo'oyi saq saiguet nagui da 'auamata'ac da aÿim 'ai'alec, qaq no'on qome da 'au'enaxatteguet aÿim ca 'oonolec nam 'ad'onataxanaxanecpi.” 20Huaña, nachi jec, ÿi'iguelaxa yi lma' so lta'a.

Qaq co'ollaq ña qaÿata'aguet, nachi so lta'a ÿauaateguet somayi. Nachi ÿataqta huo'o da lchoxonnataxanaxa. Nachi nqalgoqta'aguet. Qaq co'ollaq ivideguet, nachi nqapale' qataq napigoq. 21Nachi som llalec 'enapeco': “'Am taxade, aÿim huo'o da ÿasouaxashit huo'ot ñi Dios qataq'en 'am. Qaq ÿoqo'oyi saq saiguet nagui da 'auamata'ac da aÿim 'ai'alec.” 22Qalaxayi so lta'a 'enapega so l-latacpi, 'eeta': “Sa qauaÿaloxoñi qome da qanqachiideec caua no'on anogo. Ime, qaq qan'otaxanaxañi qataq qai'añiim nataq'en aca chiguishaqte qataq caua lapela'te. 23Ime, qaq qanaviquiiuo ca ÿataqta chaxadaic huaca llalec, nachi qaualauachi. Ime, qaq ¡sequi'aq, so'otaq ca qad'ashaxac! 24Cha'ayi de'eda ÿalcolec damayi mashi saqca, qalaxayi qaltaq nca'aleec. Damayi daqat, qalaxayi mashi sanataxa.” Nachi qai'ot se'eso n'ashaxac.

25Qaq ñaq huetauga na n'onaxa so ÿi llalec, qaq co'ollaq mashi ñi'iguelaxauo, nachi mashi nayiitau'a so lma', nachi hua'axaÿapegueu'a aso nviquepi qataq so dasottega'tpi. 26Nachi iÿaxana so 'oonolec som nsoxotpi, nachi inattac da chaq negue't ca huo'o mshi qai'ottac de'eda. 27Nachi som nsoq 'enapeco': “Qomyi 'adqaÿa da nvi', ÿoqo'oyi ñi 'adta'a damaxasoxoolec da qaÿalauat som ÿataqta chaxadaic huaca llalec, cha'ayi ñimayi nvi', qataq saqca ca da.” 28Qalaxayi som lqaÿa ÿi dalemata, nachi sa ishit da pa'auo. Qaq ÿoqo'oyi so lta'a nachi nqo'oneuga, nachoxodeetacot da pa'auo. 29Nachi 'eetega so lta'a, 'eeta': “'Am 'auaÿateeta da mashi qalote' naua vi'iyi da 'am so'onataxaatacot, qataq sa ÿauango' da huo'otaq 'am sa salaxaguet. Qalaq sa ÿauango' da huo'otaq chochi 'oonolec ca aÿim 'ai'ami' quetaq llalec da yaqto' so'ot ca iqui'axac, da yaqto' ñiuana'ai' na ñauochaxauapi. 30Qaq nagui da nvi' da 'ai'alec mayi chochi ÿaqataqchit aso 'om souaxat ana quishiguetaxai, nachi 'aualaataxanem, 'aualauat so huaca llalec mayi chaxadaic.” 31Nachi so lta'a 'enapeco': “'Am ÿalcolec, 'am nachi 'eetai' da aÿim qoneto'ot. Qaq ÿoqo'oyi 'enauac nam aÿim hueto'ot 'enauac 'adalamaxat. 32Qalaxayi nagui no'on da so'otaq ca qadqui'axac da ñitonaqpigui'. Cha'ayi ñi 'adqaÿa, ñimayi mashi saqca, qalaxayi qaltaq nca'aleec; ñimayi daqat, qalaxayi mashi sanataxa.”

Currently Selected:

Lucas 15: TBSNT

Highlight

Copy